Pakajumpha vyaka pafupifupi 70 kufuma apo Ŵaisrayeli ŵakawelera ku Yerusalemu. Kweni ŵanyake ŵakaŵa kuti ŵachali kukhala mu vigaŵa vinyake vya Ufumu wa Peresiya. Yumoza wawo wakaŵa Ezira, uyo wakasambizganga Dango la Yehova. Ezira wakapulika kuti ŵanthu mu Yerusalemu ŵakulondezga yayi Dango. Ntheura wakakhumbanga kuluta kuti wakaŵawovwire. Themba la Peresiya Aritazekisesi likaphalira Ezira kuti: ‘Chiuta wakupa vinjeru kuti usambizge Dango lake. Luta, ndipo ulute na waliyose uyo wakukhumba kuluta nawe.’ Ezira wakakumana na wose awo ŵakakhumbanga kuwelera ku Yerusalemu. Ŵakati ŵalomba kwa Yehova kuti waŵavikilire paulendo utali uwu, ŵakambapo ulendo.

Ŵakenda myezi 4 ndipo ŵakafika ku Yerusalemu. Ŵakaronga ŵakaphalira Ezira kuti: ‘Ŵaisrayeli ŵakumupulikira yayi Yehova ndipo ŵali kutora ŵanakazi awo ŵakusopa ŵachiuta ŵatesi.’ Kasi Ezira wakachita vichi? Pamaso pa Ŵaisrayeli wose, Ezira wakagwada pasi na kulomba kwa Chiuta kuti: ‘Yehova, mwatichitira vinandi chomene, kweni tamunangirani.’ Ŵanthu ŵakalapa, kweni ŵakalutilira kuchita viheni. Ezira wakasankha ŵalara na ŵeruzgi kuti ŵeruzgenge ŵanthu. Pakati pajumpha myezi yitatu, wose awo ŵakasopanga Yehova yayi ŵakachimbizgika mu Yerusalemu.

Pakati pajumpha vyaka 12, viliŵa vya Yerusaremu vikaŵa kuti vyazengekaso. Ntheura, Ezira wakawunganya ŵanthu kuti waŵaŵazgire Dango la Chiuta. Ezira wakati wajura waka buku, ŵanthu wose ŵakayimilira. Ezira wakalumba Yehova, ndipo ŵanthu ŵakawuska mawoko kulongora kuti ŵakolerana nayo. Pamasinda, Ezira wakaŵazga na kuŵalongosolera Dango, ndipo ŵanthu ŵakapulikizganga chomene. Ŵakazomerezga kuti ŵakapatukaso kwa Yehova, ntheura ŵakalira. Zuŵa lakulondezgapo, Ezira wakalutilira kuŵaŵazgira Dango. Ŵanthu ŵakaphalirika kuti kuŵenge Chiphikiro cha Visakasa. Ntheura, nyengo yeneyiyo ŵakamba kunozgekera chiphikiro ichi.

Chiphikiro ichi chikatora mazuŵa 7, ndipo ŵanthu ŵakakondwa na kuwonga Yehova chifukwa cha kuŵapa vyakurya vinandi. Kufuma mu nyengo ya Joshuwa chiphikiro chanthena ichi chikaŵa kuti chindachitikepo. Chiphikiro chikati chamara, ŵanthu ŵakawungana, ndipo ŵakalomba kuti: ‘Yehova, mukatithaska ku wuzga, mukatiryeska mu mapopa, ndipo mukatipa charu chakutowa ichi. Kweni tamugalukirani mwakuwerezgawerezga. Mukatuma zintchimi kuti zitichenjezge, kweni tikapulikira yayi. Kweni mukazikira nase. Mukalutilira kukumbuka phangano ilo mukachita na Abrahamu. Sono tikulayizga kuti timupulikiraninge.’ Ŵakalemba phangano lawo, ndipo ŵakaronga, Ŵalevi, na Ŵasembe ŵakadindapo chidindo chawo.

