Maliferensi gha Uteŵeti na Umoyo Wachikhristu—Kabuku ka Maungano
JANYUWALE 5-11
MAZGU GHA CHIUTA MBUSAMBAZI YESAYA 17-20
“Ntchigaŵa cha Awo Ŵakutipoka Vinthu”
“Ufumu Wane Ngwa Charu Chino Chara”
Ntchakuzirwa chomene kuti nase tisinthe nga umo ŵanyithu aŵa ŵali kusinthira. Baibolo likuyaniska ŵanthu na nyanja iyo yawuka ndipo yikuŵinduka. (Yes. 17:12; 57:20, 21; Chivu. 13:1) Ndyali zikupangiska ŵanthu kuti ŵayambanenge, kugaŵikana, na kuchita vivulupi. Kweni ise tikulutilira kuŵa pa mtende na kukolerana. Apo Yehova wakuwona kugaŵikana uko kuli pa charu, wakwenera kuti wakukondwa chomene kuwona kuti ŵanthu ŵake mbakukolerana.—Ŵerengani Zefaniya 3:17.
Lutilirani Kugomezgeka kwa Yehova
Nyengo zinyake uko tikukhala ŵanthu ŵakutichichizga yayi kunjira pa ndyali. Ndipouli, apo umaliro wa charu cha Satana ichi ukusendelera, kugomezgeka kwithu kulutilirenge kuŵa pangozi. Mazuŵa ghano ŵanthu ‘mbanonono’ na “ŵakajilangi,” ndipo ŵalutilirenge kuleka kukolerana na ŵanyawo. (2 Tim. 3:3, 4) Ŵabali na ŵadumbu ŵithu ŵanyake ŵasangana na masuzgo chifukwa cha kusintha kwa ndyali mu charu chawo. Lekani tikwenera kunozgekerathu sono kuti tizakalutilire kugomezgeka nanga mphanyengo yakusuzga. Tiyeni tidumbiskane vinthu vinayi ivyo tikwenera kuchita kuti tiŵe ŵakunozgeka.
ip-1 198 ¶20
Ulongozgi wa Yehova Kwimikana na Mitundu
Kasi Ntchivichi chikachitika pamanyuma? Yesaya wakuti: “Namise, kuli wofi. Pambere kundache, iwo kulije. Ichi ntchigaŵa cha awo ŵakutipoka vinthu na chiharo cha awo ŵakutiphanga.” (Yesaya 17:14) Ŵanandi ŵakuphanga vinthu ŵanthu ŵa Yehova, ŵakuŵachitira nkhaza na kuŵayuyura. Chifukwa chakuti Ŵakhristu ŵaunenesko ŵali mu visopa vikuruvikuru vya pa charu chose yayi kweniso ŵakukhumba yayi kuŵamo, ŵanthu ŵakususka na ŵasankho ŵakuwona kuti ntchipusu kuŵawukira. Ndipouli ŵanthu ŵa Chiuta ŵali na chigomezgo chose kuti “matandakucha” ghakwiza mwaluŵiro nyengo iyo masuzgo ghawo ghose ghazamumara.—2 Ŵatesalonika 1:6-9; 1 Petrosi 5:6-11.
Ivyo Tasambira
Fundo Zikuru za Chigaŵa Chakwamba cha Buku la Yesaya
20:2-5—Kasi Yesaya wakenda nadi nkhule kwa vyaka vitatu? Yesaya wakavura waka munjilira wakuwaro, kweni vyakuvwara vya mukati wakaŵa navyo.—1 Samuyeli 19:24.
JANYUWALE 12-18
MAZGU GHA CHIUTA MBUSAMBAZI YESAYA 21-23
Kasi Tikusambirako Vichi ku Ivyo Vikachitikira Shebina?
Chiuta Wakutilanga Chifukwa Chakuti Wakutitemwa
Kuti timanye kuzirwa kwa chilango, tiyeni tidumbiskane ŵanthu ŵaŵiri awo Yehova wakaŵapa chilango. Ŵanthu aŵa ni Shebina uyo wakaŵako mu nyengo ya Themba Hezekiya, kweniso mubali Graham wa mu nyengo yithu. Shebina wakaŵa na udindo ukuru. Wakwenera kuti wakaŵa “wakulaŵilira nyumba” ya Themba Hezekiya. (Yes. 22:15) Chachitima ntchakuti wakamba kujikuzga na kujipenjera ntchindi. Wakafika na pa kujipangira dindi na kukwera “magileta ghakuchindikika.”—Yes. 22:16-18.
Chifukwa chakuti Shebina wakamba kujipenjera ntchindi, Chiuta wakamuwuskapo pa udindo wake na kuŵikapo Eliyakimu. (Yes. 22:19-21) Chiuta wakachita nthena panyengo iyo Senakeribu Themba la Asiriya likakhumbanga kuwukira Yerusalemu. Nyengo yinyake, Themba Senakeribu likatuma ŵimiliri ŵake pamoza na ŵankhondo ŵanandi kuti ŵakawofye Ŵayuda na Hezekiya kuti ŵajipeleke ŵekha. (2 Mathe. 18:17-25) Eliyakimu wakatumika kuti wakayowoye na ŵimiliri ŵa Senakeribu, kweni wakaŵa yekha yayi. Wakaluta na ŵanthu ŵaŵiri, ndipo yumoza wawo wakaŵa Shebina uyo panyengo iyo wakaŵa mulembi. Ivi vikulongora kuti Shebina wakasunga vyakusingo panji ukali yayi. Kweni m’malo mwake wakajiyuyura na kuzomera udindo uchoko. Kasi ivyo Shebina wakachita vikutisambizga vichi? Tiyeni tiwone vinthu vitatu.
