Kunozga Nyumba za Ufumu

Nicole mudumbu wa ku Colombia wakati “Nkhuyitemwa chomene Nyumba ya Ufumu yithu. Yikunipa mwaŵi wakuŵa pamoza na ŵabali kweniso ŵadumbu ŵane.” Kasi ndimo namwe mukujipulikira?

Pa charu chose chapasi, Ŵakaboni ŵa Yehova ŵakuwungana mu Nyumba za Ufumu pafupifupi 63,000. Nyumba izi zikutovwira kuŵa na malo ghawemi ghakusoperapo Chiuta. Ndipouli Nyumba izi zikuchita vinandi. Mupayiniya munyake zina lake David wakati: “Nyumba ya Ufumu yithu yikovwira pa mulimo withu wakupharazga. Ŵanandi ŵakuzizwa kuwona umo tikupwelelelera Nyumba zithu za Ufumu.” Ivi vikuchitika waka vyekha yayi. Tikuŵikapo mtima kutozga na kunozga Nyumba zithu za Ufumu. Kasi tikuchita wuli mulimo uwu?

Kasi Ntchito Yakunozga Yikwenda Wuli?

Mipingo iyo yikuwunganamo ndiyo yikunozga Nyumba ya Ufumu. Kuti ivi vichitike ŵabali na ŵadumbu, ŵakwenera kuyitozga pafupipafupi. Ŵakweneraso kunozga vinthu vinyake vichokovichoko ivyo vyanangika.

Dipatimenti Yakuwona Vyamapulani na Kuzenga (LDC) ndiyo yikovwira mipingo umo yinganozgera Nyumba za Ufumu. Dipatimenti iyi yikusoraso ŵabali awo ŵakovwira mipingo umo yinganozgera nyumba yawo ya Ufumu. Ŵabali aŵa waliyose wakulaŵilira Nyumba za Ufumu 6 panji 10, ŵakwendera na kusambizga mipingo umo yingapwelelelera Nyumba yawo ya Ufumu. Para pajumpha vyaka vitatu, ŵabali aŵa ŵakuwoneseska vinthu ivyo vingapangiska ngozi panji ivyo vikwenera kunozgeka.

Ŵabali na ŵadumbu ŵithu ŵakuwonga chomene ivyo ŵakusambira pa nkhani yakunozga Nyumba za Ufumu. Indhumathi mudumbu wa India wakuti: “Ivyo tikasambira vikaŵa viwemi chomene. Ukaŵa mwaŵi wapadera kusambira umo tingapwelelelera Nyumba ya Ufumu.” Mubali wa ku Kenya zina lake Evans wakuti: “Tikasambira umo tingachitira kuti tileke kusakaza ndalama zinandi mwakunozgerathu masuzgo ghachokoghachoko pambere ghandafike paheni chomene.”

Kulipira Ivyo Vikukhumbikwa

Pa chaka ndalama izo zingagwira ntchito pakunozga Nyumba ya Ufumu zingaŵa ndalama madola ghanandi chomene,a kuyana na uko Nyumba ya Ufumu yili, vyaka ivyo yakhala yikugwira ntchito, kweniso unandi wa mipingo iyo yikuwunganamo. Kasi ŵakuchita wuli kuti ŵalipire ivyo vikukhumbikwa?

Nyumba ya Ufumu yikunozgeka na ndalama izo ŵabali na ŵadumbu ŵakupeleka mwawanangwa. Alexander, mubali wa ku Kazakhstan, wakuti: “Ndalama zinyake zikovwira kuti tiŵe na Intaneti na kulipilira mabilu gha magesi na maji. Apo zinyake izo zakhalapo tikugulira vinthu nga vyakupuputira mu mawoko, magulovesi, vyakutozgera malo na penti.” Ndalama zinyakeso zikupelekeka kuti zikawovwire pa mulimo wa pa charu chose. Mulimo uwu ukusazgapo ntchito za pa charu chose izo zikukhumba ndalama zinandi.

