Yehova Wakutisimikizgira Kuti Wazgorenge Charu Kuŵa Paradiso

1. Kasi ntchimi Yesaya yikaŵaphalira uthenga wuli Ŵaisrayeli ŵanyake?

NTCHIMI YESAYA yikamulongosora Yehova kuti ni “Chiuta wa unenesko.” Lizgu ilo lili kung’anamulika kuti “waunenesko” lingang’anamulikaso kuti “ameni.” (Yes. 65:​16, mazgu ghamusi) Lizgu lakuti “Ameni” likung’anamura kuti “viŵe ntheura,” panji “ni vyaunenesko.” Mu Baibolo, para lizgu lakuti “ameni” layowoyeka pa nkhani ya Yehova panji Yesu ndikuti chinthu icho ntchaunenesko nadi mulimose umo vingaŵira. Lekani Yesaya wakaphalira Ŵaisrayeli ŵanyake uthenga wakuti, Chilichose icho Chiuta wachima, chikuchitika nadi. Yehova walongora nadi kuti fundo iyi njaunenesko chifukwa nyengo zose wakufiska malayizgo ghake.

2. Chifukwa wuli tingagomezga malayizgo gha Yehova, ndipo kasi ni mafumbo wuli agho tiwonenge mu nkhani iyi?

² Kasi tingagomezgaso kuti Yehova wazamufiska nadi ivyo walayizga munthazi? Pati pajumpha vyaka pafupifupi 800 kufuma apo Yesaya wakaŵirako, mpositole Paulosi wakalongosora chifukwa icho malayizgo gha Chiuta ghakuŵira ghakugomezgeka nyengo zose. Paulosi wakati: “Ntchambura machitiko kuti Chiuta watete.” (Heb. 6:18) Nga umo vikuŵira kuti chisimi cha maji ghawemi chingafumiska yayi maji ghamchere, mwakuyana waka, Yehova pakuti ndiyo ni Mwenecho wa unenesko, wangayowoya yayi utesi. Lekani tingaŵa na chigomezgo chose kuti vyose ivyo Yehova wakuyowoya, kusazgapo malayizgo ghake gha munthazi, ni vyaunenesko. Mu nkhani iyi tiwonenge mafumbo agha: Kasi Yehova walayizga kuti wazamutichitira vichi munthazi? Ndipo kasi wakutisimikizgira wuli kuti malayizgo ghake ghazamufiskika nadi?

KASI YEHOVA WATILAYIZGA VICHI?

3. (a) Kasi ni layizgo wuli ilo ŵateŵeti ŵanandi ŵa Chiuta ŵakulitemwa? (Chivumbuzi 21:​3, 4) (b) Kasi ŵanji ŵakuzgora wuli para tikuŵaphalira vya layizgo la Chiuta la Paradiso?

³ Layizgo ilo tidumbiskanenge ndakukondweska ku ŵateŵeti wose ŵa Chiuta pa charu chose chapasi. (Ŵazgani Chivumbuzi 21:​3, 4.) Yehova wakulayizga kuti nyengo yinyake “nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.” Taŵanandi tikuŵazga mavesi agha para tikupembuzga ŵanthu awo tikuŵapharazgira na kuŵaphalira umo umoyo uzamuŵira mu Paradiso. Kasi ŵanthu ŵakuyowoya vichi para tikuŵaphalirako layizgo ili? Ŵanandi ŵakuyowoya kuti, “Vinthu ivi ni viwemi nadi, kweni nkhugomezga yayi kuti vingazakachitika.”

4. (a) Kasi apo Yehova wakalayizganga vya Paradiso wakamanyirathu vichi ivyo vizamuchitika mu mazuŵa ghithu ghano? (b) Padera pa kulayizga vya paradiso, kasi Yehova wakachitaso vichi?

⁴ Mbunenesko kuti apo Yehova wakakhuŵirizga mpositole Yohane kulemba layizgo ili lakukhwaskana na Paradiso, wakamanyanga kuti mazuŵa ghano tizamuphalirangako ŵanji para tikupharazga uthenga wa Ufumu. Kweni Yehova wakamanyaso kuti ŵanandi vizamuŵasuzga kugomezga layizgo lakuti wazamupanga vinthu vyose kuŵa viphya. (Yes. 42:9; 60:2; 2 Kor. 4:​3, 4) Ipo kasi tingachita wuli kuti tovwire ŵanji kuti ŵakhorwe kuti vitumbiko ivyo vikuyowoyeka pa Chivumbuzi 21:​3, 4 vizamufiskika nadi? Ndipo kasi nase tingachita wuli kuti tilutilire kugomezga Yehova na malayizgo ghake? Padera pakupeleka layizgo lake ili, Yehova wali kupelekaso vifukwa vyakukhorweska ivyo tingagomezgera layizgo lake ili. Kasi wali kupeleka vifukwa wuli?

