Ŵakaŵa Mwana wa Sara

AMAMA ŴANE ŵakaŵa ŵalusungu kweniso ŵaubwezi. Ŵakalitemwanga chomene Baibolo. Ŵati ŵakumana na Gertrud Ott uyo wakaŵa mishonale mu Manado ku North Sulawesi, ŵakazomera sambiro la Baibolo ndipo ŵakasambira unenesko. Kweni adada ŵane a Erwin, awo ŵakagwiranga ntchito ku Banki ndipo pamanyuma ŵakaŵa cheyamani pa kampani yinyake yakukhwaskana na vya chuma ku Jakarta, ŵakaŵasuskanga chomene amama.

Zuŵa linyake adada ŵakaŵawofya chomene amama.

Adada ŵakaphalira amama mwaukali kuti: “Usankhepo pakati pa ine na tchalitchi lako!”

Amama ŵakakhala dankha chete na kughanaghanirapo. Pamanyuma ŵakazgora mwakuzika kuti: “Nkhukhumba vyose, mfumu wane na Yehova.”

Adada ŵakasoŵa chakuyowoya ndipo ukali ukamalira penepapo.

Pati pajumpha nyengo, adada ŵakamba kuŵapulikiska amama. Adada ŵakaŵatemwanga chomene amama kweniso ŵakaŵachindikanga chifukwa ŵakachitanga vinthu mwavinjeru ndiposo mwamahara.

Kweni amama ŵakakhumbanga chomene kuti adada ŵasambire unenesko. Ŵati ŵayilombera nkhani iyi kufumira pasi pa mtima, ŵakakumbuka kuti adada ŵakutemwa chomene kusambira viyowoyero. Ntheura ŵakaŵikanga pa malo ghakuwonekera mapepara agho pakaŵanga mavesi gha mu Baibolo mu Chingelezi. Amama ŵakaphalira adada kuti: “Nkhukhumba kuti nichimanye makora Chingelezi.” Pakuti ŵakamanyanga kuti adada ŵakatemwanga chomene kuti munthu wayowoyenge makora pawumba, ŵakaŵapempha kuti ŵawone umo ŵanozgekelera nkhani yawo ya mu Sukulu ya Uteŵeti wa Chiuta. Adada ŵakazomera. Pakuti ŵakamanyanga kuti adada ŵakutemwa kupokelera ŵalendo, amama ŵakaŵapempha usange ŵangapokelera mulaŵiliri wa dera. Adada ŵakazomera. Chifukwa chakuti adada ŵakatemwanga chomene banja lawo, amama ŵakaŵapempha kuti para vingachitika ŵakaŵe nase pa ungano wa chigaŵa. Adada ŵakaluta nase.

Pachoko na pachoko, mtima wa adada ukamba kusintha chifukwa amama ŵakazikiranga na kuchita vinthu mwamahara. Banja lithu likati lasamukira ku England, adada ŵakamba kuluta ku maungano ndipo ŵakaŵa paubwezi na John Barr, uyo pamanyuma wakazakaŵa yumoza wa mu Wupu Wakulongozga wa Ŵakaboni ŵa Yehova. Mu chaka chenechichi, adada ŵakabatizika ndipo amama ŵakakondwa chomene. Kufuma nyengo iyi kuya munthazi, adada ŵakalongoranga chitemwa chekhachekha kwa amama.

Ŵabwezi ŵithu ŵanyake ŵakatenge amama ŵakuyana na Lidiya, Mkhristu uyo wakaŵako mu nyengo ya ŵapositole. Lidiya wakatemwanga kupeleka vinthu ku ŵanthu. (Mil. 16:14, 15) Kweni ine nkhuwona kuti ŵakaŵa nga ni Sara, uyo wakapulikiranga chomene mfumu wake Abrahamu. (1 Pet. 3:4-6) Amama ŵakaŵa ŵakopa Chiuta, ŵantchindi, ndiposo ŵakutemwa chomene vinthu vyauzimu. Awo ŵakaŵamanyanga ŵakaŵatemwanga chomene. Chifukwa cha nkharo ya amama, adada ŵakasambira unenesko. Ine nkhuwona kuti ŵakaŵa nga ni mwana wa Sara.