NKHANI YAKUSAMBIRA 48
SUMU 129 Tilutilirenge Kuzizipizga
Buku la Yobu Lingamovwirani Para Mukusuzgika
“Enya nadi, Chiuta wangachita uheni chara.”—YOBU 34:12.
FUNDO YIKURU
Mu nkhani iyi, tiwonenge ivyo tingasambirako kufuma mu buku la Yobu pa nkhani ya chifukwa icho Chiuta wakuzomerezgera kusuzgika kweniso umo tingazizipizgira para tikusuzgika.
1-2. Chifukwa wuli ntchakuzirwa kuŵazga buku la Yobu?
KASI mwasonosono apa mwaŵazgapo buku la Yobu? Nangauli likalembeka vyaka 3,500 ivyo vyajumpha, kweni buku ili ndimoza mwa mabuku agho ghali kulembeka makora chomene. Ŵanthu ŵanandi ŵakulumba mulembi wa buku ili chifukwa lili na mazgu ghapusu, ghakukondweska na ghankhongono. Nangauli Mozesi ndiyo wakalemba buku ili, kweni Mweneko wa buku ili ni Yehova Chiuta.—2 Tim. 3:16.
2 Buku la Yobu ndakuzirwa chomene mu Baibolo. Chifukwa wuli? Chifukwa chimoza ntchakuti, likuvumbura makora chomene nkhani yakuzirwa iyo yikukhwaska ŵanthu na ŵangelo, iyo nkhutuŵiska zina la Yehova. Likutisambizgaso mikhaliro yiwemi chomene ya Yehova nga ntchitemwa, vinjeru, urunji, na nkhongono. Mwachiyelezgero, buku la Yobu likuzunura Yehova kuti “Wankhongonozose” maulendo 31, kujumpha mabuku ghanyake ghose gha mu Baibolo para tasazga pamoza. Buku la Yobu likuzgoraso mafumbo ghanandi chomene ghakukhwaskana na umoyo, kusazgapo na lakuti: Chifukwa wuli Chiuta wakuzomerezga kusuzgika?
3. Kasi ni vyandulo wuli vinyake ivyo tingasanga pakusambira buku la Yobu?
3 Nga umo vikuŵira kuti para munthu wakwera pachanya pa phiri wakuwona makora chomene chigaŵa icho chamuzingilira, buku la Yobu nalo lingatovwira kuwona masuzgo ghithu mwakwenelera, nga umo Yehova wakughawonera. Tiyeni tiwone umo buku la Yobu lingatovwilira para tikusuzgika. Tiwonenge umo Ŵaisrayeli ŵakatenge ŵasangirenge chandulo na nkhani ya Yobu kweniso umo ise tingasangira chandulo mazuŵa ghano. Tiwonengeso umo ise tingagwiliskira ntchito buku la Yobu pakovwira ŵanji.
CHIUTA WAKAZOMEREZGA KUTI YOBU WASUZGIKE
4. Kasi Yobu wakaŵa wakupambana wuli na Ŵaisrayeli awo ŵakaŵa ku Eguputo?
4 Panyengo iyo Ŵaisrayeli ŵakasuzgikanga nga ŵazga ku Eguputo, Yobu wakakhalanga mu charu cha Uzi, icho chikaŵa kumafumiro gha dazi gha Charu cha Layizgano cha kumpoto kwa Arabia. Mwakupambana na Ŵaisrayeli ŵanyake awo ŵakamba kusopa vikozgo ku Eguputo, Yobu wakateŵetera Yehova mwakugomezgeka. (Josh. 24:14; Ezek. 20:8) Yehova wakayowoya za Yobu kuti: “Palije munthu pa charu chapasi wakuŵa nga ndiyo.”a (Yobu 1:8) Yobu wakaŵa musambazi chomene ndipo wakachindikikanga chomene kuluska munthu waliyose ku chigaŵa icho wakakhalanga. (Yobu 1:3) Tikukayika yayi kuti Satana wakakwiya chomene kuwona mwanalume wakumanyikwa na musambazi uyu wakuteŵetera Yehova mwakugomezgeka.