YEHOVA WAKUTISIMIKIZGIRA KUTI WAZAMUFISKA LAYIZGO LAKE

5. Kasi tili na vifukwa wuli vyakugomezgera layizgo la Chiuta la Paradiso, ndipo tingavisanga mu mavesi wuli?

⁵ Mavesi ghakulondezgapo ghakutiphalira vifukwa ivyo tingagomezgera layizgo la Yehova la Paradiso. Tikuŵazga kuti: “Uyo wakakhala pa chitengo wakati: ‘Wonani! Nkhupanga vinthu vyose kuŵa viphya.’ Kweniso wakati: ‘Lemba, chifukwa mazgu agha ngakugomezgeka na ghaunenesko.’ Wakati kwa ine: ‘Ghafiskika! Ndine Alefa na Omega, wakwamba na waumaliro.’”—Chivu. 21:​5, 6a.

6. Chifukwa wuli ivyo vili kulembeka pa Chivumbuzi 21:​5, 6 vikutovwira kuti tigomezgenge chomene layizgo la Chiuta?

⁶ Kasi mavesi agha ghakutovwira wuli kuti tigomezgenge chomene layizgo la Chiuta ili? Buku la Mapeto Osangalatsa a Masomphenya a M’buku la Chivumbulutso likuyowoya fundo yakulondezgapo iyi yakukhwaskana na mavesi agha, likuti: “Ivi vili nga kuti Yehova wakusayinira yekha chikalata chakusimikizgira kuti ŵanthu ŵakugomezgeka ŵazamupokera nadi vitumbiko munthazi umu.”b Layizgo la Chiuta ili lili kulembeka pa Chivumbuzi 21:​3, 4. Kweni mu vesi 5 na 6, ndimo tingati tikusanga siginecha ya Yehova, iyo yikutisimikizgira kuti layizgo ili ndaunenesko nadi. Tiyeni sono tiwone mwakupwelelera mazgu agho Yehova wakayowoya kuti wasimikizge layizgo lake ili.

7. Chifukwa wuli mazgu agho ghali kukwambilira kwa vesi 5 ngapadera, ndipo chifukwa wuli ngakuzirwa?

⁷ Vesi 5 likwamba na mazgu ghakuti: “Uyo wakakhala pa chitengo wakati.” (Chivu. 21:5a) Mazgu agha ngapadera chifukwa ngamoza mwa mazgu agho ghakuyowoyeka nyengo zitatu mu buku la Chivumbuzi apo Yehova wakayowoya yekha kwizira mu mboniwoni. Ntheura uyo wakayowoya mazgu agha ni mungelo yayi panji Yesu uyo wakawuskika, kweni ni Yehova! Mazgu agha ghakutipa chifukwa chakukwana chakugomezgera fundo iyo yili mu mazgu ghakulondezgapo gha mu vesi ili. Chifukwa wuli tikuyowoya nthena? Chifukwa ntchakuti Yehova “wakuteta yayi.” (Tito 1:2) Mazgu agha ghakupangiska kuti tigomezgenge chomene ivyo tikuŵazga pa Chivumbuzi 21:​5, 6 kuti ni vyaunenesko.

“WONANI! NKHUPANGA VINTHU VYOSE KUŴA VIPHYA”

8. Kasi Yehova wakutisimikizgira wuli kuti wazamufiska nadi layizgo lake ili? (Yesaya 46:10)

⁸ Sono tiyeni tisande mazgu ghakuti “Wonani!” (Chivu. 21:5) Lizgu la Chigiriki ilo lili kung’anamulika kuti “wonani!” likugwiliskirika ntchito kanandi waka mu buku la Chivumbuzi. Buku linyake likuti mazgu agha ghali kulembeka nthena na chilato chakuti “uyo wakuŵazga waŵikeko mahara chomene ku ivyo waŵazgenge panthazi pake.” Kasi Chiuta wakayowoyaso vichi kufuma apo? Iyo wakati: “Nkhupanga vinthu vyose kuŵa viphya.” Mbunenesko kuti apa Yehova wakuyowoya vyakunthazi, kweni pakuti kwa iyo layizgo ili lizamufiskika nadi, lekani wakuyowoya nga wambapo kale kuchita.—Ŵazgani Yesaya 46:10.

