21 Fakamuli ifo, ne fanatu a Tavita ki Nopa+ ki te faitaulaga ko Aimeleka. Ne kamata a Aimeleka o polepole i tena fetauiga mo Tavita, kae ne fai atu a ia: “Kaia ne vau tokotasi ei koe kae seai se tino ne o‵mai mo koe?”+ 2 Ne tali atu a Tavita ki a Aimeleka: “Ne fakatonu mai te tupu ke fai ne au se mea, kae ne fai mai a ia, ‘Sa fai ke iloa ne se tino a te fekau tenei ka uga ne au koe ke fano o fai e pelā foki mo fakatonuga ne tuku atu ne au ki a koe.’ Ko oti ne fai ne au se fakatokaga ke fetaui mo aku tamataene i se koga. 3 Nei la, kafai e isi ne au falaoa e lima ko tuku mai aka la ki a au, io me ne isi mea aka e mafai o maua.” 4 Kae ne tali atu te faitaulaga ki a Tavita: “E seai ne falaoa masani i oku lima, kae e isi ne falaoa tapu,+ kae e mafai fua o ‵kai au tamataene ki ei māfai e seki ‵nofo fakatasi eiloa mo fāfine.”*+ 5 Ne tali atu a Tavita ki te faitaulaga: “Ko oti eiloa ne taofi aka a fāfine ke se ‵nofo fakatasi mo matou e pelā eiloa mo te mea e fai sāle māfai e fanatu au o taua.+ Kafai e tapu a foitino o tamataene konei māfai e olo sāle o fai se galuega masani, kae sili atu la te tapu o latou i te aso nei!” 6 Tenā ne avatu ei ne te faitaulaga ki a ia a falaoa tapu,+ me e seai ne nisi falaoa i konā kae ko falaoa fua kolā ko oti ne ofo atu ki a Ieova kae ko aumai kea‵tea mai ana mua kae sui ki falaoa ‵fou i te aso eiloa ne ave ei kea‵tea.