Usange wakaghanaghananga nthena ndikuti wakabudiska comene. Usange ivi ndivyo Adamu na Eva ŵakaphaliranga mwana wawo Kayini uyo wakaŵa wambura kufikapo ndikuti ŵakacitiska kuti wajikuzge comene. Pamasinda, Eva wakababa mwana waciŵiri ndipo ŵakamuthya zina lakuti Abelu, ndipo wakayowoyapo yayi mazgu ghakumuhaya mwana uyu. Zina lakuti Abelu likung’anamura “Mvuci” panji kuti “Cawakawaka.” (Genesis 4:2) Kasi zina ili likulongora kuti ŵakaŵikako mahara viŵi yayi kwa Abelu kuluska umo ŵakacitira na Kayini? Tikumanya makora yayi.

Apo ŵasepuka aŵa ŵakakuranga, Adamu wakwenera kuti wakaŵasambizganga kugwira nchito na cilato cakuti ŵazakapwelelerenge makora mbumba zawo. Kayini wakaŵa mulimi, apo Abelu wakaŵa muliska.

Tikugomezga kuti Abelu wakaŵanga na nyengo ya kughanaghanira vya Ciuta. Muŵe nga mukumuwona wakuliska viŵeto vyake. Pakuŵa muliska, wakendanga mitunda yitali. Wakaliskanga mberere mu mapiri, madambo, wakambukanga nazo milonga kupenja utheka uwemi wakubiliŵira kweniso malo ghawemi ghakupumulirapo. Pa viŵeto vyose mberere ndizo zikakhumbikwiranga wovwiri cifukwa zikuŵa nga zikalengeka munthowa yakuti munthu wazilongozgenge, na kuzivikilira. Kasi Abelu nayo wakawonanga kuti wakukhumbikwira kuti Ciuta uyo ngwavinjeru na wankhongono comene wamulongozgenge na kumuvikilira? Tikukayika yayi kuti ivi ndivyo wakazunuranga mu malurombo ghake ndipo cipulikano cake cikakuranga.