9. (a) Kasi mazgu ghakuti “nkhupanga vinthu vyose kuŵa viphya” yakuyowoya za vinthu wuli viŵiri ivyo Yehova wazamuchita? (b) Kasi ntchivichi chizamuchitikira “machanya” na “charu” ivyo vilipo sono?

⁹ Tiyeni sono tisande mazgu ghanyakeso gha pa Chivumbuzi 21:​5, ghakuti: “Nkhupanga vinthu vyose kuŵa viphya.” Kasi mazgu agha ghakung’anamurachi? Mu chaputara ichi, mazgu agha ghakuyowoya vya vinthu viŵiri ivyo Yehova wachitenge. Chakwamba waparanyenge charu chakale. Chachiŵiri, waŵikengepo charu chiphya. Pa Chivumbuzi 21:​1, tikuŵazga kuti: “Kuchanya kwakale na charu chapasi chakale vikafumapo.” Mazgu ghakuti “kuchanya kwakale” ghakung’anamura maboma ghose gha ndyali agho ghakulongozgeka na Satana na viŵanda vyake. (Mat. 4:​8, 9; 1 Yoh. 5:19) Mu Baibolo mazgu ghakuti “charu” ghangang’anamuraso ŵanthu. (Gen. 11:1; Sal. 96:1) Lekani mazgu ghakuti “charu chakale,” ghakung’anamura ŵanthu ŵaheni ŵa mu charu ichi mazuŵa ghano. Vinthu viŵiri ivi “kuchanya” na “charu,” Yehova wazamuvinozga waka yayi, kweni wazamuviparanyirathu. Kufuma apo, wazamuŵikapo “machanya ghaphya na charu chapasi chiphya,” ilo ni boma liphya na ŵanthu ŵarunji.

10. Kasi ni vinthu wuli ivyo Yehova wazamuvizgora viphya?

¹⁰ Kasi Yehova wazamuzgoraso vinthu vyose kuŵa viphya munthowa wuli? (Chivu. 21:5) Yehova wazamunozga charu na kuchizga ŵanthu mwakuti ŵaŵe ŵakufikapo. Nga umo Yesaya wakayowoyerathu, charu chose chizamuŵa chakutowa nga umo ukaŵira munda wa Edeni. Wazamutizgoraso ŵaphya pakutichizgirathu ku matenda ghose. Ŵakupendera, ŵambura kuwona, na ŵakumangwa ŵazamuchizgika, kweniso ŵakufwa ŵazamuwuskika.—Yes. 25:8; 35:​1-7.

“MAZGU AGHA NGAKUGOMEZGEKA NA GHAUNENESKO. . . . GHAFISKIKA!”

11. Kasi Yehova wakamuphalira Yohane kuchita vichi, ndipo chifukwa wuli?

¹¹ Kasi Chiuta wakayowoyaso vichi kuti watisimikizgire kuti wazamufiska nadi ivyo walayizga? Yehova wakaphalira Yohane kuti: “Lemba, chifukwa mazgu agha ngakugomezgeka na ghaunenesko.” (Chivu. 21:5) Padera pakupeleka dango kwa Yohane lakuti “lemba,” Yehova wakapelekaso chifukwa chake. Iyo wakati: “Chifukwa mazgu agha ngakugomezgeka na ghaunenesko”—kung’anamura kuti mazgu gha Chiuta ngakugomezgeka na ghaunenesko. Tikuwonga chomene kuti Yohane wakapulikira dango ili lakuti “lemba.” Lekani sono tili na mwaŵi wakuŵazga vya layizgo la Chiuta la Paradiso na kughanaghanirapo pa vitumbiko ivyo tikulindilira munthazi.

12. Chifukwa wuli Yehova wakayowoya kuti: “Ghafiskika!”?

¹² Kasi wakayowoyaso vichi kufuma apa? Iyo wakati: “Ghafiskika!” (Chivu. 21:6) Apa Yehova wakuyowoya nga kuti vinthu vyose ivyo wakayowoya vyakukhwaskana na layizgo la Paradiso vyachitika kale. Ndipo wakwenera kuyowoya nadi nthena chifukwa iyo palije chinthu icho chingamutondeska kufiska khumbo lake. Yehova wakayowoyaso chinthu chinyake kuti watisimikizgire kuti wazamufiska nadi layizgo lake ili. Kasi wakayowoyaso vichi?

