Mwapokelereka mu Sukulu ya Uteŵeti wa Ciuta

KUZINGILIRA caru cose capasi, mu vyaru vyakujumpa 200, ŵasambiri mamiliyoni ghanandi ŵakovwirika na Sukulu ya Uteŵeti wa Ciuta sabata yiliyose. Ŵasambiri ŵanji mbapya. Ŵanji ŵasanga nayo candulo sukulu iyi kwa virimika vinandi comene. Sukulu iyi yikucitika mu vigaŵa vinandi comene pa caru capasi. Kulikose uko mukukhala, programu yakuyana waka ya masambiro yikucitika. Ŵantu ŵa misinku yose, mafuko, ndiposo ŵamasambiro ghakupambana-pambana ŵakupokera urongozgi wakufuma kwa Ciuta mwambura kulipira.

Peneapo sukulu iyi yikamba kugwira ncito mu mipingo ya Ŵakaboni ŵa Yehova mu 1943, cilato cake cikaŵa: “Kunozgekereska ‘ŵanarumi ŵakugomezgeka’ wose awo ŵali kupulika Mazgu gha Ciuta na kurongora cipulikano cawo mu igho, kuti ‘ŵasambizge ŵanji’. . . na kupanga muntu waliyose kuŵa . . . wakukwana pakuyowoya za cilindizga cake.” (Course in Theocratic Ministry, peji 4) Cilato ca sukulu iyi cindasinte cara mupaka lero.

Mwanadi, kasi ncintu wuli cakuzirwa ceneico waliyose wa ise wangacita na cawanangwa cakupika na Ciuta ca kuyowoya? Baibolo likuzgora mwanteura: ‘Cintu ciri cose ico cikuthuta mvuci cirumbe Yehova!’ (Sal. 150:6) Para tikucita ici, tikumukondweska Dada withu wakucanya. Tikurongora kwa iye kuti mitima yithu yikuwongera uweme wake na citemwa cake. Mwambura kukayika Ŵakristu nyengo zose ŵakukhuŵirizgika kuti ‘ŵaperekenge sembe ya marumbo kwa Ciuta rutaruta, uko ndiko kuti cipambi ca milomo iyo yikuzomera zina lake.’ (Heb. 13:15) Kuti mugwiriskire ncito makora cawanangwa cinu cakupika na Ciuta kuti murumbe Yehova, tikumupokelerani nga ni musambiri mu Sukulu ya Uteŵeti wa Ciuta.

Peneapo kuŵazga kwa pawumba, luso lwa kuyowoya na kusambizga ndizo nkani zikuru mu Sukulu iyi, vyandulo vya Sukulu ya Uteŵeti wa Ciuta kuti ni vyenevivi pera cara. Para mukusambira, muzamovwirika kukuzga maluso ghakuzirwa gha nga ni kuŵazga, kutegherezga na kukumbukira, kusambira, kucita kafukufuku, kukonkoska na kulinganizga, kudumbiskana, kuzgora mafumbo, na kulemba fundo. Baibolo ilolene na vyakupharazga vyakuzikika pa Baibolo vizamupereka lufura lwa masambiro na fundo ndiposo viyezgelero ivyo vikulongoreka mu sukulu. Peneapo mukuzuzga maghanoghano ghinu na unenesko wakuzirwa uwo ukusangika mu Mazgu gha Ciuta, muzamusambira kaghanaghaniro ka Ciuta. Mwee, naco ncandulo ico cingaŵapo mu vigaŵa vyose vya umoyo! Pakuyowoya za kuzirwa kwa Mazgu gha Ciuta, William Lyon Phelps, musambizgi wa pa yunivesite ya mu virimika vya handiredi la 20 wakalemba kuti: “Waliyose uyo wali na cimanyisko ceneko ca Baibolo, mwanadi wangacemeka kuŵa wakusambira. . . . Nkugomezga kuti kuŵa na cimanyisko ca Baibolo kwambura kuruta ku koleji ncakuzirwa comene kuruska masambiro gha ku koleji ghambura Baibolo.”

Umo Tingasangira Candulo Cikuru

Kuti musange candulo cikuru mu masambiro gha mu Sukulu ya Uteŵeti wa Ciuta, imwe musambiri, mukwenera kulimbikira comene. Mpostole Paulos wakaciska Mkristu munyake Timote kuti: “Koserezga mu vyeneivi; uvifukatire nkanira; mwakuti [ŵantu] ŵose ŵawone umo ukukulira makora.” (1 Tim. 4:15) Ni mu ntowa wuli zakovwira izo mungagwiriskira ncito lemba ili?

