Esoto

28 “E ‵tau o aumai ne koe mai i tino Isalaelu a tou taina ko Alona fakatasi mo ana tama tāgata, ko te mea ke tavini mai a ia ki a au e pelā me se faitaulaga+​—ko Alona+ fakatasi mo ana tama tāgata ko Natapu mo Apiu,+ Eliesa mo Itamala.+ 2 E ‵tau o ‵sui ne koe ne gatu tapu mō tou taina ko Alona, ke mata ‵malu kae ke ‵gali.+ 3 E ‵tau o faipati atu koe ki tino apo* katoa kolā ko oti ne faka‵fonu ne au ki te agaga o te poto,+ kae ka ‵sui ne latou a gatu o Alona mō tena fakatapuga, ko te mea ke mafai o tavini mai a ia ki a au e pelā me se faitaulaga.

4 “Konei a gatu ka ‵sui ne latou: ko te ufi fatafata,+ te efota,+ se gatu ‵loa e seai ne lima,+ se gatu fakatolotolo, se pulou laugatu,+ mo se fusi laugatu;+ ka ‵sui ne latou a gatu tapu konei mō tou taina ko Alona mo ana tama tāgata, ko te mea ke mafai o tavini mai a ia ki a au e pelā me se faitaulaga. 5 Ka fakaaoga ne tino ga‵lue apo konā a aulo, filo lanu moana, vulu lanu violeta, filo lanu kula mo laugatu lino ‵lei.

6 “E ‵tau o fai ne latou te efota ki te aulo, filo lanu moana, vulu lanu violeta, filo lanu kula mo laugatu lino ne mio faka‵lei ana filo, kae e ‵tau o ‵sui ki ei a mea fakagali‵gali.+ 7 E ‵tau o faka‵mau a potu laugatu e lua i tuauma kolā e ‵soko fakatasi i ei a feitu e lua o te gatu. 8 A te fusi telā ne ‵laga+ faka‵lei kae ‵sui ki luga i te efota mo ‵sai te efota ke ‵mau i tena tulaga, e ‵tau o fai ki mea foki eiloa konā: te aulo, te filo lanu moana, vulu lanu violeta, filo lanu kula mo laugatu lino ne mio faka‵lei ana filo.

9 “E ‵tau o puke ne koe e lua a fatu ko te onika+ kae ta i luga i ei a igoa o tama tāgata a Isalaelu,+ 10 e ono a igoa i luga i te fatu e tasi kae ko nisi igoa e ono i luga i te suā fatu, e ‵tusa mo te fakasologa o olotou tausaga. 11 A te tino ta igoa e ‵tau o ta ne ia a igoa o tama tāgata a Isalaelu i luga i fatu e lua konei e pelā eiloa mo te auala e ta ei ne ia se fakamailoga.+ Ka oti ko faka‵mau atu ei ki luga i teuteuga aulo. 12 E ‵tau o tuku ne koe a fatu e lua i luga i potu laugatu i tuauma o te efota ke fai pelā me ne fatu fakamanatu mō tino Isalaelu,+ kae e ‵tau o tauave ne Alona olotou igoa i mua o Ieova i luga i potu laugatu i ana tuauma e pelā me se fakamasauaga. 13 E ‵tau o faite ne koe ne teuteuga aulo, 14 mo filifili e lua mai te tinā aulo kolā ne mio e pelā me se uka,+ ko faka‵mau ei ne koe a filifili ne mio ki teuteuga aulo.+

15 “E ‵tau o fakatonu ne koe se tino ke ‵sui fakagaligali ne ia te ufi fatafata mō fakamasinoga.+ E ‵tau o fai e pelā mo te efota, mai te aulo, filo lanu moana, vulu lanu violeta, filo lanu kula mo laugatu lino ne mio faka‵lei ana filo.+ 16 E ‵tau o sikuea māfai e fetulua, e tasi te aga* te loa kae tasi te aga te lauefa. 17 E ‵tau o faka‵mau ne koe ki ei a laina e fa o fatu tāua. A te laina muamua ko te lupi, topasa mo te emela. 18 A te laina i te lua ko te takosi, safaila mo te iasipi. 19 A te laina i te tolu ko te fatu ko te lesema, akate mo te ametisi. 20 A te laina i te fa ko te kuate lanu ‵sega, onika mo te iasepi. E ‵tau o faka‵mau a mea konā ki teuteuga aulo. 21 E ‵tau o ‵pau a fatu mo te aofaki o igoa o tama tāgata e toko 12 a Isalaelu. A fatu takitasi e ‵tau o ta e pelā me se fakamailoga, kae ko igoa takitasi e sui i ei a matakāiga e 12.

