Para Mukuŵazga Baibolo Muŵenge nga Mukuwona Ivyo Vikuchitika

Mu Baibolo muli nkhani zinandi za vinthu ivyo vikachitika nadi ndipo zikutisambizga vinthu vyakuzirwa chomene. Usange tikujitora nga tikuwona vinthu ivyo vikachitikanga mu nkhani izi, tipulikiskenge makora kweniso kusanga chandulo chomene na nkhani izi. Wonani masachizgo ghanyake agho ghangamovwirani kuti muŵenge nga mukuwona ivyo vikuchitika para mukuŵazga nkhani za mu Baibolo.

• Muŵazgenge mwakukwezga. Kuŵazga Baibolo mwakukwezga kungamovwirani kuti muŵe nga mukuwona ivyo vikulongosoreka. Para mukuŵazga Baibolo nga mbumba, mungajitora nga namwe mukaŵako pa nyengo iyo nkhani iyo yikachitikira ndipo mupani waliyose chigaŵa chake chakuti waŵazge.

• Muŵe nga mukuwona ivyo vikuchitika. Yezgani kupulikiska umo ŵanthu awo ŵakuzunulika mu nkhani iyo ŵakaghanaghaniranga kweniso umo ŵakajipulikiranga. Mwachiyelezgero, jifumbani kuti: ‘Chifukwa wuli munthu uyu wakayowoya panji kuchita vinthu munthowa iyi? Viŵenge kuti vinthu ivi vikachitikira ine, kasi mphanyi nkhaghanaghananga vichi panji nthena nkhajipulika wuli?’

• Dindani chithuzi cha ivyo vikuyowoyeka. Kudinda ivyo vikuyowoyeka mu nkhani iyo mukuŵazga mu Baibolo kungamovwirani kuti muŵe nga mukuwona kweniso kukumbuka makora ivyo mukuŵazga, nanga vingaŵa kuti mukumanya yayi kudinda mwaluso.