Usange ncamacitiko, sangikanipo sabata yiliyose pa Sukulu ya Uteŵeti wa Ciuta. Gwiriskirani ncito mwamahara buku ili la Sangani Candulo na Sukulu ya Uteŵeti wa Ciuta. Lembani zina linu pa malo ghakugaŵirika pa peji ilo pali mutu wa buku. Nyengo zose mukwenera kwiza na buku linu para mukusangikapo pa sukulu. Buku ili liri na malo agho mukwenera kulembapo fundo. Para mukuliŵazga ndipo mwasanga fundo zakuzirwa izo mukuwona kuti zingamovwirani, gwarani muzere kusi kwake. Gwiriskirani ncito malo ghamumpepete kuti mulembepo fundo zakovwira izo mwasambira panyengo ya vidumbirano mu sukulu.

Kope lakusindikizgika la programu iyo yizamugwiriskirika ncito mu Sukulu ya Uteŵeti wa Ciuta laperekeka. Ndondomeko iyi yizamuŵaso na urongozgi wa umo sukulu yizamucitikira. Cizamuŵa cakovwira kuŵika ndondomeko iyi mukati mwa buku ili, kuti muyisange mwaluŵiro.

Pakunozgekera masambiro gha sabata na sabata, kumbukirani kuti Baibolo ndilo buku likuru leneilo likugwiriskirika ncito comene. Ŵikani pwererero likuru pa kuŵazga cigaŵa cilicose ca Baibolo ico calinganizgika sabata iyo. Usange muli na mupata wa kuŵazga mwakutendekera nkani zakupambana-pambana za mu programu, ici naco cizamuŵa cakovwira comene.

Mu sukulu iyi, ŵategherezgi ŵakuŵa na mwaŵi nyengo zinyake kuti ŵatoremo cigaŵa. Gwiriskirani ncito mwaŵi uwu. Kunjizgikamo mu vidumbirano ivi nkwakovwira kuti mukumbukire ivyo mukupulika na kuvigwiriskira ncito mu umoyo winu.

Ŵasambiri wose wazamuŵa na mwaŵi wakuyowoya nkani panji kucita viyezgelero mu mpingo. Gwiriskirani ncito makora mwaŵi wuliwose. Yezgayezgani kunyolorera maluso ghinu mwakugwiriskira ncito urongozgi wuliwose wakukhwaskana na kayowoyero uwo mwapika. Muzamupika urongozgi na cilato cakuti murutilire kuya pantazi. Pokelerani covwiro ico. Mu buku linu, lembani masacizgo gha ivyo mungacita kuti munyolorere. Cifukwa cakuti ncakusuzga kwa muntu kujimanya iye mwene za cimanyisko cake kuruska umo ŵanji ŵakumuwonera, masacizgo na urongozgi vyakuzikika mu Baibolo ivyo vikuperekeka vingamovwirani comene kuti murute pantazi. Ici ncaunenesko nadi nanga mungaŵa kuti mwaŵa mukusambira mu sukulu kwa virimika vinandi.—Zinth. 1:5.

Kasi mukukhumba kuti murute pantazi mwaluŵiro? Usange mukukhumbisiska, mbwenu cicitikenge. Ŵazgani mwakutendekera nkani yiliyose iyo yamuyowoyeka na musambiri. Usange muyowoyi wandafike ndipo pakukhumbikwira munyake kuti wayowoye mu malo mwake, cizamuŵa camacitiko kwa imwe kujipereka, ndipo ici cizamupangiska kuti muŵe na mahara ghanandi. Peneapo ŵanji ŵakudumba nkani, tegherezgani mwakupwererera kuti muwone umo ŵakudumbira. Tikusambira kufuma ku ŵanyithu.

Mwakusazgirapo, usange ukhaliro winu ukuzomerezga, mungaruta pantazi mwa kuŵazga mwakutendekera buku ili. Panyuma pakuti mwasambira makora ivyo vili mu vipaturo 15 vyakurondezgapo, rutirizgani kuŵazga mupaka pa mutu wakuti “Ndondomeko ya Umo Mungarutiskira Pantazi Luso Lwinu Nga Ndi Muyowoyi na Musambizgi,” uwo ukuyambira pa peji 78. Cakwamba, ŵazgani sambiro lirilose na kujifumba vintu ivyo mwasambira mu sambiro ilo. Gwiriskirani ncito mu upharazgi ivyo mukusambira. Ivi vingarutiska nadi pantazi luso lwinu nga ndi muyowoyi ndiposo musambizgi wa Mazgu gha Ciuta.

Masambiro ghinu gha mu Sukulu ya Uteŵeti wa Ciuta ghamovwiraninge kunozgekera vintu ivyo nvyakuzirwa comene mu umoyo. Pakuti tili na umoyo cifukwa ca khumbo la Ciuta, anteura ise tikwenera kumurumba Ciuta cifukwa ndiye wakatilenga. Yehova Ciuta ngwakwenelera kurumbika comene. (Civ. 4:11) Masambiro agho tikusambira mu sukulu iyi ni ntowa ya kufiskira cakulata ici mwakuti tighanaghanire makora, kucita mwavinjeru, na kupharazga mwakukora mtima Mazgu ghakufunyilirika gha Ciuta.