Chakwamba, Shebina wakapokeka udindo wake. Ivyo vikamuchitikira vikutichenjezga kuti “para munthu wakujikuzga ndikuti wali pafupi kuparanyika, ndipo para wamba mzimu wakujituntha wali pafupi kuwa.” (Zinth. 16:18) Para muli na udindo wapadera mu mpingo, kasi mulutilirenge kuŵa ŵakujiyuyura? Kasi mupelekenge ntchindi kwa Yehova para muli na maluso ghanyake mu mpingo panji mwachita makora vinthu vinyake? (1 Kor. 4:7) Mpositole Paulosi wakalemba kuti: “Nkhuphalira waliyose wa imwe kuti waleke kujighanaghanira mwakujumphizga kuluska umo wakwenera kughanaghanira. Kweni waghanaghanenge mwakwenelera.”—Rom. 12:3.
Chiuta Wakutilanga Chifukwa Chakuti Wakutitemwa
Chachiŵiri, Yehova wati wamupa chilango Shebina, wakagomezga kuti Shebina wangasintha na kwamba kuchita makora. (Zinth. 3:11, 12) Ili ni sambiro liwemi ku awo ŵapokeka mauteŵeti mu mpingo mazuŵa ghano. M’malo mwa kukwiya panji kukhuŵara, ŵakwenera kulutilira kuteŵetera Chiuta na mtima wose kuyana na umo ŵangafiskira. Kweniso ŵakwenera kuwona chilango kuŵa ukaboni wakuti Yehova wakuŵatemwa. Kumbukani kuti Adada ŵithu ŵatitayenge yayi para tikulutilira kujiyuyura. (Ŵerengani 1 Petrosi 5:6, 7.) Nthowa yimoza iyo Chiuta wakutiwumbira njakuti wakutipa chilango mwachitemwa. Ntheura tiyeni tiŵe dongo liwemi mu woko lake.
Chiuta Wakutilanga Chifukwa Chakuti Wakutitemwa
Chachitatu, umo Yehova wakachitira na Shebina ni sambiro lakuzirwa chomene ku awo ŵakupeleka chilango, nga ni ŵapapi ndiposo ŵalara mu mpingo. Kasi ŵakusambirako vichi? Para Yehova wakupeleka chilango, wakulongora kuti wakutinkha kwananga kweniso wakughanaghanira munthu uyo wananga. Usange ndimwe mupapi panji mulara, kasi pakupeleka chilango muyezgenge Yehova, kutinkha icho ntchiheni na kuwonamo viwemi mu mwana winu panji Mkhristu munyinu?—Yuda 22, 23.
Ivyo Tasambira
Fundo Zikuru za Chigaŵa Chakwamba cha Buku la Yesaya
21:1—Kasi ntchigaŵa ntchini icho chikuchemeka kuti “mapopa gha ku nyanja”? Nangauli msumba wa Babuloni ukaŵa kutali chomene na nyanja, kweni ndiwo ukuzunulika kuti mapopa gha ku nyanja. Vili nthena chifukwa chakuti maji gha mu madambo gha Yufurate na Tayigirisi ghakafulukiranga mu chigaŵa ichi chilimika na chilimika, kupangiska “nyanja” ya mathipa.
JANYUWALE 19-25
MAZGU GHA CHIUTA MBUSAMBAZI YESAYA 24-27
“Uyu Ni Chiuta Withu!”
“Wonani! Uyu Ni Chiuta Withu!”
Kasi muli kuwonapo mwana muchoko wakulongora adada ŵake ku ŵabwezi ŵake na kuyowoya mwakukondwa kweniso mwakunontha kuti, “Aŵa ndiwo mbadada ŵane”? Awo ŵakusopa Chiuta ŵali na chifukwa chakukwana cha kujipulika mwakuyana waka pakuyowoya za Yehova. Baibolo likuyowoyerathu za nyengo apo ŵanthu ŵakugomezgeka ŵazamuchemerezga kuti: “Wonani! Uyu ni Chiuta withu.” (Yesaya 25:8, 9) Apo mukusambira vinandi vyakukhwaskana na wunthu wa Yehova, ndipo muzamujipulika makora chomene kuti muli na Dada muwemi.
Ivyo Tikusambirako ku Munthondwe wa Yesu wa Chingwa
Pakuyowoya za “chakurya chithu cha zuŵa ili,” Yesu wakasambizgaso kuti tilombenge kuti khumbo la Chiuta “lichitike pano pasi nga nkhuchanya.” (Mat. 6:9-11) Kasi mukughanaghana kuti charu chizamuŵa wuli pa nyengo iyo? Baibolo likulongora kuti khumbo la Chiuta pa charu chapasi likusazgaposo kuŵa na chakurya chiwemi. Kuyana na Yesaya 25:6-8, kuzamuŵa vyakurya vinandi apo Ufumu wa Yehova uzamuwusanga. Lemba la Salimo 72:16 likuti: “Muzamuŵa vyakurya vinandi mu charu. Vizamuŵa na pachanya pa mapiri.” Kasi mukulindilira mwakunweka nyengo iyi kuti muzakaphike chakurya icho mukuchitemwa chomene panji icho mundaphikepo nakale? Kweniso muzamukondwa kupanda minda yinu ya mpheska na kusangwa na vipambi vyake. (Yes. 65:21, 22) Ndipo waliyose pa charu chapasi wazamukondwa na vinthu viwemi ivi.
Umo Tikusangira Chandulo na Chitemwa cha Yehova
Ghanaghanirani umo umoyo uzamuŵira mu Paradiso. Muzamufipaso mtima yayi na matenda panji nyifwa. (Yes. 25:8; 33:24) Yehova wazamumukhorweskani nadi. Kasi muzamutemwa kuti musambire vichi? Vyasayansi, sumu, panji vyakujamburajambura? Tikukayika yayi kuti pazamukhumbikwa awo ŵakumanya kupanga mapulani, kuzenga, kweniso vyaulimi. Ndipo ŵanthu ŵazamukhumbikwiraso kuphika vyakurya, kupanga vyakugwilira ntchito, kweniso kupwelelera minda. (Yes. 35:1; 65:21) Chifukwa chakuti muzamukhala kwamuyirayira, muzamuŵa na nyengo yinandi yakusambilira luso lulilose ulo mungaghanaghanira.
