Lutilirani Kukhorweska ‘Njara Yinu Yauzimu’

1. Kasi ni vinthu wuli vinyake ivyo taŵanthu tikukhumbikwira? (Mateyu 5:3)

YEHOVA wakumanya ivyo taŵanthu tikukhumbikwira. Mwachiyelezgero, kuti tiŵe na umoyo uwemi tikukhumbikwira chakurya, vyakuvwara, na pakukhala. Usange tikusoŵerwa chimoza mwa vinthu ivi, nanga kungaŵa kwa nyengo yichoko waka, umoyo ukusuzga chomene. Padera pa kutilenga munthowa iyi, Yehova wali kutilengaso na njara yauzimu. (Ŵazgani Mateyu 5:3.) Usange tikukhumba kuŵa ŵakukondwa zanadi, tikwenera kumanya kuti tili na njara iyi na kuyikhorweska.

2. Kasi ntchiyelezgero wuli icho chingatovwira kupulikiska ng’anamuro la ‘kumanya njara yithu yauzimu’?

² Kasi ‘kumanya njara yithu yauzimu’ chikung’anamurachi? Mu Chigiriki mazgu agha ghakuyowoya vya munthu uyo wakupempha mzimu. Mazgu agha ghakutipa chithuzi cha munthu mukavu chomene panji kuti wakupempheska. Tiyelezgere kuti mukuwona munthu wakughanda chomene wavwara malaya ghakukeluka ndipo wakhala pasi mu msewu. Nkhongono walijirethu chifukwa cha kusoŵa chakurya, ŵanthu ŵakumugega chifukwa cha umo wakuwonekera, ndipo namuhanya wakusuzgika na kotcha kwa zuŵa kweniso nausiku napo mphepo yikumalirapo. Munthu wakupempheska uyu wakumanya makora kuti wakukhumbikwira wovwiri kuti waŵe wamoyo na wankhongono. Mwakuyana waka, munthu uyo wakumanya njara yake yauzimu panji kuti uyo wakupempha mzimu, wakukhumbikwira wovwiri kuti vinthu vimwendere makora. Ntheura wakuŵa wakukhumbisiska kusanga chandulo na chakurya chinandi chauzimu icho Yehova wakupeleka ku ŵanthu awo ŵakumutemwa.

3. Kasi tidumbiskanenge vichi mu nkhani iyi?

³ Mu nkhani iyi, chakwamba tidumbiskanenge ivyo tingasambirako kwa mwanakazi wa ku Fonike uyo wakapempha Yesu kuti wamovwire. Nkhani ya mwanakazi uyu yikulongora mikhaliro yitatu iyo ŵanthu awo ŵakumanya njara yawo yauzimu ŵakwenera kuŵa nayo. Pamanyuma tidumbiskanenge chiyelezgero cha mpositole Petrosi na Paulosi, kweniso cha Themba Davide, awo ŵakaŵa ŵanalume ŵakukhwima mwauzimu.

CHIYELEZGERO CHIWEMI PA NKHANI YA KUJIYUYURA, CHITATATA, NA CHIPULIKANO

4. Kasi mwanakazi wa ku Fonike wakakhumbanga vichi kwa Yesu?

⁴ Zuŵa linyake, mwanakazi wa ku Fonike wakiza kwa Yesu. Mwana wake msungwana ‘wakasuzgikanga uheni chomene na chiŵanda.’ (Mat. 15:​21-28) Mwanakazi uyu wakajikama na kupempha wovwiri kwa Yesu. Mwanakazi wa ku Fonike uyu wakalongora mikhaliro yakuzirwa chomene wakati wafika kwa Yesu. Tiyeni tiwone yinyake mwa mikhaliro iyi.

