Kasi Uchigeŵenga Uzamumara?

Pamanyuma pakuti vigeŵenga vyakuwukira, nyengo zinyake ungajifumba kuti: ‘Kasi Chiuta wakunipwelelera? Chifukwa wuli vinthu vyanthena ivi vikuchitika? Kasi uchigeŵengaa uzamumara? Kasi nifiskenge kukhala mwawofi nthena?’ Baibolo likupeleka mazgoro ghakukhorweska gha mafumbo agha.

Kasi Chiuta wakujipulika wuli na uchigeŵenga?

Chiuta wakutinkha nkhaza na uchigeŵenga. (Salimo 11:5; Zintharika 6:16, 17) Kweniso Yesu, mwimiliri wa Chiuta, nyengo yinyake wakasuska ŵasambiri ŵake ŵati ŵachita vinthu mwankhaza. (Mateyu 26:50-52) Nangauli ŵanthu ŵanyake ŵakuchita nkhaza mu zina la Chiuta, iyo wakuŵazomerezga yayi kuti ŵachitenge vinthu viheni ivi. Unenesko ngwakuti, iyo wakupulika na kupulika wuwo yayi malurombo ghawo.—Yesaya 1:15.

Chiuta wakuŵapwelelera ŵanthu wose awo ŵakusuzgika, kusazgapo awo ŵakhwaskika na vigeŵenga. (Salimo 31:7; 1 Petrosi 5:7) Baibolo likulongora kuti Chiuta wazamuchitapo kanthu kuti wamazge nkhaza.—Yesaya 60:18.

Icho chikwambiska uchigeŵenga

Baibolo likulongosora chifukwa cheneko icho chikwambiska uchigeŵenga, likuti: “Munthu wakuwusa munyake na kumupweteka.” (Mupharazgi 8:9) Kwamba kale chomene, ŵanthu awo ŵali na nkhongono ŵakugwiliskira ntchito vigeŵenga kuti ŵakandilizge ŵanyawo. Pamanyuma pake, ŵanthu awo ŵakandilizgika nawo ŵakugwiliskira ntchito vigeŵenga kuti ŵawezgere.—Mupharazgi 7:7.

Umo uchigeŵenga uzamumalira

Chiuta wakulayizga kuti wawuskengepo wofi na nkhaza, ndipo wazamukhazikiska mtende pa charu chapasi. (Yesaya 32:18; Mika 4:3, 4) Iyo:

Wazamuwuskapo icho chikwambiska uchigeŵenga. Chiuta wazamuwuskapo maboma gha ŵanthu na kuŵikapo boma lake ilo lizamuwusa pa charu chose chapasi. Muwusi wa boma la Chiuta uyo ni Yesu Khristu, wazamuchita vinthu mwambura kutemwera, ndipo wazamuwuskapo kukandilizgana na nkhaza. (Salimo 72:2, 14) Panyengo iyo, pazamuŵavya munthu uyo wazamuchitaso uchigeŵenga. Ŵanthu “ŵazamukondwa chomene na mtende ukuru.”—Salimo 37:10, 11.
Wazamuwuskapo masuzgo ghose agho ghiza chifukwa cha uchigeŵenga. Chiuta wazamuchizga ŵanthu wose awo ŵasangana na masuzgo chifukwa cha uchigeŵenga kwali ŵali kuchita kupwetekeka muthupi panji mu maghanoghano. (Yesaya 65:17; Chivumbuzi 21:3, 4) Wakulayizga kuti wazamuwuska nanga ŵangaŵa ŵakufwa kuti ŵazakaŵe na umoyo wamuyirayira pa charu chapasi icho pazamuŵa mtende.—Yohane 5:28, 2.

Baibolo likupeleka vifukwa viwemi vyakugomezgera kuti Chiuta wachitengepo kanthu mwasonosono kuti wawuskepo masuzgo ghose. Ndipouli, mungajifumba kuti, ‘Chifukwa wuli pasono Chiuta wandamazge uchigeŵenga?’ Kuti musange zgoro la fumbo ili, wonelerani vidiyo ya mutu wakuti Chifukwa Wuli Chiuta Walekelera Uheni na Suzgo?

a Mazgu ghakuti “Uchigeŵenga” kanandi ghakuyowoya za kuchitira ŵanthu nkhaza panji kuŵawofya, chomenechomene ŵanthu bweka na chilato chakuti vinthu visinthe pa nkhani ya ndyali, chisopa, panji vinthu vinyake mu charu. Kweni ŵanthu ŵanyake ŵangakolerana nayo yayi fundo iyi kuti kuchita nthena mbuchigeŵenga.

Baibolo likovwira ŵanthu kuti ŵazizipizge

Wonani vinthu viŵiri ivyo Baibolo likuyowoya kuti vingamovwirani.

Lombani kwa Chiuta.—Ŵafilipi 4:6, 7.
Ŵikani mtima pa chigomezgo icho Baibolo likupeleka.—Ŵahebere 6:19.

Kuti mumanye nthowa za umo Baibolo lingamovwilirani kuti muleke kwenjerwa, wonani nkhani ya mutu wakuti “Ivyo Mungachita Kuti Muleke Kwenjerwa.”

Ŵakaboni ŵa Yehova awo ŵazizipizgapo uchigeŵenga ŵakawovwirika chomene na Ŵakhristu ŵanyawo. Wonani viyelezgero viŵiri ivi:

Natalya na mwana wake musepuka wa vyaka 9, zina lake Aslan, ŵakaŵa ku sukulu ku Beslan, Russia, apo vigeŵenga vya futi vikiza na kukora ŵanthu ŵakujumpha 1,000. Chachitima ntchakuti, ŵanthu ŵanandi ŵakafwa, ndipo ŵanandi ŵakaŵa ŵana. Nangauli Natalya na mwana wake Aslan ŵakapona, kweni ŵakakhwaskika chomene na ivyo vikachitika. Wonani ivyo vyaŵawovwira kuti ŵajipulikengeko makora.
Pablo na Sophie mwana wawo munyamata wakafwa apo vigeŵenga vikaphuliska nyumba ziŵiri zakuchemeka Twin Towers ku New York. Wonelerani vidiyo iyi na kuwona ivyo vikaŵawovwira iwo na ŵanthu ŵanyake awo ŵakakhwaskika na ivyo vigeŵenga vikaŵachitira.