Kuti Musungilire Bwezi, Mukwenera Kuŵa Bwezi

Ubwezi ukuzikika pa citemwa. Para mukusambira vinandi vyakukhwaskana na Yehova, muzamuŵa na citemwa cikuru pa iye. Peneapo citemwa cinu ca pa Ciuta cikukura, khumbo linu la kumuteŵetera nalo lizamukura. Ici cizam’mupangiskani kuti muŵe musambiri wa Yesu Kristu. (Mateyu 28:19) Mwakukolerana na mbumba ya cimwemwe ya Ŵakaboni ŵa Yehova, mungasangwa na ubwezi na Ciuta kwamuyirayira. Kasi mukwenera kucitaci?

Mukwenera kurongora citemwa cinu pa Ciuta mwakupulikira marango ghake. “Kumutemwa Ciuta nceneici, cakuti tisungirire marango ghake: ndipo marango ghake kuti ngazitu cara.”—1 Yohane 5:3.

Gwiriskirani ncito ivyo mukusambira. Yesu wakayowoya nkani yeneiyo yikulongosora ici. Muntu wamahara wakazenga nyumba yake pa jarawe. Muntu wakupusa wakazenga nyumba yake pa mcenga. Peneapo vura yikuru yikarokwa, nyumba yeneiyo yikazengeka pa jarawe yikabwanganduka cara, kweni nyumba iyo yikazengeka pa mcenga yikabwanganduka. Yesu wakayowoya kuti awo ŵakupulika visambizgo vyake na kuvirondezga ŵali nga ndi muntu mweneuyo wakazenga nyumba yake pa jarawe. Kweni awo ŵakutegherezga ku visambizgo vyake na kuleka kuvirondezga ŵali nga ndi muntu mweneuyo wakazenga nyumba yake pa mcenga. Kasi imwe mukhumba kuŵa nga ndi muntu nju?—Mateyu 7:24-27.

Kujipatulira. Ici cikung’anamura kumufikira Yehova mu pempero na kumuphalira iye kuti mukukhumba kucita khumbo lake kwamuyirayira. Kucita khumbo la Ciuta cikurongora kuti muli musambiri wa Yesu Kristu.—Mateyu 11:29.

Ubapatizo. “Ubapatizike, ndipo ujisambiske ku zakwananga zako, pakucema zina lake.”—Milimo 22:16.

Toranimo cigaŵa mwakukwanira pa kuteŵetera Ciuta. “Kose ako mukucita, citani na mtima [wose, NW] nga ndi para nku Fumu ndiko, ku ŵantu cara.”—Ŵakolose 3:23.