5. Kasi mwanakazi uyu wakalongora mikhaliro wuli, ndipo Yesu wakachita wuli? (Wonaniso chithuzi.)

⁵ Mwanakazi wa ku Fonike wakalongora kujiyuyura. Chifukwa wuli tikuyowoya nthena? Chifukwa chakuti wakakhuŵara yayi apo Yesu wakagwiliskira ntchito chiyelezgero icho chikawonekanga kuti wakumuyaniska na kantcheŵe kadoko, ako ŵanthu awo ŵakaŵa Ŵayuda yayi ŵakaŵetanga mu nyumba zawo. Kasi viŵenge kuti Yesu wakayowoya kwa imwe mazgu agha, mukatenge muchitenge wuli? Kasi mukatenge mukhuŵarenge na kufumapo waka? Kweni ndimo mwanakazi wa ku Fonike wakachitira yayi. Wakalongora kujiyuyura pera yayi, kweni wakalongoraso chitatata. Ivi vikuwoneka na umo wakachitira pakulutilira kupempha wovwiri kwa Yesu. Kasi ntchivichi chikamuchiska kuti wachite nthena? Chifukwa chakuti wakaŵa na chipulikano mwa Yesu. Nakuti chipulikano icho mwanakazi uyu wakalongora chikapangiska kuti Yesu wachitepo kanthu na kumovwira. Nangauli pakwamba wakayowoya kuti wakatumika kovwira waka “mberere zakuzgeŵa za nyumba ya Israyeli,” kweni Yesu wakafumiska mzimu uheni uwo ukaŵa mwa mwana msungwana wa mwanakazi uyu.

6. Kasi tikusambirako vichi ku chiyelezgero cha mwanakazi wa ku Fonike uyu?

⁶ Kuti tikhorweske njara yithu yauzimu, nase tikwenera kuŵa na mikhaliro yakuyana waka. Tikwenera kuŵa ŵakujiyuyura, ŵachitatata, kweniso ŵachipulikano chakukhora. Munthu uyo ngwakujiyuyura ndiyo mwachitatata wakulutilira kupempha Chiuta kuti wamovwire. Tikweneraso kuŵa na chipulikano chakukhora mwa Khristu Yesu kweniso tikwenera kuŵagomezga awo wakuŵagwiliskira ntchito kulongozga ŵasambiri ŵake. (Mat. 24:​45-47) Yehova na Mwana wake ŵakukondwa kukhorweska njara yauzimu ya wose awo ŵakulongora mikhaliro iyi. (Yaniskani na Yakobe 1:​5-7.) Sono tiyeni tiwone umo Yehova wakutilongozgera kweniso kutipa vyose ivyo tikukhumbikwira kuti tiŵe ŵakukondwa. Tiwonengeso ivyo tingachita kuti tisange vinthu ivi, mwa kuwona chiyelezgero cha mpositole Petrosi na Paulosi kweniso Themba Davide.

YEZGANI PETROSI PA KULUTILIRA KUSAMBIRA MAZGU GHA CHIUTA

7. Kasi Petrosi wakapika uteŵeti wuli, kweni ntchivichi icho wakenerangaso kuchita? Longosorani. (Ŵahebere 5:14–6:1)

⁷ Tiyeni tiwone chiyelezgero cha mpositole Petrosi. Wakaŵa yumoza mwa Ŵayuda ŵakwambilira awo ŵakamanya kuti Yesu ni Mesiya, uyo Yehova wakamugwiliskiranga ntchito kulyeska ŵanthu ŵake “mazgu gha umoyo wamuyirayira.” (Yoh. 6:​66-68) Pambere Yesu wandawelere kuchanya, wakamupa Petrosi uteŵeti wa ‘kuliska tumberere twake.’ (Yoh. 21:17) Petrosi wakafiska uteŵeti uwu mwakugomezgeka, ndipo Yehova wakamugwiliskira ntchito kulemba makalata ghaŵiri agho ni mabuku gha mu Baibolo. Kweni Petrosi wakakhumbikwirangaso kusambira Mazgu gha Chiuta payekha. Mwachiyelezgero, wakaŵerenganga makalata gha Paulosi agho wakalemba kumasinda. Petrosi wakasanga kuti vinyake ivyo Paulosi wakalemba vikaŵa “vyakusuzga kupulikiska.” (2 Pet. 3:​15, 16) Kweni ntchakuwonekerathu kuti Petrosi wakaŵa na chitatata, ndipo wakaŵa na chipulikano kuti Yehova wamovwirenge kughanaghanirapo na kupulikiska kweniso kulondezga ivyo wakasambira mu makalata gha Paulosi agha.—Ŵazgani Ŵahebere 5:14–6:1.

