1. Chifukwa wuli kanandi tikuzura mazgu gha pa Mateyu 6:9-13 para tikupharazga?

ŴANTHU ŵanandi ŵakughamanya mazgu gha mu lurombo lwa Yesu agho ghali pa Mateyu 6:9-13. Kanandi tikuzunura mazgu gha mu lurombo ulu kuti tovwire ŵanthu kumanya kuti Ufumu wa Chiuta ni boma la kuchanya ilo lizamuzgora charu kuŵa paradiso. Mazgu ghakuti, “zina linu lituŵiskike,” ghakulongora kuti Chiuta wali na zina ndipo ndakupatulika.—Mat. 6:9.

2. Kasi tikumanya wuli kuti Yesu wakakhumbanga yayi kuti pakulomba tilondezgenge waka ivyo wakayowoya?

² Kasi Yesu wakang’anamuranga kuti nyengo zose para tikulomba tiwerezgenge waka ivyo wakayowoya? Yayi. Yesu wakati: ‘Para ukulomba, ungayowoyanga vinthu vimoza pera mwakuwerezgawerezga chara.’ (Mat. 6:7) Zuŵa linyake apo wakasambizganga ŵasambiri ŵake kulomba, wakalomba ndendende umo wakalombera pakwamba yayi. (Luka 11:1-4) Yesu wakasambizga vinthu ivyo tikwenera kulomba, kweniso ivyo vikwenera kuŵa pakwamba. Lekani lurombo ulu lukuchemeka lwachiyelezgero.

3. Kasi tikwenera kujifumba mafumbo wuli?

³ Mu nkhani iyi na yakulondezgapo, tisambirenge ivyo Yesu wakayowoya mu lurombo ulo wakasambizga ŵasambiri ŵake. Ntheura tikwenera kujifumba kuti: Kasi ivyo wakayowoya vinganovwira wuli kuti nilombenge makora? Kasi nkhuchita ivyo Yesu wakayowoya?

“ŴADADA ŴITHU IMWE MULI KUCHANYA”

4. Kasi mazgu ghakuti “Ŵadada ŵithu” ghakutisambizga vichi? Chifukwa wuli tikuti Yehova ni “Dada” withu?

⁴ Pakulomba Yesu wakamba na mazgu ghakuti, “Ŵadada ŵithu.” Mazgu agha ghakutisambizga kuti Yehova ni Dada wa ŵabali na ŵadumbu ŵithu pa charu chose chapasi. (1 Pet. 2:17) Awo Yehova waŵasankha kuti ŵakakhale kuchanya ŵakumuchema kuti ‘Adada.’ (Rom. 8:15-17) Awo ŵazamukhala pa charu chapasi kwamuyirayira nawo ŵakuchema Yehova kuti ‘Adada.’ Vili nthena chifukwa Yehova ndiyo wakaŵalenga ndipo wakuŵapwelelera. Awo ŵazamukhala pa charu chapasi, ŵazamuchemeka ‘ŵana ŵa Chiuta’ para ŵazakazgoka ŵarunji ndiposo para ŵagomezgeka pa chiyezgo chaumaliro.—Rom. 8:21; Uvu. 20:7, 8.

5, 6. Kasi ŵapapi ŵakwenera kuchita vichi? Kasi mwana waliyose wakwenera kuchita vichi? (Wonani chithuzithuzi chakwamba.)

