Ulongozgi wa Ungano wa Uteŵeti na Umoyo Wachikhristu — LAYIBULARE YA PA INTANETI ya Watchtower

1. Ulongozgi wa mu fomu iyi uwovwirenge wose awo ŵakuyowoya nkhani pa Ungano wa Uteŵeti na Umoyo Wachikhristu. Waliyose uyo wapika nkhani, pakunozgekera wakwenera kuwona ulongozgi wa nkhani yake mu Kabuku ka Uteŵeti na Umoyo Wachikhristu. Ŵapharazgi wose ŵakwenera kuchiskika kuti ŵalembeske mwakuti ŵapikenge nkhani za ŵasambiri. Ŵanyake awo ŵakuwungana na mpingo nawo ŵangapika nkhani za ŵasambiri usange ŵakukolerana na kulondezga ivyo Baibolo likusambizga. Mulaŵiliri wa Ungano wa Uteŵeti na Umoyo Wachikhristu wakwenera kudumbiskana ivyo vikukhumbikwa na waliyose uyo ni mupharazgi yayi, uyo wakukhumba kulembeska kuti wapikenge nkhani za ŵasambiri. Para wamara kudumbiskana nayo wamuphalire usange ngwakwenelera. Pakudumbiskana, uyo wakumusambizga Baibolo nayo wakwenera kuŵapo (panji mupapi wake usange ni Kaboni wa Yehova). Ivyo vikukhumbikwa vikuyana waka na ivyo vikukhumbikwa kuti munthu waŵe mupharazgi wambura kubatizika.—od mutu 8, ndime 8.

MAZGU GHAKWAMBA

2. Miniti yimoza. Sabata yiliyose, pamanyuma pa sumu na lurombo, cheyamani wa Ungano wa Uteŵeti na Umoyo Wachikhristu, wayowoyenge mwakudumura ivyo tisambirenge. Cheyamani wakwenera kuyowoya fundo izo zingawovwira chomene mpingo.

MAZGU GHA CHIUTA MBUSAMBAZI

3. Nkhani: Maminiti 10. Nkhani iyi yikuŵa mu Kabuku ka Uteŵeti na Umoyo Wachikhristu ndipo yikuŵa na mutu uwo ukuŵa na fundo ziŵiri panji zitatu. Nkhani iyi yikwenera kuyowoyeka na mulara panji muteŵeti wakovwira wakwenelera. Para tamba kusambira buku linyake mu Baibolo, tizamuwoneleranga vidiyo iyo yikulongosora buku ilo. Uyo wakuyowoya nkhani iyi, wakwenera kulongosora kukolerana kwa vidiyo na mutu wa nkhani. Kweni wakwenera kuwoneseska kuti wayowoya fundo izo zalembeka mu kabuku ka maungano. Wakweneraso kulongosora vithuzi ivyo vili mu nkhani yake kuti wadidimizge fundo zikuru. Kweniso wangagwiliskira ntchito malifarensi ghanyake chikuru ghawovwirenge kuti fundo za mu nkhani yake zipulikikwe makora.

4. Ivyo Tasambira: Maminiti 10. Nkhani iyi nja mafumbo na mazgoro kwambura kuyowoyapo mazgu ghakwamba panji ghaumaliro. Yikwenera kuyowoyeka na mulara panji muteŵeti wakovwira wakwenelera. Uyo wapika wakwenera kufumba mafumbo ghose ghaŵiri. Kweniso, wangasankha kuŵerenga mavesi ghose agho ghaŵikikapo panji yayi. Waliyose uyo wakuzgorapo wakwenera kuyowoya fundo yake mu masekondi 30 panji kuchepera apa.

