Se Fakaasiga ki a Ioane
18 Mai tua o te mea tenei ne matea ne au a te suā agelu e fanaifo mai te lagi mo te pulega lasi, kae ne maina te lalolagi kātoa i tena ‵malu. 2 Kae ne kalaga mai a ia i se leo lasi, ana muna: “Ko pakū tou fafine! Ko pakū a Papelonia te Sili,+ kae ko fai a ia mo koga e ‵nofo i ei a temoni mo te koga e ‵nofo i ei a agaga* sē ‵ma katoa mo manu eva sē ‵ma katoa kolā e fakatakalia‵lia!+ 3 Ona ko te uaina o tena fina ki amioga fakatauavaga sē ‵tau* ne pa‵kia i ei a atufenua katoa,+ kae ko tupu o te lalolagi ne aofia i amioga fakatauavaga sē ‵tau fakatasi mo tou fafine,+ kae ko tino faipisinisi* o te lalolagi ne mau‵mea ona ko te malosi o tena olaga maumea e aunoa mo te masiasi.”
4 Kae ne lagona ne au te suā leo mai te lagi e fai mai: “‵Tele kea‵tea mai i a ia, e oku tino,+ māfai e se fia ‵kau koutou ki ana agasala, kae māfai e se fia maua ne koutou se vaega o ana mala.+ 5 Me ko fua‵tu ki luga i te lagi ana agasala,+ kae ko masaua ne te Atua ana faifaiga sē ‵tonu.*+ 6 Toe taui atu ki a ia i te auala eiloa telā ne fai ne ia ki nisi tino,+ ao, taui fakalua atu ki a ia a mea kolā ko oti ne fai ne ia;+ i te ipu+ telā ko oti ne palu ne ia, palu fakalua atu sena vaega i ei.+ 7 E pelā mo te lasi o te faka‵maluga ne tou fafine a ia eiloa kae ola i se olaga maumea e aunoa mo se mā, ke penā foki eiloa te lasi o te puapuaga mo te fanoanoa e tuku atu ki a ia. Me e fai aka faeloa a ia i tena loto, ‘Au e sagasaga e pelā me se tupu fafine, kae ko au e sē se fafine telā ko mate tena avaga, ka se mafai o matea ne au te fanoanoa.’+ 8 Tenā te pogai ka oko atu ei ki a ia ana mala i te aso e tasi, ko te mate mo te tagi fanoanoa mo te oge, kae ka ‵sunu fakapalele atu a ia ki te afi,+ me i a Ieova* te Atua telā ne fakamasino ne ia a tou fafine, e malosi.+
9 “Kae ko tupu o te lalolagi kolā ne aofia i amioga fakatauavaga sē ‵tau* fakatasi mo ia kae ne ola i se olaga maumea e aunoa mo te masiasi ka ‵tagi kae tuki olotou foitino i te fanoa‵noa ona ko tou fafine māfai e ‵kilo atu latou ki te au mai i tena ‵sunuga. 10 Ka ‵tu latou i se koga tai ‵mao ona ko te lotou ma‵taku i ana puapuaga kae fai atu: ‘Fakaalofa, fakaalofa, a koe e te fakai takutakua,+ Papelonia a koe ko te fakai malosi, me ne oko mai tou fakamasinoga i te itula e tasi!’
11 “A tino faipisinisi foki o te lalolagi e ‵tagi kae fanoa‵noa ona ko ia, me ko seai se tino e ‵togi ne ia olotou koloa katoa, 12 ko koloa katoa o aulo, siliva, fatu tāua, penina, laugatu lino ‵lei, laugatu violeta, silika mo laugatu kula; mo mea katoa ne faite mai i lakau ma‵nogi; mo so se vaegā mea ne faite ki nifo o elefane, kae mai i lakau ‵togi ‵mafa, kopa, fiti mo fatu tāua; 13 penā foki mo kinamoni, mea fakama‵nogi meakai mai Initia, mea ma‵nogi, sinu ma‵nogi, pulu lipano, uaina, sinu olive, falaoa ‵mata kae ‵lei, saito, pulumakau, mamoe, solofanua, kā, pologa mo tino ola. 14 Ao, a fuagalakau ‵gali kolā ne manako koe ki ei ko ‵galo atu katoa mai i a koe, kae ko mea mo‵mona mo mea ‵gali katoa ko se maua nei ne koe, kae ka se toe maua eiloa.
15 “A tino faipisinisi kolā ne fakatau atu ne latou a mea konei, kolā ne mau‵mea ona ko tou fafine, ka ‵tu mai i se koga ‵mao ona ko te lotou ma‵taku i ana puapuaga, kae ka ‵tagi kae fanoa‵noa, 16 olotou muna, ‘Fakaalofa, fakaalofa, te fakai takutakua, ne pei ki laugatu lino ‵lei, violeta mo laugatu kula kae ne teu ki mea fakagali‵gali aulo, fatu tāua mo penina,+ 17 me ne fakamaseigina a koloa e uke konā i te itula e tasi!’
“Kae ko kapeni katoa o vakamutu mo pasese katoa kolā e faima‵laga i te tai mo kauvaka mo latou katoa kolā e fakavae olotou olaga ki mea mai te tai, ka ‵tu mai i se koga ‵mao 18 kae ‵tagi paka‵laga māfai e ‵kilo atu latou ki te au mai i tena ‵sunuga, olotou pati, ‘Ko oi te fakai e ‵pau mo te fakai takutakua tenei?’ 19 Ne peipei ne latou a ‵pefu ki luga i olotou ulu, kae ‵tagi kae fanoa‵noa, olotou muna: ‘Fakaalofa, fakaalofa, te fakai takutakua, telā ne mau‵mea i ei a latou kolā e isi ne olotou vakamutu i te moana, me i te itula e tasi ne fakaseai atu ei tou fafine!’+
20 “Ke fiafia te lagi ona ko ia,+ e penā foki loa mo koutou e tino tapu+ mo te kau apositolo mo te kau pelofeta, me ko oti ne fai ne te Atua a tena fakamasinoga ke fakasala a ia ona ko ana mea ne fai ki a koutou!”+
21 Kae ne sau aka ne te agelu malosi a te fatu e pelā me se fatu solo meakai lasi kae ‵pei atu ki te tai, ana muna: “Ka penei eiloa te galo fakavave ki lalo o Papelonia te fakai takutakua, kae ka se toe maua eiloa a ia.+ 22 Kae ko leo o tino usu pese kolā e tā‵tā kitala, tino tā‵tā pese, tino ili faili mo tino ili pu ka se toe lagona atu eiloa i loto i a koe. Kae ka seai se tufuga apo i so se galuega ka toe maua atu i loto i a koe, kae ka se toe lagona atu i loto i a koe te ‵tagi o se fatu solo meakai. 23 Ka seai se mainaga o se moli e toe maina i loto i a koe, kae ka seai se leo o se tagata ka fakaipoipo mo se fafine ka fakaipoipo e toe lagona atu i loto i a koe; me i ou tino faipisinisi ko toe tāgata tāua eiloa i te lalolagi, kae e auala i au faifaiga faivailakau+ ne takitaki‵segina ei a atufenua katoa. 24 Ao, ne maua atu i loto i a ia a toto o te kau pelofeta mo tino tapu+ mo latou katoa kolā ne tamate i te lalolagi.”+