Kufuma pa Ciwuka ca Yesu Mupaka pa Kukakika kwa Paulosi

Pakati pajumpha mazuŵa ghatatu Yesu wati wafwa, wakawuka ku ŵakufwa. Pa zuŵa ili wakawoneka ku ŵalondezgi ŵake kwa nyengo zinkhondi zakupambanapambana. Yesu wakalutilira kuwoneka kwa iwo kwa mazuŵa 40. Ndipo pa zuŵa linyake, uku ŵanyake mwa ŵasambiri ŵake ŵakuwona, Yesu wakakwera kucanya. Ghakati ghajumphapo mazuŵa 10, Ciuta wakapungulira mzimu utuŵa pa ŵalondezgi ŵa Yesu awo ŵakalindiliranga mu Yerusalemu.

Mukuluta kwa nyengo, ŵalwani ŵa Ciuta wakapangiska kuti ŵapositole ŵaŵikike mu jere, kweni mungelo wakaŵawuskamo. Ŵanthu ŵakususka ŵakadinya musambiri Stefano na malibwe mupaka wakafwa. Kweni tisambilenge umo Yesu wakasankhira yumoza wa ŵakususka aŵa kuti waŵe muteŵeti wake wapadera, ndipo wakazgoka mpositole Paulosi. Pakati pajumpha vilimika vitatu na hafu kufuma pa nyifwa ya Yesu, Ciuta wakatuma mpositole Petrosi kuti wakapharazge kwa Korneliyo uyo wakaŵa Muyuda yayi pamoza na nyumba yake yose.

Vilimika 13 pamanyuma pake Paulosi wakamba ulendo wake wakwamba wakukapharazga. Timote wakaluta nayo pa ulendo wake waciŵiri. Tisambirenge umo Paulosi na awo wakendanga nawo ŵakaŵira ŵakukondwa nyengo zinandi pakuteŵetera Ciuta. Paumaliro pake, Paulosi wakakakika mu Roma. Vilimika viŵiri pamanyuma pake wakasuturika, kweni wakakakikaso na kukomeka. Vyakucitika vya mu CIGAŴA 7 vikatora pafupifupi vilimika 32.