5. Kuŵerenga Baibolo: Maminiti 4. Nkhani iyi yikwenera kupelekeka kwa mwanalume. Msambiri wakwenera kuŵerenga kwambura kuyowoyapo mazgu ghakwamba panji ghaumaliro. Cheyamani wa ungano wakwenera kuwona usange msambiri wakuŵerenga mwakupulikikwa makora, kwambura kugotagota, kupumulira pakwenelera, kukwezga panji kukhizga mazgu, kweniso kuŵerenga mwakawiro, na kumovwira apo wandachite makora. Pakuti mavesi ghanyake ghakuŵa ghanandi, mulaŵiliri wa Ungano wa Uteŵeti na Umoyo Wachikhristu wakwenera kughanaghanira luso lwa ŵasambiri para wakugaŵa nkhani iyi.

PHARAZGANI MWALUSO

6. Maminiti 15. Chigaŵa ichi chikovwira waliyose kuyezgelera umo wangapharazgira, ndiposo kusazgirako luso lwa kudumbiskana na ŵanthu kweniso kupharazga na kusambizga. Ŵalara nawo ŵangapika nkhani za ŵasambiri za mu chigaŵa ichi. Msambiri waliyose wakwenera kugwilirapo ntchito pa sambiro la mu kabuku ka Kusambizga panji burosha la Temwani Ŵanthu ilo lalongoreka mu maburaketi ya nkhani yake mu Kabuku ka Uteŵeti na Umoyo Wachikhristu. Usange pa chigaŵa ichi pali nkhani yakudumbiskana, nkhani iyo yikwenera kupelekeka kwa mulara panji muteŵeti wakovwira.—Umo mungachitira na nkhani yakudumbiskana, Wonani ndime 15.

7. Kwamba Kuyowoya na Ŵanthu: Nkhani iyi yingapelekeka kwa mwanalume panji mwanakazi. Usange yapelekeka kwa mwanalume uyo wamovwirenge waŵeso mwanalume, usange ni mwanakazi uyo wamovwirenge waŵe mwanakazi, panji waŵe wa mu banja la uyo wapika nkhani. Mweneko wa nkhani na uyo wakumovwira ŵangasankha kukhala pa mpando panji kwimilira.—Kuti mumanye vya chidumbirano na umo mungachitira, wonani ndime 12 na 13.

8. Kuwelerako: Nkhani iyi yingapelekeka kwa mwanalume panji mwanakazi. Usange yapelekeka kwa mwanalume, uyo wamovwirenge waŵeso mwanalume ndipo para yapelekeka kwa mwanakazi, uyo wamovwirenge waŵe mwanakazi. (km-CN 5/97 peji 2) Mweneko wa nkhani na uyo wakumovwira ŵangakhala pa mpando panji kwimilira. Msambiri walongore ivyo tingayowoya para tawelerako kwa munthu uyo tikamupharazgirapo kale. —Kuti mumanye vya chidumbirano na umo mungachitira, wonani ndime 12 na 13.

9. Kuzgora Ŵanthu Kuŵa Ŵasambiri: Nkhani iyi yingapelekeka kwa mwanalume panji mwanakazi. Usange yapelekeka kwa mwanalume, uyo wamovwirenge waŵeso mwanalume ndipo para yapelekeka kwa mwanakazi, uyo wamovwirenge waŵe mwanakazi. (km-CN 5/97 peji 2) Mweneko wa nkhani na uyo wakumovwira ŵangakhala pa mpando panji kwimilira. Para msambiri nkhani yake yilongorenge kuti sambiro lili kale mukati, wakwenera yayi kuyowoya mazgu ghakwamba panji ghaumaliro, pekha usange sambiro ilo wakugwilirapo ntchito ndivyo likukhumba. Ntchakwenelera viŵi yayi kuŵerenga mwakukwezga ndime zose, nangauli nyengo zinyake wangachita nthena.