Chizamuŵa chakukondweska chomene kupokelera ŵabali ŵithu awo ŵali kufwa. (Mil. 24:15) Ghanaghaniraniso umo muzamukondwera kusambira vinandi vyakukhwaskana na Yehova kwizira mu chilengiwa. (Sal. 104:24; Yes. 11:9) Chakuluska vyose, chizamuŵa chakukondweska chomene kusopa Yehova kwambura kumunangiraso. Kasi mungalolera kutaya vitumbiko ivi chifukwa cha “vyakukondweska vya nyengo yichoko waka vya kwananga”? (Heb. 11:25) Yayi. Vitumbiko ivi ni viwemi chomene kuluska chilichose icho tingasida mu charu ichi pasono. Kumbukani kuti tikhalirenge waka kulindilira Paradiso yayi. Paumaliro layizgo ili lizamufiskika nadi, ghazamuŵa malo ghithu ghakukhalamo zuŵa lililose. Ndipo vyose ivi vizamuchitika chifukwa chakuti Yehova wakatitemwa chomene na kupeleka Mwana wake kuzakatifwira.
Ivyo Tasambira
Baibolo la Chingelezi la 2013 la Mang’anamuliro gha Charu Chiphya
Machaputara ghanyake ghalembeka nga ni mapowemu. Vigaŵa vinandi vya mu Baibolo vikalembeka nga ni mapowemu. Mazuŵa ghano, mapowemu ghakuyana waka na umo ŵakulembera sumu. Pakulongosora vinthu, mapowemu ghakuŵa na mazgu ghakukozgana panji ghakususkana.
Mabuku gha Yobu na Masalimo mu Baibolo liphya la Mang’anamuliro gha Charu Chiphya ghalembeka nga ni sumu. Kalembero aka kakovwira kudidimizga fundo kweniso kuti munthu wakumbukirenge ivyo wakuŵazga. Mabuku ghanyake agho ghalembeka munthowa iyi ni Zintharika, Sumu ya Solomoni, na machaputara ghanandi mu mabuku ghanyake. Chiyelezgero ni lemba la Yesaya 24:2 ilo mzere uliwose uli na mazgu ghakususkana. Ghalembeka munthowa iyi kuti ghadidimizge fundo yakuti palije uyo wangagwentha cheruzgo cha Chiuta. Para munthu wakuŵazga Baibolo wakumanya kuti awo ŵakalemba Baibolo, ŵakalemba nthena kuti ŵadidimizge uthenga wa Chiuta.
Ntchakusuzga kumanya mabuku agho mu Chihebere ghakalembeka nga ni mapowemu, lekani Mabaibolo ghakupambana kalembekero. Ntheura awo ŵakung’anamura Baibolo ŵakwenera kusanda kuti ŵamanye usange chigaŵa icho ŵakung’anamura chikalembeka nga ni powemu. Mavesi ghanyake gha mu Baibolo ghali kulembeka nga ni mapowemu na chilato cha kudidimizga fundo.
JANYUWALE 26–FEBULUWALE 1
MAZGU GHA CHIUTA MBUSAMBAZI YESAYA 28-29
Chindikani Yehova na Milomo Kweniso Mtima Winu
ip-1 299 ¶23
Yesaya Wakuyowoyerathu vya ‘Mulimo Wakuzizika’ wa Yehova
Ŵalongozgi ŵa chisopa cha Chiyuda ŵakuyowoya kuti ŵali maso mwauzimu, kweni ŵamuleka kale Yehova. Ŵakusambizga fundo zawo zautesi pa nkhani ya chiwemi na chiheni, ŵakujikhungulufya pakuchita nkharo zawakawaka ndipo ŵakupangiska ŵanthu kuti ŵaleke kutemweka na Chiuta. Mu nthowa ‘yakuzizwiska’ kweniso na ‘milimo yake yakuzizika,’ Yehova wakuvumbura upusikizgi wawo. Iyo wakuti: “Ŵanthu aŵa ŵakusendelera kwa ine na mulomo wawo, ŵakunichindika na milomo yawo, kweni mtima wawo uli kutali na ine, ndipo ŵakuniwopa pakutolera malango gha ŵanthu agho ŵali kusambizgika. Ntheura ndine nichitengeso vinthu vyakuzizwiska na ŵanthu aŵa, chakuzizwiska pa chakuzizwiska. Vinjeru vya ŵanthu ŵawo ŵavinjeru vimalenge, ndipo kapulikiskiro ka ŵanthu ŵawo ŵakuchenjera kabisikenge.” (Yesaya 29:13, 14) Vinjeru na kapulikiskiro ka vinthu ka Ŵayuda kazamumara pa nyengo iyo Yehova wazamuphyerapo visopa vyachigaluka apo Muwuso Wankhongono wa pa Charu Chose wa Babuloni wuzamuviwukira. Vyathena ivi vikachitikaso mu nyengo ya Ŵakhristu ŵakwambilira apo ŵalongozgi ŵa Chiyuda awo ŵakatenge mbavinjeru ŵakapuluskanga mtundu wawo. Ivi ndivyo vizamuchitikiraso matchalitchi gha mazuŵa ghano agho ghakujichema kuti Ngachikhristu.—Mateyu 15:8, 9; Ŵaroma 11:8.
Palije Icho Chingaŵakhuŵazga Ŵarunji
Yesu wakasuska mwachikanga visambizgo vyautesi ivyo visopa vikasambizganga. Mwachiyelezgero, wakavumbura kuti Ŵafarisi mbapusikizgi. Iwo ŵakaŵikangapo mtima chomene pa umo ŵanthu ŵakagezeranga mu mawoko, kuluska umo ŵanthu ŵangapwelelera ŵapapi ŵawo. (Mat. 15:1-11) Ŵasambiri ŵa Yesu ŵakwenera kuti ŵakazizwa chomene na ivyo Yesu wakayowoya. Nakuti ŵakamufumba kuti: “Kasi mukumanya kuti Ŵafarisi ŵangukhuŵara pakupulika ivyo mwanguyowoya?” Yesu wakazgora kuti: “Chakumera chilichose icho Adada ŵakuchanya ŵakapanda chara, chizgulikenge. Ŵalekani. Mbalongozgi ŵachibulumutira. Ndipo usange munthu wachibulumutira wakulongozga munthu wachibulumutira, wose ŵawenge mu mbuna.” (Mat. 15:12-14) Yesu wakaleka yayi kuyowoya unenesko nangauli ŵalongozgi ŵa visopa ŵakakwiya.