“NDINE ALEFA NA OMEGA”

13. Chifukwa wuli Yehova wakayowoya kuti: “Ndine Alefa na Omega”?

¹³ Nga umo tayowoyera kale, Yehova wakayowoya na Yohane katatu kwizira mu mboniwoni. (Chivu. 1:8; 21:​5, 6; 22:13) Panyengo zose izi, Yehova wakayowoya mazgu ghakuyana waka agha ghakuti: “Ndine Alefa na Omega.” Mazgu ghakuti Alefa ntchilembo chakwamba mu afabeti ya Chigiriki, ndipo omega ntchilembo chaumaliro. Yehova pakuyowoya kuti iyo ni “Alefa na Omega,” wakutovwira kumanya kuti para iyo wamba kuchita chinthu m’paka wakuchimalizga.

14. (a) Yowoyani viyelezgero vyakulongora apo Yehova wakaŵa nga wakuyowoya kuti “Alefa” kweniso apo wazamuŵa nga wakuti “Omega”? (b) Kasi mazgu gha pa Genizesi 2:​1-3 ghakutisimikizgira vichi?

¹⁴ Yehova wakati walenga Adamu na Eva, wakaŵaphalira khumbo lake lakukhwaskana na ŵanthu kweniso charu chapasi. Baibolo likuyowoya kuti: “Chiuta wakaŵatumbika, ndipo Chiuta wakati kwa iwo: “Babanani, mwandane muzuzge charu chapasi na kuchithereska.” (Gen. 1:28) Panyengo iyi, Yehova tingati wakayowoya kuti “Alefa.” Wakayowoya mwakupulikikwa makora vya khumbo lake: Kuti nyengo yizenge apo ŵana ŵakufikapo na ŵakupulikira ŵa Adamu na Eva ŵazuzgenge charu chose na kuchizgora kuŵa paradiso. Para khumbo lake lazakafiskika, Yehova wazamuŵa nga wakuyowoya kuti “Omega.” Yehova wakati wamalizga kulenga “kuchanya na charu chapasi na vyose ivyo vilimo,” wakayowoyaso chinthu chinyake kuti wasimikizge kuti khumbo lake lifiskikenge nadi. Tikuchisanga pa Genizesi 2:​1-3. (Ŵazgani.) Yehova wakapatura zuŵa la 7 kuŵa lakupatulika. Kasi wakang’anamurangachi? Yehova wakasimikizganga kuti kwambura kutondeka wazamufiska khumbo lake ku ŵanthu na charu chapasi. Wazamufiska nadi paumaliro wa zuŵa la 7.

15. Chifukwa wuli vikawonekanga nga Satana watondeska khumbo la Chiuta ku ŵanthu?

¹⁵ Adamu na Eva ŵakati ŵakagaluka, ŵakazgoka ŵakwananga ndipo ŵakapirako ŵana ŵawo kwananga na nyifwa. (Rom. 5:12) Ntheura vikawoneka nga kuti Satana watondeska khumbo la Chiuta lakuti charu chizure na ŵanthu ŵawemi kweniso ŵakupulikira. Kweniso vikaŵa nga kuti Satana watondeska Yehova kuti wazamuyowoyapo yayi kuti “Omega.” Satana wakwenera kuti wakaghanaghananga kuti Yehova walijeso nthowa yinyake yakuti wangafiskira layizgo lake. Nthowa yimoza yikaŵa yakuti Yehova wakome Adamu na Eva na kulengaso ŵanthu ŵanyake ŵakufikapo kuti wafiske khumbo lake. Kweni Chiuta wachitenge nthena, mphanyi Dyabulosi wakati Chiuta ni mutesi. Chifukwa wuli? Chifukwa ntchakuti, nga umo pali kulembekera pa Genizesi 1:​28, Yehova wakaphalira Adamu na Eva kuti mphapu yawo yizuzgenge charu chapasi.

16. Kasi ntchifukwa wuli icho panji Satana wakaghanaghananga kuti wanganenerapo Chiuta kuti ngwakutondeka?

¹⁶ Kasi Satana wakwenera kuti wakaghanaghaniraso nthowa wuli yinyake iyo Chiuta wangachita? Panji Satana wakaghanaghana kuti Yehova wazomerezgenge Adamu na Eva kubaba ŵana ŵambura kufikapo awo ŵazamuŵapo ŵakufikapo yayi. (Muph. 7:20; Rom. 3:23) Apa napo, tikukayika yayi kuti Dyabulosi wakatenge wanenenge Yehova kuti ngwakutondeka. Chifukwa wuli? Chifukwa nthowa iyi nayo yikatenge yovwirenge yayi kuti khumbo la Chiuta lifiskike, lakuti Paradiso wazure na ŵana ŵa Adamu na Eva ŵakufikapo kweniso ŵakupulikira.