10. Kulongosora Vigomezgo Vinu: Usange yalongoreka kuti ni nkhani, yikwenera kupelekeka kwa mwanalume. Usange yalongoreka kuti ntchiyezgelero, yingapelekeka kwa mwanalume panji mwanakazi. Usange yapelekeka kwa mwanalume, uyo wamovwirenge waŵeso mwanalume ndipo para yapelekeka kwa mwanakazi, uyo wamovwirenge waŵe mwanakazi. Mweneko wa nkhani wakwenera kuzgora fumbo la nkhani iyo mwakupulikikwa makora kweniso mwaluso, ndipo wagwiliskire ntchito fundo izo zili mu lifarensi. Msambiri wangasankha kuzunura lifarensi panji yayi pa nyengo iyo wakuyowoya nkhani yake.

11. Nkhani: Nkhani iyi yikwenera kuyowoyeka na mwanalume ndipo wadumbe nga umo ŵabali ŵakuyowoyera nkhani pa mpingo. Usange fundo za mu nkhani zafuma mu vyakusazgirapo A mu burosha la Temwani Ŵanthu, msambiri wakwenera kulongora umo tingagwiliskira ntchito mavesi agho para tili mu uteŵeti. Mwachiyelezgero wangalongosora nyengo iyo tingagwiliskira ntchito vesi ilo, kweniso umo tingawovwilira nalo munthu. Usange nkhani yafuma mu sambiro la burosha la Temwani Ŵanthu, msambiri wakwenera kulongosora umo tingagwiliskira ntchito fundo iyo mu uteŵeti. Wangalongosora chiyelezgero icho chikusangika mu fundo 1 pa sambiro ilo panji wangalongosora fundo yiliyose ya mavesi agho ghali pa chigaŵa cha wonaniso mu sambiro ilo, usange mphakwenelera.

12. Chidumbirano: Fundo za mu ndime iyi na yakulondezgapo, ni zakovwira awo ŵapika nkhani ya “Kwamba Kuyowoya na Ŵanthu” na ya “Kuwelerako.” Pekha usange papelekeka ulongozgi unyake, msambiri wakwenera kuŵa na chilato cha kupharazgira munthu fundo za mu Baibolo munthowa yipusu mwakuyana na mikhaliro ya munthu uyo, kweniso wawoneseske kuti uyo wakumupharazgira wamulekera fundo yakuzakadumbirana pa ulendo wakulondezgapo. Pakwamba kudumbirana na munthu, msambiri wangagwiliskira ntchito nkhani yakwenelera iyo yachitika mwasonosono mu chigaŵa chinu. Wangasankha kugaŵira buku panji kuwoneska vidiyo kufuma pa Ivyo Tikusambizgira Ŵanthu Baibolo. M’malo mwa kuchita kuyowoya chidumbirano chakusunga pa mtima, msambiri wakwenera kusambira maluso ghakudumbiskana na munthu, agho ghakusazgapo kunweka na munthu, kweniso kuyowoya mwakawiro.

13. Umo Mungachitira: Msambiri wakwenera kulongora chiyelezgero cha upharazgi mwakukolerana na ŵanthu ŵa mu chigaŵa chinu. Mwachiyelezgero:

(1) Ku Nyumba na Nyumba: Upharazgi uwu ukuŵa wa ku nyumba na nyumba—ndipo ukuchitika mwakudumbiskana na munthu maso na maso, kumuyimbira foni, panji kumulembera kalata—ndimoso tikuchitira pa kuwelerako kwa munthu uyo tikamusanga apo tikapharazganga ku nyumba na nyumba.

(2) Kupharazga Mwamwaŵi: Upharazgi uwu ukuchitika pa nyengo iyo tikudumbiskana na ŵanthu nkhani yinyake ndipo pajulika m’pata wakupharazgira. Mungaŵaphalirako fundo ya mu Baibolo ŵanthu awo mukukumana nawo ku ntchito, ku sukulu, uko mukukhala, awo mwakwera nawo basi panji galimoto, panji kulikose uko mukukumana na ŵanthu.

(3) Kupharazga ku Malo Uko Kukusangika Ŵanthu Ŵanandi: Upharazgi uwu ukusazgapo kugwiliskira ntchito mashelufu ghamatayara, kupharazga ku malo gha bizinesi, kupharazga mu misewu, malo agho ŵanthu ŵakuchezgera, malo ghakwimikako magalimoto, panji kulikose uko kungasangika ŵanthu.