⁵ Ŵapapi ŵangachita makora chomene usange ŵangasambizga ŵana ŵawo umo ŵangalombera kweniso kumanya kuti Yehova ni dada wawo. Mulaŵiliri wa dera munyake ku South Africa wakati: “Kufuma apo ŵana ŵane ŵakababikira, mise yiliyose para nilipo nkhalombanga nawo. Nangauli ŵakukumbuka yayi ivyo nkhayowoyanga mu lurombo, kweni ŵakukumbuka kuti para tikulomba ŵakajipulikanga kuti ŵali pafupi chomene na Yehova ndipo ŵakawonanga kuti mbakuvikilirika. Nkhamba kuŵasambizga umo ŵangalombera kwa Yehova ŵachali ŵachoko. Nkhaŵachiskanga kuti para ŵakulomba, ŵafumiskenge mazgu. Ivi vikanovwiranga kuti nipulike ivyo ŵakalombanga na kumanya ivyo vili mu mitima yawo. Ntheura nkhaŵasambizga kuti ŵazunurenge fundo zakuzirwa za mu lurombo lwa Yesu.”

⁶ Ŵana ŵake ŵakalutilira kutemwa Yehova. Pasono ŵali kutengwa ndipo ŵakuchita uteŵeti wanyengozose na ŵafumu ŵawo. Chinthu chakuzirwa chomene icho ŵapapi ŵakwenera kuchita ndicho kusambizga ŵana ŵawo kuti ŵaŵe paubwezi na Yehova. Kweni mwana waliyose wakwenera kukhozga ubwezi wake na Yehova.—Sal. 5:11, 12; 91:14.

“ZINA LINU LITUŴISKIKE”

7. Kasi tili na mwaŵi wuli ndipo tikwenera kuchita vichi?

⁷ Tili na mwaŵi wapadera chomene. Tamanya zina la Chiuta kweniso tikumanyikwa na “zina lake.” (Mil. 15:14; Yes. 43:10) Nyengo zose tikulomba kuti zina la Chiuta “lituŵiskike.” Tikulomba Yehova kuti watovwire kugega kuchita chilichose icho chingatukiska zina lake. Tileke kuchita vinthu nga Mbakhristu ŵanyake ŵakwambilira awo Paulosi wakaŵaphalira kuti: “Zina la Chiuta likuyuyulika pakati pa mitundu chifukwa cha imwe.”—Rom. 2:21-24.

8, 9. Yowoyani chiyelezgero icho chikulongora kuti Yehova wakovwira ŵanthu awo ŵakukhumba kutuŵiska zina lake.

⁸ Tikuchita chilichose kuti tichindike zina la Chiuta. Mudumbu munyake wa ku Norway mfumu wake wakafwa apo mwana wake wakaŵa na vyaka viŵiri. Mudumbu uyu wakati: “Vikaŵa vyakusuzga chomene. Nkhalombanga zuŵa na zuŵa pafupifupi ora lililose. Nkhamulombanga kuti wanipe nkhongono zakuzizipizgira kweniso kuti nileke kuchita chilichose icho chingapangiska Satana kunyoza Yehova. Nkhakhumbanga kutuŵiska zina la Yehova kweniso kuti mwana wane wazakawone adada ŵake mu Paradiso.”—Zinth. 27:11.

⁹ Kasi Yehova wakazgora lurombo lwake? Enya. Ŵabali na ŵadumbu ŵakamukhozga chomene. Pakati pajumpha vyaka 5, wakatengwa kwa mulara mu mpingo. Mwana wake uyo sono wali na vyaka 20 wali kubatizika. Mudumbu uyu wakati: “Ndine wakukondwa chomene kuti mfumu wane wakanovwira kulera mwana uyu.”

10. Kasi Yehova wazamutuŵiska wuli zina lake?

¹⁰ Yehova wazamutuŵiska chomene zina lake para wazakawuskapo ŵanthu wose awo ŵakukana Ufumu wake. (Ŵazgani Ezekiel 38:22, 23.) Panyengo iyo, ŵanthu ŵazamuŵaso ŵarunji ndipo waliyose kuchanya na pa charu chapasi wazamusopanga Yehova. Paumaliro, Yehova wazamuŵa “vinthu vyose kwa waliyose.”—1 Kor. 15:28.

“UFUMU WINU WIZE”

11, 12. Kasi Ŵasambiri ŵa Baibolo ŵakamanya vichi mu 1876?