5. Chifukwa wuli Yehova wakazomerezga kuti Yobu wasuzgike? (Yobu 1:20-22; 2:9, 10)
5 Satana wakayowoya kuti Yobu wangaleka kuteŵetera Yehova para wangasuzgika. (Yobu 1:7-11; 2:2-5) Nangauli Yehova wakamutemwanga chomene Yobu, kweni wakamuzomerezga Satana kuti walongore usange ivyo wakayowoya vyakukhwaskana na Yobu ni vyaunenesko panji yayi. (Yobu 1:12-19; 2:6-8) Satana wakapoka viŵeto vyose vya Yobu, wakakoma ŵana ŵake 10, kweniso wakamutimba na mapumba ghakuŵinya chomene kufuma ku mutu m’paka kusi ku malundi. Nangauli Yobu wakasuzgika chomene, kweni wakaleka yayi kuteŵetera Yehova mwakugomezgeka. (Ŵazgani Yobu 1:20-22; 2:9, 10.) Pati pajumpha nyengo, Yehova wakamuchizga Yobu, wakamupaso usambazi, na ŵana ŵanyakeso 10, ndipo ŵanthu ŵakambaso kumuchindika. Pamanyuma Yehova wakasazgirako umoyo wa Yobu na vyaka 140. Ntheura wakakhala umoyo utali ndipo wakawona ŵana ŵake na ŵazukuru ŵake ŵa muwiro wachinayi. (Yobu 42:10-13, 16) Kasi nkhani iyi yikatenge yiŵawovwirenge wuli ŵateŵeti ŵakale, ndipo ise yingatovwira wuli mazuŵa ghano?
6. Kasi nkhani ya Yobu yikatenge yiŵawovwirenge wuli Ŵaisrayeli? (Wonaniso chithuzi.)
6 Umo Ŵaisrayeli ŵakatenge ŵasangirenge chandulo. Ŵaisrayeli ŵakakhalanga umoyo upusu yayi ku Eguputo. Mwachiyelezgero, Joshuwa na Kalebi ŵakakhala unyamata wawo wose nga mbazga. Kweniso chifukwa cha kuleka kupulikira kwa Ŵaisrayeli ŵanyake, ŵakakhalaso vyaka 40 mu mapopa. Usange Ŵaisrayeli ŵakamanyanga ivyo vikachitikira Yobu kweniso vyakufumapo vyake, tikukayika yayi kuti vikaŵawovwira iwo kweniso miwiro yawo ya munthazi kumanya uyo wakambiskanga masuzgo. Kweniso ŵakatenge ŵapulikiskenge chifukwa icho Yehova wakuzomerezgera kuti ŵanthu ŵasuzgikenge ndiposo umo wakuŵazirwiskira awo ŵakuzizipizga na kulutilira kuŵa ŵakugomezgeka.
Ŵaisrayeli awo kwa nyengo yitali ŵakaŵa ŵazga ku Eguputo, ŵakatenge ŵasangenge chandulo na nkhani ya Yobu (Wonani ndime 6)
7-8. Kasi buku la Yobu lingawovwira wuli awo ŵakusangana na masuzgo? Yowoyani chiyelezgero.
7 Umo tingasangira chandulo. Chachitima ntchakuti mazuŵa ghano ŵanthu ŵanandi ŵaleka kugomezga Chiuta chifukwa ŵakupulikiska yayi chifukwa icho viheni vikuchitikira na ŵanthu ŵawemi wuwo. Ghanaghanirani chiyelezgero cha Hazelb wa ku Rwanda. Apo wakaŵa muchoko, wakagomezganga mwa Chiuta. Kweni pamanyuma vinthu vikasintha. Ŵapapi ŵake nthengwa yikamara, ndipo wakalereka na adada ŵake ŵamusangapo awo ŵakamuchitiranga nkhaza. Apo wakaŵa wachali muchoko munthu munyake wakamukolelera. Ndipo apo Hazel wakaluta ku tchalitchi lake kuti wakapembuzgike, pakaŵavya munthu uyo wakamupembuzga. Pamanyuma, Hazel wakalembera kalata Chiuta ya umo wakajipulikiranga. Mu kalata iyi wakalembamo kuti: “Chiuta, nkhalomba kwa imwe, nkhayezga kuchita viwemi, kweni imwe muli kuniwezgera viheni. Sono naleka kumusopani ndipo nichitenge ivyo vinganipangiska kuŵa wakukondwa.” Mitima yithu yikuŵinya chomene para tikuwona ŵanthu nga ni Hazel, awo ŵali kupusikika ndipo ŵakugomezga kuti Chiuta ndiyo wakwambiska masuzgo agho ŵakukumana nagho!
