Numela

28 Ne fai atu a Ieova ki a Mose: 2 “Fakatonu atu a tino Isalaelu kae fai atu ki a latou, ‘E ‵tau o fai faka‵lei ne koutou a te auala e ofo mai ei ne koutou taku taulaga, ko aku meakai. Ko aku taulaga manogi ‵gali* kolā e ofo mai ki a au i luga i te afi e ‵tau eiloa o ofo mai i olotou taimi ‵tonu.’+

3 “Kae fai atu ki a latou, ‘Tenei te taulaga ka ofo atu ne koutou i luga i te afi ki a Ieova: e lua mamoe tāgata ‵lei kolā ko takitasi tausaga te ma‵tua i te aso ke fai e pelā me se taulaga ‵sunu i taimi katoa.+ 4 E tasi te mamoe tagata ka ofo atu ne koe i te taeao, kae ko te suā mamoe tagata ka ofo atu ne koe i te fakaafiafi kae koi tuai o pouli,*+ 5 fakatasi mo te tasi-vae-sefulu o te efa* o falaoa ‵mata kae ‵lei telā ne palu fakatasi mo te tasi-vae-fa o te hini* o te sinu mai i olive kolā ne tuki e pelā me se taulaga meakai.+ 6 A te mea tenā ko te taulaga ‵sunu+ masani telā ne kamata i te Mauga o Sinai e pelā me se mea manogi gali,* se taulaga telā e ofo atu i luga i te afi ki a Ieova, 7 fakatasi mo tena taulaga meainu, ko te tasi-vae-fa o te hini mō mamoe tāgata takitasi.+ Ke ‵ligi ki tua a meainu ma‵losi i te koga tapu e pelā me se taulaga meainu ki a Ieova. 8 Kae ka ofo atu ne koe a te suā mamoe tagata i te fakaafiafi kae koi tuai o pouli.* Ke ofo fakatasi atu ne koe mo te taulaga meakai e pelā mo te taulaga ne fai i te taeao e pelā foki mo tena taulaga meainu, kae ka ofo atu ne koe e pelā me se taulaga e ofo atu i luga i te afi kae manogi gali* ki a Ieova.+

9 “‘Kae i te aso o te Sapati+ e ‵tau o ofo atu se avā mamoe tāgata ‵lei kolā ko takitasi tausaga te ma‵tua mo te lua-vae-sefulu o te efa o falaoa ‵mata kae ‵lei ne palu fakatasi mo te sinu e pelā me se taulaga meakai, fakatasi mo tena taulaga meainu. 10 Tenei te taulaga ‵sunu mō te Sapati, fakatasi mo te taulaga ‵sunu masani mo tena taulaga meainu.+

11 “‘I te kamataga o masina* takitasi ka ofo atu ne koutou e pelā me se taulaga ‵sunu ki a Ieova se avā tamā pulumakau tāgata, e tasi te mamoe, mo mamoe tāgata ‵lei e fitu kolā ko takitasi tausaga te ma‵tua,+ 12 kae tolu-vae-sefulu o te efa o falaoa ‵mata kae ‵lei ne palu fakatasi mo te sinu e pelā me se taulaga meakai+ mō pulumakau takitasi kae lua-vae-sefulu o te efa o falaoa ‵mata kae ‵lei ne palu fakatasi mo te sinu e pelā me se taulaga meakai mō te mamoe e tasi,+ 13 kae e tasi-vae-sefulu o te efa o falaoa ‵mata kae ‵lei ne palu fakatasi mo te sinu e pelā me se taulaga meakai mō mamoe tāgata takitasi, e pelā me se taulaga ‵sunu, e manogi gali,*+ se taulaga telā e ofo atu i luga i te afi ki a Ieova. 14 Kae ko te lotou taulaga meainu e ‵tau se āfa hini o te uaina mō se pulumakau+ kae tasi-vae-tolu o te hini mō te mamoe+ kae tasi-vae-fa o te hini mō se mamoe tagata.+ A te mea tenei ko te taulaga ‵sunu i masina takitasi i loto i te tausaga kātoa. 15 E ‵tau foki o ofo atu se tamā kouti e pelā me se taulaga mō agasala ki a Ieova i tafa o te taulaga ‵sunu masani fakatasi mo tena taulaga meainu.

16 “‘I te masina muamua, i te po 14 o te masina, ka fai i ei te Paseka a Ieova.+ 17 Kae i te po 15 o te masina tenei, ka fai i ei se ‵kaiga fiafia. Ka ‵kai i ei ki falaoa sē faka‵fete i aso e fitu.+ 18 I te aso muamua ka fai i ei se fakatasiga tapu. E se ‵tau mo koutou o fai ne galuega ‵mafa i ei. 19 Kae ka ofo atu ne koutou e pelā me se taulaga ‵sunu telā e ofo atu i luga i te afi ki a Ieova se avā tamā pulumakau tāgata, e tasi te mamoe tagata, kae e fitu mamoe tāgata ko takitasi tausaga te ma‵tua. E ‵tau mo koutou o ofo atu a manu ‵lei eiloa.+ 20 E ‵tau mo koutou o ofo atu a mea konā fakatasi mo olotou taulaga meakai o falaoa ‵mata kae ‵lei kolā ne palu fakatasi mo te sinu,+ e tolu-vae-sefulu o te efa mō se pulumakau kae lua-vae-sefulu o te efa mō te mamoe tagata. 21 Ka ofo atu ne koe se tasi-vae-sefulu o te efa mō mamoe tāgata takitasi kolā e fitu, 22 mo se kouti e tasi e pelā me se taulaga mō agasala mo fai te otou faka‵māga. 23 I tafa o te taulaga ‵sunu i te taeao, telā ko te taulaga ‵sunu masani, ka ofo atu i ei ne koutou a mea konei. 24 Ka ofo atu ne koutou a mea konei i te auala eiloa tenā i aso takitasi mō aso e fitu e pelā me ne meakai,* se taulaga e ofo atu i luga i te afi kae manogi gali* ki a Ieova. E ‵tau o ofo tasi atu mo te taulaga ‵sunu masani mo tena taulaga meainu. 25 I te fitu o aso e ‵tau o fai ne koutou se fakatasiga tapu.+ E se ‵tau mo koutou o fai ne galuega ‵mafa i ei.+

26 “‘I te aso e ‵sulu ei a fuataga muamua,+ i te taimi e ofo atu ei ne koutou a taulaga meakai ‵fou ki a Ieova,+ e ‵tau o fai ne koutou se fakatasiga tapu i otou ‵kaiga o vaiaso.+ E se ‵tau mo koutou o fai ne galuega ‵mafa i ei.+ 27 E ‵tau o ofo atu ne koutou e pelā me se taulaga ‵sunu telā e manogi gali* ki a Ieova se avā tamā pulumakau, e tasi te mamoe tagata, kae fitu mamoe tāgata kolā ko takitasi tausaga te ma‵tua,+ 28 kae e pelā mo te lotou taulaga meakai o falaoa ‵mata kae ‵lei kolā ne palu fakatasi mo te sinu, e tolu-vae-sefulu mō pulumakau takitasi, e lua-vae-sefulu mō te mamoe e tasi, 29 e tasi-vae-sefulu mō mamoe tāgata takitasi e fitu, 30 e pelā foki mo se tamā kouti e tasi mo fai te otou faka‵māga.+ 31 Ka ofo atu ne koutou a mea konā i tafa o te taulaga ‵sunu masani mo tena taulaga meakai. E ‵tau o ‵lei katoatoa a manu konā,+ fakatasi mo te lotou taulaga meainu.