Esoto

34 Tenā ne fai atu ei a Ieova ki a Mose: “Faite ne papa fatu e lua e pelā mo papa fatu muamua,+ kae ka tusi ne au i luga i papa fatu konā a pati kolā ne tusi i papa fatu muamua+ kolā ne ‵pei ne koe ke malipi‵lipi.+ 2 Fakatoka mō te aso taeao, me ka fanatu koe i te tafataeao ki luga i te Mauga o Sinai kae ka tu koe i oku mua i te taulu o te mauga.+ 3 Kae e seai se tino e ‵tau o olo aka mo koe, e seai foki se tino e ‵tau o lavea atu i so se koga i luga i te mauga. E se ‵tau foki o kai‵kai a mamoe io me ko pulumakau i tafa o te mauga tenā.”+

4 Ne faite eiloa ne Mose a papa fatu e lua e pelā mo papa fatu muamua kae alausu i te tafataeao o fanaka ki te Mauga o Sinai, e pelā eiloa mo te fakatonuga a Ieova ki a ia, kae ne puke ne ia a papa fatu e lua i ana lima. 5 Tenā ne fanaifo ei a Ieova+ i te kaumana kae tu atu i ana tafa i konā kae ne folafola atu ne ia te igoa o Ieova.+ 6 Ne fakasili atu a Ieova i ana mua kae folafola atu: “Ieova, Ieova, te Atua alofa fakamagalo+ kae alofa atafai,*+ e tuai o ita+ kae ‵fonu i te alofa fakamaoni+ mo te munatonu,*+ 7 e fakaasi ne ia te alofa fakamaoni ki te fia afe o tino,+ kae fakamagalo ne ia a mea ‵se mo amioga solitulafono mo agasala,+ e fakasala eiloa ne ia a tino ma‵sei,+ kae fakasala foki ne ia a tama mo mokopuna ona ko mea ‵se ne fai ne olotou tamana, ke oko eiloa ki te tolu o kautama penā foki loa mo te fa o kautama.”+

8 Ne totuli fakavave a Mose ki te laukele kae ifo ki lalo. 9 Tenā ne fai atu ei a ia: “Ieova, kafai e fiafia mai koe ki a au, fakamolemole e Ieova, vau ke olo fakatasi+ tatou e tiga eiloa a matou ne tino loto ma‵keke,+ kae fakamagalo mai omotou mea ‵se mo omotou agasala,+ kae puke atu matou e pelā me ne ou tino tonu.” 10 Kae ne tali atu a ia: “Nei la, ka fai ne au se feagaiga: Ka fai eiloa ne au i mua o ou tino katoa a mea fakaofoofogia kolā e seki fai aka eiloa ne au i te lalolagi kātoa io me ko atufenua katoa,+ kae ka lavea ne tino katoa kolā e ‵nofo fakatasi koutou a galuega a Ieova, me i te mea tenei ka fai ne au ki a koutou se mea fakaofoofogia eiloa.+

11 “Saga tonu mai ki fakatonuga kolā ka fai atu ne au i te aso nei.+ Ka afuli ne au kea‵tea mai i ou mua a tino Amoli, tino Kanana, tino Heti, tino Pelise, tino Hivi mo tino Iepuse.+ 12 Fakaeteete ke mo a ma fai ne koe se feagaiga mo tino konā e ‵nofo i te fenua telā ka olo koutou ki ei,+ i te mea ma fai te mea tenā e pelā me se malei ki a koutou.+ 13 E ‵tau o lepe ne koutou olotou fatafaitaulaga, tuki olotou pou fatu tapu ki lalo,* kae ‵kati ki lalo olotou pou lakau tapu.+ 14 E se ‵tau mo koe o ifo ki se isi atua,+ me e lauiloa a Ieova ona* ko tena manako ke tapuaki atu fua ki a ia tokotasi.* Ao, a ia se Atua telā e manako ke tapuaki atu fua ki a ia tokotasi.+ 15 Fakaeteete ke mo a ma fai ne koe se feagaiga mo tino konā e ‵nofo i te fenua, me kafai e fai ne latou a faifaiga talitāgata ki olotou atua kae ofo atu olotou taulaga ki a latou,+ ka ‵kami koe ne se tino i a latou kae ka kai eiloa koe ki tena taulaga.+ 16 Tenā ko puke ei ne koe olotou tama fāfine ke a‵vaga mo au tama tāgata,+ kae ko olotou tama fāfine ka fai ne latou a faifaiga talitāgata ki olotou atua kae ka fai foki ne latou au tama tāgata ke fai a faifaiga talitāgata ki olotou atua.+

17 “E se ‵tau mo koe o faite ne atua fiti.+

18 “E ‵tau o fakamanatu ne koe te ‵Kaiga Fiafia o Falaoa sē Faka‵fete.+ Ka kai koe ki falaoa sē faka‵fete e pelā eiloa mo taku fakatonuga ki a koe; fai a te mea tenei i aso e fitu i te taimi tonu i te masina o Apipa,*+ me ko te masina o Apipa ne vau ei koe ki tua mo Aikupito.