22 “E ‵tau o faite ne koe ne filifili i luga i te ufi fatafata, e pelā me ne uka mai te tinā aulo.+ 23 E ‵tau o faite ne koe a ligi aulo e lua mō te ufi fatafata kae faka‵mau atu a ligi e lua konā ki mata e lua o te ufi fatafata. 24 E ‵tau o faulu ne koe a uka aulo e lua ki loto i ligi e lua i mata o te ufi fatafata. 25 Ka faulu ne koe a mata e lua o uka e lua ki loto i teuteuga e lua, ko faka‵mau atu ei ne koe ki potu laugatu i tuauma o te efota, i te feitu ki mua. 26 E ‵tau o faite ne koe a ligi aulo e lua kae faka‵mau atu ki mata e lua o te ufi fatafata i tena feitu ki loto, telā e saga atu ki te efota.+ 27 E ‵tau o faite ne koe a nisi ligi aulo e lua i te feitu ki mua o te efota, mai lalo o potu laugatu e lua i tuauma, kae pili ki te koga e soko i ei, mai luga o te fusi o te efota telā ne ‵laga.+ 28 A te ufi fatafata e ‵tau o taofi ne te uka lanu moana i tena tulaga tonu māfai e ‵sai atu ana ligi ki ligi o te efota. E fai ne te mea tenei ke taofi i ei te ufi fatafata i tena tulaga tonu i luga i te efota, mai luga o te fusi telā ne ‵laga.

29 “E ‵tau mo Alona o tauave a igoa o tama tāgata a Isalaelu i te ufi fatafata mō fakamasinoga mai luga o tena fatu māfai ko ulu atu ki loto i te Potu Tapu e pelā me se fakamasauaga tumau i mua o Ieova. 30 Ka tuku ne koe a te Ulima mo te Tumema*+ ki loto i te ufi fatafata mō fakamasinoga, kae e ‵tau o tuku mai luga i te fatu o Alona māfai ko vau ki mua o Ieova, kae e ‵tau o tauave ne Alona a te mea e fai ki ei a fakamasinoga o tino Isalaelu i luga i tena fatu i mua o Ieova i taimi katoa.

31 “E ‵tau o ‵sui ne koe te gatu ‵loa e seai ne lima o te efota ki te filo lanu moana.+ 32 Ka isi se pūga i te kogaloto o te koga mai luga.* E ‵tau o ‵laga fakatamilo a te pūga o te gatu ne se tino ‵laga laugatu. E ‵tau o fai ke pelā mo te ua o se gatu tau fiti ko te mea ke se mafai o masae. 33 E tau ‵sui fakatamilo ne koe a pomekalanite* kolā e faite ki filo lanu moana, vulu lanu violeta, filo lanu kula i te kapakapa ki lalo o te gatu kae ke fakavasavasa ki pēle aulo. 34 E ‵tau o fakavasavasa ne koe a te pēle aulo mo te pomekalanite, se pēle aulo mo se pomekalanite, e fakatamilo katoa i te kapakapa ki lalo o te gatu ‵loa e seai ne lima. 35 E ‵tau o pei ki ei a Alona ko te mea ke mafai o fai tena taviniga, kae e ‵tau o lagona atu a te tagi‵tagi o pēle māfai ko ulu a ia ki loto i te faletapu i mua o Ieova, kae penā foki māfai ko foki mai a ia ki tua, ko te mea ke se mate a ia.+

36 “E ‵tau o faite ne koe se mea malipolipo ki te tinā aulo kae ke ta i luga i ei a pati konei, ‘A Ieova e ‵malu,’+ e pelā eiloa mo te auala e ta sāle i ei se fakamailoga. 37 E ‵tau mo koe o faka‵mau a te mea tenā ki te pulou laugatu+ kae ‵sai ki se filo lanu moana; kae ke fakatu i te feitu ki mua o te pulou laugatu. 38 Ka fakatu a te mea tenā i muālae o Alona, me ka ‵losi atu ki a Alona so se mea ‵se telā e fai ne se tino ki luga i mea tapu+ kolā ko oti ne fakatapu ne tino Isalaelu i te taimi ne ofo ei ne latou e pelā me ne meaalofa tapu. E ‵tau faeloa o fakatu a te mea tenā i muālae o Alona ko te mea ke maua ne latou te taliaga a Ieova.

39 “E ‵tau o ‵laga ne koe te gatu fakatolotolo ki te laugatu lino ‵lei, faite se pulou laugatu ki te laugatu lino ‵lei, kae ‵laga se fusi.+

40 “Ka fai foki ne koe ne gatu, fusi mo pulou mō tama tāgata a Alona,+ ke mata ‵malu kae ke ‵gali.+ 41 Ke fakapei ne koe ki ei a tou taina ko Alona mo ana tama tāgata, kae e ‵tau o faū+ kae faka‵sopo+ ne koe a latou* kae fakatapu latou, kae ka tavini mai latou ki a au e pelā me ne faitaulaga. 42 Ke faite foki ne tivae ‵mutu mai laugatu lino ke ‵funa ki ei olotou koga tapu.+ E ‵tau o vau mai kautega ke oko ki kauaga te ‵loa. 43 E ‵tau o ‵pei ki ei a Alona mo ana tama tāgata māfai ko o‵mai ki loto i te faleie o maopoopoga io me māfai ko olo atu ki te fatafaitaulaga o fai te lotou taviniga i te koga tapu, ko te mea ke seai se lotou mea ‵se e fai ko ‵mate ei latou. Tenā eiloa te tulafono fakavae tumau mō ia mo ana tama* katoa mai i ana tua.