Kasi muli kujifumbapo kuti: ‘Ntchivichi chikuchitika para munthu wafwa? Kasi ŵabali ŵithu awo ŵali kufwa ŵakusuzgika ku malo ghanyake? Kasi tizamuŵawonaso? Kasi tingasimikizga wuli kuti tizamuŵawonaso?’ Wonani ivyo Malemba ghakusambizga pa nkhani iyi. Chakwamba, tiyeni tiwone ivyo Baibolo likuyowoya pa nkhani ya nyifwa. Pamasinda tiwonenge ivyo Baibolo likulayizga ku awo ŵali kufwa.

Kasi ŵakufwa ŵakumanya kalikose?

IVYO BAIBOLO LIKUYOWOYA: ‘Ŵamoyo ŵakumanya kuti ŵafwenge, kweni ŵakufwa ŵakumanya kanthu chara, nanga nkhuŵa nayo njombe; kweni chikumbukiro chawo ntchakuluwika. Chose icho woko lako lasanga kuchita, chichita na nkhongono zako; chifukwa kulije mulimo, panji maghanoghano, panji mahara, panji vinjeru, mu malaro uko ukuya.’a—Mupharazgi 9:5, 10.

Mwakudumura, ŵanthu para ŵafwa ŵakuluta ku Dindi. Ku malo agha munthu wakumanya chilichose yayi, nesi kugwira ntchito. Kasi Yobu, munthu wakugomezgeka wakatenge Dindi ni vichi? Yobu wakataya vinthu vyake vyose pamoza na ŵana ŵake mu zuŵa limoza. Pamanyuma wakakomwa na mapumba ghakuŵinya agho ghakataka thupi lake lose. Wakalomba Chiuta kuti: “Okwe, mphanyi mwandibisa mu dindi, mundisunge mu ubende.” (Job 1:13-19; 2:7; 14:13) Apa vikulongora kuti Yobu wakamanyanga kuti Dindi ni ng’anjo yamoto yayi, chifukwa mphanyi ndiko wakasuzgikaso chomene. Kweni wakamanyanga kuti ni malo ghakupumulirako.

Paliso nthowa yinyake iyo tingamanyira ivyo vikuchitika para munthu wafwa. Mu Baibolo muli nkhani za ŵanthu 8 awo ŵakafwa, kweni ŵakawuka.—Wonani bokosi lakuti, “Ŵanthu 8 Awo Baibolo Likuti Ŵakawuka ku Ŵakufwa.”

Pa ŵanthu wose 8 ŵara, palije uyo wakayowoyapo kuti wakaŵa ku malo uko wakakhalanga mwakukondwa panji wakasuzgikanga. Ŵanthu ŵara ŵaŵenge kuti ŵakaluta ku malo ghanthena agha, asi mphanyi ŵakayowoya? Asi mphanyi vili kulembekaso mu Baibolo kuti waliyose wajiŵazgirenge yekha? Mu Baibolo, mundalembekemo nkhani zanthena izi. Vikuwoneka kuti ŵanthu wose 8 ŵara ŵakayowoyapo chilichose yayi pa nkhani iyi. Chifukwa wuli ŵakayowoyapo yayi? Chifukwa ntchakuti ŵakamanyanga kalikose yayi, ŵakaŵa nga ŵali mu tulo twakufwa nato. Nakuti nyengo zinyake, Baibolo likuyaniska nyifwa na tulo. Mwachiyelezgero, Baibolo likuti Davide na Stefano ‘ŵakagona tulo mu nyifwa.’—Milimo 7:60; 13:36.

Sono kasi awo ŵali kufwa mbwenu kuli kumara waka? Kasi ŵazamuwuka?

Kasi ŵakufwa ŵangaŵaso ŵamoyo?

IVYO BAIBOLO LIKUYOWOYA: ‘Ora likwiza mu leneilo wose awo ŵali mu malaro gha chikumbusko ŵazamupulika lizgu [la Yesu] na kufumira kuwaro.’—Yohane 5:28, 29.