19 “So se toekimua tagata e fanau mai i a aku,+ e aofia i ei otou lafu manu katoa, faitalia me se pulumakau tagata io me se mamoe.+ 20 A te tama muamua a se asini e ‵tau o sui ne koe ki se mamoe. Kae kafai e se sui ne koe ko ‵fati ei ne koe tena ua. E ‵tau o sui ne koe a toekimua katoa a au tama tāgata.+ E seai se tino e vau ki oku mua e aunoa mo ne mea i ana lima.

21 “E ono aso e mafai o galue koe i ei, kae i te fitu o aso ka malōlō*+ koe i ei. Faitalia me ko te taimi e ‵toki i ei a fuataga io me ko te taimi e tau ei, ka malōlō eiloa koe.

22 “Kae ka fakamanatu ne koe a te ‵Kaiga Fiafia o Vaiaso ki fuataga ma‵tua muamua o saito; e penā foki mo te ‵Kaiga Fiafia o te Fakamaopoopomaiga o Fuataga* i te fakaotiga o te tausaga.+

23 “E tolu taimi i te tausaga e ‵tau ei o ‵tu atu otou tāgata katoa i mua o te Aliki tonu ko Ieova, te Atua o Isalaelu.+ 24 Me ka afuli kea‵tea ne au a nisi atufenua mai i a koe,+ kae ka fakalasi atu ne au tou laukele, kae ka seai se tino e manako ki tou laukele i te taimi e fanaka ei koe ki mua o Ieova tou Atua fakatolu taimi i te tausaga.

25 “E se ‵tau mo koe o ofo atu te toto o taku taulaga fakatasi mo so se mea faka‵fete.+ A te taulaga o te ‵kaiga fiafia o te Paseka e se ‵tau o tuku i te po kātoa ke oko ki te tafataeao.+

26 “E ‵tau o aumai ne koe a te ‵toe fuataga ‵lei o fuataga ma‵tua muamua mai tou laukele ki te fale o Ieova tou Atua.+

“E se ‵tau mo koe o saka se tamā kouti ki vai ū o tena mātua.”+

27 Ne toe fai atu a Ieova ki a Mose: “E ‵tau o tusi ne koe ki lalo a pati konei,+ me e ‵tusa mo pati konei ko fai ei ne au se feagaiga mo koe e pelā foki mo Isalaelu.”+ 28 Kae ne ‵nofo eiloa a lāua mo Ieova i konā i ao e 40 mo po e 40. E seki kai a ia ki ne falaoa io me inu ki vai.+ Kae ne tusi eiloa ne Ia* ki luga i papa fatu a pati o te feagaiga, ko Tulafono e Sefulu.+

29 Tenā ne fanaifo ei a Mose mai te Mauga o Sinai mo papa fatu e lua o te Feagaiga i ana lima.+ I tena fanaifoga mai te mauga, e se iloa ne Mose me ne sulu atu te mainaga i ana mata ona ko ia ne fai‵pati mo te Atua. 30 I te laveaga ne Alona mo tino Isalaelu katoa a Mose, ne lavea ne latou me ne sulu mai te mainaga i ana mata kae ne ma‵taku latou ma fakapili‵pili atu ki a ia.+

31 Kae ne kalaga atu a Mose ki a latou, olo atu ei a Alona mo takitaki katoa o te fakapotopotoga ki a ia kae ne fai‵pati latou mo Mose. 32 Oti aka, olo atu ei a tino Isalaelu katoa ki ana tafa, kae tuku atu ne ia ki a latou a fakatonuga katoa kolā ne tuku atu ne Ieova ki a ia i luga i te Mauga o Sinai.+ 33 Kafai ko oti ne faipati atu a Mose ki a latou ko ‵pono ei ana mata ki te veli.+ 34 Kae kafai ko fanatu a Mose ki loto o faipati ki a Ieova, e tapale kea‵tea ne ia te veli ke oko ki te taimi ko foki ei a ia ki tua.+ Tenā ko fano ei a ia ki tua o fakaasi atu ki tino Isalaelu a fakatonuga kolā ne tuku atu ki a ia.+ 35 Kae ne lavea ne tino Isalaelu a te mainaga e sulu mai i mata o Mose; tenā ko toe pulou ei ne Mose ana mata ki te veli ke oko ki te taimi e toe ulu ei a ia ki loto o fai‵pati mo te Atua.*+