Kuyowoya mwakurongora kukondweskeka na vintu ivi kungacitiska ŵategherezgi ŵinu kuti ŵajipulike mwakuyana waka mu mitima yawo.

Awonani umo Yehova wakutovwilira kutonda masuzgo agho tikukumana nagho. Iye wakutirongora ntowa yiweme ya umo tikwenera kukhalira. (Yes. 30:21) Wakurongosora ivyo vikucitiska kuti kuŵe kuswa-marango, kuwura-urunji, ukavu, urwari, na nyifwa ndiposo wakutiphalira umo wazamumazgira vintu vyose ivi. Wakutizingirizga na ubali wacitemwa. Wali kutipa cawanangwa cakuzirwa ca lurombo. Wali kutipa mwaŵi wa kuŵa Ŵakaboni ŵake. Wakujura maso ghithu mwakuti tiwone kuti Kristu wali kukhazikika kale pa cizumbe kucanya ndiposo kuti agha ni mazuŵa gha umaliro gha caru ici.—Civ. 12:1-12.

Kusazgirapo apa, tiliso na maungano gha mpingo, gha dera, na gha cigaŵa. Para kayowoyero kinu kakurongora kuti mukuwongera vintu ivi, mbwenu mukhozgenge cisimikizgo ca ŵanji ca kuwungana na ŵabali ŵawo nyengo zose.—Heb. 10:23-25.

Malipoti agho ghakurongora kuti Yehova wakutumbika uteŵeti wa m’munda naghoso ghakutikhozga. Mu virimika vya mu handiredi lakudanga peneapo Paulos na Barnaba ŵakarutanga ku Yerusalemu, “ŵakasekereska comene ŵabali wose” mwakuŵaphalira umo ŵamitundu ŵakazgokera. (Mil. 15:3) Imwe namwe mungakondweska ŵabali mwakuŵaphalira vyakukumana navyo vyakukhozga.

Ntowa yinyake yakukhwimiskira ŵabali ndiyo kuŵavwira kuti ŵamanye kuti ivyo ŵakucita ni vintu vyakuzirwa comene. Ŵawongani cifukwa ca ivyo ŵakucita mu uteŵeti Wacikristu. Wongani awo ŵakutondeka kucita ivyo ŵakukhumba mu uteŵeti cifukwa ca ucekuru na matenda kweni ŵakuzizipizga mwakugomezgeka. Ŵakumbuskani kuti Yehova wakuruwa yayi citemwa ico ŵakurongora pa zina lake. (Heb. 6:10) Kurongora cipulikano para tikuyezgeka ncintu cakuzirwa comene. (1 Pet. 1:6, 7) Ŵabali ŵakukhumbikwira kukumbuskika za ici.

Iŵani na Maghanoghano gha Cilindizga ca Muntazi Para Mukuyowoya. Cintu cikuru ico cikukhwimiska ŵantu awo ŵakutemwa Ciuta ni vilayizgo vya vintu ivyo vikwiza. Nyengo zinyake ŵanandi awo ŵakutegherezga nkani yinu ŵaŵa ŵakupulika mazgu agha nyengo na nyengo. Kweni mwakurongora mzimu wakuwongera penepapo mukuyowoya za vilayizgo ivi, mungapangiska kuti viŵe vyakukondweska, vyakusimikizgirika, ndiposo kupangiska mitima ya ŵategherezgi kuwongera. Kugwiriskira ncito ivyo mukusambira mu Sukulu ya Uteŵeti wa Ciuta kungamovwirani kucita ici.

Yehova iye mwene ndiye wakukhwimiska na kupereka nkongono ku ŵantu ŵake. Ndipouli, imwe namwe mungavwirana naye. Mungacita ici para mukuyowoya nkani pampingo.

KASI imwe pamwekha mwagwirirapo ncito pa urongozgi wuliwose uwo wuli mu programu ya sukulu iyi? Kasi mwamarizga ncito zose? Kasi mukugwiriskira ncito fundo yiliyose para mukuyowoya nkani mu sukulu panji pa maungano ghanyake, ndiposo para muli mu uteŵeti wa m’munda?

Rutilirani kwandula na Sukulu ya Uteŵeti wa Ciuta. Nanga mungaŵa kuti mukamba ni kale kuyowoya nkani, kweni pacali vigaŵa vinyake ivyo mukukhumbikwira kuti munyolorere.