14. Kugwiliskira Ntchito Mavidiyo na Mabuku: Mwakuyana na umo vinthu viliri, msambiri wangasankha kugwiliskira ntchito vidiyo panji buku. Usange nkhani yili na vidiyo panji msambiri wasankha kugwiliskira ntchito vidiyo, wakwenera yayi kuwoneska vidiyo, kweni wayowoye waka kuti ŵawonelerenge vidiyo ndipo wadumbiskane na munthu uyo wakumupharazgira fundo za mu vidiyo iyo.

UMOYO WACHIKHRISTU

15. Para timba sumu, pa maminiti 15 pa chigaŵa ichi pakuŵa nkhani yimoza panji ziŵiri izo zikulongosora umo tingalondezgera fundo za mu Baibolo. Ŵalara panji ŵateŵeti ŵakovwira ŵakwenelera ndiwo ŵakwenera kupika nkhani izi. Kweni usange pali nkhani ya ivyo vikukhumbikwa pa mpingo, mulara pera ndiyo wakwenera kuyowoya. Para nkhani njakudumbiskana, mubali uyo wapika nkhani wangafumba mafumbo ghakusazgirapo. Mazgu ghake ghakwamba ghakwenera kuŵa ghafupi, mwakuti fundo zikuru izo zili mu nkhani iyo zilongosoreke makora kweniso kuti ŵategherezgi ŵazgorepo mwakukwana. Usange nkhani yili na chigaŵa cha kufumba munthu, uyo wafumbikenge para ntchamachitiko ntchiwemi kuti walute ku pulatifomu m’malo mwakuzgolera apo wakhala.

16. Sambiro la Baibolo la Mpingo: Maminiti 30. Mulara uyo wakusambizga makora ndiyo wakwenera kulongozga sambiro ili. (Mipingo iyo yili na ŵalara ŵakuchepa, ŵateŵeti ŵakovwira ŵakwenelera ŵangalongozga sambiro ili.) Wupu wa ŵalara ukwenera kusankha ŵabali awo mbakwenelera kulongozga Sambiro la Baibolo la Mpingo. Awo ŵasankhika ŵakwenera kusunga nyengo, kuwoneseska kuti malemba agho ghali na fundo zikuru za nkhani iyo ghalongosoleka makora, kweniso kuti waliyose wawone kuzirwa kwa fundo izo tasambira. Awo ŵakulongozga ŵangachita makora kuwona ulongozgi wa Sambiro la Gongwe la Mulinda mwakuti ŵamanye fundo zakovwira pakulongozga sambiro ili. (w23.04 peji 24, bokosi) Para fundo zose zalongosoreka makora, sambiro likwenera kumalira penepapo. Usange ntchamachitiko, ŵabali awo ŵakulongozga Sambiro la Baibolo la Mpingo ndiposo awo ŵakuŵerenga ndime ŵasinthanenge sabata yiliyose. Usange cheyamani wa Ungano wa Uteŵeti na Umoyo Wachikhristu wayowoya kuti sambiro liŵe lakudumura, mubali uyo wachitiskenge sambiro wamanye yekha umo wangachitira. Wangasankha kuti ndime zinyake zileke kuŵerengeka.

