19 I te logoga a te Tupu ko Hesekia i te mea tenei, ne saesae ne ia ana gatu kae pei ki gatu lautaga kae fanatu ki loto i te fale o Ieova.+ 2 Tenā ne uga atu ei ne ia a Eliakimo, te pule o te kaufale,* Sepina te failautusi, mo toeaina mai faitaulaga kolā e ‵pei ki gatu lautaga, ki te pelofeta ko Isaia,+ te tama tagata a Amota. 3 Ne fai atu latou ki a ia: “Konei a pati a Hesekia ne fai mai, ‘A te aso nei se aso o te puapuaga, polopolokiga ‵mafa,* mo te masiasi; me i tama‵liki ko toka ke fa‵nau,* kae ko seai se malosi ke mafai o fanau.+ 4 E se taumate ka lagona ne Ieova tou Atua a pati katoa a te tagata ave ipu uaina,* telā ne uga mai ne tena aliki ko te tupu o Asulia ke fakaitaita ei te Atua ola,+ kae ka taui atu eiloa ne ia ki a ia ona ko pati kolā ne lagona ne Ieova tou Atua. Tela la, fai atu se ‵talo+ mō te ‵toega o tino kolā ne ‵sao.’”