Faataoto
22 E ‵tau o filifili ki se igoa ‵lei* i lō koloa e uke;+
E ‵lei atu ke fakaaloalogina i lō siliva mo aulo.
2 E ‵pau katoa a tino mau‵mea mo tino ma‵tiva i te feitu tenei:
Ne faite ne Ieova a latou katoa.+
3 A te tino atamai e lavea ne ia te mea fakamataku kae ‵muni,
Kae ko tino e se lasi te lotou iloa e olo ‵tonu atu eiloa, ko puapuaga ei i ikuga* o mea konā.
4 A te ikuga o te loto maulalo mo te mataku ki a Ieova
Ko te maumea mo te ‵malu mo te ola.+
5 A lakau tala‵tala mo matasele e ‵tu i te auala o te tagata fai mea pikopiko,
Kae ko so se tino e fakatāua ne ia tena ola e faka‵mao kea‵tea mai mea konā.+
6 Ke fakamasani se tamaliki tagata* ki te auala e ‵tau o fano a ia i ei;+
Kafai ko matua a ia ka se tiaki eiloa ne ia te auala tenā.+
7 A te tino maumea e pule ne ia a tino ma‵tiva,
Kae ko te tino kaitalafu se pologa a te tino ne kaitalafu a ia i ei.+
8 So se tino e ‵toki ne ia te sē amiotonu ka tau ne ia a fakalavelave,+
Kae ko te tokotoko o tena kaitaua ka oko ki tena gataga.+
9 A te tino kaimalie ka fakamanuiagina,
Me e tufa atu ne ia ana meakai ki tino ma‵tiva.+
10 Afuli kea‵tea a te tagata fakatauemu,
Kae ka ‵galo atu ei a kinauga;
A kinauga mo pati fakamasei ka gata atu.
11 A te tino telā e fiafia ki te loto ‵ma kae ‵gali ana pati
Ka fai ne ia te tupu mo fai tena taugasoa.+
12 A mata o Ieova e leoleo ne ia te iloaga,
Kae fakaseaoga ne Ia a pati a tino faitogafiti.+
13 Muna a te tino paie: “E isi se leona telā i tua!
Ka tamate eiloa au i te kogaloto o te malae o te fakai!”+
14 A gutu o fāfine ma‵sei* se lua ‵poko.+
A te tino e fakamalaia ne Ieova ka tō ki loto i ei.
15 A te loto o se tamaliki tagata*+ e saisai ne te valea,
Kae ko te tokotoko o te polopolokiga ka tapale kea‵tea ne ia ke ‵mao mai i a ia.+
16 A te tino telā e kaisoa ne ia a mea a tino ma‵tiva ke fakauke ei ana koloa+
Mo te tino telā e tuku atu a meaalofa ki tino mau‵mea
Ka iku atu ki te ma‵tiva.
17 Tuku mai ou taliga kae fakalogo ki pati a tino ‵poto,+
Ko te mea ke mafaufau faka‵lei tou loto ki mea e iloa ne au,+
18 Me se mea gali ke tausi a mea konā i loto i a koe,+
Ko te mea ke ‵nofo faeloa a mea katoa konā i ou laugutu.+
19 Ko te mea ke maua ne koe te loto talitonu ki a Ieova,
Ko tuku atu ne au ki a koe i te aso nei a te poto.
20 E a, e seki tusi atu eiloa au ki a koe,
O tuku atu a pati fakatonutonu mo te poto,
21 Ke akoako atu ki a koe a pati ‵tonu kae fakatuagagina,
Ko te mea ke mafai o foki atu koe mo se lipoti tonu ki te tino ne uga mai ne ia koe?
22 Ke mo a ma kaisoa ne koe a mea a te tagata mativa me i a ia e mativa,+
Kae ke mo a ma tuki pala ne koe a te tagata fakaalofa i te mataloa o te ‵pui o te fakai,+
23 Me ko Ieova eiloa ka fesoasoani atu ki te lotou tagi+
Kae ka tamate ne ia a latou kolā ne kaisoa ne latou olotou mea.
24 Ke mo a ma fai taugasoa mo se tagata mata itaita
Io me ‵kau fakatasi mo se tino kaitaua,
25 Ko te mea ke se tauloto eiloa koe ki ana auala
Kae maleigina ei koe.+
26 Ke mo a ma aofia koe i a latou kolā e lūlū lima i se tautoga,
Kolā e fai ne latou ne puipuiga mō tupe kaitalafu.+
27 Kafai e seai se mea a koe ke ‵togi ki ei,
Ka puke eiloa kea‵tea a tou moega mai lalo i a koe!
28 Ke mo a ma fakagasue ne koe se pine o te tuakoi
Telā ne ‵toki ne ou tupuga i te koga tonu.+
29 Kai lavea aka eiloa ne koe se tagata atamai i tena galuega?
Ka tu atu eiloa a ia i mua o tupu;+
Ka se tu a ia i mua o tāgata valevale.