Ŵajalirika mu Jele Chifukwa cha Chipulikano Chawo—Crimea

Nkhaza izo ŵamazaza ŵa boma la Russia ŵakuchitira Ŵakaboni ŵa Yehova sono zafikaso nanga nkhu Crimea. Boma la Russia likukanizga mawupu gha Ŵakaboni ŵa Yehova kweniso lalongora pakweru kuti likukhumba kumazgirathu vyose vyakukhwaskana na kusopa kwawo kwa mtende. Kufuma waka apo boma la Russia likakanizgira ntchito ya Ŵakaboni mu April 2017, ŵamazaza ŵa Russia ŵakusecha nyumba za Ŵakaboni na kutimbanizga maungano ghawo kanandinandi waka, ndipo ŵakaka na kujalirika mu jele Ŵakaboni ŵanandi. Vinthu vyanthena ivi ndivyo vikuchitikiraso Ŵakaboni ŵa Yehova ku Crimea.

Kusecha Nyumba za Ŵakaboni ku Dzhankoy mu November 2018

Pa November 15, 2018, ku Dzhankoy, Crimea, ŵapolisi 200 na ŵamazaza ŵanyake ŵakasecha mwakuchichizga nyumba 8, izo Ŵakaboni ŵachoko waka ŵakakumananga kuti ŵaŵerenge na kudumbiskana fundo za mu Baibolo. Ŵapolisi pafupifupi 35 awo ŵakayeya futi kweniso ŵakavwara vinthu vyakujara ku maso, ŵakanjira mwakuchichizga mu nyumba ya Sergey Filatov, umo Ŵakaboni 6 ŵakawungana. Ŵakaboni aŵa ŵakachita wofi chomene na ivyo vikachitika. Ŵapolisi aŵa ŵakafyenyelera ku chimati mwanalume wa vyaka 78, kumuchichizga kuti wagone pasi, kukaka mawoko ghake na simbi, na kumutimba uheni chomene mwakuti m’paka ŵakachimbilira nayo ku chipatala mwaluŵiro. Ŵanalume ŵanyakeso ŵaŵiri ŵachekuru BP yikakwera chomene chifukwa cha ivyo vikachitika ndipo nawo ŵakachimbilira nawo ku chipatala. Chachitima ntchakuti mwanakazi munyake uyo nayo ŵapolisi ŵakasecha nyumba yake, nthumbo yikafuma.

Ŵapolisi ŵati ŵasecha nyumba izi, Filatov ŵakamupa mulandu wakuti ‘wakovwira gulu ilo likuchita vinthu mwakutalulira,’ kuyana na Dango 282.2(1) la Russia. Pa March 5, 2020, Mweruzgi Mariya Yermakova wa Khoti la Dzhankoy ku Crimea wakati Filatov wakagwire jele vyaka 6. Ŵati ŵapeleka waka cheruzgo ichi, nyengo yeneyiyo ŵakaluta nayo ku jele. Chilango icho wakapika apa ntchikuru chomene kuyaniska na “mulandu” wake wakuti wakachitanga vinthu vyakukhwaskana na kusopa mwa mtende ku nyumba yake. Filatov ngwakutora, wali na ŵana ŵanayi, ndipo ŵaŵiri ŵachali ŵachoko.

Pa May 26, 2020, Khoti Likuru ku Crimea likategherezga apilu ya Filatov ndipo nalo likakhozgera ivyo khoti lichoko likadumura pa March 5. Chilango icho wakapika cha vyaka 6, chikamba kugwira ntchito nyengo yeneyiyo. Pakutolera nyengo iyo wanguŵira kale mu jele kulindilira kuti mulandu wake weruzgike, vyaka 6 ivi vizamumara pa January 23, 2026. Maloya gha Filatov ghalemberenge vikalata mawupu ghakupambanapambana ghakuwona vya wanangwa wa ŵanthu kuti ghawovwirepo.