8. Kasi Petrosi wakachita wuli wati wapokera ulongozgi uphya kufuma kwa mungelo wa Yehova?

⁸ Petrosi wakalongora kuti wakaŵa na chipulikano mwa Yehova pa kupulikira ulongozgi uwo wakapokera. Mwachiyelezgero, apo wakaŵa ku Yopa, Petrosi wakawona mboniwoni iyo mungelo wa Chiuta wakamuphalira kuti wakome na kurya nyama izo kuyana na Dango la Mozesi zikaŵa zakufipirwa. Ku Ŵayuda, ulongozgi uwu ukaŵa wakuzizika chomene. Pakwamba, Petrosi wakazgora kuti: “Yayi Fumu, chifukwa nindaryepo chinthu chilichose chakufipirwa na chaukazuzi.” Kweni mungelo wakamuphalira kuti: “Leka kuchema vinthu ivyo Chiuta watozga kuti ni vyakufipirwa.” (Mil. 10:​9-15) Petrosi wakapulikira na kusintha kaghanaghaniro kake. Kasi tikumanya wuli? Nyengo yichoko waka wati wawona mboniwoni, ŵanalume ŵatatu awo ŵakatumika na Koroneliyo uyo wakaŵa Wamitundu ŵakiza kuzakamuchema kuti wakakumane na fumu yawo. Pambere wandawone mboniwoni, Petrosi wakatenge wazomerenge yayi kunjira mu nyumba ya Koroneliyo chifukwa wakaŵa Muyuda yayi. Ŵayuda ŵakawonanga Ŵamitundu kuti ŵakaŵa ŵakufipirwa. (Mil. 10:​28, 29) Kweni Yehova wati wamulongora kwizira mu mboniwoni kuti wakukhumba ŵanthu ŵa mitundu yose ŵapulike uthenga uwemi, Petrosi mwaluŵiro wakasintha kaghanaghaniro kake kuti wapulikire Yehova. (Zinth. 4:18) Wakapharazgira Koroneliyo na ŵamunyumba yake, ndipo wakaŵa wakukondwa kuwona ŵakuzomera unenesko, kupokera mzimu utuŵa, na kubatizika.—Mil. 10:​44-48.

9. Kasi tikusanga chandulo munthowa wuli ziŵiri para tikuŵa na njara ya chakurya chakukhoma?

⁹ Nga ni Petrosi, nyengo zose tikwenera kumwa mkaka panji kuti visambizgo vyakwambilira vya mu Mazgu gha Chiuta. Tikweneraso kuŵa na njara ya chakurya chakukhoma—uwo mbunenesko uwo ungaŵa wakusuzga chomene kuwupulikiska. Tikwenera kujipatulira nyengo kweniso kuŵa ŵakukhumbisiska kuŵikapo mtima kuti tipulikiske fundo zakunyang’amira za mu Mazgu gha Chiuta, ndipo kuchita nthena ntchakuzirwa chomene. Chifukwa wuli? Tikusanga chandulo munthowa ziŵiri: Yakwamba, tikusambira vinthu vyakukhwaskana na Yehova ivyo vikukuzga chitemwa chithu pa iyo kweniso tikumuchindika chomene; ndipo yachiŵiri, tikuchiskika chomene kuphalirako ŵanji vyakukhwaskana na iyo. (Rom. 11:33; Chivu. 4:11) Chiyelezgero cha Petrosi chikutisambizgaso sambiro linyake: Usange pali kusintha pa umo tapulikiskiranga fundo yinyake ya mu Mazgu gha Chiuta, tikwenera kusintha mwaluŵiro kaghanaghaniro kithu kweniso umo tikuchitira vinthu. Para tachita nthena ndipo Yehova wangalutilira kutilongozga kweniso ise nase timuteŵeterenge mwakugomezgeka.

YEZGANI PAULOSI PA KULUTILIRA KUVWARA WUNTHU UPHYA

10. Kasi kuvwara wunthu uphya kukusazgapo vichi? (Ŵakolose 3:​8-10)

¹⁰ Kuti tikondweske Yehova, tikweneraso kuchita chinthu chinyake icho nkhuvwara wunthu uphya. Kasi tikung’anamurachi para tikuyowoya nthena? Tikung’anamura ivyo mpositole Paulosi wakalemba, kuti tikwenera ‘kuvura wunthu wakale’ na kuvwara “wunthu uphya.” (Ŵazgani Ŵakolose 3:​8-10.) Ntchipusu yayi kuti tivware wunthu uphya, pakukhumbikwa nyengo na nkhongono. Ghanaghanirani chiyelezgero cha Paulosi. Kufuma waka apo wakaŵa muchoko, wakaŵikangapo mtima kuti wakondweske Chiuta. (Gal. 1:14; Fil. 3:​4, 5) Kweni wakamanyanga makora yayi umo wangasopera Chiuta munthowa yakwenelera. Chifukwa chakuti wakamanyanga yayi visambizgo vya Khristu kweniso chifukwa cha kujikuzga, vikapangiska kuti waŵe “munthu wamsinjiro,” ndipo wakaŵa na mikhaliro yinandi yiheni.—1 Tim. 1:13.

