Te Lua Tupu
18 I te tolu o tausaga o te pulega a Hosia+ te tama tagata a Ela te tupu o Isalaelu, ne fai a Hesekia+ te tama tagata a te tupu o Iuta ko Aasa+ mo fai te tupu. 2 Ko 25 ana tausaga i te taimi ne fai ei a ia mo tupu, kae ne pule a ia i Ielusalema i tausaga e 29. A te igoa o tena mātua ko Avi* te tama fafine a Sakalia.+ 3 Ne fai faeloa ne ia te mea tonu i te kilokiloga a Ieova,+ e pelā eiloa mo mea ne fai ne tena tupuga ko Tavita.+ 4 Ko ia ne tapale kea‵tea ne ia a koga ma‵luga,+ ne ofa a pou fatu tapu, kae ‵kati ki lalo a pou lakau tapu.*+ Ne tuki palapala foki ne ia a te gata kopa telā ne faite ne Mose;+ me i te taimi tenā a tino Isalaelu koi fai eiloa ne latou ke fanaka te au o te taulaga ki ei kae ne masani o fakaigoa ne latou a te tupua ki te gata kopa.* 5 Ne talitonu a ia ki a Ieova+ te Atua o Isalaelu; e seai se tino ne ‵pau mo ia i tupu katoa o Iuta mai tua o ia e pelā foki mo latou kolā ne mua atu i a ia. 6 Ne ‵piki ‵mau a ia ki a Ieova.+ Ne seki ‵fuli kea‵tea a ia mai te tautali atu i a ia; ne tumau eiloa a ia i te tausi ki fakatonuga ne tuku atu ne Ieova ki a Mose. 7 Kae ko Ieova ne fakatasi atu ki a ia. So se koga ne fano a ia ki ei, ne gasuesue a ia mo te poto. Ne ‵teke atu a ia ki te tupu o Asulia kae ita ma tavini atu ki a ia.+ 8 Ne fakatakavale foki ne ia a tino Filisitia+ ke oko atu eiloa ki Kasa mo ana laukele, mai te taoa maluga ke oko ki te fakai e puipui faka‵lei.*
9 I te fa o tausaga o te pulega a te Tupu ko Hesekia, telā ko te fitu o tausaga o te pulega a Hosia+ te tama tagata a Ela te tupu o Isalaelu, ne fanatu te tupu o Asulia ko Salamanesa o taua atu ki Samalia kae kamata o nikoi ne ia.+ 10 Ne puke ne latou te fakai+ i te fakaotiga o te tolu o tausaga; i te ono tausaga o te pulega a Hesekia, telā ko te iva tausaga o te pulega a te tupu o Isalaelu ko Hosia, ne puke ei a Samalia. 11 Tenā ne ave fakapagota ei ne te tupu o Asulia a tino Isalaelu+ ki Asulia kae faka‵nofo atu latou i Hala mo Hapola i te vaitafe ko Kosana mo fakai o tino Metai.+ 12 Ne tupu te mea tenei ona ko te lotou sē faka‵logo ki te leo o Ieova te lotou Atua kae tumau i te fakaseaoga ne latou tena feagaiga, ko mea katoa kolā ne fakatonu atu ne Mose te tavini a Ieova.+ Ne seki faka‵logo latou ki ei io me tausi ki ei.
13 I te 14 tausaga o te pulega a te Tupu ko Hesekia, ne fanatu a Sanelivi te tupu o Asulia+ o taua ki fakai katoa o Iuta kolā e ‵pui faka‵lei kae ne puke ne ia.+ 14 Tenā ne avatu ei ne te tupu o Iuta ko Hesekia a te fekau ki te tupu o Asulia i Lakisa: “Au ko ‵se. Fano kea‵tea mai i a au, kae ka tuku atu ne au so se mea e fai mai koe ki ei.” Ne fai atu a te tupu o Asulia ki te tupu o Iuta ko Hesekia ke ‵togi atu e 300 taleni* siliva kae 30 taleni aulo. 15 Tenā ne avatu ei ne Hesekia a siliva katoa kolā e mafai o maua i te fale o Ieova mo potu ‵teu koloa i te fale* o te tupu.+ 16 I te taimi tenā ne tapale kea‵tea ne Hesekia a mataloa o te faletapu+ o Ieova mo pou o mataloa kolā ne ufi* eiloa ne te tupu o Iuta ko Hesekia,+ kae tuku atu ne ia ki te tupu o Asulia.
17 Tenā ne uga atu ei ne te tupu o Asulia a te takitaki,* te ofisa,* mo te tagata ave ipu uaina* fakatasi mo se kautau lasi mai Lakisa+ ki te Tupu ko Hesekia i Ielusalema.+ Ne olo aka latou ki Ielusalema kae ‵tu i tafa o te alavai o te vai mai luga, telā e tu i tafa o te auala lasi o te laukele o te tagata ‵ta gatu.+ 18 I te taimi ne ka‵laga atu ei latou ki te tupu ke vau ki tua, ne o‵mai ki tua i a latou a Eliakimo+ te tama tagata a Hilikia, telā e pule atu ki te kaufale,* Sepina+ te failautusi, mo Ioaha te tama tagata a Asafo te tino fakamau fakamatalaga.
