Tikasankha Kuchepeskako Vyakuchita pa Umoyo Withu

Madián na Marcela ŵakakhalanga umoyo wa wofuwofu ku Medellín, Colombia. Madián wakapokeranga ndalama zinandi pa ntchito yake, ndipo ŵakakhalanga mu nyumba yiwemi chomene. Kweni pakachitika chinthu chinyake icho chikaŵatuma kuti ŵasandeso vyakuchita vyawo pakuŵa ŵateŵeti ŵa Yehova Chiuta. Iwo ŵakulongosora kuti: “Mu 2006 tikaluta ku ungano wadera wa mutu wakuti ‘Ŵani na Jiso Liwemi.’ Nkhani zinandi izo zikayowoyeka zikatichiska kuti tichepeskeko vyakuchita pa umoyo withu kuti titeŵetere Chiuta mwakukwana. Apo tikafumanga ku ungano uwu, tikawona kuti ndivyo ise tikuchita yayi. Tikatemwanga kugura waka chilichose icho tachidokera ndipo tikaŵa na ngongoli yikuru yakuti tiwezge.”

Pakupulikira ulongozgi uwo ŵakapulika pa ungano uwu, Madián na Marcela ŵakamba kuchepeskako vyakuchita pa umoyo wawo. Iwo ŵakuti: “Tikamba kuchepeskako vyakuguragura. Tikasamira mu kanyumba kachoko, tikaguliska galimoto yithu, na kugura muthuthuthu.” Chinyake ntchakuti ŵakaleka kukagura vinthu ku mashopu ghakurughakuru kuti ŵaleke kuyezgeka kugura vinthu vinyake vinandi. Ŵakamba kumalira nyengo yinandi pakuyowoya na ŵanthu vya Baibolo. Ŵakendanga na ŵanyawo awo ŵakateŵeteranga Yehova Chiuta mwamwamphu pakuŵa ŵapayiniya ŵapadera.a

Nakalinga, Madián na Marcela ŵakaghanaghana vya kusazgirakoso uteŵeti wawo pakusamira ku mpingo uchoko wa ku mizi uwo ukakhumbikwiranga wovwiri. Kuti ŵasame, Madián wakaleka ntchito. Bwana wake wakawona nga wafuntha kuleka ntchito. Ntheura Madián wakadumba nayo, wakamufumba kuti: “Imwe mukusanga ndalama zinandi chomene, kweni kasi ndimwe ŵakukondwa?” Bwana yura wakati yayi, chifukwa wakaŵa na masuzgo ghanandi agho wakatondekanga kughamazga. Penepapo Madián wakati kwa iyo: “Ipo ndikuti chakuzirwa chomene ni unandi wa ndalama izo munthu wakusanga yayi. Chakuzirwa chomene nkhusanga chinthu icho chingakupangiska kuŵa wakukondwa nadi. Muwoli wane na ine tikukondwa para tikusambizga ŵanthu vya Chiuta, ndipo tikukhumba kuŵa ŵakukondwa chomene pakusazgirako nyengo iyo tikuchitira mulimo uwu.”

Madián na Marcela mbakukhorwa kweniso ŵakukondwa chifukwa cha kuchita vinthu vyakuzirwa chomene vyauzimu. Mu vyaka 13 ivyo vyajumpha, ŵateŵetera mu vigaŵa ivyo kukukhumbikwira ŵapharazgi ŵanandi mu mipingo ya kumpoto cha kumanjiliro gha dazi kwa Colombia. Nakuti pasono mbapayiniya ŵapadera.