Iŵani Bwezi la Ciuta Kwamuyirayira!

Kukukhumbikwira kuyezgayezga kuti muŵe na bwezi; kukukhumbikwira kuyezgayezga kuti musungilire bwezi. Kuyezgayezga kwinu kuti muŵe ndiposo kukhalirira bwezi la Ciuta kuzamutumbikika comene. Yesu wakayowoya kwa awo ŵakamugomezga kuti: “Unenesko uti umuzgorani ŵanangwa.” (Yohane 8:32) Kasi ici cikung’anamuraci?

Mungasangwa na wanangwa sono. Mungafwatuka ku visambizgo vyautesi na ku mautesi agho ghathandazgika na Satana. Mungafwatuka ku kuwura cigomezgo kweneuko kwazara mu mamiliyoni ghanandi gha ŵantu ŵeneawo ŵakumumanya cara Yehova. (Ŵaroma 8:22) Mabwezi gha Ciuta ngakufwatuka ku “wofi wa nyifwa.”—Ŵahebere 2:14, 15.

Mungasangwa na wanangwa mu caru cipya ca Ciuta. Mwee, nawo ngwanangwa wakuziziswa weneuwo mungasangwa nawo muntazi umu! Mu Paradiso wa pacaru capasi, muzamuŵavya nkondo, urwari, na kuswa-marango. Muzamuŵavya ukavu na njara. Muzamuŵavyaso ucekuru na nyifwa. Muzamuŵavyaso wofi, nkaza, na kuwura urunji. Pakuyowoya za Ciuta, Baibolo likuti: “Mukujura woko linu na kukhorweska camoyo cose na ulemu.”—Salmo 145:16.

Mabwezi gha Ciuta ghazamukhala na umoyo kwamuyirayira. Umoyo wamuyirayira ncawanangwa cakuzirwa ceneico Ciuta wazamupereka ku wose awo ŵakupenjerezga kuti ŵaŵe pa ubwezi na iye. (Ŵaroma 6:23) Mwee, aghanaghanirani waka za umoyo wamuyirayira umo uzamuŵira wacandulo kwa imwe!

Muzamuŵa na nyengo yakucitira vintu vinandi. Mutepanji mukukhumba kumanya umo mungagwiriskilira ncito vyombo vyakwimbira. Panji mukukhumba kuti musambire umo mungajambulira vithuzi-thuzi panji kuŵa kalipentara. Panyake mungakhumba kusambira za vinyama panji vintu vyakumera. Enya, panji mukukhumba kwenda na kuwona malo ghakupambana-pambana na ŵantu. Kuŵa na umoyo wamuyirayira kuzamupangiska vintu vyose ivi kuŵa vyamacitiko!

Muzamuŵa na nyengo yakupangira mabwezi ghanandi. Kukhala na umoyo wamuyirayira kuzamupangiska kuŵa kwamacitiko kumanyana na ŵantu ŵanandi ŵeneawo nawo ni mabwezi gha Ciuta. Muzamumanya maluso ghawo na mikhaliro yawo yiweme, ndipo nawoso ŵazamuŵa mabwezi ghinu. Muzamuŵatemwa, ndipo nawo ŵazam’mutemwani. (1 Ŵakorinte 13:8) Kuŵa na umoyo wamuyirayira kuzam’mupani nyengo yakuŵira pa ubwezi na waliyose pacaru! Cakuzirwa comene pa vyose ivi ncakuti ubwezi winu na Yehova wuzamukhora comene peneapo virimika vikujumpa. Mwee, mpanyi mwaŵa bwezi la Ciuta kwamuyirayira!