¹¹ Pambere Yesu wandalute kuchanya, ŵasambiri ŵake ŵakamufumba kuti: “Fumu, kasi mukuwezgera ufumu kwa Israyeli pa nyengo iyi?” Yesu wakaŵazgora kuti nyengo yindakwane kuti ŵamanye apo Ufumu wa Chiuta wambirenge kulamulira. Kweni wakaŵachiska kuti ŵakwenera kulimbikira chomene kupharazga. (Ŵazgani Milimo 1:6-8.) Wakaŵaphaliraso kuti ŵalombenge kuti Ufumu wa Chiuta wize na kulindilira waka apo wizirenge. Lekani tichali kulomba kuti Ufumu uwu wize.

¹² Apo Yesu wakaŵa pafupi kwamba kulamulira, Yehova wakawovwira Ŵasambiri ŵa Baibolo kuti ŵamanye chaka icho wambirenge kulamulira. Mu 1876, Charles Taze Russell wakalemba nkhani ya mutu wakuti: “Nyengo za Ŵamitundu, Kasi Zizamumara Pawuli?” mu magazini ya Bible Examiner. Wakalongosora kuti, ‘nyengo zinkhondi na ziŵiri’ izo zikuzunulika mu uchimi wa mu buku la Daniel zikuyana waka na “nyengo zakutemeka za ŵamitundu” izo Yesu wakayowoya mu uchimi wake. Nkhani iyi yikayowoya kuti nyengo izi zizamumara mu 1914.a—Dan. 4:16; Luka 21:24.

13. Kasi ntchivichi chikachitika mu 1914, ndipo ivyo vikuchitika mu charu vikulongora vichi?

¹³ Mu 1914, ku Europe kukambika nkhondo iyo yikathandazgika pa charu chose. Nkhondo iyi yikapangiska kuti paŵe njara yikuru. Kuumaliro wa 1918, nthenda ya fuluwenza yikakoma ŵanthu ŵanandi chomene kuluska awo ŵakafwa pa nkhondo. Ivi vikaŵa vinyake mwa vimanyikwiro ivyo Yesu wakayowoya. Vimanyikwiro ivi vikulongora kuti Yesu wakamba kulamulira kuchanya mu 1914. (Mat. 24:3-8; Luka 21:10, 11) Mu 1914, Yesu “wakaluta kukatonda na kumalizga kutonda kwake.” (Uvu. 6:2) Wakaponya Satana na viŵanda vyake pa charu chapasi. Ivi vikati vyachitika, uchimi ukafiskika wakuti, ‘soka ku charu chapasi na nyanja, chifukwa Dyabulosi wakhilira pasi kwa imwe, wali na ukali ukuru, pakumanya kuti wali na nyengo yifupi.’—Uvu. 12:7-12.

14. (a) Chifukwa wuli tikulomba kuti Ufumu wa Chiuta wize? (b) Kasi ni ntchito wuli yakuzirwa iyo tikwenera kuchita?

¹⁴ Yesu wakati wamba kulamulira kuchanya, vinthu vikahenipa chomene pa charu chapasi. Uchimi wa mu Uvumbuzi 12 ukutovwira kupulikiska chifukwa icho vinthu vikahenipira nthena. Yesu wali kwamba kulamulira kuchanya, Satana wachali kulamulira charu chapasi. Kweni sonosono apa, Yesu wamalizgenge “kutonda kwake” para wafumiskapo uheni wose pa charu. Tilekenge yayi kupharazga na kulomba Ufumu wa Chiuta m’paka apo masuzgo ghazamumalira. Para tikupharazga, tikufiska uchimi wa Yesu wakuti: “Makani ghawemi agha gha ufumu, ghazamupharazgika mu charu chose kuti uŵe ukaboni ku mitundu yose; penepapo ndipo umaliro wizenge.”—Mat. 24:14.