Lutilirani Kuŵa Ŵalendo ŵa Yehova Kwamuyirayira!
Awo ‘ŵakuyowoya unenesko mu mtima,’ ŵakugega kujilongora kuti mbakupulikira pawumba uku kumphepete ŵakuswa fundo za Chiuta. (Yes. 29:13) Ŵakugega kuchita vinthu mwauryarya. Munthu muryarya wangamba kukayikira malango ghanyake gha Yehova. (Yak. 1:5-8) Wangaleka kupulikira Yehova pa nkhani izo iyomwene wakuwona kuti ni zichokozichoko. Kufuma apo para wawona kuti palije masuzgo ghalighose agho wakumanapo nagho, wangaswaso fundo zinyake za Chiuta. Nangauli wangaŵa kuti wakughanaghana kuti wakusopa Chiuta, kweni kusopa kwake kungaŵa kwambura kuzomerezgeka. (Muph. 8:11) Ndipouli, ise tikwenera kuŵa ŵanenesko mu vinthu vyose.
Ivyo Tasambira
it “Ariyeli” ¶1; it “Ariyeli” Na. 3
Ariyeli
(Ariyeli) [Ntchipembo cha Jotchero la Chiuta; panji, Nkharamu ya Chiuta].
Ni zina linyake la msumba wa Yerusalemu ilo likuzunulika pa Yesaya 29:1, 2, 7. Ku Yerusalemu ndiko kukaŵa tempile la Chiuta ndipo likaŵaso na jotchero ilo ŵakapelekerangapo sembe. Chifukwa cha vinthu ivi, lekani msumba uwu ukachemekangaso kuti, ntchipembo cha jotchero la Chiuta. Msumba uwu ukenerangaso kuŵa chinyina cha kusopa kutuŵa. Ndipouli, mazgu gha pa Yesaya 29:1-4 ngakufipiska mtima ndipo ghakuyowoyerathu vya pharanyiko ilo likaŵa kuti lizenge pa Yerusalemu uyo wakaparanyika na Ŵababuloni mu 607 B.C.E. Panyengo iyo msumba uwu uzamuŵa “chipembo cha jotchero” munthowa yinyake: nga ni msumba uwo muli ndopa zinandi izo zathiskika, kweniso msumba uwo ukuphya na moto uwo wazura na vitanda ivyo vyawotcheka ndipo vyati waka ngundangunda. Icho chikiziska soka ili chikuyowoyeka pa vesi 9 m’paka 16. Ndipouli pa Yesaya 29:7, 8, pakulongora kuti mitundu iyo yanozgeka kuparanya Yerusalemu yizamufiska yayi chilato chawo.
FEBULUWALE 2-8
MAZGU GHA CHIUTA MBUSAMBAZI YESAYA 30-32
Bisamani mu Mapapindo gha Yehova
Yehova Ni Malo Ghithu Ghakubisamamo
Pakuti Yehova ni malo ghithu ghakubisamamo, tikusanguluka na mazgu agha: “Wakubenekelerenge na mapapindo ghake, ubisamenge ku mapapindo ghake. Kugomezgeka kwake kuŵenge nga ntchiskango chikuru na chiliŵa chakukhora.” (Salimo 91:4) Chiuta wakutivikilira nga ni umo chiyuni chikuvikilira twana twake. (Yesaya 31:5) Enya, ‘Watibenekelerenge na mapapindo ghake.’ Chiyuni chikutandawura mapapindo ghake na kubenekelera twana twake mwakuti chivikilire twana ku vilwani. Nga ni twana tuchoko, ise tikujoŵa kusi ku mapapindo ghakuyerezgera gha Yehova chifukwa tabisama mu gulu launenesko la Chikhristu.—Rute 2:12; Salimo 5:1, 11.
Yehova Wamovwiraninge mu Nyengo Zakusuzga
Ivyo tikukhumbikwira kuchita. Yezgayezgani kuleka kujipatura. Para tikujipatura, kanandi tikwamba kughanaghana waka vya taŵene na masuzgo agho tikujumphamo. Kaghanaghaniro kanthena kangatipangiska kuti tisankhe uheni vinthu. (Zinth. 18:1) Mbunenesko kuti tose nyengo zinyake tikukhumba kuŵa patekha, chomenechomene para tasangana na suzgo likuru chomene. Ndipouli para tikujipatura kwa nyengo yitali, tingaŵa kuti tikukana wovwiri wa Yehova uwo wakutipa kwizira mu ŵanyithu. Ntheura nanga tingakumana na suzgo likuru wuli, tikwenera kuzomera wovwiri wakufuma ku ŵamumbumba yithu, ŵabwezi ŵithu, kweniso ŵalara. Muwonenge kuti ni nthowa iyo Yehova wakugwiliskira ntchito kuti wamovwirani.—Zinth. 17:17; Yes. 32:1, 2.
‘Wamuzgoraninge Ŵankhongono’
Kasi mungachita wuli kuti mukhozge chigomezgo chinu? Mwachiyelezgero, usange chigomezgo chinu ntchakuti muzamukhala pa charu chapasi kwamuyirayira, ŵazgani nkhani zakukhwaskana na Paradiso na kughanaghanirapo. (Yes. 25:8; 32:16-18) Ghanaghanirani umo umoyo uzamuŵira mu charu chiphya. Ndipo mujitore kuti muli mu charu chiphya. Kasi mukuwona njani? Kasi mukupulika vichi? Kasi mukujipulika wuli? Kuti mughanaghanire makora umo Paradiso wazamuŵira, wonani vithuzi mu mabuku ghithu panji wonelerani sumu za mavidiyo nga za mutu wakuti Charu Chiphya Icho Chizenge, Charu Chiphya Chili Pafupi, panji Ghanaghanirani Nyengo Iyo. Para nyengo na nyengo tikughanaghanirapo chigomezgo chithu cha charu chiphya, masuzgo ghithu tighawonenge kuti ‘ngakanyengo na yakupepuka.’ (2 Kor. 4:17) Chigomezgo icho Yehova watipa chingatovwira kuzizipizga masuzgo.