Kusecha Nyumba za Ŵakaboni ku Yalta mu March 2019

Pa March 20, 2019, ŵamazaza ŵakasecha mwakuchichizga nyumba 8 za Ŵakaboni ŵa Yehova mu misumba ya Alupka na Yalta, ndipo pamanyuma ŵakakaka Artem Gerasimov kwa kanyengo na kumufumba mafumbo. Apo ŵamazaza ŵakasechanga nyumba izi, ŵakapoka Mabaibolo, makompyuta, na vinthu vinyake. Pamanyuma Gerasimov ŵakamupa mulandu wakuti wakulongozga gulu ilo likuchita vinthu vyakofya, chifukwa chakuti waka wakadumbiskananga fundo za mu Baibolo lumoza na ŵanyake.

Pa March 3, 2020, Khoti la Msumba wa Yalta ku Crimea likati Gerasimov wali na mulandu. Khoti likati walipire ndalama pafupifupi madola 6,000 gha ku America. Wakachita apilu mulandu wake. Pa June 4, 2020, Khoti Likuru ku Crimea likakana apilu iyo wakachita ndipo likati wakagwire jele vyaka 6. Nyengo yeneyiyo chigamuro ichi chikamba kugwira ntchito ndipo ŵakaluta nayo kukamujalira mu selo. Gerasimov wachitenge apilu chigamuro ichi.

Kukaka na Kusunga mu Jele Ŵakaboni mu 2020

Pa October 1, 2020, nyumba 9 za Ŵakaboni ŵa Yehova zikasecheka ku Sevastopol, Crimea. Ŵati ŵamara kusecha, ŵanalume 5 na mwanakazi yumoza ŵakaŵasunga dankha mu jele. Pati pajumpha maora ghachoko waka, mwanakazi ŵakamufumiska. Padera pa kusecha kweniso kusunga mu jele ŵanthu ŵanyake, ŵamazaza ŵakajura milandu yiŵiri kuyana na Dango 282.2(1) la Malango gha charu ichi. Mulandu umoza ni uwo ŵakamupa Evgeniy Zhukov, Vladimir Sakada, Vladimir Maladyka, na Aleksandr Kostenko. Unyake ni uwo ŵakamupa Igor Schmidt.

Pa October 2, 2020, Khoti la Leninsky ku Sevastopol likati ŵanalume ŵanayi ŵasungike mu jele myezi yiŵiri. Milandu iyi yikajurika na ŵamazaza ŵa FSB ŵa ku Republic of Crimea na Msumba wa Sevastopol. Mulara wa ŵa FSB, Yu.A. Andreyev ndiyo wakafufuza milandu iyi, ndipo ndiyoso wakuchita kafukufuku wa Milandu Yikuruyikuru Chomene. Mu March 2021, ŵati ŵaŵasazgirako kanandinandi waka nyengo ya kuŵasungira mu jele, ŵanalume ŵatatu ŵakaŵafumiska na kuŵatuma pa jele la panyumba. Mubali Zhukov wachali mu jele umo ŵakumusunga.

Nyengo

1. October 1, 2020

   Nyumba 9 zasecheka ku Sevastopol. Ŵanalume ŵanayi awo Mbakaboni ŵaŵasunga mu jele.

2. June 4, 2020

   Khoti Likuru ku Crimea ladumura kuti Gerasimov wagwire jele vyaka 6.

3. May 26, 2020

   Khoti Likuru ku Crimea likutegherezga apilu ya Filatov ndipo likukhozgera ivyo khoti lichoko likadumura.

4. March 5, 2020

   Filatov waphalirika kuti wakagwire jele vyaka 6.

5. March 3, 2020

   Khoti la mu Msumba wa Yalta ku Crimea lati Gerasimov wali na mulandu ndipo lati walipire ndalama zakukwana madola pafupifupi 6,000 gha ku America.

6. February 25, 2020

   Mulandu wa Filatov ukulutilira mu Khoti la Dzhankoy.

7. March 20, 2019

   Ŵamazaza ŵasecha mwakuchichizga nyumba 8 ku Alupka na Yalta. Gerasimov ŵamufumba mafumbo ndipo ŵati wali na mulandu wa kulongozga gulu ilo likuchita vinthu mwakutalulira.

8. November 15, 2018

   Ŵapolisi ŵakujumpha 200 na ŵamazaza ŵanyake ŵasecha nyumba 8 ku Dzhankoy, kusazgapo nyumba ya Filatov.