Umo Charu cha Indonesia Chiliri

Charu: Chili pakati pa Australia na Asia ndipo chili na virwa vinandi kuluska charu chilichose. Chili na virwa vyakujumpha 17,500 ndipo vinandi mwa virwa ivi vili na mapiri agho ghali na malibwe ghanandi. Virwa ivi viliso na makuni ghanandi. Ku charu ichi kukuphulika vimabala vyakotcha kufuma pasi kuluska charu chilichose. Vimabala ivi vikuphulika mu malo ghakujumpha 100.

Ŵanthu: Pa vyaru ivyo vili na ŵanthu ŵanandi chomene pa charu chose chapasi, charu cha Indonesia chili pa nambara 4. (chili mu gulu la vyaru nga ni China, India, na United States) kuli mitundu ya ŵanthu yakujumpha 300. Ŵanthu ŵakuchemeka Ŵajavani na Ŵasundani ndiwo mbanandi chomene mu charu ichi.

Chisopa: Ŵanthu ŵanandi ku Indonesia Mbasilamu (90 peresenti). Ŵachoko waka Mbahindu, Ŵabuda, na ŵanyake awo ŵakujichema kuti Ŵakhristu. Kuliso ŵanthu ŵanandi awo ŵakulondezga visopa vya ŵapapi ŵawo ŵakale.

Chiyowoyero: Ŵanthu ku Indonesia ŵakuyowoya viyowoyero vyakujumpha 700. Kweni Chiindonesiya ndicho wose ŵakupulikana makora. Chiyowoyero ichi chili kufuma ku chiyowoyero chakuchemeka Malay. Kweni ŵanthu ŵanandi ŵakuyowoya viyowoyero vyawo para ŵali pa nyumba zawo.

Umoyo: Ŵanthu ŵanandi mbalimi ndipo ŵanyake ŵakuchita bizinesi. Charu ichi kuli malibwe ghanandi ghakuzirwa, mathabwa, mafuta, kweniso chikuguliska chomene labara na mafuta gha kanjeza.

Chakurya: Mpunga ndiwo ntchakurya icho ŵanandi ŵakugomezga. Ŵanthu ŵanandi ŵakutemwa mpunga wakukazinga mu mafuta wakusazga na masumbi na mphangwe, uwo ukuchemeka nasi goréng. Ŵakutemwaso nyama yakotcha iyo ŵakuyichema satay. Kweniso ŵanandi ŵakutemwa kusazga mphangwe yambura kuphika (saladi) na doŵe.

Nyengo: Kukotcha chomene ku charu ichi. Ku Indonesia kukuŵa chihanya na chifuku chifukwa cha mphepo iyo yikutemwa kuputa (mphepo ya monsoon). Kanandi kukuŵa chimphepo na chivula cha ŵaleza.