6. (a) Kasi uchimi uwu ukasimikizgiranga ŵanthu layizgo wuli? (b) Kasi mboniwoni iyi yikaŵaso na chenjezgo wuli? (Wonani mazgu ghamusi.)

⁶ Maji ghakupa umoyo. Mu mboniwoni ya Ezekiyeli, mlonga ukanjira mu Nyanja Yakufwa, na kuchizga chigaŵa chikuru cha nyanja iyi. Wonani kuti maji agha ghakachizga somba zinandi chomene, mwakuti unandi wake ukayananga waka na izo zikaŵa mu Nyanja Yikuru, panji kuti Nyanja ya Meditereniyani. Bizinesi ya somba nayo yikatotoma mumphepete mwa Nyanja Yakufwa, pakati pa matawuni ghaŵiri agho ghakwenera kuti ghakaŵa patali na patali. Mungelo wakati: “Kose uko mlonga uwu ukulazga chilichose chamuŵa chamoyo.” Kasi ichi chikung’anamura kuti maji ghakufuma mu nyumba ya Yehova ghakafika mu vigaŵa vyose vya Nyanja Yakufwa? Yayi. Mungelo wakalongosora kuti mu visapa, maji ghakupa umoyo agha ghamufikamo yayi. Malo agha ghakalekeka kuti ghaŵe “ghamchere.”b (Ezek. 47:8-11) Ntheura uchimi uwu ukaŵa na layizgo lakuti kusopa kutuŵa kuzamuchizga ŵanthu, ndipo ŵazamwambaso kuchita makora. Kweni pakaŵaso chenjezgo lakuti: Ni wose yayi awo ŵamupokelera vitumbiko vya Yehova; kweniso ni wose yayi awo ŵamuchizgika.

Maji Ghakupa Umoyo

KALE: Yehova wakatumbika ŵanthu ŵake awo ŵakamupulikiranga. Nanga mpha nyengo iyo ŵanthu ŵake ŵakandana chomene, Yehova wakalutilira kuŵatumbika mwauzimu

MAZUŴA GHANO: Mu paradiso wauzimu namo, ŵanthu ŵanandi ŵakutumbikika na unenesko wa mu Baibolo ndipo ŵamba kusambira vya Yehova kweniso kukolerana na ŵanthu awo ŵakumusopa munthowa iyo wakukondwa nayo

KUNTHAZI: Ŵanthu awo ŵazamupona pa Aramagedoni, ŵazamuŵa pamoza na ŵanthu mamiliyoni ghanandi awo ŵazamuwuskika, ndipo wose Yehova wazamuŵatumbika chomene

12. (a) Kasi tili na ukaboni wuli wakuti uthenga wa unenesko wapeleka umoyo uwemi wauzimu ku ŵanthu? (b) Kasi mboniwoni iyi yili na chenjezgo wuli kwa ise mazuŵa ghano? (Wonaniso mazgu ghamusi.)

¹² Maji ghakupa umoyo. Ezekiyeli wakaphalirika kuti: “Kose uko mlonga uwu ukulazga chilichose chamuŵa chamoyo.” Ghanaghanirani umo uthenga wa unenesko wafikira ku wose awo ŵiza mu charu chithu chauzimu. Unenesko wa mu Baibolo wapeleka umoyo wauzimu ku ŵanthu mamiliyoni awo ŵawupokelera. Kweni mboniwoni iyi yiliso na chenjezgo lakuti: Ni wose yayi awo ŵakulutilira kukoleska unenesko uwu. Nga ni visapa na madambo gha ku Nyanja Yakufwa ivyo Ezekiyeli wakawona mu mboniwoni, pali ŵanthu ŵanyake awo mbanonono mtima, ŵakukhumba yayi kupokera unenesko na kuwulondezga.c Ise tingaŵanga na mtima wanthena yayi.—Ŵazgani Dotoronome 10:16-18.