Yesu wakalongora kuti kunthazi, apo iyo wazamulamulira mu Ufumu wake, ŵanthu ŵazamufumamo mu Dindi. Fernando, uyo wazunulika mu nkhani iyo yajumpha, wakati: “Nkhazizwa chomene nkhati naŵazga lemba la Yohane 5:28, 29 kakwamba. Likanikwezga nkhongono, ndipo nkhamba kuŵa na chigomezgo kuti kunthazi vinthu vizamuŵa makora.”

Kale, munthu munyake zina lake Yobu wakagomezganga kuti para wafwa Chiuta wazamumuwuska. Yobu wakafumba kuti: ‘Usange munthu wafwa, kasi wangaŵaso wamoyo?’ Kufuma apo, wakayowoya kuti: ‘Mazuŵa ghose gha kuteŵetera kwane nilindilirenge m’paka kusutuka kwane kwize. Muchemenge ndipo ine nimuzgoraninge.’—Job 14:14, 15.

Nkhani yakuti ŵakufwa ŵazamuwuka yikaŵa yachilendo yayi kwa Marita, mudumbu wa Lazaro. Lazaro wakati wafwa, Yesu wakati kwa Marita: “Mudumbu wako wawukenge.” Marita wakati: ‘Nkhumanya kuti wazamuwuka pa chiwuka mu zuŵa laumaliro.’ Yesu wakatiso kwa iyo: ‘Ndine chiwuka na umoyo. Uyo wakupulikana mwa ine, nanga wafwe, waŵenge wamoyo.’ (Yohane 11:23-25) Kufuma apo, Yesu wakawuska Lazaro ku ŵakufwa. Ivyo vikachitika apa vikutovwira kuŵa na chithuzithuzi cha vinthu vikuru ivyo vizamuchitika kunthazi. Muŵe nga mukuwona ŵanthu ŵakuwuskika pa charu chose chapasi!

Kasi ŵanyake ŵazamuwuka na kuluta kuchanya?

IVYO BAIBOLO LIKUYOWOYA: Baibolo likutiphalira kuti chiwuka cha Yesu chikupambana chomene na chiwuka cha ŵanthu 8 awo ŵakuzunulika mu Baibolo. Ŵanthu 8 awo ŵakawuka, ŵakakhalangaso pano pa charu chapasi. Kweni pakuyowoya vya Yesu, Baibolo likuti: ‘Yesu Khristu wali ku woko lamalyero la Chiuta, pakuti wakaluta kuchanya.’ (1 Petrosi 3:21, 22) Kasi ni Yesu pera uyo wakawuka na kuluta kuchanya? Yesu wakaŵa kuti waphalira kale ŵapositole ŵake kuti: “Usange nkhuluta kukamunozgerani malo, nkhwizaso ndipo nizamupokelera imwe kwa namwene, mwakuti uko ine nili ndiko namwe muŵenge.”—Yohane 14:3.

Khristu wakaluta kuchanya ndipo wakanozgera malo ŵasambiri ŵake ŵanyake. Awo ŵawuskikenge na kuluta kuchanya ŵakwenera kukwana 144,000. (Uvumbuzi 14:1, 3) Kweni kasi ŵanthu aŵa ŵamuchitako vichi kuchanya?

Ŵanthu aŵa ŵamuŵa na ntchito zinandi chomene! Baibolo likutiphalira kuti: ‘Wakukondwa na mutuŵa ni uyo wali na chigaŵa mu chiwuka chakwamba; pa ŵeneaŵa nyifwa yachiŵiri yilije mazaza, kweni ŵazamuŵa ŵasofi ŵa Chiuta na ŵa Khristu, ndipo ŵazamuwusa nga ni mathemba pamoza na iyo vilimika 1,000.’ (Uvumbuzi 20:6) Awo ŵawuskika na kuluta kuchanya ŵazamuŵa mafumu na ŵasofi pamoza na Khristu, ndipo ŵazamulongozga charu chapasi.