19 Ne fai atu a te tagata ave ipu uaina ki a latou: “Fakamolemole fai ki a Hesekia, ‘Konei a pati a te tupu sili, te tupu o Asulia ne fai mai: “Se a te pogai o tou loto talitonu?+ 20 E fai mai koe, ‘E isi saku aofaga mo toku malosi ke taua atu,’ kae ko pati konei ne pati fua sē aoga. Ko oi e talitonu koe ki ei, ko mafai ei ne koe o ‵teke mai ki a au?+ 21 Kiloke! A koe e talitonu ki te ‵lago mai o te mouku loa tenei ko palapala ko Aikupito,+ telā kafai e fakapale ki ei se tagata e sulufia tena alofilima, ko pu ei. Tenā eiloa te mea e fai ne te Falao, te tupu o Aikupito, ki tino katoa kolā e tali‵tonu ki a ia. 22 Kae kafai e fai mai koe ki a au, ‘A matou e tali‵tonu ki a Ieova te motou Atua,’+ e a, e se i a ia a koga ma‵luga mo fatafaitaulaga kolā ne tapale kea‵tea ne Hesekia,+ kae fai atu a ia ki Iuta mo Ielusalema, ‘E ‵tau mo koutou o ifo ki lalo i te fatafaitaulaga tenei i Ielusalema’?”’+ 23 Nei la, fakamolemole, ke fai atu ne koe te peti tenei ki toku aliki te tupu o Asulia: Ka tuku atu ne au e 2,000 solofanua māfai e mafai ne koe o ‵sala a tino faka‵tele solofanua e lava ke faka‵tele a solofanua konā.+ 24 E mafai pefea o ‵tuli ne koe se kovana e tokotasi telā ko te ‵toe tino sē taulia i tavini a toku aliki, kae talitonu koe ki Aikupito ki ana kaliota mo tāgata faka‵tele solofanua? 25 E a, e se ko te taliaga a Ieova ne vau ei au o taua kae fakamasei te koga tenei? Ko Ieova eiloa ne fai mai ki a au, ‘Fano o taua ki te fenua tenei kae fakamasei atu.’”
26 I konā loa, fai atu ei a Eliakimo te tama tagata a Hilikia, mo Sepina+ mo Ioaha ki te tagata ave ipu uaina:+ “Fakamolemole, faipati mai ki au tavini i te ‵gana Alamaika,*+ me i a matou e malamalama i ei; sa faipati mai ki a matou i te ‵gana a tino Iutaia i te mea ma lagona ne tino i luga i te ‵pui.”+ 27 Kae ne fai atu te tagata ave ipu uaina ki a latou: “E mata, ne uga mai au ne toku aliki ke fai atu fua a pati konei ki te otou aliki mo koutou? E mata, e se ‵tau foki o fai atu ki tāgata konā e saga‵saga mai i luga i te ‵pui, ko latou kolā ka ‵kai ki olotou fekau kae inu ki olotou mimi fakatasi mo koutou?”
28 Tenā ne tu aka ei a te tagata ave ipu uaina kae kalaga atu i se leo maluga i te ‵gana a tino Iutaia, ana muna: “Faka‵logo mai ki pati a te tupu sili, te tupu o Asulia.+ 29 Konei a pati a te tupu ne fai mai, ‘Sa talia ne koutou ke fakaloiloi koutou ne Hesekia, me e se mafai o faka‵sao ne ia koutou mai oku lima.+ 30 Kae sa talia ke fai koutou ne Hesekia ke tali‵tonu ki a Ieova i ana pati: “Ka faka‵sao eiloa tatou ne Ieova, kae ka se tuku atu a te fakai tenei ki lima o te tupu o Asulia.”+ 31 Sa faka‵logo ki a Hesekia, me konei a pati ne fai mai ne te tupu o Asulia: “Fai ke maua se va filemu mo au kae talia ke takavale* koutou, kae ko koutou taki tokotasi ka ‵kai ki otou vine mo otou mati kae inu ki vai mai otou vaikeli eiloa, 32 ke oko ki te taimi e vau ei au o ave koutou ki se fenua e ‵pau mo te otou fenua,+ se fenua o saito mo uaina fou, se fenua o falaoa mo togavine, se fenua o lakau olive mo hani. Ko koutou eiloa ko ola kae e se ‵mate. Sa faka‵logo ki a Hesekia, me takitaki ‵se ne ia koutou i ana pati, ‘Ka faka‵sao tatou ne Ieova.’ 33 E mata, kai faka‵sao aka eiloa ne se atua o atufenua a te lotou fenua mai i lima o te tupu o Asulia? 34 Kofea a atua o Hamata+ mo Apaata? Kofea a atua o Sefavaima,+ Hena mo Ivaa? E mata, ko oti ne faka‵sao ne latou a Samalia mai i oku lima?+ 35 Ko oi mai i atua katoa o fenua ko oti ne fakasao ne ia te lotou fenua mai oku lima, ko te mea ke fakasao ne Ieova a Ielusalema mai i oku lima?”’”+
36 Kae ne ‵nofo filemu eiloa a tino kae seai se pati e fai atu ki a ia, me tenei te fakatonuga a te tupu, “E seai eiloa se otou tali e fai atu ki a ia.”+ 37 Kae ko Eliakimo te tama tagata a Hilikia, telā e pule i te kaufale,* Sepina te failautusi, mo Ioaha te tama tagata a Asafo te tino fakamau fakamatalaga ne olo atu ki a Hesekia mo olotou gatu ko oti ne saesae kae fai atu ki a ia a pati a te tagata ave ipu uaina.