Levitiko

20 Ne faipati atu a Ieova ki a Mose, ana muna: 2 “E ‵tau o fai atu koe ki tino Isalaelu, ‘So se tino Isalaelu mo so se tino fakaa‵tea e nofo i Isalaelu telā e tuku atu sena tama ki a Moleka e ‵tau eiloa o tamate.+ E ‵tau o peipei a ia ne tino o te fenua ki fatu ke mate. 3 Ko au eiloa ka saga atu ki te tagata tenā, kae ka tapale kea‵tea* ne au a ia mai i ana tino, me ko oti ne tuku atu ne ia ana nisi tama ki a Moleka kae fakalailai ne ia te koga ne fakatapu+ ne au kae fakamasei toku igoa tapu. 4 Kafai e ma‵nako tonu a tino o te fenua o faka‵kivi olotou mata ki mea e fai ne te tagata tenā i te tukuatuga o tena tama ki a Moleka kae e se tamate ne latou a ia,+ 5 tenā ko saga atu ei au ki te tagata tenā mo tena kāiga.+ Ka tapale kea‵tea* ne au a te tagata tenā mai i ana tino fakatasi mo tino kolā e ‵kau atu ki a ia i te faiga o faifaiga sē fakamaoni* mo Moleka.

6 “‘E pelā mo te tino telā e ‵fuli atu ki tino e fesokotaki ki agaga+ mo tino fakamatala mea ‵tupu+ i aso mai mua ko te mea ke fai ne latou a faifaiga talitāgata i te feitu faka-te-agaga mo latou, ka saga atu eiloa au ki te tino tenā kae tapale kea‵tea* mai i ana tino.+

7 “‘E ‵tau mo koutou o faka‵malu a koutou eiloa ko te mea ke tapu+ koutou, me i a au ko Ieova te otou Atua. 8 Kae e ‵tau mo koutou o tausi aku tulafono fakavae kae faka‵logo ki ei.+ Au ko Ieova telā e faka‵malu ne au koutou.+

9 “‘Kafai e isi se tagata telā e fakamalaia* ne ia tena tamana io me ko tena mātua, e ‵tau eiloa o tamate.+ Ona ko te fakamalaiaga ne ia o tena tamana io me ko tena mātua, ka i luga eiloa i a ia ana toto.

10 “‘Kae e pelā mo se tagata telā ne mulilua mo te avaga a te suā tagata: A te tino telā ne mulilua mo te avaga a tena tuakoi, e ‵tau eiloa o tamate, te tagata mulilua mo te fafine mulilua.+ 11 A te tagata telā e ‵moe mo te avaga a tena tamana ko fakamasiasi+ ne ia tena tamana. E ‵tau eiloa o tamate a lāua tokolua. Ka i luga eiloa i a lāua a lā toto. 12 Kafai e ‵moe se tagata mo te avaga a tena tama tagata, e ‵tau eiloa o tamate a lāua tokolua. Ko oti ne fakaseaoga ne lāua a faifaiga masani. Ka i luga eiloa i a lāua a lā toto.+

13 “‘Kafai e ‵moe se tagata mo se isi tagata e pelā loa mo se tagata māfai e ‵moe mo se fafine, ko fai ne lāua tokolua se mea fakatakalialia.+ E ‵tau eiloa o tamate lāua. Ka i luga eiloa i a lāua a lā toto.

14 “‘Kafai e avaga se tagata mo se fafine kae ‵moe foki mo te mātua o te fafine tenā, a te mea tenā se amioga fakatakalialia.+ E ‵tau o ‵sunu ne latou a tou tagata mo lāua konā ki te afi,+ ko te mea ke se ‵pisi atu te amioga fakatakalialia tenā ki a koutou.

15 “‘Kafai e ‵moe se tagata mo se manu, e ‵tau eiloa o tamate a ia, kae e ‵tau foki o tamate ne koutou a te manu tenā.+ 16 Kafai e fanatu se fafine ke ‵moe fakatasi lāua mo se manu,+ e ‵tau mo koe o tamate te fafine mo te manu tenā. E ‵tau eiloa o tamate a lāua. Ka i luga eiloa i a lāua a lā toto.

17 “‘Kafai e ‵moe fakatauavaga se tagata mo tena tuagane, te tama fafine a tena tamana io me ko te tama fafine a tena mātua, kae lavea ne te suā tino a te nofo fuafua o te suā tino, se mea fakamasiasi a te mea tenā.+ E ‵tau o tapale kea‵tea* lāua mai i mua o tino katoa. Ko oti ne fakamasiasi ne ia tena tuagane. E ‵tau eiloa o fakasala a ia ona ko tena mea ‵se.

18 “‘Kafai e ‵moe fakatauavaga se tagata mo se fafine telā e masaki fakafafine, ko fakaasi atu ne lāua me e se fakatāua ne lāua a te toto.+ E ‵tau eiloa o tapale kea‵tea* a lāua mai i olotou tino.

19 “‘E se ‵tau mo koe o ‵moe fakatauavaga mo te taina o tou mātua io me ko te tuagane o tou tamana, me ka fakamasiasi ne koe tou kāiga i te toto.+ E ‵tau eiloa o fakasala lāua ona ko te lā mea ‵se. 20 A te tagata telā e ‵moe fakatasi mo te avaga a tena fakatamana ko fakamasiasi ne ia a tena fakatamana.+ E ‵tau o fakasala lāua ona ko te lā agasala. E ‵tau o ‵mate lāua e aunoa mo se tamaliki. 21 Kafai e puke ne se tagata te avaga a tena taina, a te mea tenā se mea fakatakalialia.+ Ko fakamasiasi ne ia a tena taina. E se ‵tau o isi se lā tamaliki.

22 “‘E ‵tau mo koutou o tausi aku tulafono fakavae katoa mo ikuga o aku fakamasinoga+ katoa kae faka‵logo ki ei,+ ko te mea ke se luaki koutou ki tua ne te fenua telā ka aumai ne au koutou ki ei.+ 23 E se ‵tau mo koutou o tau‵tali i tulafono fakavae a fenua fakaa‵tea kolā ka afuli kea‵tea ne au i mua o koutou;+ me ko oti ne fai ne latou a mea katoa konā kae takalialia au ki ei.+ 24 Tenā te pogai ne fai atu ei au ki a koutou: “Ka puke ma koutou a te lotou fenua, kae ka tuku atu ne au ki a koutou mo fai te otou fenua, se fenua telā e ‵tafe i ei a susu mo hani.+ Au ko Ieova te otou Atua, telā ne ‵vae kea‵tea ne au koutou mai i tino katoa.”+ 25 E ‵tau o iloa ne koutou te ‵kese o te manu ‵ma mo te manu sē ‵ma, te manu eva sē ‵ma mo te manu eva ‵ma;+ e se ‵tau mo koutou o fai ke takalia‵lia a tino ki a koutou ona ko manu io me ko manu eva io me ko so se manu telā e ‵tolo i te laukele kolā ko oti ne ‵vae kea‵tea ne au e pelā me ne mea sē ‵ma ki a koutou.+ 26 E ‵tau mo koutou o tapu i oku mua, me i a au, Ieova, e tapu;+ kae ko ‵vae kea‵tea ne au koutou mai tino katoa ke fai koutou mo oku tino.+

27 “‘So se tagata io me se fafine telā e fai pelā me se tino e fesokotaki ki agaga io me se tino e fakamatala mea ‵tupu i aso mai mua* e ‵tau eiloa o tamate.+ E ‵tau o peipei latou ne tino ki fatu ke ‵mate. Ko i luga eiloa i a latou olotou toto.’”