MAZGU GHAUMALIRO

17. Maminiti 3. Cheyamani wa Ungano wa Uteŵeti na Umoyo Wachikhristu waweleremo fundo zikuru izo tasambira. Para nyengo yichalipo, wangapempha ŵategherezgi kuti ŵayowoyepo fundo izo ŵakuwona kuti ni zakovwira. Wayowoye fundo izo tizamusambira sabata yikwiza. Para nyengo yilipo, wazunure mazina gha ŵasambiri awo ŵazamuyowoya nkhani sabata yikwiza. Usange palije ulongozgi uliwose, cheyamani wayowoye vipharazgo ivyo ni vyakwenelera panji makalata agho ghakukhumbikwira kuŵerengeka. Vipharazgo vya nyengo zose, nga ni ndondomeko ya uteŵeti wa m’munda, kuphyera na kukolopa, vingapharazgikanga pa maungano yayi, vikwenera kuŵikika pa bolodi la chimanyisko. Usange vipharazgo ni vinandi, panji kalata njitali mwakuti wangafiska yayi mu mazgu ghaumaliro, cheyamani wapemphe ŵabali awo ŵali na nkhani pa chigaŵa cha Umoyo Wachikhristu kuti ŵachepeskeko nyengo ya nkhani zawo. (Wonani ndime 16 na 19.) Paumaliro wa Ungano paŵe sumu na lurombo.

KUWONGA NA KUPELEKA ULONGOZGI

18. Para msambiri wamara kuyowoya nkhani yake, cheyamani wa Ungano wa Uteŵeti na Umoyo Wachikhristu, kwa miniti yimoza wawonge ndiposo kupeleka ulongozgi kwa msambiri mwakukolerana na fundo iyo msambiri wagwilirangapo ntchito. Para cheyamani wakuchema msambiri kuti wayowoye nkhani yake, wangazunuranga yayi sambiro ilo wakugwilirapo ntchito. Kweni para msambiri wamara kuyowoya nkhani yake, pakumuwonga cheyamani wangazunura sambiro ilo wagwilirangapo ntchito na kuyowoya icho msambiri wachita makora pa sambiro ilo, panji mwachitemwa wayowoye chifukwa icho msambiri wakwenera kugwiliraposo ntchito pa sambiro ilo. Cheyamani wangayowoyapo pachoko waka umo msambiri wachitira chiyezgelero chake usange wakuwona kuti viwovwirenge msambiri panji ŵategherezgi. Kumphepete msambiri wangapika ulongozgi wakusazgirapo kufuma mu burosha la Temwani Ŵanthu, kabuku ka Kusambizga, panji buku la Sangani Chandulo para ungano wamara panji pa nyengo yinyake, kwali wakukhwaskana na sambiro ilo wagwilirangapo ntchito panyake sambiro linyake.—Wonani ndime 19, 24 na 25 kuti muwone ntchito ya cheyamani wa Ungano wa Uteŵeti na Umoyo Wachikhristu kweniso ya uyo wakupeleka ulongozgi wapadera.

NYENGO

19. Paŵavye nkhani iyo yikwenera kujumpha nyengo yake nesi mazgu ghaumaliro gha cheyamani wa Ungano wa Uteŵeti na Umoyo Wachikhristu. Nangauli Kabuku ka Uteŵeti na Umoyo Wachikhristu kakulongora nyengo ya nkhani yiliyose, palije chifukwa chakulutilizgira kuyowoya nkhani usange fundo zose zayowoyeka nangauli nyengo yichalipo. Usange munyake warya nyengo pakudumba nkhani yake, cheyamani wa Ungano wa Uteŵeti na Umoyo Wachikhristu panji mubali uyo wakupeleka ulongozgi wapadera wakumane nayo pamphepete na kumovwira. (Wonani ndime 24 na 25.) Ungano wose ukwenera kumara mu ora limoza na maminiti 45 kusazgapo sumu na malurombo.