Kasi mbanjani awo ŵazamuwuskika pamanyuma?

IVYO BAIBOLO LIKUYOWOYA: Baibolo lili na mazgu agho mpositole Paulosi wakayowoya, ghakuti: ‘Nili na chigomezgo mwa Chiuta, chigomezgo icho ŵanthu aŵa nawo ŵali nacho, chakuti kuzamuŵa chiwuka cha ŵarunji na ŵambura urunji wuwo.’—Milimo 24:15.

Kasi mbanjani ŵanyake awo ŵazamuŵa mu gulu la awo Paulosi wakati “ŵarunji”? Wonani chiyelezgero ichi. Daniyeli, munthu wakugomezgeka wakaphalirika kuti: ‘Wamupumura, kweni wamwimilira mu malo ghako paumaliro wa mazuŵa.’ (Daniel 12:13) Kasi Daniyeli wazamuwukira nkhu? Baibolo likuti: ‘Ŵakunyoloka ŵamkuhara charu na kukhala mwenemumo kwandanda.’ (Salmo 37:29) Yesu wakayowoya kuti: ‘Mbakukondwa awo mbakuzika, pakuti ŵazamuhara charu chapasi.’ (Mateyu 5:5) Daniyeli pamoza na ŵanalume na ŵanakazi ŵanyake ŵakugomezgeka ŵazamuwuka na kukhalaso pa charu chapasi muyirayira.

Kasi mbanjani ŵanyake awo ŵazamuŵa mu gulu ilo Paulosi wakati “ŵambura urunji”? Mbanthu mabiliyoni ghanandi awo ŵali kufwa, kweni ŵakaŵavya mwaŵi wakuti ŵasambire Baibolo na kulondezga fundo zake. Para ŵanthu aŵa ŵazakawuka, ŵazamovwirika kuti ŵamanye Yehovaa na Yesu. (Yohane 17:3) Wose awo ŵazamusankha kuteŵetera Chiuta ŵazamuŵa na chigomezgo cha kukhala kwamuyirayira.

Kasi charu chapasi chizamuŵa wuli pa nyengo iyo?

IVYO BAIBOLO LIKUYOWOYA: Chiuta ‘wazamufyura sozi lililose ku maso ghawo, ndipo nyifwa yizamuŵakoso chara, nesi kutengera panji kutampha nesi vyakuŵinya vizamuŵakoso chara.’ (Uvumbuzi 21:4) ‘Ŵanthu ŵazamuzenga nyumba na kukhalamo; ŵazamupanda mpheska na kurya vipasi vyake.’—Yesaya 65:21.

Vizamuŵa vyakunozga nadi kukhala mu charu chanthena ichi pamoza na ŵabali ŵinu awo ŵawuka ku ŵakufwa. Kweni fumbo ndakuti, Kasi mungagomezga wuli kuti ŵakufwa ŵazamuwuka nadi?

Kasi mbuzeleza kughanaghana kuti ŵakufwa ŵazamuŵaso ŵamoyo? Mpositole Paulosi wakawona kuti mbuzeleza yayi. Mu nkhongono ya Chiuta, iyo wakalemba kuti: ‘Usange mu umoyo uno pera tagomezga mwa Khristu, ipo pa ŵanthu wose tikwenera kulengekera chitima chomene. Ndipouli, Khristu wali kuwuskika ku ŵakufwa, chipambi chakwamba cha awo ŵali kugona tulo mu nyifwa.’ (1 Ŵakorinte 15:19, 20) Paulosi wakagomezganga kuti ŵakufwa ŵazamuwuka nadi. Ukaboni wakuti ŵanthu ŵazamuwuka nadi nkhuwuka kwa Yesu.a (Milimo 17:31) Lekani Paulosi wakati Yesu ‘ntchipambi chakwamba,’ chifukwa ndiyo wakaŵa wakwamba kuwuskikira ku umoyo wamuyirayira. Usange Yesu wakaŵa wakwamba kuwuka, ipo paliso ŵanyake awo ŵazamuwuka.