8 Kweni ise tasambira kufuma mu buku la Yobu kuti Chiuta ndiyo wakwambiska masuzgo yayi kweni ni Satana! Tasambiraso kuti tileke kughanaghana kuti para ŵanthu ŵakusuzgika ndikuti ŵakuvuna ivyo ŵakaseŵa. Baibolo likuti “nyengo na vyakuchitika vyamabuchi” vingachitikira waliyose pa nyengo yiliyose. (Muph. 9:11; Yobu 4:1, 8) Kweniso tasambira kuti para tikuteŵetera Yehova na kuzizipizga viyezgo mwakugomezgeka, tikumupa mwaŵi wakuti walongore kuti Satana ni mutesi. (Yobu 2:3; Zinth. 27:11) Tikuviwona mwakupepuka yayi ivyo tasambira, chifukwa tamanya chifukwa icho tikusuzgikira. Pamanyuma, Hazel wakamba kusambira na Ŵakaboni ŵa Yehova ndipo wakapulikiska kuti Yehova ndiyo wakambiska masuzgo ghake yayi. Iyo wakati: “Nkhalombaso kwa Yehova kufuma pasi pa mtima. Nkhamuphalira Yehova kuti nangauli nkhatenge naleka kumusopa kweni ndivyo nkhang’anamuranga nadi yayi. Nkhayowoya vinthu vyose ivi chifukwa nkhamumanyanga makora yayi. Sono namanya kuti Yehova wakunitemwa. Ndipo nili wakukondwa chomene kweniso wakukhorwa.” Tikuwonga chomene kuti tikumanya chifukwa icho Yehova wakuzomerezgera masuzgo! Tiyeni tiwone umo nkhani ya Yobu yingatovwilira waliyose payekha para takumana na masuzgo.
UMO NKHANI YA YOBU YINGATOVWILIRA KUZIZIPIZGA
9. Kasi Yobu wakachita vichi apo wakasuzgikanga? (Yakobe 5:11)
9 Muŵe nga mukuwona Yobu wali yekha ndipo wakhala mu vyoto, wali na mapumba thupi lose ndipo wakupulika vyakuŵinya chomene. Thupi lake lanangika na vilonda ndipo waghandirathu. Nkhongono walijirethu, ndipo wakhala pasi uku wakujikwantha vilonda vyake na dengere kweniso wakudandawura chifukwa cha vyakuŵinya ivyo wakupulika. Nangauli vinthu vikaŵa nthena kwa Yobu, kweni wakazizipizga na kulutilira kuthemba Yehova. (Ŵazgani Yakobe 5:11.) Kasi ntchivichi chikawovwira Yobu kuzizipizga?
10. Kasi ntchivichi chikulongora kuti Yobu wakaŵa paubwezi uwemi na Yehova? Longosorani.
10 Yobu wakamuphalira Yehova umo wakajipulikiranga. (Yobu 10:1, 2; 16:20) Mwachiyelezgero, chaputara 3 chikuyowoya kuti Yobu wakadandawura chomene na masuzgo agho ghakamuwira, mwakuti wakaghanaghananga kuti Yehova ndiyo wachitiska. Nakuti apo ŵabwezi ŵake ŵatatu ŵara ŵakatenge Chiuta wakumulanga chifukwa cha zakwananga zake, Yobu wakalutilira kujivikilira kuti iyo ngwakugomezgeka kwa Yehova. Mazgu ghanyake agho Yobu wakayowoya ghakulongora kuti kwakanyengo wakajiwonanga kuti ni murunji chomene kuluska Chiuta. (Yobu 10:1-3; 32:1, 2; 35:1, 2) Kweni pamanyuma wakazomerezga kuti vinyake ivyo wakayowoya pakujivikilira kuti iyo ni murunji, vikamupangiska kuyowoya vinthu “vyambura kwenelera.” (Yobu 6:3, 26) Mu chaputara 31, tikuŵazga kuti Yobu wakakhumbanga kuti Chiuta wamuzgore na kumuphalira kuti wakeneranga nadi kulangika yayi. (Yobu 31:35) Kweni apa chikaŵa chambura kwenelera kuti Yobu wamukoserezge Yehova kuyowoya chifukwa icho iyo wakasuzgikiranga.
