IVYO VIKUCHITIKA MU CHARU
Nkhani za ku Americas
Nkhani zakufuma ku vyaru vyakumanjiliro gha dazi kwa charu chapasi (Western Hemisphere) zikulongora kuti fundo zavinjeru za mu Baibolo ni zakuzirwa.
Kasi Kuchepeskako Kuwona Maimelu Kungawovwira?
Kafukufuku uyo wakachitika ku Vancouver, Canada, wakulongora kuti ŵanthu ŵanandi ŵangaleka kusuzgika maghanoghano usange ŵangajuranga maimelu ghawo katatu pa zuŵa, m’malo mwa kujura kafutikafuti. Kostadin Kushlev, uyo wakadangilira pa kafukufuku uyu, wakayowoya kuti ivyo ŵasanga vikulongora kuti: “Ŵanthu ŵakutondeka kujikora pa nkhani ya kuwona maimelu. Kweni ukaboni ukulongora kuti para ŵangajikora mbwenu ŵangachepeskako suzgo la maghanoghano.”
FUNDO YAKUTI TIGHANAGHANIREPO: Tili mu “nyengo zinonono na zakusuzga,” ntheura ntchiwemi kusanga nthowa zakuchepeskerako suzgo la maghanoghano.—2 Timote 3:1.
Vyamoyo Vyam’maji Vyambaso Kwandana
Lipoti la wupu wa Wildlife Conservation Society (WCS) likuti: “Ukaboni ukulongora kuti somba, nkhara, na vyamoyo vinyake vyambaso kwandana mu vigaŵa ivyo maboma ghali kukanizga ŵanthu kuloŵamo.” Ivi vikuchitika ku Belize na vyaru vinyake vya ku Caribbean. Lipoti ili likutiso: ‘Pangatora chaka chimoza panji vyaka 6 kuti vyamoyo ivyo vyakhala pachoko kumalirathu vyambeso kwandana mu vigaŵa vyakukanizgika, kweni pangatora vyaka vinandi chomene kuti vyamoyo vyose viweleremo nga umo vikaŵira kale.’ Janet Gibson, mulara wa WCS, wakayowoya vya charu cha Belize kuti: “Vikulongora kuti kukanizga ŵanthu kuloŵa mu malo ghanyake, vingawovwira kuti somba na vyamoyo vinyake viweleremo mu charu ichi.”
FUNDO YAKUTI TIGHANAGHANIREPO: Kasi kuzizipizga uko tikuwona mu vilengiwa mbukaboni wakuti kuli Mlengi wavinjeru?—Salimo 104:24, 25.
Nkhaza mu Brazil
Wupu wakuthandazga makani wa Agência Brasil ukayowoya kuti nkhaza zafika paheni ku Brazil. Mu 2012, ŵanthu awo ŵakakomeka ŵakajumpha 56,000. Ichi chikaŵa chiŵelengero chikuru chomene pakuyaniska na viŵelengero vyose ivyo Unduna wa Vyaumoyo ukulemba chaka na chaka. Luís Sapori, kaswiri wa kuwona vya chivikiliro cha ŵanthu, wakayowoya kuti kusazgikira kwa nkhaza ntchilongolero chakuti makhaliro ghanjira pasi. Iyo wakati para ŵanthu ŵamba kuyuyura malango, “ŵakwamba kuchita nkhaza kuti ivyo ŵakukhumba vichitike.”
KASI MUKUMANYA? Baibolo likayowoya kale kuti yizamuŵapo nyengo iyo chitemwa cha ŵanthu “chizamuzizima” ndipo uchikanamalango uzamwandana.—Mateyu 24:3, 12.