Teutelonome

26 “Kafai ko ulu atu koe ki loto i te fenua telā ka tuku atu ne Ieova tou Atua ki a koe ke fai mo ou tofi kae ko puke mō koe kae nofo foki i ei, 2 e ‵tau o puke ne koe a fuataga muamua katoa o te laukele, kolā ka tau mai ne koe i te fenua telā ka tuku atu ne Ieova tou Atua ki a koe, tuku ki loto i se kete kae fano ki te koga telā e filifili ne Ieova tou Atua ke tuku i ei tena igoa.+ 3 E ‵tau mo koe o fano ki te faitaulaga telā e tavini atu i te aso tenā kae fai atu ki ei, ‘I te aso nei ko fakailoa atu ne au ki a Ieova tou Atua me ko oti ne oko mai au ki te fenua telā ne tauto a Ieova ki ‵tou tupuga ke tuku mai ki a tatou.’+

4 “Tenā ko puke ei ne te faitaulaga a te kete i ou lima kae tuku atu i mua o te fatafaitaulaga a Ieova tou Atua. 5 Ko fai atu ei koe ki a Ieova tou Atua, ‘A toku tamana se tino Alamea+ maumausolo; kae ne fanatu a ia ki lalo i Aikupito+ kae nofo i ei e pelā me se tino fakaa‵tea, fakatasi mo nai tino i tena kāiga.+ Kae ne fai a ia i konā e pelā me se fenua lasi, e malosi kae tokouke ‵ki latou.+ 6 Kae ko tino Aikupito ne fakasaua kae fakapuapuaga mai ki a tatou kae fakaga‵lue fakapologa foki tatou.+ 7 Tenā ne kamata ei o ka‵laga atu tatou ki a Ieova te Atua o ‵tou tupuga, kae ne lagona ne Ieova ‵tou leo kae ne kilokilo mai a ia ki ‵tou logo‵maega mo ‵tou fakalavelave mo ‵tou puapuaga.+ 8 Fakamuli loa, aumai ei ne Ieova tatou ki tua mo Aikupito ki tena lima malosi mo tena lima mafi+ fakatasi mo faifaiga fakama‵taku mo fakailoga mo vavega.+ 9 Tenā ne aumai ei ne ia tatou ki te koga tenei kae tuku mai ki a tatou te fenua tenei, se fenua telā e ‵tafe i ei a susu mo hani.+ 10 Nei la, ko aumai ne au a fuataga muamua o te laukele telā ne tuku mai ne Ieova ki a au.’+

“E ‵tau mo koe o avatu a mea konā ki mua o Ieova tou Atua kae ifo ki lalo i mua o Ieova tou Atua. 11 Tenā ko fiafia ei koe ki mea ‵lei katoa kolā ne tuku atu ne Ieova tou Atua ki a koe mo tino o tou kāiga, ko koe mo te kau Levi mo te tino fakaa‵tea i loto i a koutou.+

12 “Kafai ko oti ne fai te tasi-vae-sefulu+ kātoa o au fuataga i te tolu o tausaga, ko te tausaga o te tasi-vae-sefulu, ka avatu ne koe a mea konā ki te kau Levi, te tino fakaa‵tea, te tamaliki e seai sena tamana, mo te fafine ko mate tena avaga, kae ka ‵kai eiloa latou ke ma‵kona i ou fakai.+ 13 Tenā ko fai atu ei koe ki a Ieova tou Atua, ‘Ko oti ne ave kea‵tea ne au te vaega tapu mai loto i toku fale kae tuku atu ki te kau Levi, te tino fakaa‵tea, te tamaliki e seai sena tamana, mo te fafine ko mate tena avaga,+ e pelā eiloa mo tau fakatonuga ki a au. E seki soli io me ne manatu māmā au ki au fakatonuga. 14 Ne seki kai au ki ei i te taimi o te fanoanoa io me tapale ne mea mai i ei i te taimi ne se ‵ma ei io me tuku atu ne mea mai i ei ki tino ‵mate. Ne fakalogo eiloa au ki te leo o Ieova toku Atua kae fai a mea katoa ne fakatonu mai ne koe ki a au. 15 Nei la, kilo ifo ki lalo mai te koga ‵malu e nofo ei koe, ko te lagi, kae fakamanuia mai ou tino Isalaelu mo te fenua ko oti ne tuku mai ne koe ki a matou,+ e pelā eiloa mo tau tautoga ki omotou tupuga,+ te fenua telā e ‵tafe i ei a susu mo hani.’+

16 “I te aso nei a Ieova tou Atua ko fakatonu atu ki a koe ke fakalogo ki tulafono fo‵liki mo ikuga o fakamasinoga konei. E ‵tau mo koe o fakalogo kae fai a mea konā mo tou loto kātoa+ mo tou ola kātoa. 17 Ko maua ne koe i te aso nei a te folafolaga a Ieova me ka fai a ia mo ou Atua i te taimi e sasale ei koe i ana auala kae tausi ki ana tulafono fo‵liki,+ ana fakatonuga+ mo ikuga o ana fakamasinoga,+ mo te taimi e fakalogo ei koe ki tena leo. 18 Kae i te aso nei ko oti ne talia ne Ieova tau folafolaga ke fai koe mo ana tino, ko ana tino fakapito,*+ e ‵tusa eiloa mo tena tautoga ki a koe, kae ka fakalogo koe ki ana fakatonuga katoa 19 kae ka fakamaluga ne ia koe i nisi atufenua katoa ne faite ne ia,+ kae tuku atu a vikiga mo te takutakua mo te ‵malu ki a koe, māfai e fakamaoni atu ne koe i a koe se fenua tapu ki a Ieova tou Atua,+ e pelā eiloa mo tena tautoga.”