11. Kasi Paulosi wakakhumbikwiranga kuti wasinthe vichi? Longosorani.

¹¹ Pambere wandaŵe Mkhristu, Paulosi wakaŵa na kamtima kakunjoŵe. Nkhani iyo yikusangika mu buku la Milimo yikuyowoya kuti Paulosi wakaŵakwiyira chomene ŵasambiri ŵa Yesu mwakuti “wakalutilira kofya ŵasambiri ŵa Fumu ndipo wakakhumbisiska kuŵakoma.” (Mil. 9:1) Wati waŵa Mkhristu, Paulosi wakwenera kuti wakaŵikapo mtima kuvura wunthu wakale. (Efe. 4:​22, 31) Nangauli vikaŵa nthena, kweni panyengo iyo Paulosi na Baranaba ŵakapambana maghanoghano, Paulosi ‘wakakwiya chomene.’ (Mil. 15:​37-39) Ivi vikatenge vimuwezgere nyuma Paulosi, kweni wakagongowa yayi. Iyo wakalutilira ‘kutchaya thupi lake’ panji kuti kulimbana na kwananga kwake kuti wakondweske Yehova.—1 Kor. 9:27.

12. Kasi ntchivichi chikawovwira Paulosi kuti walutilire kuvura wunthu wake wakale?

¹² Paulosi wakafiska kusintha wunthu wake wakale na kuvwara wunthu uphya chifukwa chakuti wakathembanga nkhongono zake yayi. (Fil. 4:13) Nga ni Petrosi, Paulosi nayo wakathembanga “nkhongono izo Chiuta wakupeleka.” (1 Pet. 4:11) Ndipouli, nyengo zinyake Paulosi wakajipulikanga kuti ngwakutondeka. Kweni apo wakagongowanga, wakaghanaghanirangapo za vinthu viwemi ivyo Adada ŵake ŵakuchanya ŵamuchitirapo kale, ndipo ivi vikamovwira kuti walutilire kusintha.—Rom. 7:​21-25.

13. Kasi tingamuyezga wuli Paulosi?

¹³ Tingamuyezga Paulosi pakumanya kuti nanga vingaŵa kuti tateŵetera Yehova kwa nyengo yitali wuli, kweni tikwenera kulutilira kuŵikapo mtima kuvura wunthu wakale na kuvwara wunthu uphya. Usange tabudiska na kulongoraso nkharo iyo tili kuyileka kale nga nkhukalipira munthu munyake panji kumuyowoyera mwambura lusungu, tikwenera kujiwona ŵakutondeka yayi. M’malo mwake, tikwenera kulutilira kuŵikapo mtima kuti tisinthe. (Rom. 12:​1, 2; Efe. 4:24) Ndipouli apo tikuchita nthena, tikwenera kukumbuka fundo iyi: Mwakupambana na malaya gheneko agho ungachita kuwezga panji kusanuzga kuti ghakuyane, kweni kuti tivware wunthu uphya ise ndise tikwenera kusintha. Nakuti ntchakupulikikwa kuti ise ndise tikwenera nadi kusintha kuti tikondweske Yehova.

YEZGANI DAVIDE PA KULUTILIRA KUKHALA MU MALO GHAKUVIKILIRIKA GHAUZIMU

14-15. Kasi Yehova wakupeleka wuli malo ghakuvikilirika ghauzimu ku ŵanthu ŵake? (Salimo 27:5) (Wonaniso chithuzichikopi.)

¹⁴ Kuti tiŵe ŵakukondwa zanadi pakukhumbikwira vinandi padera pa chakurya chauzimu na kuvwara wunthu uphya. Tikukhumbikwiraso malo ghakuvikilirika ghauzimu. Kasi malo agha ni nga, ndipo tingachita wuli kuti tilutilire kukhala mu malo agha?

