Usiku unyake Nebukadinezara wakalota loto lakofya. Wakachema ŵanalume ŵake ŵavinjeru kuti ŵamuphalire ng’anamuro lake. Kweni wose ŵakatondeka. Paumaliro, themba likafumba Daniyeli.

Nebukadinezara wakaphalira Daniyeli kuti: ‘Mu maloto, nkhawona chikhuni. Chikakura chomene mwakuti chikafika m’paka kuchanya. Chikawonekeranga pa charu chose chapasi. Chikaŵa na mahamba ghakutowa kweniso vipambi vinandi. Vinyama vikakhalanga mu mfwiri wake, ndipo viyuni vikazenga vivwimbo mu minthavi yake. Pamasinda mungelo wakakhira kufuma kuchanya. Wakati: “Dumulira pasi chikhuni, phatako minthavi yake. Kweni chisinga uchileke pasi pamoza na misisi yake ndipo uchikake na chakukakira chachisulo na mkuŵa. Mtima wa chikhuni usinthenge kufuma ku mtima wa munthu na kuzgoka mtima wachinyama, ndipo pazamujumpha nyengo 7. Ŵanthu wose ŵazamumanya kuti Chiuta ndiyo wakuwusa ndipo wakupeleka ufumu kwa uyo mweneko wakhumba.”’

Yehova wakamuvumbulira Daniyeli ng’anamuro la loto ili. Daniyeli wakati wamanya ivyo loto ili likung’anamura wakawopa. Wakati: ‘Fumu yane, loto ili mphanyi languŵa la ŵalwani ŵinu, kweni likuyowoya vya imwe. Chikhuni chikuru icho chikadumulikira pasi ndimwe. Muzamupokeka ufumu, ndipo muzamurya utheka muthondo nga ni vinyama vyamuthengere. Kweni pakuti mungelo wakati chisinga na misisi yake vilekeke, muzamuŵaso themba.’

Pakati pajumpha chaka chimoza, Nebukadinezara wakendanga pachanya pa nyumba yake yachifumu, wakajihayanga chifukwa cha Babuloni. Wakati: ‘Wonani msumba ukuru uwo nazenga. Ndine mukuru nadi!’ Uku wachali kuyowoya, mazgu ghakafuma kuchanya ghakati: ‘Nebukadinezara! Sono ufumu wako wapokeka.’

Panyengo yeneyira, Nebukadinezara wakafuntha ndipo wakazgoka nga ntchinyama chamuthengere. Wakachichizgika kuleka nyumba yake yachifumu na kukakhala lumoza na vinyama ku thondo. Sisi la Nebukadinezara likakura nga ni mahungwa gha nombo, ndipo njoŵe zake zikaŵa nga ni njoŵe za viyuni.

Pakati pajumpha vyaka 7, Nebukadinezara wakaŵaso makora, ndipo Yehova wakamuŵikaso kuŵa themba la Babuloni. Pamasinda, Nebukadinezara wakati: ‘Nkhulumba Yehova, Fumu ya kuchanya. Sono namanya kuti Yehova ni Muwusi. Wakukhizga ŵanthu ŵakujikuzga, ndipo wakupeleka ufumu kwa uyo mweneko wakhumba.’

Pakati pajumpha nyengo, Belishazara wakaŵa themba la Babuloni. Usiku unyake wakachema ŵanthu ŵakuchindikika 1,000 ku phwando. Wakaphalira ŵateŵeti ŵake kuti ŵatore makapu ghagolide agho Nebukadinezara wakatora mu tempile la Yehova. Belishazara na ŵalendo ŵake ŵakamweranga makapu agha, uku ŵakulumba ŵachiuta ŵawo. Mwamabuchi, woko likuru likawoneka mu mlengalenga ndipo likamba kulemba mazgu ghakuzizika pa chiliŵa mu chipinda chakulyeramo.

Belishazara wakawopa chomene. Wakachema ŵamasalamusi ŵake ndipo wakaŵaphalira kuti: ‘Uyo wanganilongosolera mazgu agha, waŵenge wachitatu pa ŵanthu ŵamazaza chomene mu Babuloni.’ Ŵakayezga , kweni wose ŵakatondeka. Pamanyuma fumukazi yikati: ‘Pali munthu munyake zina lake Daniyeli uyo wakatemwanga kulongosolera vinthu Nebukadinezara. Wangamulongosolerani mazgu agha.’

Daniyeli wakiza kwa themba. Belishazara wakati kwa iyo: ‘Usange unganiŵazgira na kunilongosolera mazgu agha, nikupenge majuda ghagolide ndipo uŵenge wachitatu pa ŵanthu ŵamazaza chomene mu Babuloni.’ Daniyeli wakati: ‘Vyawanangwa vinu nkhuvikhumba yayi, kweni nimuphaliraninge ivyo mazgu agha ghakung’anamura. Adada ŵinu, a Nebukadinezara, ŵakaŵa ŵakujikuzga, ndipo Yehova wakaŵakhizga. Imwe mukumanya vyose ivyo vikaŵachitikira, kweni mwayuyura Yehova pakumwera vinyo mu makapu ghagolide gha mu tempile lake. Ntheura Chiuta walemba mazgu agha: Mene, Mene, Tekeli, na Parisini. Mazgu agha ghakung’anamura kuti Ŵamedi na Ŵaperesiya ŵazamupoka Babuloni, ndipo imwe muzamuŵaso themba yayi.’

Vikawonekanga nga kuti palije uyo wangathereska Babuloni. Msumba uwu ukaŵa wakuvikilirika chifukwa ukaŵa na m’panda wakukhora kweniso ukaŵa pakati pa mlonga. Kweni usiku wenewura, Ŵamedi na Ŵaperesiya ŵakawukira Babuloni. Sayirasi themba la Ŵaperesiya, wakapatuska maji mu mlonga, kuti ŵasilikari wake ŵambuke kuti ŵakafike pa geti la msumba. Ŵakati ŵafika pa geti, ŵakasanga kuti pali pwankhu! Ŵasilikari ŵakanjira mu msumba na kuwupoka, ndipo ŵakakoma themba. Pamasinda, Sayirasi ndiyo wakaŵa themba la Babuloni.

Mu chaka chimoza, Sayirasi wakapharazga kuti: ‘Yehova waniphalira kuti nimuzengereso tempile lake ku Yerusalemu. Waliyose uyo wakukhumba kovwirapo ni mwanangwa kuluta.’ Ntheura, Ŵayuda ŵanandi ŵakawelera kwawo ku Yerusalemu pakati pajumpha vyaka 70 nga umo Yehova wakalayizgira. Sayirasi wakatumizgaso makapu ghagolide na ghasiliva na viteŵetero vyose ivyo Nebukadinezara wakatora mu tempile. Apa tawona kuti Yehova wakagwiliskira ntchito Sayirasi kuti wawovwire ŵanthu ŵake.