‘KHUMBO LINU LICHITIKE PA CHARU CHAPASI’

15, 16. Padera pakulomba kuti khumbo la Chiuta lichitike pano pasi, kasi tikwenera kuchitaso vichi?

¹⁵ Pakwamba, khumbo la Chiuta likachitikanga pa charu chapasi. Lekani Yehova wakayowoya kuti vinthu vyose ‘vikaŵa viwemi chomene.’ (Gen. 1:31) Pamasinda, Satana wakagaluka na kupangiska ŵanthu ŵanandi kuti ŵaleke kuchita khumbo la Yehova. Kweni sono, pali ŵanthu ŵakujumpha 8 miliyoni awo ŵakuteŵetera Yehova. Iwo ŵakuchita khumbo la Chiuta ndipo ŵakulomba kuti lichitike pano pasi. Ŵakukondweska Yehova na kusambizga ŵanthu vya Ufumu wake.

¹⁶ Mudumbu munyake wa vyaka 80 uyo wakaŵa mishonale mu charu chinyake kuno ku Africa, wakabatizika mu 1948. Iyo wakati: “Nkhulombera ŵanthu wose awo ŵakukhumba nadi kumanya Yehova kuti mphanyi ŵasambira pambere umaliro undize. Pambere nindambe kupharazgira munthu, nkhwamba dankha kulomba kuti ni mufike pamtima. Kweniso nkhulomba Yehova kuti watovwire kupwelelera ŵanthu wose awo ŵali kusambira kale unenesko.” Mudumbu uyu wawovwira ŵanthu ŵanandi kuti ŵamanye Yehova. Kasi namwe mukumanyapo mubali panji mudumbu muchekuru uyo wakulimbikira kuchita khumbo la Yehova?—Ŵazgani Ŵafilipi 2:17.

17. Kasi mukujipulika wuli na ivyo Yehova wazamuchitira ŵanthu pa charu chapasi?

¹⁷ Tilutilirenge kulomba kuti Ufumu wize m’paka Yehova wazakawuskepo ŵalwani wose pa charu chapasi. Para Ufumu wiza, charu chizamuŵa paradiso ndipo ŵanthu mabiliyoni ghanandi awo ŵali kufwa ŵazamuwuka. Yesu wakati: ‘Ora likwiza mu leneilo wose awo ŵali mu malaro gha chikumbusko ŵazamupulika lizgu lake na kufumira kuwaro.’ (Yoh. 5:28, 29) Tizamukondwa chomene kupokelera ŵabali ŵithu awo ŵazamuwuskika. Chiuta “wazamufyura sozi lililose ku maso ghawo.” (Uvu. 21:4) Ŵanthu ŵanandi “ŵambura urunji” ŵazamuwuskika. Ŵanthu “ŵambura urunji” ni awo ŵakafwa pambere ŵandasambire vya Yehova na Yesu. Ntheura tizamukondwa kuŵasambizga kuti nawo ŵamanye khumbo la Chiuta na kukhala na “umoyo wamuyirayira.”—Mil. 24:15; Yoh. 17:3.

18. Kasi ntchivichi chizamuchitika para Ufumu wa Chiuta wamba kulamulira charu?

¹⁸ Para Ufumu wa Chiuta wazakamba kulamulira pa charu chapasi, uzamutuŵiska zina la Chiuta ndipo tose tizamusopa Yehova mwakukolerana. Pa nyengo iyo, Chiuta wazamutipa vyose ivyo tikukhumba. Mu nkhani yakulondezgapo tizamusambira vinthu vinyake ivyo Yesu wakati tilombenge.

1-3. Kasi Yehova wakazgora wuli lurombo lwa Lana?

