Usiku unyake Nebukadinezara wakalota loto lakuzizika chomene. Likamusuzga chomene mwakuti wakatondekanga kugona. Wakachema ŵamasalamusi ŵake na kuŵaphalira kuti: ‘Nilongosolerani loto lane.’ Iwo ŵakati: ‘Tiphalirani loto linu Themba.’ Kweni Nebukadinezara wakati: ‘Yayi! Imwe ndimwe muniphalire ivyo nangulota, para mwatondeka nimukomaninge.’ Iwo ŵakatiso: ‘Tiphalirani ivyo mwangulota, ndipo timulongosoleraninge ng’anamuro lake.’ Nebukadinezara wakati: ‘Mose mukukhumba kunimata phura mu maso. Niphalirani ivyo nangulota!’ Ŵakaphalira themba kuti: ‘Palije munthu wamoyo uyo wangachita nthena. Ivyo mukupempha vingachitika yayi.’

Nebukadinezara wakakwiya chomene, ntheura wakayowoya kuti ŵanalume wose ŵavinjeru ŵakomeke mu Babuloni. Daniyeli, Shadireki, Misheki, na Abedinego nawo ŵakaŵa pa gulu lakwenera kukomeka. Daniyeli wakapempha themba kuti liŵape nyengo. Ntheura Daniyeli na ŵanyake ŵakalomba Yehova kuti waŵawovwire. Kasi Yehova wakaŵawovwira?

Mu mboniwoni Yehova wakalongora Daniyeli loto la Nebukadinezara na ng’anamuro lake. Zuŵa lakulondezgapo, Daniyeli wakaluta kwa muteŵeti wa themba na kumuphalira kuti: ‘Kukoma mwanalume waliyose wavinjeru yayi. Ine ningalongosora loto la themba.’ Muteŵeti wakaluta na Daniyeli kwa Nebukadinezara. Daniyeli wakaphalira themba kuti: ‘Chiuta wavumbura vinthu vyamunthazi kwa imwe. Loto linu ni ili: Mukawona chikozgo chikuru icho chikaŵa na mutu wagolide, nganga na mawoko vyasiliva, nthumbo na vigha vyamkuŵa, malundi ghachisulo, ndipo vikandiro vyake vikaŵa vyakusazgikana chisulo na dongo. Kufuma apo, libwe likachekeka kufuma ku phiri, ndipo likatimba vikandiro vya chikozgo. Chikozgo chikateketeka na kuzgoka fuvu ilo likaputa na mphepo. Libwe ili likazgoka phiri likuru, ndipo likazura charu chose chapasi.’

Daniyeli wakalutilira kuti: ‘Loto linu ili likung’anamura kuti: Ufumu winu ni mutu wagolide. Siliva ni ufumu uwo wizenge pamanyuma pinu. Kufuma apo, pazamwiza ufumu unyake uwo uzamuŵa nga ni mkuŵa, ndipo uzamuwusa charu chose chapasi. Ufumu unyake uzamuŵa wankhongono nga ntchisulo. Paumaliro, pazamuwuka ufumu wakugaŵikana, mu vigaŵa vinyake uzamuŵa wankhongono nga ntchisulo ndipo mu vigaŵa vinyake uzamuŵa wambura nkhongono nga ni dongo. Libwe ilo likazgoka phiri ni Ufumu wa Chiuta. Uzamuteketa maufumu ghose agha, ndipo iwo uzamukhalilira muyirayira.’

Nebukadinezara wakawa pasi panthazi pa Daniyeli, wakasindama m’paka chisko chake pasi. Wakati: ‘Chiuta wako ndiyo wakuvumbulira loto ili. Palije Chiuta munyake wakuyana nayo.’ M’malo mwa kumukoma Daniyeli, Nebukadinezara wakamwimika kuŵa mulara wa ŵanalume wose ŵavinjeru. Kweniso wakamupa mazaza kuti walaŵilirenge chigaŵa chinyake cha Babuloni. Kasi wawona umo Yehova wakazgolera lurombo lwa Daniyeli?

Nyengo yikati yajumphapo kufuma apo Themba Nebukadinezara likalotera loto la chikozgo, likapanga chikozgo chikuru chagolide. Likachiyimika mu chidika cha Dura, ndipo likachema ŵanthu ŵakuchindikika chomene mu charu chira. Shadireki, Misheki, na Abedinego nawo ŵakachemeka kuti ŵimilire panthazi pa chikozgo. Themba likalangura kuti: ‘Para mwapulika waka kulira kwa mbata, toliro, na bango, mose mugwadire chikozgo! Waliyose uyo wandagwade waponyekenge mu ng’anjo yakugolera na moto.’ Kasi Ŵahebere ŵatatu aŵa ŵakachigwadira chikozgo, panji ŵakalutilira kusopa Yehova pera?

Themba likalangura kuti sumu yiyimbike. Ŵanthu wose ŵakagwada pasi na kusopa chikozgo. Kweni Shadireki, Misheki, na Abedinego ŵakagwadako yayi. Ŵanthu ŵanyake ŵakaŵawona ndipo ŵakaphalira themba kuti: ‘Ŵahebere ŵatatu aŵa ŵakana kusopa chikozgo chinu.’ Nebukadinezara wakaŵachemeska na kuŵaphalira kuti: ‘Nkhumupani mwaŵi unyake kuti musope chikozgo. Para mwakana, nimuponyaninge mu ng’anjo yamoto. Palije chiuta uyo wangamuponoskani kwa ine.’ Iwo ŵakazgora kuti: ‘Tikukhumbaso mwaŵi unyake yayi. Chiuta withu wangatiponoska. Nakuti nanga wangaleka kutiponoska, tisopengepo chara chikozgo chinu, imwe Themba.’

Nebukadinezara wakakwiya chomene. Wakaphalira ŵateŵeti ŵake kuti: ‘Mukasonkhe moto mu ng’anjo ka 7 kuti yiŵe yakotcha chomene kuluska nyengo zose!’ Wakaphaliraso ŵasilikari ŵake kuti: ‘Ŵakakani ŵanalume aŵa na kuŵaponyamo!’ Ng’anjo yikawotcha chomene mwakuti ŵasilikari ŵakati ŵafika pafupi, ŵakafwira papo. Ŵahebere ŵatatu ŵara ŵakawira mu ng’anjo. Kweni Nebukadinezara wakati walaŵiska mukati, wakawona ŵanthu ŵanayi ŵakwendakwenda mu ng’anjo. Wakawopa chomene, ndipo wakafumba ŵantchito ŵake kuti: ‘Asi tanguponyamo ŵanthu ŵatatu mu ng’anjo? Ine nkhuwonamo ŵanayi, ndipo munyake wakuwoneka nga ni mungelo!’

Nebukadinezara wakaluta pafupi na ng’anjo ndipo wakachemerezga kuti: ‘Fumani, imwe ŵateŵeti ŵa Chiuta Wapachanya Nkhanira!’ Ŵanthu wose ŵakazizwa kuwona Shadireki, Misheki, na Abedinego ŵakufuma mu moto ŵali ndendende umo ŵakaŵaponyera. Thupi lawo, sisi, na vyakuvwara vyawo vikaphyapo yayi, panji kununkha josi pera.

Nebukadinezara wakati: ‘Chiuta wa Shadireki, Misheki, na Abedinego ni mukuru. Wangutuma mungelo wake na kuŵaponoska. Palije chiuta munyake wakuyana na Chiuta wawo.’

Nase mphanyi tasimikizga mtima kuti tilutilirenge kugomezgeka kwa Yehova visuzge viti wuli.