Ivyo Tasambira
it “Chingwa” ¶6
Chingwa
Mazgu Ghakuyelezgera. Mu Baibolo mazgu ghakuti “chingwa,” ghakugwiliskirika ntchito kuyelezgera vinthu vyakupambanapambana. Mwachiyelezgero, Joshuwa na Kalebi ŵakaphalira Ŵaisrayeli kuti ŵanthu awo ŵakukhala mu Kenani ‘ntchingwa chithu.’ Panji ŵakang’anamuranga kuti ntchipusu kuŵathereska, ndipo ŵakayowoya nthena chifukwa chakuti ŵakakhumbanga kuŵazikiska mtima panji kuŵakhozga Ŵaisrayeli. (Maŵ 14:9) Chitima chikuru icho chikatenge chizenge chifukwa chakuleka kutemweka na Yehova chikuyowoyeka pa Salimo 80:5. Pa lemba ili pakuyowoya vya Yehova uyo ni Muliska wa Israyeli, pakuti: “Mukuŵaryeska masozi nga ntchingwa.” Yehova wakuyowoyekaso kuti wakuŵapa ŵanthu ŵake “chingwa mu suzgo na maji mu kuyuzgika.” Apa ntchakuwonekerathu kuti mazgu agha ghakang’anamuranga masuzgo agho ŵamusangana nagho para ŵatolekera ku wuzga, ndipo masuzgo agha ghamuŵa waka palipose nga ntchingwa na maji.—Yes 30:20.
FEBULUWALE 9-15
MAZGU GHA CHIUTA MBUSAMBAZI YESAYA 33-35
“Ndiyo Wamukhozganinge mu Nyengo Zinu”
Yehova Wamovwiraninge mu Nyengo Zakusuzga
Suzgo. Para takumana na suzgo likuru, tikutondeka kughanaghana makora nga umo vikuŵira para vinthu vili makora waka. Tingaŵa nga ni ngalaŵa iyo yikututuzgika waka na chimphepo chankhongono. Ana, uyo tamuzunura kukwambilira wakayowoya kuti wakasuzgikanga chomene maghanoghano mfumu wake Luis wati wafwa. Iyo wakati: “Para namba kusuzgika maghanoghano, nkhajilengeranga chitima chomene. Kweniso nkhakwiyanga kuti wali kufwa na kunileka nekha.” Chinyake ntchakuti nyengo zinyake wakachitanga phukwa kweniso wakawonanga kuti ntchakusuzga kusankha chakuchita pa vinthu ivyo mfumu wake ndiyo wakasankhanga makora. Nyengo zinyake wakajiwonanga nga wali pakatikati pa nyanja uku kuli chimphepo. Kasi Yehova wakutovwira wuli para tamba kusuzgika chomene maghanoghano?
Kasi Yehova wakulayizga vichi? Wakutilayizga kuti watikhozgenge. (Ŵazgani Yesaya 33:6.) Para kuli chimphepo, sitima yikwamba kulegha panji kuti kugenukagenuka. Kweni kuti yikhazikike, sitima zinyake zikuŵa na tuvisulo tunyake mumphepete uto tukovwira kuti zikhazikike. Tuvisulo utu tukovwira kuti yileke kugenukagenuka chomene, ndipo vikovwira kuti yikafike makora. Kweni tuvisulo utu tukugwira makora ntchito para sitima yikwenda. Mwakuyana waka, Yehova wangatovwira kuti tiŵe ŵakukhora pekha para tikulutilira kumuteŵetera mwakugomezgeka panyengo ya masuzgo.
Umo Tingachitira Kuti Tilutilire Kuŵa Ŵakukondwa Para Tikuyezgeka
Icho mungachita: Lombani vinjeru kwa Yehova. Kuti tizizipizge viyezgo na kulutilira kuŵa ŵakukondwa, chakwamba tikwenera kulomba Yehova kuti watipe vinjeru kuti tisankhe makora vinthu. (Ŵazgani Yakobe 1:5.) Kasi tikwenera kuchita wuli para tikuwona kuti Yehova wakuzgora luŵiro yayi lurombo lwithu? Yakobe wakayowoya kuti tikwenera ‘kulutilira kulomba’ Chiuta. Yehova wakuvuka yayi kutegherezga para tikulutilira kumulomba vinjeru. Iyo watikwiyirenge yayi. Dada withu wakuchanya “wakupeleka mwawanangwa” para talomba vinjeru kuti tizizipizge viyezgo. (Sal. 25:12, 13) Iyo wakuwona masuzgo agho tili nagho, kweniso vikumukhwaska para tikusuzgika, ndipo ngwakukhumbisiska kutovwira. Nakuti ivi ndivyo vikutipangiska kuti tiŵenge ŵakukondwa chomene. Kweni kasi Yehova wakutipa wuli vinjeru?