MU 2012, mupayiniya munyake zina lake Lana, wakaluta ku Germany. Iyo wakuti wazamuluwa yayi icho chikachitika pa ulendo uwu. Wakalomba vinthu viŵiri ndipo Yehova wakamuzgora. Chakwamba, apo wakalutanga kukakwera ndege, wakalomba kuti wasange munthu wakuti wangamupharazgira. Wakati wafika ku chiŵanja, ŵakamuphalira kuti ndege yinyamukenge namachero. Wakalombaso kuti Yehova wamovwire chifukwa wakaŵavya ndalama zakukwana kuti wasange kwakugona.

² Wakati wamara waka kulomba, pakiza munyamata uyo kale ŵakasambiranga lumoza. Wakaŵa na amama na agogo ŵake awo ŵakamupelekezganga. Munyamata uyu wakalutanga ku South Africa. Lana wakaŵalongosolera suzgo lake ndipo agogo na amama ŵa munyamata uyu ŵakaluta nayo ku nyumba kwawo. Ŵakamufumba mafumbo ghanandi gha ivyo wakugomezga kweniso ntchito ya kupharazga iyo wakuchita.

³ Kukati kwacha, Lana wakaŵazgora mafumbo ghanandi agho ŵakamufumba. Wakaŵapempha kuti ŵamupe adiresi yawo kuti Kaboni munyake wazakalutizge kusambira nawo Baibolo. Lana wakawelera kwawo ndipo wachali kuchita upayiniya. Iyo wakukayika yayi kuti Yehova, uyo ‘wakupulika malurombo’ wakamupa ivyo wakakhumbikwiranga.—Sal. 65:2.

4. Kasi mu nkhani iyi tisambirenge vichi?

⁴ Usange tasangana na masuzgo tikulomba Yehova kuti watovwire. Iyo ngwakunozgeka kutovwira. (Sal. 34:15; Zinth. 15:8) Kweni lurombo lwa Yesu lukutovwira kumanya kuti paliso vinyake ivyo tikwenera kulomba. Mu nkhani iyi, tisambirenge vinthu vinayi ivyo Yesu wakati tilombenge. Vinthu ivi vingatovwira kuti tilutilire kugomezgeka kwa Yehova.—Ŵazgani Mateyu 6:11-13.

‘MUTIPE MUHANYA UNO CHAKURYA CHITHU CHA ZUŴA ILI’

5, 6. Chifukwa wuli Yesu wakati tilombenge kuti Chiuta watipe ‘chakurya chithu’?

⁵ Yesu wakati tilombenge kuti Chiuta watipe ‘chakurya chithu.’ Iyo wakayowoyapo yayi kuti titenge munipe ‘chakurya chane.’ Victor, mulaŵiliri wa dera kuno ku Africa wakati: “Ine na muwoli wane tikuwonga chomene Yehova chifukwa wakutipwelelera. Tikufipa mtima yayi kuti tiryenge vichi panji tigonenge nkhu. Zuŵa lililose ŵabali ŵakutovwira. Tikulombera ŵabali kuti Yehova walutilire kuŵawovwira.”

⁶ Nyengo zinyake ise tingaŵa na chakurya chakukwana. Ndipouli, ŵabali ŵithu ŵanandi mbakavu ndipo ŵanyake ŵakukumana na masoka ghachilengiwa. Tikwenera kuŵalombera na kuŵawovwira. Tingaŵapako ivyo tili navyo. Tingaŵawovwira para tikupeleka ndalama zakovwira ntchito yakupharazga pa charu chose. Ndalama izo tikupeleka zikovwiraso ŵabali ŵithu awo ŵakumana na masuzgo.—1 Yoh. 3:17.

