Kasi Nkhondo ya pa Charu Chose Yili Pafupi Kuchitika?—Kasi Baibolo Likuti Wuli?

Vyaka 30 ivyo vyajumpha ŵanthu ŵanandi ŵakawonanga kuti vyaru pa charu chose vili pa mtende kweniso kuti vinthu vikwendako makora. Kweni pasono ndimo viliri yayi para tingayaniska na ivyo vikuchitika.

• “Ŵanthu ŵanandi ŵakufipa mtima kuti nkhondo ya pakati pa Israel, na Gaza yithandazgikirenge mu vyaru vinyake. Ŵakughanaghana nthena chifukwa ŵasilikari ŵa Hezbollah ku Lebanon nawo ŵakuponyerana mabomba na ŵasilikari ŵa Israel.”—Reuters, January 6, 2024.

• “Magulu agho ghakulongozgeka na charu cha Iran ghakuponya na kuphuliska mabomba mu vigaŵa vyakupambanapambana, kweniso mwamabuchi charu cha Iran chambaso kupanga vilwero vya nyukiliya. Ivi vyapeleka wofi ku charu cha America na vyaru vinyake. Ndipo pasono charu cha Iran chikuchita vinthu mwakukolerana na charu cha Russia na China.”—The New York Times, January 7, 2024.

• “Mabomba agho ŵasilikari ŵa charu cha Russia ŵakuponya ku Ukraine ghakulutilira kunanga vinthu mu charu ichi.”—UN News, January 11, 2024.

• “Charu cha China chikulutilira kuchita makora pa nkhani ya vyachuma kweniso chili na ŵasilikari ŵankhongono, ndipo charu cha Taiwan nacho chikulutilira kujithemba kuŵa chakwima pachekha, ndipo ivi vyapangiska kuti charu cha China na America vileke kumwerana maji ndipo ivi vingapangiska kuti nyengo yiliyose pabuke nkhondo.”—The Japan Times, January 9, 2024.

Kasi Baibolo likuti wuli pa nkhani ya ivyo tikuwona vikuchitika pasono? Kasi vinthu ivi vyambiskenge nkhondo ya pa charu chose?

Baibolo likayowoyerathu vinthu ivyo vikuchitika pasono

Nangauli Baibolo likazunulirathu yayi vyaru ivyo vikuchita nkhondo izo tikuziwona, kweni likayowoyerathu kuti kuzamuŵa nkhondo zikuru izo zizamuwuskapo “mtende pa charu chapasi.”—Chivumbuzi 6:4.

Buku la Daniyeli likayowoyerathu kuti “mu nyengo yaumaliro,” vyaru ivyo vikulimbirana mazaza ‘vizamututuzgana’ panji kuti kulimbirana mazaza. Pakulimbana uku pakuŵa ŵasilikari ŵankhongono kweniso kusakaza “usambazi,” panji kuti ndalama zinandi.—Daniyeli 11:40, 42, 43.

Nkhondo iyo yikwiza

Baibolo likulongora kuti vinthu mu charu vihenipenge chomene pambere vindafike pawemi. Yesu wakayowoyerathu kuti “kuzamuŵa suzgo yikuru, iyo yindachitikepo kufuma ku uyambiliro wa charu.” (Mateyu 24:21) “Suzgo yikuru” iyi yizamulongozgera ku nkhondo yakuchemeka Aramagedoni, iyo ni “nkhondo ya zuŵa likuru la Chiuta Wankhongonozose.”​—Chivumbuzi 16:14, 16.

Kweni nkhondo ya Aramagedoni yizamuponoska ŵanthu m’malo mwakuŵaparanya. Kwizira mu nkhondo iyi Chiuta wazamumazga maboma gha ŵanthu agho ghakupangiska kuti pa charu paŵe nkhondo zakofya. Kuti mumanye vinandi umo nkhondo ya Aramagedoni yizamwiziskira mtende wamuyirayira pa charu chapasi, ŵerengani nkhani ya mutu wakuti:

• “Kasi Nkhondo ya Aramagedoni Ni Vichi?”

• “Aramagedoni Ni Nkhani Yakukondweska!”