Yehova wakutipa vinjeru kwizira mu Mazgu ghake. (Zinth. 2:6) Kuti tiŵe na vinjeru, tikwenera kusambira Mazgu gha Chiuta kweniso mabuku ghithu ghakulongosora Baibolo. Kweni tikwenera kuchita vinandi padera pakusambira waka. Tikwenera kuchita ivyo Chiuta wakutiphalira. Yakobe wakalemba kuti: “Muchitenge ivyo mazgu ghakuyowoya, ŵakupulika waka yayi.” (Yak. 1:22) Para tikulondezga ulongozgi wakufuma kwa Yehova, tikuŵa ŵamtende, ŵakupulikiska vinthu ndiposo ŵalusungu. (Yak. 3:17) Mikhaliro iyi yingatovwira kuzizipizga suzgo lililose uku tikulutilira kuŵa ŵakukondwa.
ip-1 352-355 ¶21-22
“Pazamuŵavya Munthu Wakukhala mu Charu Uyo Wazamuti: ‘Nalwara’”
Ndipouli, uchimi wa Yesaya uwu ukufiskikaso mu nyengo yithu yino. Ŵanthu ŵa Yehova nawo mazuŵa ghano ŵakukondwa chifukwa cha kuchizgika mwauzimu. Ŵali kufwatulika ku visambizgo vyautesi nga vyakuti mzimu ukufwa yayi, Utatu, na moto wa helo. Ŵakupokera ulongozgi uwo ukuŵawovwira kugega nkharo ziheni, kweniso umo ŵangasankhira vinthu mwamahara. Ŵakuwonga chomene sembe yakuwombora iyo Yesu Khristu wakapeleka, chifukwa yikuŵawovwira kuti ŵaŵe paubwezi na Chiuta kweniso ŵakuŵa na njuŵi yituŵa. (Ŵakolose 1:13, 14; 1 Petrosi 2:24; 1 Yohane 4:10) Kuchizgika mwauzimu uku kuliso na vyandulo vyakuthupi. Mwachiyelezgero, kugega uzaghali na kukhweŵa hona kukuvikilira Ŵakhristu ku matenda ghakupilana pa kugonana kweniso na mitundu yinyake ya kansa.—1 Ŵakorinte 6:18; 2 Ŵakorinte 7:1.
Ndipouli, chigaŵa chikuru cha uchimi wa pa Yesaya 33:24 chizamufiskika pamanyuma pa Aramagedoni, mu charu chiphya cha Chiuta. Mu muwuso wa Ufumu wa Mesiya, ŵanthu ŵazamuchizgika chomene mwakuthupi na mwauzimu wuwo. (Chivumbuzi 21:3, 4) Pamanyuma pa kuparanyika kwa mgonezi uheni wa Satana uwu, tikukayika yayi kuti pa charu chose chapasi pazamuchitika minthondwe yinandi yanthena iyo Yesu wakachitanga. Ŵachibulumutira ŵazamuwona, ŵakumangwa ŵazamupulika, ndipo ŵakupendera ŵazamwenda. (Yesaya 35:5, 6) Ivi vizamovwira awo ŵazamupona pa suzgo yikuru kuti ŵazakachiteko mulimo wakunozga charu kuŵa paradiso.
Ivyo Tasambira
Lutilirani Kwenda mu “Nthowa Yakupatulika”
Kweni ŵanyake ŵangaghanaghana kuti, ‘Kasi ivyo vikachitika kale chomene ku Ŵayuda vili na ntchito kwa ise mazuŵa ghano?’ Enya, chifukwa nase, mukayowoyero kanyake, tikwenda pa “Nthowa Yakupatulika.” Kwali ndise ŵakuphakazgika panji ŵamberere zinyake, tikwenera kukhalilira pa “Nthowa Yakupatulika.” Nthowa iyi yitovwirenge kulutilira kusopa Yehova sono kweniso munthazi apo Ufumu wa Chiuta uzamwiza na vitumbiko vinandi pa charu chapasi. (Yoh. 10:16) Kwambira waka mu 1919 C.E., ŵanalume, ŵanakazi na ŵana mamiliyoni ghanandi ŵali kufumamo mu Babuloni Mukuru, nyinawo wa chisopa chautesi pa charu chose, ndipo ŵali kwamba kwenda pa nthowa yakuyelezgera. Nakuti namwe mukwenera kuŵa yumoza wawo. Nangauli nthowa iyi yikajulika vyaka 100 ivyo vyajumpha, mulimo wakunozga msewu ukuru uwu ukamba vyaka vinandi kumasinda.
FEBULUWALE 16-22
MAZGU GHA CHIUTA MBUSAMBAZI YESAYA 36-37
“Ungawopanga Chara Chifukwa cha Mazgu Agho Wapulika”
it “Hezekiya” Na. 1 ¶14
Hezekiya
Senakeribu Wakatondeka Kuthereska Yerusalemu. Kuti wafiske ivyo Hezekiya wakakhazganga, Senakeribu wakaŵikapo mtima kuwukira Yerusalemu. Apo Senakeribu na gulu lake la nkhondo ŵakazingilizga msumba wa Lakishi uwo ukaŵa na malinga ghakukhora, wakatuma ŵanyake mwa ŵasilikari pamoza na ŵalongozgi ŵa ŵasilikari kuti ŵakaphalire awo ŵali mu Yerusalemu kuti ŵajipeleke waka. Uyo wakayowoyeranga gulu la ŵasilikari aŵa, wakaŵa Rabushake (likaŵa zina lake leneko yayi, kweni zina la udindo la usilikari), uyo wakayowoyanga makora Chihebere. Mwakukwezga wakamuyowoyera msinjiro Hezekiya na kunyoza Yehova. Ndipo wakajituntha na kuyowoya kuti Yehova wangaponoska yayi msumba wa Yerusalemu nga umo vikaŵira na ŵachiuta ŵamitundu yinyake awo ŵakatondeka kuthaska ŵanthu ŵawo mu mawoko gha themba la Asiriya.—2Ma 18:13-35; 2Mi 32:9-15; Yes 36:2-20.
ip-1 387 ¶10
Themba Likatumbikika Chifukwa cha Chipulikano Chake
Pamanyuma Rabushake wakukumbuska Ŵayuda kuti ŵasilikari ŵawo ŵakumanya yayi nkhondo. Ndipo mwakujikuzga wakuyowoya kuti: “Nikupenge mahachi 2,000, para ungasanga ŵakukwerapo ŵakukwana.” (Yesaya 36:8) Ndipouli, unenesko ngwakuti vilije kanthu kwali Ŵayuda ŵaŵe na ŵasilikari ŵanandi ŵapamahachi awo mbakusambizgika makora panji yayi, vili nthena chifukwa chakuti chiponosko cha Ŵayuda chikuthemba pakuŵa na ŵasilikari ŵankhongono yayi. Lemba la Zintharika 21:31 likuyowoya kuti: “Hachi likunozgekera zuŵa la nkhondo, kweni Yehova ndiyo wakuponoska.” Pamanyuma Rabushake wakuyowoya kuti vitumbiko vya Yehova vili na Ŵaasiriya, Ŵayuda yayi. Iyo wakuti viŵenge na Ŵayuda mphanyi Yehova wazomerezga yayi kuti Ŵaasiriya ŵanjire mu chigaŵa cha Ŵayuda.—Yesaya 36:9, 10.
