Ntheura ŵaŵiri aŵa ŵakalutira lumoza ku Betelehemu. Munthu munyake wakayowoya kuti, ŵakwenera kuti ŵakenda kwa sabata yose. Ndipouli, wose ŵakwenera kuti ŵakakhozgananga mu nthowa cifukwa ca suzgo ilo likaŵawira.

Paumaliro ŵanakazi ŵaŵiri aŵa ŵakafika ku Betelehemu mtunda wa makilomita 10 kumwera kwa Yerusalemu. Vikuwoneka kuti pakwamba mbumba ya Naomi yikaŵa yakusanga makora mu Betelehemu, cifukwa ŵanthu ŵanandi ŵakayowoyanga vya Naomi. Ŵanakazi ŵanandi ŵakazizwanga kuti, “Kasi ndi Naomi uyu?” Naomi wakwenera kuti wakasintha comene kawonekero umo wakakhaliranga ku Moabu. Thupi lake likalongora kuti wakasuzgikanga comene kweniso wakaŵa na citima.—Ruth 1:19.