11. Kasi Yehova wakachita wuli na ivyo Yobu wakazgora vyakuti wakaŵa murunji?
11 Tikuwona kuti Yobu wakayowoya nthena chifukwa chakuti wakaŵa paubwezi wakukhora chomene na Yehova ndipo wakagomezganga kuti wakumbukirenge kunyoloka kwake. Pamanyuma Yehova wakamuzgora Yobu kufumira mu chimphepo, kweni wakamuphalira yayi chifukwa icho wakasuzgikiranga. Kweniso wakamulanga yayi chifukwa cha kudandawura kwake panji kujivikilira kuti wakaŵa murunji. M’malo mwake, Yehova wakamupa Yobu ulongozgi wachitemwa nga umo dada wakuchitira na mwana wake. Ndipo iyi yikaŵa nadi nthowa yiwemi chomene yakovwilira Yobu. Ntheura Yobu wakajiyuyura na kuzomerezga kuti wakamanyanga nadi vinandi yayi ndipo wakalapa chifukwa cha kuyowoya mwambura kughanaghana makora. (Yobu 31:6; 40:4, 5; 42:1-6) Kasi nkhani iyi yikatenge yiŵawovwirenge wuli ŵateŵeti ŵa Yehova mu nyengo yakale ndipo ise yingatovwira wuli mazuŵa ghano?
12. Kasi nkhani ya Yobu yikatenge yiŵawovwirenge wuli Ŵaisrayeli?
12 Umo Ŵaisrayeli ŵakatenge ŵasangirenge chandulo. Ŵaisrayeli ŵakatenge ŵasambirengeko ku ivyo vikachitikira Yobu. Ghanaghanirani chiyelezgero cha Mozesi. Chikaŵa chipusu yayi kuti walongozge mtundu wa Israyeli chifukwa kanandi ukamugalukiranga Yehova kweniso kumukhuŵazga iyo. Mwakupambana na Ŵaisrayeli ŵakugaluka awo kanandi ŵakadinginyikiranga Yehova, Mozesi wakamuphaliranga Yehova mu lurombo umo wakajipulikiranga. (Eks. 16:6-8; Maŵa. 11:10-14; 14:1-4, 11; 16:41, 49; 17:5) Mozesi wakakhumbikwirangaso kuzizipizga apo wakapika chilango. Mwachiyelezgero, apo Ŵaisrayeli ŵakajintha msasa pa Kadeshi, panji mukaŵa mu chaka cha 40 icho ŵakaŵira mu mapopa, Mozesi “wakayowoyeramo bweka na milomo yake” ndipo wakatondeka kulumba zina la Yehova. (Sal. 106:32, 33) Ntheura Yehova wakamuzomerezga yayi Mozesi kukanjira mu Charu cha Layizgano. (Doto. 32:50-52) Ivi vikwenera kuti vikamuŵinya chomene Mozesi, kweni wakajiyuyura na kuzomerezga. Nkhani ya Yobu iyi yikatenge yovwirengeso chomene Ŵaisrayeli awo ŵakaŵako Mozesi wati wafwa. Kughanaghanirapo nkhani ya Yobu kukatenge kuŵawovwirenge Ŵaisrayeli ŵakugomezgeka umo ŵangayowoyera kwa Yehova maghanoghano ghawo munthowa yakwenelera, kweniso umo ŵangagegera kujilongora kuti iwo mbarunji chomene kuluska Yehova. Ŵakatenge ŵasambirengeso kujiyuyura na kuzomera chilango chakufuma kwa Yehova.