PARA MULAŴILIRI WA DERA WAKUCHEZGERA MPINGO WINU

20. Para mulaŵiliri wa dera wakuchezgera mpingo winu, ungano ukwenera kuchitika mwakuyana na ndondomeko ya mu Kabuku ka Ungano wa Uteŵeti na Umoyo Wachikhristu, kweni pa chigaŵa cha Umoyo Wachikhristu paŵavyenge Sambiro la Baibolo la Mpingo m’malo mwake paŵenge nkhani ya uteŵeti ya maminiti 30 ya mulaŵiliri wa dera. Pambere nkhani ya mulaŵiliri wa dera yindambe, cheyamani wa Ungano wa Uteŵeti na Umoyo Wachikhristu waweleremo mwakudumura fundo zikuru izo tasambira, wayowoye ivyo tizamusambira sabata yikwiza, wayowoye vipharazgo ivyo ni vyakwenelera panji kuŵerenga makalata, ndipo paumaliro wazunure mutu wa nkhani ya mulaŵiliri wa dera na kumuchema. Para mulaŵiliri wa dera wamara kuyowoya nkhani yake, paŵenge sumu iyo wasankha. Wangapempha mubali munyake kuti wajale na lurombo. Pa nyengo iyo mulaŵiliri wa dera wakuchezgera mpingo pakuŵavya makilasi ghanyake gha ŵasambiri. Gulu la chiyowoyero chinyake lingachita maungano ghake nangauli mpingo uwo ukulaŵilira gulu lawo uli na sabata yapadera. Kweni para mulaŵiliri wa dera wamba kuyowoya nkhani ya uteŵeti, gulu ilo likwenera kwiza.

SABATA YA UNGANO WA DERA PANJI WA CHIGAŴA

21. Usange mpingo winu uli na ungano wa dera panji wa chigaŵa, mu sabata iyo kuchita maungano gha mpingo yayi. Waliyose wakwenera kukumbuskika kuti wakasambire payekha panji na mbumba yake nkhani za mu sabata iyo.

SABATA YA CHIKUMBUSKO

22. Usange Chikumbusko chichitikenge mukati mwa sabata, Ungano wa Uteŵeti na Umoyo Wachikhristu uzamuŵako yayi.

MULAŴILIRI WA UNGANO WA UTEŴETI NA UMOYO WACHIKHRISTU

23. Wupu wa ŵalara ndiwo ukusankha mulara kuti waŵe mulaŵiliri wa Ungano wa Uteŵeti na Umoyo Wachikhristu. Mubali uyu wakuwoneseska kuti ungano uwu ukuchitika mu ndondomeko yake mwakuyana na ulongozgi wa mu fomu iyi. Wakwenera kudumbiskana na mubali uyo wakupeleka ulongozgi wapadera. Para Kabuku ka Uteŵeti na Umoyo Wachikhristu kafika waka, mulaŵiliri wa Ungano wa Uteŵeti na Umoyo Wachikhristu wagaŵirethu nkhani zose za maungano gha mukati mwa sabata kwa myezi yiŵiri. Fundo iyi yikusazgapo kusankha awo ŵaŵenge macheyamani pa awo ŵali kuzomerezgeka na wupu wa ŵalara. (Wonani ndime 3-16 na 24.) Uyo wakugaŵa nkhani za ŵasambiri, wakwenera kughanaghanira vyaka vya munthu, luso lwake, kweniso usange wali na wanangwa wakuyowoya nkhani iyo. Fundo iyi yikugwiraso ntchito nanga mphakugaŵa nkhani izo ni za ŵasambiri yayi. Waliyose wakwenera kugaŵirika nkhani kuchali pafupifupi masabata ghatatu pambere lindafike zuŵa lakuyowoyera. Pakugaŵa nkhani za ŵasambiri gwiliskirani ntchito fomu Yakugaŵira Nkhani mu Ungano wa Uteŵeti na Umoyo Wachikhristu (S-89). Mulaŵiliri wa Ungano wa Uteŵeti na Umoyo Wachikhristu wakwenera kuwoneseska kuti ndondomeko yose ya maungano gha mukati mwa sabata yaŵikika pa bolodi la chimanyisko. Wupu wa ŵalara ungasankha mulara munyake panji muteŵeti wakovwira kuti wamovwirenge kugaŵa nkhani. Ndipouli ŵalara pera ndiwo ŵakwenera kugaŵa nkhani izo zikupika ku ŵasambiri yayi.

