Faataoto
29 A te tagata e fakamakeke tena ua* mai tua o polopolokiga ‵mafa e uke+
Ka pakiakia a ia kae ka se mafai o faka‵lei aka.+
2 Kafai e tokouke a tino amio‵tonu, e fia‵fia a tino,
Kae kafai ko pule mai a te tino amio masei, e mānava fi‵ta a tino.+
3 A te tagata e fiafia ki te poto e fai ne ia ke fiafia tena tamana,+
Kae ko te tino e fai mea fakatasi mo fāfine talitāgata e fakamāumāu ne ia ana koloa.+
4 E aumai ne se tupu a te tokagamalie ki se fenua e auala i te fai mea tonu,+
Kae ko te tino e salasala ki ‵togi fakakolekole e aumai ne ia te fakamaseiga ki ei.
5 A te tagata e tavae fakaloiloi ne ia tena tuakoi
E ‵fola ne ia se tili mō ana vae.+
6 A amioga solitulafono a se tagata masei e maleigina ei a ia,+
Kae e kalaga atu a te tino amiotonu i te lifu mo te fiafia.+
7 A te tino amiotonu e manavase ki te saolotoga o tino ma‵tiva,+
Kae ko te tino amio masei e se manavase ki mea penā.+
8 A tāgata e fai‵pati fakamata‵mata e fai ne latou ke kaitāua a tino i se fakai,+
Kae ko latou kolā e ‵poto e afuli kea‵tea ne latou te kaitaua.+
9 Kafai e kinau se tagata poto mo se tino valea,
Ka uke a pati kaitāua e fai mo fakatauemuga, kae e seai se lotomalie e maua i ei.+
10 A tāgata fia tatino e takalia‵lia ki tino e seai ne olotou ‵se,+
Kae e ‵sala latou o tamate a tino fai mea tonu.*
11 E fakaasi atu ne te tino valea ana lagonaga katoa,+
Kae ko te tino poto e taofiofi ne ia ana lagonaga.+
12 Kafai e saga atu se tino pule ki pati ‵loi,
Ana tavini katoa ka fai pelā me ne tino amio ma‵sei.+
13 E ‵pau eiloa te tagata mativa mo te tino fakasaua i te feitu tenei:
E tuku atu ne Ieova te mainaga ki mata o lāua konā.*
14 Kafai e fakamasino ne se tupu a tino ma‵tiva i te auala tonu,+
Ka saogalemu faeloa a tena nofogaaliki.+
15 A te lakau* mo polopolokiga ‵mafa e maua mai i ei te poto,+
Kae ko te tamaliki e tuku tiaki e aumai i ei te masiasi ki tena mātua.
16 Kafai ko tokouke a tino amio ma‵sei, ko uke foki a amioga solitulafono,
Kae ko tino amio‵tonu ka lavea ne latou te takavale o tino konā.+
17 Polopoloki tau tama kae ka aumai ne ia te filemu ki a koe;
Kae ka tuku atu ne ia ki a koe te fiafia lasi.+
18 Kafai e seai se fakaasiga,* e olo valevale fua a tino,+
Kae e fia‵fia a latou kolā e faka‵logo ki te tulafono.+
19 A te tavini ka se talia ne ia a pati fakatonutonu,
Faitalia me malamalama a ia, e se fakalogo a ia ki ei.+
20 Kai lavea aka eiloa ne koe se tagata e faipati fakava‵vave?+
E lasi atu te fakamoemoega o se tino valea i lō tou tagata.+
21 Kafai se tavini ne fakapelepele mai te taimi koi talavou ei,
Fakamuli ifo, ka seai se loto fakafetai i a ia.
22 A te tagata e ita vave e faka‵tupu ne ia a taua;+
So se tino e vave o kaitaua e fai ne ia amioga solitulafono e uke.+
23 A te fakamaualuga o se tagata ka fai ei a ia ke malalo,+
Kae ko so se tino e loto maulalo ka maua ne ia te ‵malu.+
24 A te tino e ga‵lue tasi mo te tino kaisoa e takalialia ki a ia eiloa.
E mafai o lagona ne ia te kalaga ke fai se molimau, kae e seai sena lipoti e fai atu.+