Te Muamua Nofoaiga Tupu

15 Kae ne faite faeloa ne ia ana fale i te Fakai o Tavita, kae ne fakatoka ne ia se koga mō te Pusa a te Atua tonu kae faite se faleie mō ia.+ 2 Ko te taimi tenā ne fai atu ei a Tavita: “E seai se tino e ‵tau o amo ne ia te Pusa a te Atua tonu kae na ko tino Levi fua, me ko oti ne filifili aka ne Ieova a latou ke amo te Pusa a Ieova kae tavini atu faeloa+ ki a ia.” 3 Tenā ne fakamaopoopo mai ei ne Tavita a tino Isalaelu katoa ki Ielusalema ke aumai a te Pusa a Ieova ki te koga telā ne fakatoka ne ia ke tuku i ei.+

4 Ne fakamaopoopo mai ne Tavita a tino kolā ne ‵tupu mai i a Alona+ mo tino Levi:+ 5 mai tino Koate, ko Ulielu te takitaki mo ana taina e toko 120; 6 mai tino Melali, ko Asaia+ te takitaki mo ana taina e toko 220; 7 mai tino Kelesoma, ko Ioelu+ te takitaki mo ana taina e toko 130; 8 mai tino kolā ne ‵tupu mai i a Elisafana,+ ko Semaia te takitaki mo ana taina e toko 200; 9 mai tino kolā ne ‵tupu mai i a Hepelona, ko Elielu te takitaki mo ana taina e toko 80; 10 mai tino kolā ne ‵tupu mai i a Usieli,+ ko Aminatapu te takitaki mo ana taina e toko 112. 11 E se gata i ei, ne kalaga atu a Tavita ki faitaulaga ko Satoka+ mo Aviata+ mo tino Levi ko Ulielu, Asaia, Ioelu, Semaia, Elielu mo Aminatapu, 12 kae ne fai atu a ia ki a latou: “A koutou ko ulu o kāiga o tino Levi i otou tamana. Ke fakatapu otou foitino, ko koutou mo otou taina, kae aumai te Pusa a Ieova te Atua o Isalaelu ki te koga ne fakatoka ne au ke tuku i ei. 13 Ona ko te mea ne seki amo ne koutou a te pusa i te taimi muamua,+ ne kaitaua a Ieova te ‵tou Atua ki a tatou,+ me ne seki ‵sala atu tatou ki te mea telā e ‵tau o fai.”+ 14 Tenā ne fakatapu ei a foitino o faitaulaga mo tino Levi ke aumai ne latou a te Pusa a Ieova te Atua o Isalaelu.

15 Tenā ne amo ei ne tino Levi a te Pusa a te Atua tonu i olotou tuauma ki amo,+ e pelā eiloa mo te fakatonuga a Mose mai i a Ieova. 16 Ne fai atu a Tavita ki takitaki o tino Levi ke ‵tofi aka olotou taina ko tino usuusu ke usu pese mo te fia‵fia, fakatasi mo mea fakatagi‵tagi: ko mea fakatagi‵tagi e isi ne uka i ei, kitala+ mo sumepalo.+

17 Tenā ne ‵tofi aka ei ne tino Levi a Hemanu+ te tama tagata a Ioelu kae mai i ana taina, ko Asafo+ te tama tagata a Pelekia, kae mai olotou taina ko tino Melali, ko Etanu+ te tama tagata a Kusaia. 18 E fakatasi atu ki a latou ko olotou taina mai te potukau i te lua,+ ko Sakalia, Peni, Iasiela, Semilamota, Ieielu, Uni, Eliapo, Penaia, Maseia, Matitia, Elifelehu, kae ko Mikineia mo Opeta-etoma mo Ieiela ko tino tausi mataloa. 19 A tino usuusu ko Hemanu,+ Asafo+ mo Etanu e ‵tau o fakatagi‵tagi ne latou a sumepalo+ kopa; 20 kae ko Sakalia, Iasiele, Semilamota, Ieielu, Uni, Eliapo, Maseia mo Penaia e tātā i kitala kae tiuni ki te Alamota;*+ 21 kae ko Matitia,+ Elifelehu, Mikineia, Opeta-etoma, Ieiela mo Asasia e tātā i kitala kolā e tiuni ki te Seminita,*+ ke fai pelā me ne takitaki o te kau fai pese. 22 A Kenania+ te takitaki o tino Levi e onoono ki te aveavega o mea, me i a ia se tino e apo i te faiga o mea konā, 23 kae ko Pelekia mo Elekana ko tino tausi o te Pusa. 24 A faitaulaga ko Seipania, Iosafata, Netanelu, Amasai, Sakalia, Penaia mo Eliesa ne faka‵tagi ne latou a pu i mua o te Pusa a te Atua+ tonu, kae ko Opeta-etoma mo Ieia e tavini atu foki e pelā me ne tino tausi o te Pusa.

25 Tenā ne sa‵sale fakatasi atu ei a Tavita mo toeaina o Isalaelu mo takitaki o te fia afe, o aumai te pusa o te feagaiga a Ieova mai te fale o Opeta-etoma+ mo te fia‵fia lasi.+ 26 I te taimi ne fesoasoani atu ei a te Atua tonu ki tino Levi kolā e amo te pusa o te feagaiga a Ieova, ne ofo atu ne latou a tamā pulumakau tāgata e fitu mo mamoe tāgata e fitu.+ 27 A Tavita e pei ki se gatu ‵loa mai laugatu ‵lei eiloa, e pelā foki mo tino Levi kolā e amo i te Pusa, ko tino usuusu, mo Kenania te takitaki o te aveavega o mea mo tino usuusu; a Tavita ne pei foki ki te efota lino.+ 28 Ne aumai ne tino Isalaelu katoa a te pusa o te feagaiga a Ieova kae ka‵laga fia‵fia+ fakatasi mo te faka‵tagiga o piukila, pu+ mo sumepalo, kae tātā i se leo maluga i olotou mea fakatagi‵tagi e isi ne uka i ei mo kitala.+

29 Kae i te taimi ne oko atu ei te pusa o te feagaiga a Ieova ki te Fakai o Tavita,+ ne kilo ifo a Mekala,+ te tama fafine a Saulo, mai te famalama kae lavea ne ia a te Tupu ko Tavita e evaeva fakatamilo kae fiafia; kae ne kamata a ia o takalialia ki tou tagata i tena loto.+