ŵanovwilire na ndopa zane ndikuti nakana kupimika ndopa, makina ghakusefa ndopa, panji makina agho ghakugwira ntchito nga ni mtima na maphapu?’

Mkhristu wakwenera kumanya yekha chakuchita pa umo ŵakwenera kuchitira na ndopa zake nyengo ya opareshoni. Fundo iyi yikugwiraso ntchito pa nthowa zakupimira na kuchizgira matenda izo zikusazgapo kutora ndopa zichoko waka mwa munthu, panji kusazgako vinthu vinyake, na kuziwezgeraso mu thupi lake.

Chizgoŵi chambura kukondweska Yehova cha kunyenyenkha nkhule, chikupangiska munthu kuti wajighanaghanirenge yekha ndiposo kunanga maghanoghano.a Munthu uyo wali na chizgoŵi cha kunyenyenkha nkhule wakuwona ŵanji nga ŵali kulengekera waka kugonana. Wakuŵawona nga ŵaliriko waka kuti ŵakhorweskenge khumbo lake la kugonana. Wakuwona kugonana kuti ntchilongolero cha chitemwa yayi, kweni ntchinthu chakuti chikhorweskenge waka makhumbiro ghake gha kugonana. Kweni wakukhorwa nyengo yichoko waka. Unenesko ngwakuti, m’malo mwa kuzgora viŵaro vya thupi lake kuŵa vyakufwa, “ku uzaghali, ukazuzi, makhumbiro ghakugonana kwambura kujikora,” munthu uyo wakunyenyenkha nkhule wakuviwuska.​—Ŵakolose 3:5.

Mpositole Paulosi wakalemba kuti: “Ŵakutemweka, . . . tiyeni tijitozge ku ukazuzi wose wa thupi na wauzimu, mwakuti tilutilire kuŵa ŵatuŵa apo tikopa Chiuta.” (2 Ŵakorinte 7:1) Para vikumusuzgani kulondezga mazgu agha, lekani kugongowa. Yehova ‘ngwakunozgeka kugowokera’ ndiposo kovwira. (Masalimo 86:5; Luka 11:9-13) Enya, pakuti kanandi mukujisuska para mwachita chizgoŵi ichi ndipo mukuyezgayezga kuti muleke nangauli nyengo zinyake mukutondeka, chikulongora kuti muli na mtima uwemi. Kumbukirani kuti “Chiuta ni mukuru kuluska mitima yithu ndipo wakumanya vinthu vyose.” (1 Yohane 3:20) Chiuta wakuwona vinandi kuluska waka zakwananga zithu, wakuwona wunthu withu wose. Ichi chikumupangiska kuti waŵenge nase na chitima para tikulomba kuti watichitire lusungu. Ntheura tingavukanga yayi kulomba Chiuta mwakufumira pasi pa mtima ndiposo mwakujiyuyura, nga ni mwana uyo wakuluta kwa awiske para wali na suzgo. Yehova wamupaninge njuŵi yakutowa. (Masalimo 51:1-12, 17; Yesaya 1:18) Ndipouli, mukwenera kuchitapo kanthu mwakukolerana na malurombo ghinu. Mwachiyelezgero mukwenera kufwilirapo kugega vithuzithuzi panji chinthu chilichose icho chingawuska khumbo la kugonana ndiposo ŵabwezi ŵaheni.b

Para suzgo linu la kunyenyenkha nkhule likulutilira, phalirani ŵapapi ŵinu awo Mbakhristu panji mubwezi winu wakukhwima mwauzimu.c​—Zintharika 1:8, 9; 1 Ŵatesalonika 5:14; Tito 2:3-5.

Yehova wakulindizga kuti wose awo ŵali mu nthengwa ŵakhalilirenge kuŵa ŵakugomezgeka ku vilapo vya nthengwa. Apo wakagumaniska mwanalume na mwanakazi wakwamba mu nthengwa, Yehova wakati: ‘Mwanalume wabatikanenge na muwoli wake ndipo ŵaŵenge thupi limoza.’ Pamanyuma, Yesu Khristu wakawerezgapo fundo yeneyiyi ndipo wakati: “Pa chifukwa ichi, icho Chiuta wagumanya pamoza munthu waleke kupatura.” (Genizesi 2:24; Mateyu 19:3-6) Ntheura, Yehova na Yesu ŵakuwona nthengwa nga mbubwezi wa umoyo wose, uwo ukumara pekha usange yumoza wafwa. (1 Ŵakorinte 7:39) Pakuti nthengwa ntchinthu chakupatulika chomene, kupatana ni nkhani iyo yikwenera kuwoneka yakupepuka yayi. Yehova wakutinkha kupatana uko kulije chifukwa chilichose cha mu Malemba.​—Malaki 2:15, 16.