CHEYAMANI WA UNGANO WA UTEŴETI NA UMOYO WACHIKHRISTU

24. Sabata yiliyose mulara yumoza wakuŵa cheyamani wa Ungano wa Uteŵeti na Umoyo Wachikhristu. (Usange ŵalara mbakuchepa pa mpingo, wupu wa ŵalara ungasankha ŵateŵeti ŵakovwira ŵakwenelera.) Cheyamani wakwenera kunozgekera mazgu ghakwamba na ghaumaliro. Ndiyo wakuchema wose awo ŵayowoyenge nkhani mu ungano, ndipo usange pa mpingo pali ŵalara ŵakuchepa, nayo wangayowoya nkhani zinyake, chomene nkhani izo zikukhumba kuwoneska waka mavidiyo kwambura kudumbiskana na ŵategherezgi. Wakwenera kuyowoyapo vinandi yayi para munthu wamara kuyowoya nkhani yake. Wupu wa ŵalara ukwenera kusankha ŵalara ŵakwenelera kuti ŵaŵe macheyamani. Ŵalara ŵakwenelera ndiwo ŵakusinthana pa mulimo wa cheyamani. Kuyana na umo vinthu viliri pa mpingo, mulaŵiliri wa Ungano wa Uteŵeti na Umoyo Wachikhristu ndiyo kanandi wangaŵa cheyamani kuluska ŵalara ŵanyake. Usange mulara ngwakwenelera kulongozga Sambiro la Baibolo la Mpingo, wangaŵaso wakwenelera kuŵa cheyamani. Kuluwa yayi kuti mulara uyo ni cheyamani wakwenera kuwonga na kupeleka ulongozgi wachitemwa kwa msambiri waliyose uyo wayowoya nkhani. Ni udindo wa cheyamani kuwoneseska kuti ungano ukumara pa nyengo yake. (Wonani ndime 17 na 19.) Para cheyamani wakhumba, wangaŵika mayikirofoni ghanyake ku pulatifomu usange kuli malo ghakukwana kuti wayowoyerengepo, mwakuti uyo wayowoyenge nkhani wizenge mwakutendekera na kuŵa pa mayikirofoni iyo wayowoyerengepo nkhani. Kweniso, wangasankha kukhala pa mpando ku pulatifomu pa nyengo iyo msambiri wakuŵerenga Baibolo na pa chigaŵa cha Pharazgani Mwaluso. Kuchita nthena kungawovwira kusunga nyengo.

UYO WAKUPELEKA ULONGOZGI WAPADERA

25. Mubali uyu wapelekenge ulongozgi usange tchakwenelera, kwa mulara panji muteŵeti wakovwira waliyose uyo wayowoya nkhani mu Ungano wa Uteŵeti na Umoyo Wachikhristu, nkhani yachisanisani, kweniso uyo wakulongozga Sambiro la Gongwe la Mulinda panji Sambiro la Baibolo la Mpingo.—Wonani ndime 19.

MAKILASI GHANYAKE

26. Usange ŵasambiri mbanandi pa mpingo, mungapanga makilasi ghanyake. Kilasi lililose likwenera kuŵa na mubali uyo wakupeleka ulongozgi, chomene mulara. Para mphakwenelera, muteŵeti wakovwira wakwenelera wangalongozga kilasi la ŵasambiri. Wupu wa ŵalara ukwenera kusankha mubali uyo wangalongozga kilasi la ŵasambiri ndiposo usange ntchakwenelera kuti ŵasinthanenge. Mubali uyo wakupeleka ulongozgi wakwenera kulondezga ivyo vyalembeka mu ndime 18. Para muli na makilasi ghanyake, ŵasambiri ŵakwenera kuluta ku kilasi lawo para yamara nkhani ya Ivyo Tasambira. Ŵakwenera kuwerako para nkhani yaumaliro ya musambiri yamara.

MAVIDIYO

27. Pa ungano uwu paŵenge mavidiyo agho tiwonelerenge. Mavidiyo gha ungano wa mukati mwa sabata ghaŵikikenge pa JW Library^® ndipo tingapanga dawunilodi pakugwiliskira ntchito foni, tabuleti, panji kompyuta.

S-38-TB 9/25