Kasi Ni Vichi Icho Nkhwenera Kumanya pa Nkhani ya Kukhweŵa Hona na Shisha?

Julia wakati: “Uko ine nkhukhala ni viŵi yayi kuti munthu wakwaniske vyaka 25 kwambura kukhweŵapo hona panji shisha (vaping).”

Ivyo vili mu nkhani iyi

• Ivyo mukwenera kumanya

• Ivyo mungachita

• Wuli pa nkhani ya vyamba?

• Ivyo ŵanyinu ŵakuyowoya

Ivyo mukwenera kumanya

• Hona wakukoma. Mu hona mukusangika nicotine iyo ni nkhongono iyo yikupangiska munthu kuti waŵenge na khumbo likuru lakukhweŵa hona. Lipoti la U.S. Centers for Disease Control and Prevention likayowoya kuti: “Chimoza mwa vinthu ivyo vikukoma mwaluŵiro ŵanthu pa charu chose nkhukhweŵa hona.”

  Theresa wakayowoya kuti: “Nkhugwira ntchito ku chipatala ku dipatimenti yakujambura ŵalwari ndipo nkhuwona umo kukhweŵa kukunangira umoyo wa munthu. Chikuŵa chakuzizika chomene kuwona unandi wa vinthu vyakugandilira vyakufuma ku hona ivyo vikulundana mu misipa. Umoyo wane ngwakuzirwa chomene mwakuti ningayezga na kuyezga wuwo yayi kukhweŵa hona.”

  Kasi Mukumanya? Mu hona mukusangika tunthu twakukwana 7,000 ndipo tunandi mwa utu nthuheni mu thupi la munthu. Chaka chilichose ŵanthu mamiliyoni ghanandi ŵakufwa chifukwa cha matenda agho ghakwamba chifukwa cha kukhweŵa hona.

• Kugwiliskira ntchito Shisha kukunjizga tunthu tuheni tunandi muthupi. Ŵanthu ŵanandi maphapu ghakunangika kweniso ŵakufwa chifukwa cha kugwiliskira ntchito shisha. Nga umo vikuwira na ndudu, shisha nayo yikuŵanga na nicotine. Pakuti nicotine wakupangiska munthu kuti waŵenge na khumbo likuru lakukhweŵa hona, vikupangiska ŵachinyamata kuti chiŵe chipusu kugwiliskira ntchito minkhwala ghakutimbanizga wongo.—Fact sheet on e-cigarettes.

  Miranda wakuti: “Vyakugwiliskira ntchito pa shisha ivyo vili na mazina nga ni cotton candy na cherry bomb vikuŵa na kasungu kawemi ako kakupangiska kuti ŵana kweniso ŵachinyamata ŵavitemwenge.”

  Kasi mukumanya? Mu e-cigarette mukuŵa waka maji yayi. Kweni mukuŵangaso tunthu tuheni chomene uto tukunanga maphapu.

Ivyo mungachita

• Fufuzani. Kuzomera waka chilichose icho mwapulika yayi. Mwachiyelezgero, ŵangamuphalirani kuti shisha njiheni yayi ku umoyo wa munthu, panji kuti ni nthowa yiwemi yakumazgira kwenjerwa. Kweni mukwenera kufufuza unenesko pamwekha kuti muchite vinthu mwamahara.

  Fundo ya mu Baibolo: “Munthu muzeleza wakugomezga mazgu ghalighose, kweni wakuchenjera wakulanguruka pa mendero ghake ghose.”—Zintharika 14:15.

  Evan wakati: “Para wamunthu waghanaghanirapo za viheni ivyo vikuchitika chifukwa cha kukhweŵa kweniso kugwiliskira ntchito shisha, ukuwona kuti ni nkhani yikuru kuluska kukondwa uko ŵanthu ŵakutchuka panji ŵanji ŵangayowoya.”

  Fundo yakuti mughanaghanirepo: Kasi mukuwona kuti ŵanthu awo ŵakukhweŵa panji kugwiliskira ntchito shisha mbakukondwa nadi? Kasi mbakunozgeka kuchita mwamahara para ŵasangana na vinthu ivyo ŵakwenjerwa navyo sono kweniso munthazi? Panji ivyo ŵakuchita ŵakujichemera waka masuzgo ghanandi?

• Sangani nthowa ziwemi zakuchepeskera kwenjerwa. Nthowa ziwemi zakuchepeskera kwenjerwa zikusazgapo kuchita maseŵero ghakukhozga thupi, kuŵerenga, panji kuchezga na ŵabwezi ŵawemi. Para muli na vinthu vinandi viwemi vyakuti muchite, muzamuŵavya nyengo yakukhweŵera.

  Fundo ya mu Baibolo: “Mtima wa munthu ukulopwa chifukwa cha kwenjerwa, kweni mazgu ghawemi ghakuwukondweska.”—Zintharika 12:25.

