IVYO VIKUCHITIKA MU CHARU
Nkhani Za Mu Banja
Ŵanthu ŵakusangana na masuzgo ghanandi mu mabanja. Kweni fundo zavinjeru izo zili mu Baibolo zingaŵawovwira pa masuzgo agha.
AFRICA
Wupu wa vyaumoyo pa charu chose (WHO) ukuti para mwana wababika waka, mama wakwenera kwamba kumonkheska pambere ora limoza lindajumphe. Wakwenera kumonkheska bere pera m’paka mwana wakwaniske myezi 6. Kweni mulongozgi wa UNICEF ku Southern Africa wakayowoya kuti ŵanthu ŵakulondezga yayi ulongozgi uwu chifukwa cha kupusikika na ŵamalonda awo ŵakuti ‘kumweska mwana mukaka wa mu botolo vikuyana waka na kumonkheska bere.’
IVYO BAIBOLO LIKUYOWOYA: “Muzeleza wakupulikana bweka vyose, kweni wamahara wakupwelelera mendero ghake.”—Zintharika 14:15.
CANADA
Ŵanthu awo ŵakuchita kafukufuku ku Montreal ŵakayowoya kuti ŵana awo ŵapapi ŵawo ŵakukhwimiska chomene vinthu kwambura kuŵalongora chitemwa, kanandi ŵakuŵa na suzgo la kututuŵa chomene. Kweni ŵana awo ŵapapi ŵawo ŵakuŵatemwa kweniso kuŵalanga ŵakuŵavya suzgo ili.
KASI MUKUMANYA? Baibolo likulongosora umo ŵapapi ŵangalelera makora ŵana ŵawo.—Ŵakolose 3:21.
NETHERLANDS
Kafukufuku uyo wakachitika mu charu ichi wakulongora kuti ŵapapi awo ŵakuchezga makora na ŵana ŵawo ni awo para ŵafika ku nyumba ŵakutangwanikaso na vyantchito yayi. Kweni awo ŵakutangwanika na vyantchito para ŵaŵeruka vikuŵasuzga, chifukwa para ŵali ku nyumba ŵakwimba mafoni ghakukhwaskana na ntchito. Ntheura ŵakuŵavya nyengo yakuti ŵachezge na ŵana ŵawo.
FUNDO YAKUGHANAGHANIRAPO: “Kanthu kose kali na nyengo yake na yake.”—Mupharazgi 3:1.