Numela
24 I te laveaga ne Palaamo me e fiafia* a Ieova ke fakamanuia atu ki Isalaelu, ne seki toe fano a ia o ‵sala ki pati ‵lau+ ke fai ne ia, kae ne ‵fuli atu a ia ki te koga lavaki. 2 I te kiloakaga a Palaamo kae lavea ne ia a tino Isalaelu e ‵nofo eiloa i olotou matakāiga,+ tenā ne oko atu ei te agaga o te Atua ki luga i a ia.+ 3 Tenā ne fai atu ei ne ia te faigamuna tenei:+
“Ko pati a Palaamo te tama tagata a Piolo,
Mo pati a te tagata telā ko oti ne faka‵pula ana mata,
4 Ko pati a te tino telā e lagona ne ia a pati a te Atua,
Telā ne lavea ne ia se fakaasiga a te Atua Malosi Katoatoa,
Telā ne punou ifo mo ana mata e se ‵pono:+
5 Ko oko eiloa i te ‵gali ou faleie, e Iakopo,
Ko koga e ‵nofo ei koutou, e Isalaelu!+
6 E pelā mo vanu ko oti ne fakalaina latou i laina ‵loa,+
E pelā mo fatoaga i tafa o te vaitafe.
E pelā mo aloe kolā ne ‵toki ne Ieova,
E pelā mo alasi i tafa o te vai.
7 E moti‵moti ifo a vai mai i ana paketi e lua,
Kae ‵toki ana fuaga i vai e uke.+
8 E aumai kea‵tea a ia ne te Atua mai Aikupito;
E fai a ia e pelā mo sau o se pulumakau tagata vao mō latou.
Ka kai ne ia a fenua katoa, ko tino kolā e ‵teke ki a ia,+
Ka lamulamu ne ia olotou ivi, kae ka fatifati likiliki ne ia ki ana matasana.
9 Ko totuli a ia, ko takato ki lalo e pelā me se leona,
Kae e pelā me se leona, ko oi la te tino e mafai o ‵fagu ne ia a ia?
A tino e fakamanuia ne latou koe ka fakamanuiagina,
A tino e fakamalaia ne latou koe ka fakamalaiagina.”+
10 Tenā ne kaitaua ei a Palako ki a Palaamo. Ne pati ne Palako ana lima mo te fakatauemu kae fai atu ki a Palaamo: “Ne ‵kami mai ne au koe ke fetū aka oku fili,+ kae e seai sau mea ne fai ki a latou kae na ko te fakamanuia atu fua o latou i taimi e tolu konei. 11 Na fano fakavave nei ki te fale. Au ne mafaufau o fakaaloalo malosi ki a koe,+ kae kiloke! ko oti ne fai ne Ieova ke se maua ne koe se tulaga fakaaloalogina.”
12 Ne tali atu a Palaamo ki a Palako: “E a, e seki fai atu au ki avefekau kolā ne uga mai ne koe, 13 ‘Kafai e tuku mai ne Palako ki a au a tena fale e ‵fonu i siliva mo aulo, e se mafai o fai ne au i toku loto eiloa se mea telā e sili atu i te fakatonuga a Ieova, faitalia me se mea ‵lei io me se mea masei. Ka faipati atu fua ne au a te mea e fai mai ne Ieova ki a au’?+ 14 Kae nei au ka fano ki oku tino. Vau ke fakailoa atu ne au a mea ka fai ne tino konei ki ou tino i aso mai mua.” 15 Fai atu ei ne ia te faigamuna tenei:+
“Ko pati a Palaamo te tama tagata a Piolo,
Mo pati a te tagata telā ko oti ne faka‵pula ana mata,+
16 Ko pati a te tino telā e lagona ne ia a pati a te Atua,
Mo te tino telā e maua ne ia te iloaga o te Atua Tafasili i te Maluga,
Ne lavea ne ia te Atua Malosi Katoatoa i se fakaasiga
I te taimi ne punou ifo ei a ia mo ana mata e se ‵pono:
17 Ka lavea ne au a ia, kae e se i te taimi nei;
Ka lavea ne au a ia, kae e se i se taimi pili mai mua nei.
18 Ka fai a Etoma mo fai se tofi,+
Ao, a Seila+ ko te tofi o ana fili,+
Kae ko Isalaelu e fakaasi ne ia tena loto toa.
19 Kae ka fakatakavale ne te tino telā e vau mai i a Iakopo,+
Kae ka fakaseai ne ia so se tino telā e sao mai te fakai.”
20 I te taimi ne lavea ei ne ia a Amaleka, ne toe fai atu ne ia te faigamuna tenei:
21 I te laveaga ne ia a tino Keni,+ ne fakasoko atu tena faigamuna tenei:
“E malu ‵lei a te otou koga ‵nofo, e pelā me se ofaga e tu i luga i se kaupapa.
22 Kae e isi se tino ka ‵sunu ne ia a Keni.
E pefea te leva ka ave fakapagota ei koe ne Asulia?”
23 Kae ne faka‵soko atu tena faigamuna tenei:
“Kalofa eiloa! Ko oi a tino ka ‵sao māfai e fai ne te Atua a te mea tenei?
24 Ka o‵mai a vaka mai te tafatai o Kitimo,+
Kae ka fakalogo‵mae ne latou a Asulia,+
Kae ka fakalogo‵mae ne latou a Epela.
Kae ka fakaseai atu foki a ia fakamuli.”
25 Tenā ne tu aka ei Palaamo+ ki luga kae foki ki tena koga. Ne fano foki a Palako i tena auala.