ip-1 388 ¶13-14
Themba Likatumbikika Chifukwa cha Chipulikano Chake
Apo wakulutilira kuyowoya mwamsinjiro, Rabushake wakuyowoyaso mazgu ghanyake ghakugongoweska. Wakuchenjezga Ŵayuda kuti ŵaleke kumugomezga Hezekiya para wakuyowoya kuti: “Yehova watithaskenge.” Rabushake wakukumbuskaso Ŵayuda kuti ŵachiuta ŵa Samariya ŵakatondeka kuthaska mafuko 10 agho ghakathereskeka na Ŵaasiriya. Wakutiso, wuli pakuyowoya vya ŵachiuta ŵamitundu yinyake iyo Asiriya wathereska? Iyo wakufumbaso kuti: “Kasi ŵachiuta ŵa Hamati na Aripadi ŵali nkhu? Kasi ŵachiuta ŵa Sefaravayimu ŵali nkhu? Kasi ŵakamuthaska Samariya mu woko lane?”—Yesaya 36:18-20.
Apa vikulongora kuti Rabushake uyo wakusopa ŵachiuta ŵatesi, wakumanya yayi kuti pali mphambano yikuru chomene pakati pa Samariya wakugaluka na Yerusalemu uyo wakulongozgeka na Hezekiya. Ŵachiuta ŵatesi ŵa Samariya ŵakaŵavya nkhongono zakuponoskera ufumu wa mafuko 10. (2 Mathemba 17:7, 17, 18) Mwakuti ŵanthu ŵa mu Yerusalemu awo ŵakawusikanga na Hezekiya ŵakalekerathu kusopa ŵachiuta ŵatesi na kuwelera kwa Yehova. Nangauli ŵanalume ŵatatu awo ŵakimiranga Ŵayuda ŵakamulongosolerapo yayi Rabushake vya nkhani iyi. “Iwo ŵakakhala chete, ŵakamuzgora chara nanga ni lizgu limoza, pakuti themba likalangura kuti: ‘Mungamuzgoranga chara.’” (Yesaya 36:21) Eliyakimu, Shebina, na Yowa ŵakawelera kwa Hezekiya na kumuphalira mazgu gha Rabushake.—Yesaya 36:22.
Ivyo Tasambira
it “Nkholoŵeko” ¶4
Nkholoŵeko
Yehova wakaphalira Senakeribu themba la Asiriya kuti: “Niŵikenge mbeja mu mphuno yako na nkholoŵeko pakati pa milomo yako, ndipo nikuwezgerenge ku nthowa iyo ukizira.” (2Ma 19:28; Yes 37:29) Nangauli wakakhumba yayi, kweni na woko la Yehova, Senakeribu wakachichizgika kuleka kuzingilizga msumba wa Yerusalemu ndipo wakawelera ku Nineve uko pamanyuma wakakomeka na ŵana ŵake ŵanalume. (2Ma 19:32-37; Yes 37:33-38) Mazgu ghakuti Yehova ŵakuŵika nkholoŵeko mu miskati ya ŵalwani ŵake, ghakulongora waka kuti wali na nkhongono pa iwo nga umo vikuŵira na munthu uyo wakulongozga vinyama pakugwiliskira ntchito nkholoŵeko.—Yes 30:28.
FEBULUWALE 23–MALICHI 1
MAZGU GHA CHIUTA MBUSAMBAZI YESAYA 38-40
“Wapwelelerenge Mskambo Wake nga ni Muliska”
Ivyo Baibolo Likutiphalira vya Mwenecho Uyo Wakalipeleka
Ŵazgani Yesaya 40:8. Mazgu gha Chiuta ghapeleka ulongozgi wavinjeru ku ŵanalume na ŵanakazi ŵakugomezgeka kwa vyaka masauzandi ghanandi. Chifukwa wuli vyaŵa nthena? Ili ni fumbo liwemi, chifukwa Malemba ghakalembeka ni kale chomene pa vinthu vyambura kukhora, ivyo pasono vyose vili kumara. Kweni Yehova wakawoneseska kuti ŵanthu ŵakopera mazgu ghake ghakupatulika. Nangauli awo ŵakakoperanga ŵakaŵa ŵambura kufikapo, kweni ŵakaŵa maso chomene pakukopera. Mwachiyelezgero, pakuyowoya za Malemba Ghachihebere, nkhwantha yinyake yikati: “Tili na chigomezgo chose kuti palije buku linyake lakale ilo lili kukopereka makora chomene kuluska buku ili.” Nangauli Malemba ghakalembeka ni kale chomene pa vinthu vyambura kukhora, ndiposo ŵanthu awo ŵakakoperanga ŵakaŵa ŵambura kufikapo, kweni tili na chigomezgo chose kuti ivyo tikuŵazga mu Baibolo mazuŵa ghano ni maghanoghano gha Mwenecho, Yehova.
Yehova ni Mwenecho wa “chawanangwa chilichose chiwemi na chawanangwa chilichose chakufikapo.” (Yak. 1:17) Baibolo ntchimoza cha vyawanangwa viwemi chomene icho Yehova wali kutipa. Para munthu watipa chawanangwa, kanandi chawanangwa icho watipa chikulongora kuti munthu uyo wakutimanya makora kweniso wakumanya ivyo tikukhumbikwira nadi. Ndimoso viliri na Baibolo. Para tikuŵazga chawanangwa ichi, tikusambira vinandi vya Yehova. Tikusambira kuti wakutimanya makora kweniso wakumanya makora ivyo tikukhumbikwira. Mu nkhani iyi, tidumbiskanenge ivyo tikusambira mu Baibolo vyakukhwaskana na mikhaliro yitatu ya Yehova. Mikhaliro iyi ni vinjeru, urunji, na chitemwa. Chakwamba, tiyeni tiwone umo Baibolo likulongolera kuti Chiuta ngwavinjeru.
