Cifukwa Wuli Tikupharazga?
1. Kasi pali kukolerana wuli pakati pa citemwa na kupharazga?
1 Pa vyose ivyo tikucita, mulimo wakupharazga makani ghawemi gha Ufumu wa Ciuta ndiwo ngwakuzirwa comene. Para tikupharazga, tikulongora kuti tikupulikira malango ghaŵiri ghakuzirwa comene pa malango ghose. Tikulongora kuti tikutemwa Yehova na ŵazengezgani ŵithu. (Mrk. 12:29-31) Citemwa ndico cikuticiska kuti tipharazgenge mwamwamphu.—1 Yoh. 5:3.
2. Kasi para tikupharazga tikulongora wuli kuti tikutemwa Yehova?
2 Kutemwa Yehova: Pakuti tikumutemwa comene Yehova, lekani tikukhalapo waka cete yayi usange ŵanji ŵakumuyowoyera viheni. Satana wamuyowoyera mautesi Ciuta kwa vyaka pafupifupi 6000. (2 Kor. 4:3, 4) Cifukwa ca mautesi gha Satana, ŵanthu ŵakugomezga kuti Ciuta wakulanga ŵakwananga mu moto, kuti kuli ŵaciuta ŵatatu, ndiposo kuti ŵanthu walije nawo nchito. Ŵanandi ŵafika na pakuyowoya kuti Ciuta kulije. Lekani tikukhumbisiska kuti ŵanthu ŵamumanye makora dada withu wakucanya. Para tikufwilirapo kupharazga makani ghawemi, tikukondweska Yehova na kukwiyiska Satana.—Zinth. 27:11; Heb. 13:15, 16.
3. Kasi para tikupharazga tikulongora wuli kuti tikutemwa ŵazengezgani?
3 Kutemwa Ŵazengezgani: Palipose apo tikupharazgira munthu, tikulongora kuti tikumutemwa. Ŵanthu ŵakwenera kupulika makani ghawemi mu mazuŵa ghanonono ghano. Ŵanandi ŵali nga mbanthu ŵa mu msumba wa Nineve mu nyengo ya nchimi Yona, awo ŵakamanyanga yayi kupambaniska pakati pa woko la malyero na woko la mazere. (Yona 4:11) Para tikupharazgira ŵanthu, tikuŵawovwira umo ŵangaŵira ŵacimwemwe, kweniso na umoyo uwemi. (Yes. 48:17-19) Tikuŵawovwira kuti ŵaŵe na cigomezgo. (Rom. 15:4) Usange ŵangapulikira na kucita ivyo ŵasambira, “ŵazamuponoskeka.” (Rom. 10:13, 14)
4. Kasi nchivici ico Yehova waluwenge yayi?
4 Ŵana ŵawemi ŵakutemwa ŵapapi ŵawo mwa apo na apo yayi. Kweni ŵakuŵatemwa nyengo zose. Mwakuyana waka, para tikutemwa Yehova pamoza na ŵazengezgani ŵithu, tipharazgenge nyengo zose, mwa apo na apo yayi. Tipharazgenge kwambura kuleka. (Mil. 5:42) Yehova waluwenge yayi citemwa ca nthena.—Heb. 6:10.