Kaŵirikaŵiri, Ŵayuda ŵakamulekanga Yehova na kwamba kusopa ŵachiuta ŵatesi. Yehova wakalutilira kuyezga kuŵawovwira vyaka vinandi. Wakaŵatumira ntchimi zinandi kuti ziŵachenjezge, kweni iwo ŵakapulikira yayi. M’malo mwake, ŵakazisekanga. Kasi Yehova wakachita wuli kuti waŵalekeske kusopa vikozgo?

Nebukadinezara, themba la Babuloni, wakamba kuthereska mitundu yinandi. Pakwamba wakathereska Yerusalemu, ndipo wakakora Themba Yehoyakini, ŵakaronga, ŵankhondo, na ŵantchito ŵake na kuluta nawo ku wuzga ku Babuloni. Wakatoraso usambazi wose mu tempile la Yehova. Pamasinda, Nebukadinezara wakamuŵika Zedekiya kuŵa themba la Yuda.

Pakwamba, Zedekiya wakamupulikiranga Nebukadinezara. Kweni mitundu yapafupi na ntchimi zitesi zikamba kuphalira Zedekiya kuti wagalukire Babuloni. Yeremiya wakamuchenjezga kuti: ‘Usange wagaluka, mu Yuda muŵenge kukomana, njara, na matenda.’

Wakati wawusa vyaka 8, Zedekiya wakagalukira Babuloni. Wakapempha ŵasilikari ŵa Eguputo kuti ŵamovwire. Ntheura Nebukadinezara wakatuma ŵankhondo ŵake kuti ŵazakawukire Yerusalemu ndipo ŵakazenga msasa kuzingilizga msumba wose. Yeremiya wakaphalira Zedekiya kuti: ‘Yehova wakuti usange iwe na msumba wako mwajipeleka ku Babuloni, msumba na iwe muponenge. Kweni para wakana, Ŵababuloni ŵazamuwotcha Yerusalemu na kukutolera ku wuzga.’ Zedekiya wakati: ‘Nijipelekenge yayi!’

Pakati pajumpha chaka chimoza na hafu, ŵasilikari ŵa Babuloni ŵakanjira mu Yerusalemu na kubuska msumba wose na moto. Ŵakawotcha tempile, ŵakakoma ŵanthu ŵanandi, ndipo ŵanandiso ŵakaŵatolera ku wuzga.

Zedekiya wakachimbira, kweni Ŵababuloni ŵakamulondezga m’paka ŵakamusanga pa Yeriko. Ŵakamukora na kuluta nayo kwa Nebukadinezara. Themba la Babuloni likamutora Zedekiya kuti waŵepo apo ŵana ŵake ŵakakomekanga. Pamasinda, Nebukadinezara wakamudolora maso Zedekiya na kumuŵika mu jele, ndipo wakafwira mwenemumo. Kweni Yehova wakalayizga Ŵayuda kuti: ‘Para pajumpha vyaka 70, nizamumuwezgerani kwinu ku Yerusalemu.’

Kasi ntchivichi chikachitikira ŵawukirano awo ŵakatolekera ku wuzga ku Babuloni. Kasi ŵakalutilira kugomezgeka kwa Yehova?

Nebukadinezara wakati watolera ŵakaronga ŵa Ŵayuda ku Babuloni, wakaphalira ŵasilikari ŵake kuti ŵasankhepo ŵanyamata ŵankhongono na ŵakumanya tunthu. Ŵanyamata aŵa ŵakeneranga kusambizgika kwa vyaka vitatu. Masambiro agha ghakaŵa ghakuti ghaŵawovwire kuti ŵaŵe ŵakwenelera kuteŵetera mu nyumba ya themba ku Babuloni. Nebukadinezara wakasora Ashipenazi, wantchito mulara mu nyumba yake, kuti walaŵilirenge ŵanyamata aŵa. Ŵanyamata aŵa, ŵakeneranga kusambira kuŵazga, kulemba, na kuyowoya chiyowoyero cha Ŵakalidi. Ŵakenerangaso kurya chakurya icho themba na ŵantchito ŵake ŵakaryanga. Mazina gha ŵanyamata aŵa ghakaŵa Daniyeli, Hananiya, Mishayeli, na Azariya. Ashipenazi wakaŵathya mazina Ghachibabuloni ghakuti Beliteshazara, Shadireki, Misheki, na Abedinego. Kasi ivi vikaŵatondeska kuteŵetera Yehova?

Ŵanyamata ŵanayi aŵa ŵakasimikizga mtima kuti ŵapulikirenge Yehova. Ŵakamanyanga kuti ŵakwenera yayi kurya vyakurya vya themba, chifukwa Dango la Yehova likatenge vinyake ni vyakukazuzgika. Ntheura ŵakaphalira Ashipenazi kuti: ‘Taŵeya, kutiryeska vyakurya vya themba yayi.’ Ashipenazi wakati: ‘Usange mukurya yayi ndipo themba lamuwonani kuti mukulwara, lizamunikoma!’

Daniyeli wakapempha uyo wakaŵalaŵiliranga kuti: ‘Taŵeya, mutipe waka mphangwe na maji kwa mazuŵa 10. Para mazuŵa agha ghakwana muzakatiyaniske na ŵanyamata awo ŵakurya vyakurya vya themba.’ Uyo wakaŵalaŵiliranga wakazomera.

Pamanyuma pa mazuŵa 10, Daniyeli na ŵanyake ŵatatu ŵakawonekanga ŵakututuŵa kuluska ŵanyamata ŵanyake wose. Yehova wakakondwa chifukwa ŵakamupulikira. Nakuti wakamupa Daniyeli vinjeru kuti wapulikiskenge mboniwoni na maloto.

Ŵakati ŵamara kusambizgika, Ashipenazi wakatolera ŵanyamata wose kwa Nebukadinezara. Themba likayowoya nawo ndipo likawona kuti Daniyeli, Hananiya, Mishayeli, na Azariya ŵakaŵa ŵamahara chomene na ŵakumanya tunthu kuluska ŵanyamata wose. Themba likasankha ŵanyamata ŵanayi aŵa kuti ŵateŵeterenge mu nyumba yake. Ntheura kanandi likafumbangako ulongozgi pa nkhani zikuruzikuru. Yehova wakaŵapa mahara kuluska ŵanalume wose ŵavinjeru na ŵamasalamusi ŵa themba.

Nangauli ŵakaŵa ku charu chachilendo, Daniyeli, Hananiya, Mishayeli, na Azariya ŵakaluwa yayi kuti mbanthu ŵa Yehova. Kasi nawe ukumbukenge Yehova nyengo zose, nanga ungaŵa kwawekha uko ŵapapi ŵako kulije?