13. Kasi nkhani ya Yobu yingatovwira wuli kuzizipizga? (Ŵahebere 10:36)
13 Umo tingasangira chandulo. Pakuŵa Ŵakhristu nase tikukhumbikwira kuzizipizga. (Ŵazgani Ŵahebere 10:36.) Mwachiyelezgero, ŵanji ŵa ise tikulimbana na suzgo la muthupi panji tikusuzgika maghanoghano, masuzgo gha mu mbumba, kutaya wakutemweka withu, kweniso na masuzgo ghanyake ghakuru. Ndipo nyengo zinyake vyakuyowoya panji vyakuchita vya ŵanji vingapangiska kuti chiŵe chakusuzga kuzizipizga masuzgo ghithu. (Zinth. 12:18) Ndipouli, buku la Yobu likutisambizga kuti tingayowoya umo tikujipulikira kwa Yehova uku tili na chigomezgo chose kuti watipulikenge. (1 Yoh. 5:14) Iyo watikwiyirenge yayi para tamuphalira umo tikujipulikira nanga nyengo zinyake tingayowoya vinthu ‘vyambura kwenelera’ nga ni Yobu. M’malo mwake, watipenge nkhongono na vinjeru ivyo tikukhumbikwira kuti tizizipizge. (2 Mid. 16:9; Yak. 1:5) Nyengo zinyake wangatipa ulongozgi uwo tingakhumbikwira nadi, nga umo wakachitira na Yobu. Buku la Yobu likutisambizgaso umo tingazizipizgira para tapika chilango panji ulongozgi kufuma mu Mazgu gha Yehova, gulu lake, panji ŵabwezi ŵithu awo mbakukhwima. (Heb. 12:5-7) Nga umo Yobu wakasangira chandulo chifukwa cha kuzomera ulongozgi, nase tikusanga chandulo para tazomera ulongozgi na kusintha. (2 Kor. 13:11) Agha ni masambiro ghakuzirwa chomene agho tikusambirako kwa Yobu. Sono tiyeni tiwone umo tingagwiliskira ntchito nkhani ya Yobu pakovwilira ŵanji.
GWILISKIRANI NTCHITO BUKU LA YOBU KOVWILIRA ŴANJI
14. Kasi ni nthowa wuli yimoza iyo tingamulongosolera munthu kuti wamanye chifukwa icho kuliri masuzgo?
14 Kasi muli kukumanapo na munthu mu uteŵeti uyo wakamufumbani chifukwa icho kuliri masuzgo? Kasi mukamuzgora wuli? Panji mukamuphalira ivyo Baibolo likuyowoya vyakukhwaskana na ivyo vikachitika mu munda wa Edeni. Nyengo zinyake mukamba na kuyowoya kuti Satana uyo ni mungelo muheni, wakapusika mbumba yakwambilira kuti yigalukire Chiuta. (Gen. 3:1-6) Pamanyuma panji mukamuphaliraso kuti chifukwa chakuti Adamu na Eva ŵakagalukira Chiuta, lekani tikusuzgika na kufwa. (Rom. 5:12) Paumaliro mukwenera kuti mukamulongosolera kuti Chiuta wazomerezga kuti nyengo yijumphepo mwakuti wasuske utesi wa Satana, kweniso kuti uthenga uwemi wakuti munthazi ŵanthu ŵazamuŵaso ŵarunji upharazgike. (Chivu. 21:3, 4) Iyi ni nthowa yiwemi chomene yakuzgolera fumbo ili ndipo yingawovwira ŵanthu kupulikiska chifukwa icho ŵanthu ŵawemi nawo ŵakusuzgikira.
15. Kasi tingagwiliskira wuli ntchito buku la Yobu kuti tiphalire munthu chifukwa icho kuliri masuzgo? (Wonaniso vithuzi.)
