Kuvikilira Ŵanakazi—Kasi Baibolo Likuti Wuli?

Madhua uyo wakukhala ku India wakayowoya kuti: Apo nkhaŵa muchoko, mudumbu wane wakanichitiranga nkhaza dazi lililose, wakanitimbanga na kuninena. Nati natengwa, ŵamamavyara ŵane ŵakalutilira kunichitira nkhaza. Iwo na ŵadadavyara ŵane ŵakachitanga nane vinthu nga muzga wawo. Ivi vikanipangiskanga kuti nighanaghanenge waka vyakujikoma.

Wupu wa World Health Organization ukayowoya kuti: Kuchitira nkhaza ŵanakazi kwazara chomene pa charu chose chapasi. Ndipo ukati pafupifupi mwanakazi yumoza pa ŵanakazi ŵatatu ŵaliwose ŵakuchitirika nkhaza pa nkhani ya kugonana, kutimbika, panji kuyowoyeleka viheni.

Usange ivi vili kumuchitikiranipo, nyengo zinyakhe mungaŵa na wofi kuti vyanthena ivi vingamuchitikiraniso kulikose uko mungaluta. Chifukwa cha nkhaza kweniso vinthu vyambura kwenelera ivyo ŵanakazi ŵakusangana navyo, panji mungamba kughanaghana kuti ŵanthu ŵanandi ŵakuwona kuti ŵanakazi mbakuzirwa yayi. Kweni kasi ŵanakazi mbakuzirwa kwa Chiuta?

Kasi Chiuta Wakuŵawona wuli ŵanakazi?

Lemba: ‘Chiuta Wakalenga mwanalume na mwanakazi’—Genizesi 1:27.

Ivyo vesi ili likung’anamura: Chiuta ndiyo wakalenga mwanalume na mwanakazi. Ndipo wose ŵaŵiri wakuŵachindika mwakuyana waka. Kweniso wakukhazga kuti mfumu “watemwenge muwoli wake umo wakujitemwera yekha.” Mfumu wakwenera yayi kuwusa muwoli wake, kumuyowoyera mazgu ghaheni panji kumuchitira nkhaza. (Ŵaefeso 5:33; Ŵakolose 3:19) Apa ntchakuwonekerathu kuti ŵanakazi mbakuzirwa kwa Chiuta.

Maria wa ku Argentina wakayowoya kuti: “Apo nkhaŵa muchoko ŵabali ŵane ŵanyake ŵakanichitira vyamuziro. Nati nafika vyaka 17, uyo wakanilemba ntchito wakanofya kuti wanilekeskenge ntchito para nakana kugona nayo. Pasono ndine mulara kweni mfumu wane, ŵapapi ŵane na ŵazengezgani ŵane ŵakunichindika yayi. Kweni paumaliro nkhasambira vyakukhwaskana na Yehovab Mlengi. Iyo wakuŵachindika chomene ŵanakazi. Ivi vikundovwira kumanya kuti wakunitemwa kweniso nili wakuzirwa chomene kwa iyo.”

Kasi ni vichi vingamovwirani kuti mwambeso kujipulika makora?

Lemba: “Pali mubwezi uyo wakudemelera kuluska mubali wako.”—Zintharika 18:24.

Ivyo vesi ili likung’anamura: Mubwezi wanadi wangamovwirani na kumukhozgani. Usange mukuwona kuti ntchakwenelera, phaliraniko munthu uyo mukumugomezga umo mukujipulikira.

Elif wa ku Türkiye wakayowoya kuti: “Kwa vyaka 20 nkhaphalirapo waliyose yayi kuti munthu wakanichitira vyamuziro. Ivi vikapangiska kuti nikulenge wambura kukondwa, wawofi kweniso nkhasuzgikanga maghanoghano. Kweni nati naphalirako munyane uyo wakanitegherezga, nkhajipulika makora chomene.

Lemba: “Muthulirani vyose ivyo mukwenjerwa navyo, chifukwa wakumupwelelerani.”—1 Petrosi 5:7.

Ivyo vesi ili likung’anamura: Para mukulomba, Yehova wakutegherezga. (Salimo 55:22; 65:2) Chifukwa chakuti wakumupwelelerani, wangamovwirani kumanya kuti ndimwe ŵakuzirwa chomene.

Ana, wa ku Belize wakati: “Kusambira vyakukhwaskana na Yehova kukanovwira kuti nambe kujipulika makora na kuluwa vyakuŵinya ivyo nkhaŵa navyo chifukwa cha ivyo vikanichitikira. Pasono nkhulomba kwa Chiuta na kumuphalira umo nkhujipulikira. Iyo ni mubwezi wane uyo wakumanya umo nkhujipulikira.”

Kasi Chiuta wazamuchita wuli na nkhaza izo ŵanakazi ŵakusangana nazo?

Lemba: ‘Yehova wachitirenge urunji mwana mulanda na ŵakuyuzgika, mwakuti munthu wa pa charu chapasi waleke kuŵawofyaso.’—Salimo 10:17, 18.

Ivyo vesi ili likung’anamura: Sonosono apa Chiuta wamazgenge nkhaza zose izo ŵanakazi ŵakusangana nazo.

Roberta, wa ku Mexico wakati: “Ntchakupembuzga chomene kwa ine kumanya kuti sonosono apa Yehova wamazgenge nkhaza zose izo ŵanakazi kweniso ŵasungwana ŵakusangana nazo. Ivi vikunovwira kuŵa na mtende wa mu mtima.”

Kuti mumanye vinandi pa umo Baibolo lingamovwilirani kuŵa na chigomezgo, chifukwa icho mungagomezgera ivyo likulayizga kweniso umo Ŵakaboni ŵa Yehova ŵakupelekera wovwiri wa mu Baibolo mazuŵa ghano, pemphani kuti ŵazakamwenderani na kudumbiskana namwe kwaulere.

Dawunilodani nkhani iyi kuti mupulinte.