IVYO TINGACHITA APO MITENGO YA VINTHU YIKUKWERA

Muŵe na Chigomezgo

Kasi vinthu mu charu chinu vikukwera chomene mtengo, kweni imwe mukusanga ndalama zichoko? Kasi mukufipa mtima umo mujipwelelerenge kweniso umo mupwelelerenge ŵamumbumba yinu? Para ndimo viliri kwa imwe, mungamba kufipa mtima umo vinthu viŵirenge munthazi. Nanga vingaŵa kuti vinthu vili makora yayi pa umoyo winu, kweni kuŵa na chigomezgo kungamovwirani chomene.

CHIFUKWA WULI KUŴA NA CHIGOMEZGO NKHWAKUZIRWA?

Ŵanthu awo ŵali na chigomezgo ŵakukhumba waka kuti vinthu viwemi vichitike yayi. Chigomezgo chikuŵawovwira kuchitapo kanthu na kuchita vyose ivyo ŵangafiska kuti vinthu viŵeko makora. Mwachiyelezgero, kafukufuku munyake wakulongora kuti ŵanthu awo ŵali na chigomezgo . . .

kanandi ŵakuzizipizga makora masuzgo
vikuŵasuzga yayi kusintha para vinthu vyasintha pa umoyo wawo
ŵakusankha makora vinthu, ivyo vikuŵawovwira kuti ŵawe na umoyo uwemi, kweniso vinthu vikuŵayendera makora

IVYO MUNGACHITA

Chakwamba, wonani umo Baibolo lingamovwilirani imwe pasono. Baibolo lili na masachizgo ghawemi chomene agho ghangamovwirani kuzizipizga, apo mitengo ya vinthu yikukwera. Masachizgo agha ngamoza mwa vinthu ivyo vingamovwirani kumanya kuti pali vinyake ivyo mungachita, kuti vinthu viŵeko makora, kweniso ghangamovwirani kunozgekera masuzgo agho mungakumana nagho munthazi.

“Mahara ghakusungilirenge; kupulikiska vinthu kukuvikilirenge.”—Zintharika 2:11, New Century Version.

Chachiŵiri, wonani ivyo Baibolo likuyowoya vyakukhwaskana na munthazi. Para mwamanya kuzirwa kwa vinjeru ivyo vikusangika mu Baibolo, mukhumbisiskenge kusambira vinandi ivyo likuyowoya vyakukhwaskana na munthazi. Mwachiyelezgero, mumanyenge kuti Chiuta wakumukhumbirani waka “munthazi muwemi na chigomezgo” yayi, kweni wamupaniso chifukwa chakuŵira na chigomezgo. (Yeremiya 29:11) Chifukwa ichi ni Ufumu wa Chiuta.

KASI UFUMU WA CHIUTA NI VICHI NDIPO UZAMUCHITACHI?

Ufumu wa Chiuta ni boma ilo lizamuwusa pa charu chose chapasi. (Daniyeli 2:44; Mateyu 6:10) Uzamuwusa kufuma kuchanya, ndipo uzamumazga kusuzgika na ukavu. Ntheura waliyose wazamukhala mwamtende kweniso wazamuŵa na chilichose icho chikukhumbikwa kuti waŵe wakukondwa, nga umo malemba ghakulondezgapo agha ghakulongolera.

“Muŵenge ŵakukondwa, kusangwa na vinthu vinandi.”—Salimo 128:2.

“Ŵazamuphyoka [awo ŵazamuwusika na Ufumu] pawaka chara.”—Yesaya 65:23.

“Muzamuŵa vyakurya vinandi mu charu.”—Salimo 72:16.

Ŵanthu mamiliyoni ghanandi ŵakugomezga malayizgo agha, ndipo ŵakukhorwa kuti Chiuta “wakuteta yayi.” (Tito 1:2) Ntheura pamwekha mukwenera kuŵerenga Baibolo kuti musange maukaboni. Chigomezgo icho mungasanga para mukuŵerenga Baibolo, chingamovwirani kuzizipizga masuzgo gha vyachuma kweniso kuti muŵe na chigomezgo chakuti kunthazi vinthu vizamuŵa makora.