15 Ghanaghaniraniso nthowa yinyake iyo mungamulongosolera munthu kufuma mu buku la Yobu chifukwa icho tikusuzgikira. Mungamba na kumuwonga munthu uyu kuti wafumba fumbo liwemi. Ndipo pamanyuma mungamuphalira kuti Yobu uyo wakaŵa munthu wakugomezgeka, nayo wakafumba fumbo lakuyanako waka apo wakasuzgikanga. Nakuti wakafika na pakugomezga kuti Chiuta ndiyo wakachitiskanga masuzgo ghake. (Yobu 7:17-21) Munthu uyo mukuyowoya nayo wanganweka pakumanya kuti nanga ni kale napo ŵanthu ŵanyake ŵakakhumbanga kumanya chifukwa icho tikusuzgikira. Kufuma apo, mungamulongosolera mwaluso kuti ni Chiuta yayi uyo wakachitiskanga masuzgo gha Yobu kweni ni Dyabulosi. Dyabulosi wakachita nthena kuti walongore kuti ŵanthu ŵakuteŵetera Yehova chifukwa chakusangirapo phindu. Mungasazgirapo kuti nangauli ni Yehova yayi uyo wakambiska masuzgo gha Yobu, kweni wakazomerezga waka. Ichi chikulongora kuti Chiuta wakuŵagomezga ŵanthu awo mbakugomezgeka kuti ŵangalongora kuti Satana ni mutesi. Paumaliro mungamuphalira kuti Chiuta wakamutumbika Yobu chifukwa cha kulutilira kuŵa wakugomezgeka. Ntheura tingakhozga ŵanji pa kuŵasimikizgira kuti ni Yehova yayi uyo wakwambiska masuzgo.
Kasi mungagwiliskira wuli ntchito buku la Yobu kusimikizgira ŵanji kuti ni Chiuta yayi uyo wakwambiska masuzgo? (Wonani ndime 15)
16. Yowoyani chiyelezgero icho chikulongora umo buku la Yobu lingawovwilira munthu uyo wakusuzgika.
16 Wonani umo buku la Yobu likamovwilira Mario. Zuŵa linyake mu 2021, mudumbu wakapharazganga kwizira pa foni. Munthu wakwamba uyo wakayowoya nayo wakaŵa Mario, ndipo wakaŵerenga vesi ilo likulongora kuti Chiuta wakutilayizgaso munthazi muwemi padera pa kutegherezga malurombo ghithu. Mudumbu uyu wati wamufumba maghanoghano ghake pa lemba ili, Mario wakamuphalira kuti pambere wandamuyimbire wakaŵa kuti wakulemba kalata yakuti wakukhumba kujikoma. Wakayowoya kuti, “Nkhugomezga kuti Chiuta waliko, kweni mulenji uwu najipulikanga nga kuti wakunighanaghanira yayi.” Wati wamwimbiraso foni kachiŵiri, ŵakadumbiskana za masuzgo agho Yobu wakakumana nagho. Mario wakasankha kuti waŵazge buku lose la Yobu. Ntheura mudumbu uyu wakamutumizgira linki ya Baibolo la Malemba Ghakupatulika mu Mang’anamuliro gha Charu Chiphya. Kasi pamanyuma ntchivichi chikachitika? Mario wakazomera sambiro la Baibolo ndipo wakakondwa kusambira vinandi vya Chiuta wachitemwa uyo wakunweka nayo.
17. Chifukwa wuli mukuwonga Yehova pa kusazgamo buku la Yobu mu Mazgu ghake? (Yobu 34:12)
17 Ntchakuwonekerathu kuti Mazgu gha Chiuta ghali na nkhongono yakovwilira ŵanthu nanga ni awo ŵakusuzgika. (Heb. 4:12) Tikuwonga chomene kuti Yehova wali kusazgamo nkhani ya Yobu mu Mazgu ghake! (Yobu 19:23, 24) Buku la Yobu likutisimikizgira kuti “nadi, Chiuta wangachita uheni chara.” (Ŵazgani Yobu 34:12.) Likutisambizgaso chifukwa icho Chiuta wakuzomerezgera masuzgo kweniso umo tingazizipizgira. Ndipo likutovwira kuti tipembuzge awo ŵakusuzgika. Mu nkhani yakulondezgapo tizamudumbiskana umo buku la Yobu lingatovwilira kuti tipelekenge ulongozgi wakwenelera.
SUMU 156 Na Maso gha Chipulikano
a Vikuwoneka kuti Yobu wakaŵako mu nyengo ya pakati pa nyifwa ya Yosefe uyo wakaŵa munthu wakugomezgeka (1657 B.C.E.) na apo Mozesi wakasankhikira kuti walongozge Ŵaisrayeli (cha m’ma 1514 B.C.E.). Ivi vikulongora kuti vidumbirano ivyo vikaŵapo pakati pa Yehova na Satana kweniso masuzgo gha Yobu vikachitika mu nyengo yeneyiyi.
b Mazina ghanyake ghasinthika.