Nkhongono za Kuvikilira—“Chiuta Ntchiphokwero Chithu”
Yehova wakujiyaniska na muliska, ivi vikutovwira kugomezga kuti ngwakukhumbiskiska nadi kutivikilira. (Ezekiyeli 34:11-16) Kumbukani umo lemba la Yesaya 40:11, ilo likalongosoleka mu mutu 2 wa buku ili likulongosolera Yehova. Lemba ili likuti: “Wapwelelerenge mskambo wake nga ni muliska. Na woko lake wawunganyenge pamoza twana twa mberere, ndipo watuyeghenge pa chifuŵa chake.” Kasi kana ka mberere kakasangikanga wuli pa “chifuŵa” cha muliska? Kakwenera kuti kakizanga pafupi na muliska, panji kakamugung’uranga na malundi wuwo. Kweni muliska ndiyo wakeneranga kusindama na kunyamura kana ka mberere na kukaŵika pa chifuŵa chake. Ichi ntchiyelezgero chiwemi chomene, ndipo chikulongora kuti Muliska withu Mukuru ngwakukhumbisiska kupwelelera na kuvikilira ŵateŵeti ŵake.
“Wakuŵapa Nkhongono Ŵakuvuka”
Ŵerengani Yesaya 40:26. Palije uyo wali kuŵerengapo nyenyezi zose izo zili kuchanya. Ŵasayansi ŵakusachizga kuti Chipingausiku cha Milky Way chili na nyenyezi 400 biliyoni. Kweni nyenyezi yiliyose Yehova wakuyichema zina. Kasi tikusambirapo vichi? Para Yehova wakuwona kuti vilengiwa vyambura umoyo ni vyakuzirwa, ghanaghanirani umo wakuwonera imwe usange mukumuteŵetera na mtima wose. Mukumuteŵetera chifukwa cha kuchichizgika waka yayi, kweni chifukwa chakuti mukumutemwa. (Sal. 19:1, 3, 14) Adada ŵithu ŵakuchanya ŵakumumanyani makora chomene. “Nanga ni masisi gha ku mutu kwinu ghose ghali kupendeka” na iwo. (Mat. 10:30) Wamasalimo wakutisimikizgira kuti: “Yehova wakumanya ivyo vikuwira ŵambura kafukwa.” (Sal. 37:18) Yehova wakumanya masuzgo agho mukusangana nagho, ndipo wangamupani nkhongono kuti muzizipizge suzgo lililose.
Ŵerengani Yesaya 40:28. Yehova ndiyo ni Mweneko wa nkhongono. Ghanaghanirani nkhongono izo zuŵa lili nazo. David Bodanis, uyo wakulemba vya sayansi, wakati: “Nkhongono izo zuŵa likupeleka pa sekondi yiliyose zikuyana waka na mabomba mabiliyoni ghanandi agho ghaphulika pa nyengo yimoza.” Munthu munyake wakufufuza vinthu wakasanga kuti nkhongono iyo zuŵa “likufumiska pa sekondi yimoza, njikuru chomene mwakuti yingawovwira ŵanthu kukhala makora kwa vyaka 200,000.” Kasi walipo uyo wangakayikira kuti Yehova, uyo wakupeleka nkhongono ku zuŵa wangatipa nkhongono zakuti tizizipizgire suzgo lililose?
Ŵerengani Yesaya 40:29. Tikukondwa para tikuteŵetera Yehova. Yesu wakaphalira ŵasambiri ŵake kuti: “Yeghani joko lane.” Wakayowoyaso kuti: “Muzamupumuzgika. Chifukwa joko lane ndipusu na katundu wane ngwakupepuka.” (Mat. 11:28-30) Fundo iyi njaunenesko nadi. Nyengo zinyake tikuvuka para tikuluta ku maungano panji mu uteŵeti. Kweni kasi tikujipulika wuli para tawerako? Tikujipulika makora ndipo tikuŵa ŵakunozgeka kumarana na viyezgo. Joko la Yesu ndipusu nadi.
Ivyo Tasambira
ip-1 400 ¶7
“Sanguluskani Ŵanthu Ŵane”
Ŵayuda ŵati ŵaweleraso kwawo m’ma 500 B.C.E., uchimi uwu ukafiskika kakwamba. Uchimi uwu ukafiskikaso mu 29 C.E. Yohane Mubatizi wakaŵa mazgu gha munthu munyake ‘uyo wakachemerezganga mu mapopa,’ uku kukaŵa kufiskika kwa lemba la Yesaya 40:3. (Luka 3:1-6) Mwakukhuŵilizgika na mzimu, Yohane wakati mazgu gha Yesaya ghakuyowoya vya iyo. (Yohane 1:19-23) Kwamba mu chaka cha 29 C.E., Yohane wakamba kunozgera nthowa Yesu Khristu. Ivyo Yohane wakapharazganga ndivyo vikapangiska kuti ŵanthu ŵalindilire mwakunweka Mesiya wakulayizgika mwakuti pamanyuma ŵazakategherezge kwa iyo na kumulondezga. (Luka 1:13-17, 76) Kwizira mwa Yesu, Yehova wazamulongozgera ŵakupera ku wanangwa uwo ukwiza na Ufumu wa Chiuta pera kweniso kufwatulika ku wuzga wakwananga na nyifwa. (Yohane 1:29; 8:32) Uchimi wa Yesaya uwu chomene ukafiskika mu 1919, apo ŵakukhalira ŵa Israyeli wauzimu ŵakafwatulika ku Babuloni Mukuru ndipo kusopa kwaunenesko kukawezgekerapo.