  Angela wakati: “Ŵanthu ŵakughanaghana kuti kukhweŵa kweniso shisha vikovwira kuti munthu waleke kwenjerwa. Kweni unenesko ngwakuti vinthu ivi vikovwira zanadi yayi m’malo mwake munthu wakusangana waka na masuzgo kwa nyengo yitali. Kweni pali nthowa ziwemi izo munthu wangachepeskera kwenjerwa.”

  Fundo yakuti mughanaghanirepo: Kasi ni nthowa wuli ziwemi izo zingamovwirani kuti muchepeske kwenjerwa? Usange mukukhumbikwira wovwiri wonani nkhani ya mutu wakuti “N’chiyani chingandithandize ndikakhala ndi nkhawa?” mu buku la “Zimene Achinyamata Amafunsa.”

• Nozgekerani umo mungachitira para ŵanyinu ŵangamuchichizgani. Ŵangaŵa ŵanyinu ŵa ku sukulu panji kwizira mu ivyo mukuwonelera. Kanandi mu mafilimu, pa TV kweniso pa malo ghakuchezgerapo gha pa intaneti ŵakuyowoya nga kuti kukhweŵa hona na shisha nkhuwemi waka.

  Fundo ya mu Baibolo: “Ŵanthu ŵakukhwima . . . ŵali kuzgoŵezga nkhongono zawo zakamanyiro kupambaniska pakati pa chiwemi na chiheni.”—Ŵahebere 5:14.

  Anna wakati: “Apo nkhaŵa pa sukulu ŵanyane ŵanandi ŵakanichindikanga chifukwa chakuti nkhakhweŵanga yayi panji kushisha. Para naŵalongosolera makora umo nkhuwonera nkhani ya kukhweŵa na kugwiliskira ntchito shisha, iwo nyengo zinyake ŵakanivikiliranga. Nangauli vingawoneka nga vingawovwira yayi, kweni mungaŵa ŵakuvikilirika para mwalongosora mwakupulikikwa.”

  Fundo yakuti mughanaghanirepo: Kasi mungalongosora wuli para ŵanyinu ŵakumuchichizgani? Kasi mungaghanaghanira nyengo iyo mukachitapo nthena? Usange mukukhumba wovwiri pa nkhani iyi, wonani nkhani ya mutu wakuti “Mmene Mungakonzekerere” mu chaputara 15 cha buku la mutu wakuti Mayankho a Zimene Achinyamata Amafunsa, Buku Lachiwiri.

• Sankhani mwamahara ŵabwezi ŵinu. Mungayezgeka chomene yayi kuti mukhweŵe panji kugwiliskira ntchito shisha usange ŵabwezi ŵinu nawo ŵakuwona vinthu munthowa yakuyana waka.

  Fundo ya mu Baibolo: “Uyo wakwenda na ŵavinjeru waŵenge wavinjeru, kweni uyo wakuchita vinthu pamoza na vindere wapwetekekenge.”—Zintharika 13:20.

  Calvin wakati: “Chikuŵa chinthu chakovwira chomene kuŵa paubwezi na ŵanthu awo ŵali na mikhaliro nga kujikora kweniso kugomezgeka. Para wawona umo vinthu vikuŵayendera makora, wamunthu ukuchiskika kuchita vinthu nga ndiwo.”

  Fundo yakuti mughanaghanirepo: Kasi ŵabwezi ŵinu ŵakumovwirani kuti mukhalenge umoyo uwemi panji ŵakumugongoweskani?

Wuli pa nkhani ya vyamba?

Ŵanthu ŵanandi ŵakuyowoya kuti vyamba ni viwemi waka. Kweni uwu mbutesi.

• Ŵachinyamata ŵanandi awo ŵakukhweŵa vyamba ŵakuŵa pangozi yakuti chingaŵanjira chomene. Kafukufuku wakulongora kuti ŵanthu awo ŵakukhweŵa vyamba wongo wawo unganangikirathu, ndipo ivi vingapangiska kuti munthu waleke kughanaghana makora.

• “Kafukufuku wakulongora kuti ŵanthu awo ŵakukhweŵa vyamba kanandi ŵakukolerana yayi na ŵanyawo, ŵakuchita makora yayi pa nkhani ya sukulu, ŵakufiska yayi ivyo ŵakukhumba pa umoyo ndipo ŵakukhorwa viŵi yayi na umoyo.”

  Judah wakati: “Nkhayezgeka kuti nikhweŵe vyamba, chifukwa nkhakhumbanga kuti nipumuleko ku kwenjerwa. Kweni nkhati naghanaghanirapo kuti vyamba vinganinjira chomene, ningasakaza ndalama zinandi, kweniso kuti ningasangana na masuzgo ghakuru paumoyo wane, nkhamanya kuti para ningamba kukhweŵa vyamba mbwenu ndipo niŵenge wakwenjerwa chomene.”