Pakati pajumpha vyaka 400 kufuma apo viliŵa vya Yerusalemu vikamalira kuzengeka, Zekariya wakakhalanga pafupi na msumba uwu lumoza na muwoli wake, Elizabeti. Zekariya wakaŵa wasembe. Ŵanthu aŵa ŵakakhala vyaka vinandi mu nthengwa, kweni ŵakaŵavya ŵana. Zuŵa linyake apo Zekariya wakawotchanga vyakununkhira mu malo ghakupatulika mu tempile, mungelo Gabriyeli wakawonekera kwa iyo. Zekariya wakawopa, kweni Gabriyeli wakamuphalira kuti: ‘Kopa yayi. Niza na makani ghawemi ghakufuma kwa Yehova. Muwoli wako Elizabeti wababenge mwana msepuka, ndipo zina lake liŵenge Yohane. Yehova wasora Yohane kuti wachite ntchito yapadera.’ Zekariya wakafumba kuti: ‘Kasi ningagomezga wuli? Muwoli wane na ine tili ŵachekuru, tingababaso yayi.’ Gabriyeli wakati: ‘Chiuta ndiyo wanituma kuti nikuphalire uthenga uwu. Kweni chifukwa chakuti undanigomezge, uyowoyenge yayi m’paka mwana wazakababike.’

Zekariya wakachedwa kufuma mu malo ghakupatulika. Wakati wafuma, ŵanthu awo ŵakaŵa kuwaro ŵakakhumbanga kumanya icho changuchitika. Kweni Zekariya wakayowoyanga yayi. Wakamba kuyowoya waka na mawoko. Ntheura ŵanthu ŵakamanya kuti Zekariya wakapokera uthenga kufuma kwa Chiuta.

Nyengo yikati yajumphapo, Elizabeti wakaŵa na nthumbo ndipo wakababa mwana msepuka nga umo mungelo wakayowoyera. Ŵabwezi na ŵabali ŵake ŵakiza kuzakawona mwana. Ŵakakondwa chomene. Elizabeti wakati: ‘Zina lake ni Yohane.’ Iwo ŵakati: ‘Pakwinu palije munthu uyo wakuchemeka na zina lakuti Yohane. Umuthye waka zina la adada ŵake, Zekariya.’ Kweni Zekariya wakalemba papepara kuti: ‘Zina lake ni Yohane.’ Kufuma waka nyengo iyi, Zekariya wakambaso kuyowoya. Mu Yudeya mose ŵanthu ŵakapulika vya mwana uyu ndipo ŵakafumbanga kuti: ‘Kasi mwana uyu wazamuŵa wuli?’

Zekariya wakazuzgika na mzimu utuŵa. Wakachima kuti: ‘Walumbike Yehova uyo wakalayizga Abrahamu kuti wazamutuma Mesiya, kuti wazakatiponoske. Yohane wazamuŵa ntchimi, ndipo wazamunozgera nthowa Mesiya.’

Chinthu chinyakeso chapadera chikachitikira Mariya, mubali wa Elizabeti. Tiye tipulike vinandi mu mutu wapanthazi.

Elizabeti wakaŵa na mubali wake zina lake Mariya, ndipo wakakhalanga mu tawuni ya Nazarete ku Galileya. Mariya wakapangana na Yosefe kalipentara kuti ŵatoranenge. Apo mungelo Gabriyeli wakizanga kwa Mariya, Elizabeti wakaŵa na nthumbo ya myezi 6. Gabriyeli wakati: ‘Monire, Mariya. Yehova wakuchindika chomene.’ Mariya wakapulikiska yayi ivyo Gabriyeli wakang’anamuranga. Gabriyeli wakati: ‘Uŵenge na nthumbo ndipo uzamubaba mwana msepuka ndipo uzamumuthya Yesu. Wazamuŵa Fumu. Ufumu wake uzamuŵa wamuyirayira.’

Mariya wakati: ‘Kweni ine nindagonanepo na mwanalume. Kasi ningaŵa wuli na mwana?’ Gabriyeli wakati: ‘Palije icho chingamutonda Yehova. Mzimu utuŵa wizenge pa iwe, ndipo uŵenge na mwana. Mubali wako Elizabeti nayo wali na nthumbo.’ Mariya wakati: ‘Ndine muzgakazi wa Yehova. Vichitike kwa ine umo mwayowoyera.’

Mariya wakaluta kukawona Elizabeti uyo wakakhalanga mu tawuni iyo yikaŵa ku mapiri. Elizabeti wakati wapulika monire wa Mariya, bonda munthumbo yake wakasunkhunyika. Elizabeti wakazuzgika na mzimu utuŵa, ndipo wakati: ‘Mariya, Yehova wakutumbika. Ni mwaŵi kuŵa na mama wa Fumu yane mu nyumba yane.’ Mariya wakati: ‘Nkhulumba Yehova na mtima wane wose.’ Mariya wakakhala na Elizabeti myezi yitatu, ndipo wakawelera ku Nazarete.

Yosefe wakati wamanya kuti Mariya wali na nthumbo, wakakhumbanga kumazga chibwezi. Kweni mungelo wakawonekera kwa iyo mu maloto, ndipo wakati: ‘Kopa yayi kumutora. Palije icho wabuda.’ Ntheura Yosefe wakatora Mariya kuŵa muwoli wake ndipo wakaluta nayo ku nyumba yake.