7. Kasi Yesu wakayowoya vichi kuti watovwire kuti tileke kwenjerwa na “vya zuŵa lakulondezgapo”?

⁷ Yesu wati wasambizga ŵasambiri ŵake umo ŵangalombera, wakaŵaphaliraso kuti ŵaleke kutemwa chomene vinthu vyakuthupi. Iyo wakati usange Yehova wakupwelelera maluŵa ghakuthengere, ‘asi kwakuluska wavwalikenge imwe, ŵachipulikano chichoko? Ntheura kwenjerwa chara napachoko na kuyowoya kuti . . . “Tivwarengechi?”’ Paumaliro wakayowoyaso kuti: ‘Kwenjerwa chara napachoko vya zuŵa lakulondezgapo.’ (Mat. 6:30-34) Ntheura, nase tikwenera chara kufipa mtima na vinthu vyamunthazi, kweni tikhorwenge na ivyo tili navyo. Mwachiyelezgero, tingalomba Yehova kuti watovwire kusanga pakukhala, ntchito, ndiposo kuti watipe vinjeru kuti tichitenge vinthu mwamahara, chomenechomene para talwara. Kweniso pali vinthu vinyake vyakuzirwa chomene ivyo tingalomba.

8. Kasi mazgu ghakuti chakurya chithu ghakutikumbuska vichi? (Wonani chithuzithuzi chakwamba.)

⁸ Mazgu ghakuti chakurya chithu, ghakutikumbuskaso ivyo Yesu wakayowoya nyengo yinyake. Iyo wakati: ‘Munthu wakwenera kuŵa wamoyo na chingwa pera chara, kweni na lizgu lililose lakufuma mu mulomo wa Yehova.’ (Mat. 4:4) Ipo tilutilire kulomba kuti Yehova walutilire kutipa chakurya chauzimu pa nyengo yakwenelera.

“MUTIGOWOKERE NGONGOLI YITHU”

9. Kasi zakwananga zithu zili nga ni vichi? Longosorani.

⁹ Yesu wakati: “Mutigowokere ngongoli yithu.” Nyengo yinyake wakayowoyaso kuti: “Mutigowokere zakwananga zithu.” (Mat. 6:12; Luka 11:4) Wakayowoya nthena chifukwa zakwananga zithu zili nga ni ngongoli. Mu 1951, Gongwe la Mulinda likalongosora kuti para tachita kwananga vili nga kuti tili na ngongoli kwa Yehova. Nyengo zose tikwenera kupulikira na kumutemwa Yehova. Ntheura para tachita kwananga ndikuti tindamupulikire. Para Chiuta wangakhumba, wangatitaya ndipo ubwezi withu na iyo ungamara. Magazini iyi yikatiso: “Para tikuchita kwananga ndikuti tikumutemwa yayi Chiuta.”—1 Yoh. 5:3.

10. Kasi Yehova watipa vichi kuti zakwananga zithu zigowokereke? Kasi nase tikwenera kuchita vichi?

¹⁰ Tikuwonga chomene Yehova kuti wali kutipa mwana wake kuŵa sembe yakuwombora kuti zakwananga zithu zigowokereke. Yehova wakutigowokera zuŵa lililose. Yesu wakafwa vyaka 2,000 ivyo vyajumpha, kweni sembe yake yichali kugwira ntchito. Ntheura nyengo zose tikwenera kumuwonga Yehova chifukwa cha sembe iyi. Ni Yesu pera uyo wakaŵa wakwenelera kupeleka umoyo wake kuŵa sembe na kutiwombora ku kwananga na nyifwa. (Ŵazgani Salmo 49:7-9; 1 Petrosi 1:18, 19.) Mazgu ghakuti, “mutigowokere zakwananga zithu,” ghakung’anamura kuti tose tikukhumbikwira sembe ya Yesu kuti zakwananga zithu zigowokereke. Yehova wakukhumba kuti tose tiŵe nayo paubwezi. Ntheura para ŵanyithu ŵatibudira, tikwenera kuŵagowokera. Para tikuŵagowokera ndikuti tikuŵatemwa kweniso tikuwonga Yehova kuti wakutigowokera maubudi ghithu.—Kol. 3:13.