17. Kasi Yehova wakachita wuli Satana na ŵanthu ŵakwambilira ŵati ŵagaluka, ndipo paumaliro chizamuchitika ntchivichi? (Wonaniso chithuzi.)

¹⁷ Ivyo Yehova wakasankha kuchita na nkhani ya kugaluka kwa Satana na ŵanthu ŵakwambilira, vikaŵa vyakuti Satana wakaghanaghanangako yayi. (Sal. 92:5) M’malo mwakuti Yehova waŵe mutesi, Yehova wakazomerezga kuti Adamu na Eva ŵababe ŵana. Kweniso m’malo mwakuwoneka kuti ngwakutondeka, Yehova wakalongora kuti palije icho chingamutondeska kufiska chinthu icho wayowoya. Wakawoneseska kuti khumbo lake m’paka lizakafiskike, pakupeleka mphapu iyo yizamuponoska ŵana ŵakupulikira ŵa Adamu na Eva. (Gen. 3:15; 22:18) Satana wakwenera kuti wakazizikika chomene na nthowa iyo Yehova wakanozga ya sembe yakuwombora! Chifukwa wuli? Chifukwa ntchakuti ndondomeko iyi yikujintha pa chitemwa chambura uryezi. (Mat. 20:28; Yoh. 3:16) Satana walije mukhaliro uwu. Kasi ntchivichi chizamuchitika chifukwa cha sembe yakuwombora? Pamanyuma pa vyaka 1,000 vya muwuso wa Khristu, ŵana ŵa Adamu ŵakupulikira kweniso ŵakufikapo ŵazamukhala mu Paradiso pa charu chapasi nga umo Yehova wakakhumbiranga pakwamba. Pa nyengo iyo, Yehova wazamuŵa nga wakuyowoya kuti “Omega.”

UMO TINGACHITIRA KUTI TIGOMEZGENGE CHOMENE LAYIZGO LA YEHOVA LA PARADISO

18. Kasi ni vinthu wuli vitatu ivyo Yehova wakutisimikizgira? (Wonaniso bokosi lakuti “Vifukwa Vitatu Ivyo Tingagomezgera Layizgo la Yehova.”)

¹⁸ Pakuwona ivyo tadumbiskana mu nkhani iyi, kasi tingaŵasimikizgira wuli awo ŵakukayikira layizgo la Chiuta la Paradiso kuti lizamufiskika nadi? Chakwamba, Yehova iyomwenecho ndiyo wakulayizga. Buku la Chivumbuzi likuti: “Uyo wakakhala pa chitengo wakati: ‘Wonani! Nkhupanga vinthu vyose kuŵa viphya.’” Iyo wali na vinjeru, nkhongono, na khumbo kuti wafiske layizgo ili. Chachiŵiri, layizgo lake ili lizamufiskika nadi kwambura kutondeka, ndipo kwa iyo vili nga lili kufiskika kale. Lekani iyo wakati: “Chifukwa mazgu agha ngakugomezgeka na ghaunenesko. . . . Ghafiskika!” Chachitatu, para Yehova wamba kuchita chinthu chinyake, wakuwoneseska kuti m’paka wafiske, lekani iyo wakuti: “Ndine Alefa na Omega.” Yehova wazamulongora nadi kuti Satana ni mutesi kweniso ngwakutondeka.

19. Kasi mungachita wuli para ŵanthu ŵakukayikira layizgo la Chiuta la Paradiso?

¹⁹ Kumbukani kuti nyengo yiliyose para tikuphalirako ŵanthu mu uteŵeti kuti layizgo ili lizamufiskika nadi, vikutovwiraso kuti tigomezgenge chomene layizgo la Yehova ili. Ntheura ulendo unyake apo muzamuŵazgira munthu layizgo lakupembuzga ili la Paradiso nga umo likulongosolekera pa Chivumbuzi 21:4 ndipo wazakayowoya kuti, “Ivi vingachitika yayi,” kasi muzamuchita wuli? Mungazakamuŵazgira vesi 5 na 6 na kumulongosolera. Mulongorani umo Yehova wakulongolera kuti layizgo ili lizamufiskika nadi mwakuchita kusayina nga kuti ndiyo walembapo siginecha.—Yes. 65:16.