Tiye tiwelere ku vyaka vyakumasinda pachoko. Nehemiya, wakaŵa Muisrayeli, kweni wakakhalanga mu tawuni ya Shushani ku Peresiya. Wakaŵa wantchito wa Themba Aritazekisesi. Mubali wa Nehemiya wakafuma ku Yuda, kweni wakiza na uthenga uwemi yayi. Wakati: ‘Ŵanthu mu Yerusalemu ŵali pangozi. Viliŵa vya msumba na vipata ivyo Ŵababuloni ŵakabwangandura vindazengekeso.’ Nehemiya chitima chikamukora. Ndipo wakakhumbanga kuluta kuti wakawovwirepo. Ntheura wakalomba kwa Chiuta kuti themba limuzomerezge kuluta.

Pamasinda, themba likawona kuti Nehemiya wali na chitima. Themba likati: ‘Ndimo ukuwonekera yayi mazuŵa ghose. Suzgo ni vichi?’ Nehemiya wakati: ‘Ningalekerachi kuŵa na chitima uku tawuni yakwithu, Yerusalemu, njakupasuka?’ Themba likamufumba kuti: ‘Kasi ukukhumba kuti nikuchitire vichi?’ Nyengo yeneyiyo, Nehemiya wakalomba cha mu mtima. Ndipo wakati: ‘Chonde, nizomerezgani nilute ku Yerusalemu kuti nkhazengeso viliŵa.’ Themba Aritazekisesi likamuzomerezga kuti walute. Ndipo likawoneseska kuti Nehemiya waŵe wakuvikilirika paulendo utali uwu. Themba likamuŵikaso Nehemiya kuŵa kazembe wa Yuda ndipo likamupa mathabwa ghakuzengera vipata.

Nehemiya wakati wafika ku Yerusalemu, wakendera viliŵa. Wakachema ŵasembe na ŵalongozgi ndipo wakaŵaphalira kuti: ‘Vinthu vili makora yayi. Tikwenera kwambapo kugwira ntchito.’ Ŵanthu ŵakazomera, ndipo ŵakambapo kuzengaso viliŵa.

Kweni ŵalwani ŵawo ŵanyake ŵakaŵasekanga Ŵaisrayeli. Ŵakatenge: ‘Kambwe wangawiskira pasi linga ilo mukuzenga.’ Awo ŵakagwiranga ntchito ŵakasulako waka ivyo ŵanthu aŵa ŵakayowoyanga. Linga likakwera ndipo likaŵa lakukhora.

Ŵalwani ŵakakhumbanga kuti ŵazakawukire Yerusalemu mwamabuchi. Ŵayuda ŵakati ŵapulika ivi, ŵakawopa. Kweni Nehemiya wakati: ‘Kopa yayi. Yehova wali nase.’ Wakaŵika ŵalonda kuti ŵavikilirenge ŵantchito, kuti ŵalwani ŵaleke kuŵawukira.

Mu mazuŵa 52 pera, ŵakamalizga kuzenga linga na vipata. Nehemiya wakiza na Ŵalevi wose ku Yerusalemu kukajulira linga. Wakaŵaŵika mu magulu ghaŵiri ghakwimba. Ŵakakwera pachanya pa linga m’paka pa Chipata cha ku Dambo ndipo ŵakazingiliranga msumba wose. Ŵanyake ŵakendanga kulwande ili, ŵanyake kulwande linyake. Ŵakalizganga mbata, makumbalo, na bango ndipo ŵakayimbiranga Yehova. Ezira wakenda na gulu limoza ndipo Nehemiya wakenda na gulu linyake, m’paka ŵakafika ku tempile. Ŵanthu wose, ŵanalume, ŵanakazi, na ŵana, ŵakapeleka sembe kwa Yehova na kuchita chikondwelero. Mazgu ghawo ghakapulikikwanga kutali chomene.