¹⁵ Themba Davide likayowoya vya malo ghakuvikilirika ghauzimu agho Yehova wakupeleka. (Ŵazgani Salimo 27:5.) Yehova wakuvikilira ŵanthu ŵake ku waliyose kweniso chilichose icho chingananga chipulikano chawo. Kasi Yehova wakuvikilira wuli ŵateŵeti ŵake? Iyo wakuŵalayizga kuti palije chilwero icho chapangikira iwo icho chitondenge. (Sal. 34:7; Yes. 54:17) Nangauli Satana na viŵanda vyake mbankhongono kweni Yehova ndiyo ngwankhongono chomene kuluska iwo. Nanga ŵangatikoma, kweni Yehova wazamutiwuska. (1 Kor. 15:​55-57; Chivu. 21:​3, 4) Yehova wakutovwiraso para tikwenjerwa mwakuti tileke kuwelera nyuma na kuleka kumuteŵetera. (Zinth. 12:25; Mat. 6:​27-29) Ndipo Adada ŵithu ŵachitemwa ŵakutipa mbumba yauzimu iyo yikutikhozga na kutovwira mu nyengo zakusuzga. Kweniso ŵakutipa ŵalara awo ŵakutiliska mwachitemwa. (Yes. 32:​1, 2) Para tawungana pamoza, kanandi tikukumbuskika ivyo tingachita kuti Yehova watovwire kweniso kutivikilira.—Heb. 10:​24, 25.

16. Kasi Yehova wakamuvikilira wuli Davide?

¹⁶ Para Davide wapulikira Yehova, wakaŵanga wakuvikilirika ku masuzgo agho ŵanthu awo ŵakanangiranga dala ŵakasangananga nagho. (Yaniskani na Zintharika 5:​1, 2.) Kweni para wasulako fundo za Chiuta, Yehova wakamuvikiliranga yayi ku masuzgo agho ghakizanga chifukwa cha ivyo wachita. (2 Sam. 12:​9, 10) Wuli pakuyowoya vya nyengo izo wakasuzgikanga chifukwa chakuti ŵanji ndiwo ŵakamuchitiranga vinthu mwambura urunji? Pa nyengo zanthena izi, Davide wakapunguliranga Yehova vyose vya mumtima wake, ndipo Yehova wakamovwiranga kuti wajipulikeko makora mwakumusimikizgira kuti wakumutemwa chomene kweniso wamupwelelerenge.—Sal. 23:​1-6.

17. Kasi tingamuyezga wuli Davide?

¹⁷ Tingamuyezga Davide mwakupenja ulongozgi wa Yehova para tikupanga vyakusankha. Kweniso tikumanya kuti nyengo zinyake tingasangana na masuzgo, chifukwa chakuti Yehova watondeka kutivikilira yayi, kweni chifukwa chakuti tindasankhe vinthu mwamahara. (Gal. 6:​7, 8) Ndipo para tasangana na masuzgo chifukwa chakuti ŵanji ŵatichitira mwambura urunji, tikwenera kulomba kwa Yehova na mtima wose, kugomezga kuti wavikilirenge mitima yithu na maghanoghano ghithu.—Fil. 4:​6, 7. 

LUTILIRANI KUKHORWESKA NJARA YINU YAUZIMU

18. Kasi tikusangana na suzgo wuli, ndipo tingachita wuli kuti tilutilire kukhorweska njara yithu yauzimu? (Wonaniso vithuzi.)

¹⁸ Lemba la chaka cha 2026 likuti: “Mbakukondwa awo ŵakumanya kuti ŵali na njara yauzimu.” Nakuti pasono ndipo ntchakuzirwa chomene kumanya njara yithu yauzimu. Chifukwa wuli? Chifukwa tazingilizgika na ŵanthu awo mbambura kukondwa awo ŵakukana kuti ŵali na njara yauzimu, panji awo ŵakuyezga kukhorweska njara yawo yauzimu munthowa iyo iwo ŵakhumba kwizira mu chisopa chautesi panji vinjeru vya ŵanthu. Tikwenera yayi kutolerako kaghanaghaniro aka. Kasi tingachita wuli kuti tilutilire kugomezga Yehova? Tikwenera kulutilira kusanga chandulo na chakurya chauzimu icho Yehova wakupeleka, kulutilira kuvwara wunthu uphya, kweniso kupulikira Yehova na kuzomerezga kuti wativikilire.