Numela

10 Tenā ne fai atu ei a Ieova ki a Mose: 2 “Faite ne pu fakatagi‵tagi+ e lua ma koe; ke faite a mea konā ki siliva kolā ne tuki, kae ke fakaaoga mo fakamaopoopo mai a te fakapotopotoga mo te taimi ka faima‵laga ei latou. 3 Kafai ko ili te avā pu fakatagi‵tagi konā, e ‵tau mo te fakapotopotoga kātoa o maopoopo mai ki a koe i te mataloa o te faleie o maopoopoga.+ 4 Kafai e tasi fua te pu fakatagitagi e ili, ko takitaki fua o kaukāiga, kolā ko ulu o taki tokoafe o tino Isalaelu e ‵tau o maopoopo mai ki a koe.+

5 “Kafai e ili ne koe te pu fakatagitagi i ana tagi kese‵kese, e ‵tau o olo atu muamua a latou kolā e ‵nofo i te feitu ki saegala.+ 6 Kafai e ili ne koe te pu fakatagitagi i ana tagi kese‵kese i te lua o taimi, ko latou kolā e ‵nofo i te feitu ki saute+ ko ‵tau o olo. Tenei te auala e ‵tau o fakatagi ne latou a te pu fakatagitagi i taimi katoa e olo ei a potukau takitasi.

7 “Kafai ko fakamaopoopo mai a te fakapotopotoga kātoa, e ‵tau o ili ne koe a pu fakatagi‵tagi,+ kae ke mo a ma ili i ana tagi kese‵kese. 8 A tama tāgata a Alona, ko faitaulaga, e ‵tau o ili ne latou a pu fakatagi‵tagi,+ kae ko te auala e ili ei ka fai pelā me se tulafono fakavae tumau mō koutou i otou kautama katoa.

9 “Kafai e ‵tau o olo atu koutou o taua ki se fili telā e taua mai ki a koutou i te otou laukele, e ‵tau o fakatagi ne koutou te tagi o te taua ki pu fakatagi‵tagi konā,+ kae ka masaua koutou ne Ieova te otou Atua kae ka faka‵sao ne ia koutou mai otou fili.

10 “I aso fia‵fia foki o koutou+​—i otou ‵kaiga fia‵fia+ mo kamataga o masina​—e ‵tau o ili ne koutou a pu fakatagi‵tagi i luga i otou taulaga ‵sunu+ mo otou taulaga ‵kai fakatasi;+ ka fai a mea konā e pelā me se fakamasauaga o koutou i mua o te otou Atua. Au ko Ieova te otou Atua.”+

11 Nei la, i te lua o tausaga, i te lua o masina, i te po 20 o te masina,+ ne masagi aka ei te kaumana mai te faleie tapu+ o te Feagaiga. 12 Ne kamata o tiaki ne tino Isalaelu a te koga lavaki o Sinai i te fakasologa telā ko oti ne fakatoka mō te lotou malaga,+ kae ko te kaumana ne tu i luga i te koga lavaki o Palana.+ 13 Tenei te taimi muamua ke faima‵laga atu latou mai tua o te fakatonuga a Ieova e auala i a Mose.+

14 A matakāiga e tolu i te koga telā e ‵nofo ei a tino Iuta ne olo muamua, kae ko Nasona+ te tama tagata a Aminatapu ko te takitaki o latou. 15 A te takitaki o te matakāiga o tino Isakala ko Netanelu+ te tama tagata a Siualo. 16 A te takitaki o te matakāiga o tino Sepulona ko Eliapo+ te tama tagata a Helona.

17 I te otiga ne tuku ifo ki lalo te faleie tapu,+ olo ei a tino Kelesona+ mo tino Melali+ kolā ne amo ne latou te faleie tapu.

18 Ne ‵tao atu ki ei ko matakāiga e tolu i te koga telā e ‵nofo ei a tino Leupena e ‵tusa mo olotou potukau,* kae ko Elisula+ te tama tagata a Setulo ko te takitaki o latou. 19 A te takitaki o te matakāiga o tino Simeona ko Selumielu+ te tama tagata a Sulisatai. 20 A te takitaki o te matakāiga o tino Kato ko Eliasafo+ te tama tagata a Teuelu.

21 Tenā olo ei a tino Koate, kolā ne amo ne latou a mea katoa o te koga tapuaki.+ A te faleie tapu e ‵tau o oti ne fakatu i te taimi e oko atu ei a latou konei.

22 Ne ‵tao atu ki ei ko matakāiga e tolu i te koga telā e ‵nofo ei a tino Efalaima e ‵tusa mo olotou potukau,* kae ko Elisama+ te tama tagata a Amiuta ko te takitaki o latou. 23 A te takitaki o te matakāiga o tino Manase ko Kamalielu+ te tama tagata a Petasula. 24 A te takitaki o te matakāiga o tino Peniamina ko Apitano+ te tama tagata a Kiteone.

25 Ne ‵tao atu ki ei ko matakāiga e tolu i te koga telā e ‵nofo ei a tino Tanu e ‵tusa mo olotou potukau,* kae fai pelā me ne leoleo tafa ki tua mō tino katoa, kae ko Aiesa+ te tama tagata a Amisatai ko te takitaki o latou. 26 A te takitaki o te matakāiga o tino Asela ko Pagielu+ te tama tagata a Okilani. 27 A te takitaki o te matakāiga o tino Nafatali ko Aila+ te tama tagata a Enanu. 28 Tenei eiloa te fakasologa ne olo ei a tino Isalaelu mo olotou potukau māfai ko faima‵laga latou.+

29 Tenā ne fai atu ei a Mose ki a Hopapu te tama tagata a Leuelu*+ te tino Mitiana, ko te tamana o te avaga a Mose: “A matou ka olo ki te koga ne fai mai ei a Ieova ki a matou, ‘Ka tuku atu ne au te koga tenā mō koutou.’+ ‵Tou olo,+ kae ka fai faka‵lei ne matou a koe, me ko oti ne folafola mai a Ieova me ka maua ne tino Isalaelu a mea ‵lei.”+ 30 Kae ne fai atu a ia ki tou tagata: “Au e se fano. Au ka foki ki toku fenua mo oku kāiga.” 31 Kae ne toe fai atu a Mose: “Fakamolemole, sa tiaki ne koe matou me e iloa ne koe te koga e ‵tau o ‵nofo matou i ei i te koga lavaki, kae e mafai o takitaki ne koe matou. 32 Kae kafai e vau koe i a matou,+ so se mea ‵lei e fai mai ne Ieova ki a matou ka fai foki ne matou ki a koe.”

33 Ne faima‵laga atu latou mai te mauga o Ieova+ i se malaga e tolu aso te leva, kae ko te pusa+ o te feagaiga a Ieova ne ave i olotou mua i aso e tolu ke ‵sala ki se koga mo olotou malo‵lo.+ 34 Kae ko te kaumana+ o Ieova ne fano faeloa i luga i a latou i te ao i te taimi e faima‵laga ei latou mai te lotou koga ‵nofo.

35 I so se taimi e ave ei te Pusa, e fai atu faeloa a Mose: “Tu mai ki luga, e Ieova,+ kae fakasalalau valevale atu ou fili, kae ke afuli kea‵tea a tino kolā e takalia‵lia atu ki a koe.” 36 Kae kafai ko tuku ki lalo, e fai atu a ia: “Foki mai, e Ieova, ki te fia afe o tino Isalaelu i konei.”+