11. Chifukwa wuli tikwenera kugowokera ŵanyithu?

¹¹ Pakuti ndise ŵakwananga, ntchipusu yayi kugowokera awo ŵatibudira. (Lev. 19:18) Usange tamba kuphalira ŵanthu ŵanyake ivyo mubali withu watibudira, vingapangiska kuti ŵabali na ŵadumbu ŵaleke kukolerana mu mpingo. Para ndivyo tikuchita ndikuti tikuwonga yayi sembe ya Yesu ndipo yingagwira ntchito yayi kwa ise. Yehova wangatigowokera yayi usange tikuleka kugowokera ŵanyithu. (Ŵazgani Mateyu 6:14, 15; Mat. 18:35) Ntheura usange tikukhumba kuti Yehova watigowokere tikwenera kugega kuchita zakwananga.—1 Yoh. 3:4, 6.

‘MUNGATITOLERANGA MU KUYEZGEKA CHARA’

12, 13. (a) Kasi ntchivichi icho chikachitikira Yesu wati wabatizika waka? (b) Para tathera ku chiyezgo, chifukwa wuli tikwenera yayi kuyimba mulandu ŵanyithu? (c) Pakuti Yesu wakagomezgeka, kasi wakalongora vichi?

¹² Mazgu ghakuti, ‘mungatitoleranga mu kuyezgeka chara,’ ghakutikumbuska ivyo vikachitika Yesu wati wabatizika waka. Mzimu wa Chiuta ukamulongozgera ku mapopa “kukayezgeka na Dyabulosi.” (Mat. 4:1; 6:13) Chifukwa wuli Yehova wakazomerezga kuti Yesu wayezgeke? Adamu na Eva ŵakagalukira muwuso wa Yehova. Pa nkhani iyi, Satana wakawuska mafumbo ghanandi. Mwachiyelezgero, Kasi Yehova wakaŵalenga makora ŵanthu? Kasi munthu murunji wangalutilira kugomezgeka kwa Yehova usange wangayezgeka na “munthu muheni”? Kasi ŵanthu ŵangajiwusa yayi ŵekha? (Gen. 3:4, 5) Yesu wakagomezgeka kwa Yehova ndipo wakalongora kuti Satana ni mutesi. Usange mafumbo ghose agho Satana wakawuska ghazgoleka, ŵanthu wose ŵazamumanya kuti Yehova ni Fumu yiwemi.

¹³ Yehova ni mutuŵa. Ntheura wangayezga munthu waliyose na viheni yayi. Satana ndiyo wakuyezga ŵanthu. (Mat. 4:3) Satana wakutiyezga mu nthowa zinandi chomene. Kweni tili na wanangwa wakusankha. Tingakana panji tingazomerezga kuti Satana watiyezge. (Ŵazgani Yakobe 1:13-15.) Yesu wakakana kuti Satana wamuyezge. Wakazunura malemba kuti wazgore Satana. Iyo wakalutilira kugomezgeka kwa Yehova. Ndipouli, Satana wakalekera penepapo yayi. ‘Wakalindilira mpata unyake uwemi’ kuti wayezgeso Yesu. (Luka 4:13) Kweni Yesu wakalutilira kupulikira Yehova. Wakalongora kuti munthu murunji, nanga wangayezgeka wuli, wangagomezgeka kwa Yehova. Nase tingayezgeka kuti tileke kupulikira Yehova.

14. Kasi tingachita vichi kuti tigege viyezgo?

¹⁴ Nkhani iyo Satana wakayambiska yakususka Ufumu wa Chiuta yindamare. Lekani Yehova wali kuzomerezga kuti Satana watiyezge. Ntheura ni Yehova yayi uyo ‘wakutiyezga.’ Iyo wakumanya kuti tilutilirenge kugomezgeka kweniso ngwakunozgeka kutovwira. Kweni Yehova wakutichichizga yayi kuti tichitenge ivyo wakukhumba chifukwa wali kutipa wanangwa wa kusankha. Ntheura wakutizomerezga kuti tisankhe tekha kuŵa ŵakugomezgeka panji yayi. Pali vinthu viŵiri ivyo tingachita kuti tigege viyezgo. Tikwenera kuŵa paubwezi na Yehova kweniso kulomba nyengo zose. Kasi Yehova wakutizgora wuli para tikulomba kuti ‘mungatitoleranga mu kuyezgeka chara’?