Ntchito Zikuruzikuru

Usange ndalama zakunozgera Nyumba ya Ufumu zijumphenge unandi wa ndalama izo ŵabali ŵakugwiliskira ntchito pa mpingo kwa myezi yiŵiri panji yitatu, ŵalara ŵakumanyiska mubali uyo wali kusoleka na LDC. Para LDC yazomerezga, ntchito iyi yikovwirika na ndalama za mulimo wa pa charu chose. Mu chaka cha uteŵeti cha 2023, ntchito zanthena izi zakukwana 8,793 zikagwirika ndipo ndalama zakukwana madola 76.6 miliyoni ndizo zikagwira ntchito. Tiyeni tiwone ziŵiri mwa ntchito izi.

Ku Angola, Nyumba ya Ufumu iyo yikakhala vyaka 15, yikaŵa na masuzgo ghanandi. Vinthu vyose vya magesi vikeneranga kuŵikika vinyake, viliŵa vikaŵa na malumwa, maji ghakasuluranga ndipo ghakendanga mu maluŵaza gha awo ŵali pafupi na Nyumba ya Ufumu iyi. Ŵa LDC ŵakachitapo kanthu kuti ŵanozge masuzgo agha. Ndalama zakukwana madola 9,285 ndizo zikagwira ntchito. Ŵanthu awo ŵakukhala pafupi na Nyumba ya Ufumu iyi ŵakhorwa na umo ntchito iyi yikendera.

Ku Poland, Nyumba ya Ufumu yikasuluranga, ndipo kalipeti yikanangika chomene yikaŵa yakuti yinganozgekaso yayi. Ŵa LDC ŵakazomerezga ntchito yakunozga mtenje wa Nyumba ya Ufumu na kuŵikamo kalipeti yinyake. Mulimo uwu ukaŵa wa ndalama zakukwana madola 9,757. Ntchito iyo yikachitika yipangiskenge kuti pa Nyumba ya Ufumu iyi paleke kuchitikaso ntchito yinyake yikuru kwa vyaka vinandi.

Ntchito Yakunozga Yikulumba Yehova

Mulimo wakunozga Nyumba za Ufumu ukovwira kuti ndalama zileke kusakazika kweniso ukulumba Yehova. Mubali wa ku Tonga, zina lake Shaun wakuti: “Chifukwa cha mulimo withu wakunozga Nyumba za Ufumu, tikuŵa na malo ghakutowa, vinthu vikuŵa mu ndondomeko yake, kweniso vikugwira makora ntchito. Ivi vikupangiska ŵanthu mu chikaya kulumba Yehova. Nase tikuŵa ŵakufwatuka kuchemerako ŵanthu ku Nyumba ya Ufumu.”

Kasi Mungawovwirapo Wuli?

Tose tingawovwirapo para tikutozga na kunozga malo ghithu ghakusoperapo. Marino, mubali uyo wakovwira mipingo umo yinganozgera Nyumba za Ufumu ku Australia, wakuti: “Tose tili na mwaŵi wapadera wakuchitako mulimo wakunozga Nyumba ya Ufumu. Para tikuchita nthena tikuponoska ndalama zinandi izo zikwenera kugwira ntchito uko nkhwakwenelera nadi.”

Joel, mubali wa ku India, wakukondwa chomene kunozga Nyumba ya Ufumu. Iyo wakuti: “Kugwira ntchito na ŵabali kukunipa chithuzi cha umo vizamuŵira mu charu chiphya.” Nicole, uyo tangumuzunura pakwamba wakuti: “Mwasonosono nkhawovwirapo pa mulimo wakukolopa, apo ŵabali ŵanyake ŵakanozganga payipi iyo yikasuluranga maji. Nangauli ndine yayi nkhanozganga payipi, kweni nkhawovwirapo kuti paleke kuchitika ngozi.”

Para mukukhumba kuti movwirengepo pakunozga Nyumba za Ufumu, manyiskani ŵalara ŵa mu mpingo winu. Chinyake ntchakuti, vyawanangwa vinu vikovwira pa mulimo wakunozga Nyumba ya Ufumu yinu na zinyake zinandi pa charu chose. Mungapeleka vyawanangwa ivi mwakuponya mu bokosi la pa mpingo winu panji kwizira pa donate.jw.org. Tikumuwongani chomene chifukwa cha vyawanangwa vinu ivyo mukupeleka mwawanangwa.