Paliso chifukwa chinyake icho mungagomezgera kuti ŵakufwa ŵazamuwuka. Yehova ni Chiuta wa unenesko. ‘Chiuta wangateta chara.’ (Tito 1:2) Yehova wandatetepo, ndipo wazamutetapo yayi. Kasi wangayowoya waka kuti ŵakufwa ŵazamuwuka, na kupeleka ukaboni, mbwenu wasinthe na kuleka kufiska? Ichi chingachitika yayi.

Chifukwa wuli Yehova wakukhumba kuti wazakawuske ŵakufwa? Chifukwa ntchakuti iyo ngwachitemwa. Yobu wakafumba kuti: ‘Usange munthu wafwa, kasi wangaŵaso wamoyo? Muchemenge ndipo ine nimuzgoraninge; panji munganwekera mulimo wa mawoko ghinu.’ (Job 14:14, 15) Yobu wakagomezganga kuti Chiuta wazamukhumbisiska kumuwuska. Kasi Chiuta wali kusintha? Yayi. Baibolo likuti: ‘Ine Yehova kuti nkhuzgoka chara.’ (Malaki 3:6) Chiuta wachali wakukhumbisiska kuti ŵakufwa ŵaŵeso ŵamoyo, ŵakhale na umoyo uwemi kweniso mwakukondwa. Ivi ndivyo mupapi waliyose wakukhumba kuti para mwana wake wafwa waŵeso wamoyo. Kweni mphambano njakuti Chiuta wali na nkhongono zakuchitira ivyo wakukhumba.—Salmo 135:6.

Yehova wazamupeleka nkhongono kwa Mwana wake kuti wazakaŵape chimwemwe chikuru awo ŵakulira ŵabali ŵawo awo ŵali kufwa. Kasi Yesu wakujipulika wuli para ŵanthu ŵakufwa? Pambere wandawuske Lazaro, Yesu wakawona kuti ŵadumbu ŵa Lazaro na ŵabwezi ŵawo ŵakaŵa na chitima chikuru, ndipo nayo “wakathiska masozi.” (Yohane 11:35) Nyengo yinyake, Yesu wakakumana na chokoro cha ku Nayini, icho mwana wake yekha na yekha wakafwa. Yesu ‘wakamuchitira chitima mama yura ndipo wakati kwa iyo: “Leka kulira.”’ Nyengo yeneyiyo wakawuska mwana yura. (Luka 7:13) Ntheura Yesu chitima chikumukora para ŵanthu ŵakulira kweniso ŵakufwa. Nayo wazamukondwa chomene apo wazamuzgora chitima cha ŵanthu kuŵa chimwemwe pa charu chose!

Kasi namwe chitima chili kumukoranipo? Mungawona nga kuti nyifwa ni suzgo ilo lingamara yayi. Kweni lizamumara, para Chiuta kwizira mwa Mwana wake wazakawuska ŵakufwa. Kumbukani kuti Chiuta wakukhumba kuti namwe muzakaŵepo apo suzgo ili lizamumalira. Wakukhumba kuti muzakavumbatiraneso na ŵakutemweka ŵinu. Vizamuŵa vyakunozga kuchitira vinthu pamoza kwamuyirayira, kwambura kulekanaso.

Lionel, uyo wazunulika mu nkhani yakwamba, wakati: “Paumaliro nkhasambira kuti ŵakufwa ŵazamuwuka. Pakwamba, vikanisuzga kugomezga, ndipo nkhamugomezga yayi munthu uyo wakanisambizganga vinthu ivi. Kweni nkhati nawona mu Baibolo nkhasanga kuti mbunenesko. Nkhukhazga waka kuti nizakawoneso asekuru ŵane.”

Kasi mukukhumba kumanya vinandi? Ŵakaboni ŵa Yehova mbakunozgeka kumulongorani mu Baibolo linu chifukwa icho ŵakugomezgera kuti ŵakufwa ŵazamuwuka nadi.b