15, 16. (a) Kasi tikwenera kuchenjera na vichi? (b) Usange tikuwonelera dala vinthu vyamuziro, kasi mulandu ngwa njani?

¹⁵ Yehova wakutipa mzimu wake kuti utikhozge na kutovwira kuti tileke kuthera para tikuyezgeka. Kwizira mu mpingo kweniso Baibolo wakutichenjezgerathu kuti tileke kumalira ndalama, nkhongono na nyengo yithu pa vinthu vyambura kuzirwa. Espen na muwoli wake Janne, ŵakukhala mu charu chinyake chisambazi ku Europe. Ŵakachita upayiniya vyaka vinandi mu charu chawo. Ŵakateŵeteranga uko ŵapharazgi ŵa ufumu mbachoko. Ŵakati ŵaŵa na mwana ŵakaleka upayiniya ndipo sono ŵali na ŵana ŵaŵiri. Espen wakati: “Nangauli sono tili na nyengo yichoko yakuchitira uteŵeti, kweni tikulomba Yehova kuti watovwire kulutilira kuchita vinthu vyauzimu.”

¹⁶ Kuwonelera vinthu vyamuziro ntchiyezgo chinyake icho tikwenera kugega. Usange tikuwonelera dala vinthu vyamuziro tileke kuyowoya kuti Satana ndiyo watipangiska. Chifukwa wuli? Chifukwa Satana wangatichichizga yayi kuti tichite vinthu ivyo ise tindakhumbe. Ŵanyake ŵakuwonelera vinthu vyamuziro chifukwa ŵakutemwa kughanaghana vinthu viheni. Ŵabali na ŵadumbu ŵanandi ŵakukana kuwonelera vinthu vyamuziro. Nase tingatonda chiyezgo ichi.—1 Kor. 10:12, 13.

“MUTIWOMBORE KWA MUHENI”

17. (a) Kasi tingachita wuli kuti Yehova watiwombore kwa muheni? (b) Kasi vinthu vizamuŵa wuli para Satana waparanyika?

¹⁷ Tikukhumba kuti Yehova ‘watiwombore kwa muheni.’ Kweni kasi tingalongora wuli kuti ndivyo tikukhumba nadi? Tileke kuŵa ku ‘chigaŵa cha charu.’ Kweniso ‘tingatemwanga charu chara nesi vinthu ivyo vili mu charu.’ (Yoh. 15:19; 1 Yoh. 2:15-17) Tizamukondwa chomene para Yehova wazakaparanya Satana na charu chiheni ichi. Kweni tikwenera kumanya kuti pasono Satana “wali na ukali ukuru, pakumanya kuti wali na nyengo yifupi.” Wakuyezgayezga chomene kuti watipatuske na kuleka kuteŵetera Yehova. Ntheura tikwenera kulutilira kulomba Yehova kuti watithaske kwa muheni uyu.—Uvu. 12:12, 17.

18. Kuti tizakanjire mu charu chiphya, kasi tikwenera kuchita vichi?

¹⁸ Satana wazamuŵamo yayi mu charu chiphya. Kasi tikukhumba kuzakakhala mu charu chambura Satana? Ipo tikwenera kulutilira kulomba kuti Ufumu wa Chiuta wize, zina la Chiuta lituŵiskike, kweniso kuti khumbo la Chiuta lichitike pano pasi. Nyengo zose tigomezgenge Yehova kuti watipwelelerenge na kutipa ivyo tikukhumbikwira kuti tilutilire kugomezgeka kwa iyo. Ntheura tiyeni tichitenge ivyo Yesu wakayowoya.