Levitiko

4 Ne toe fai atu a Ieova ki a Mose: 2 “Fai atu ki tino Isalaelu, ‘Kafai e fai ne se tino se agasala e aunoa mo te iloa,+ kae fai ne ia se mea telā ne fakatonu atu a Ieova ke se fai:

3 “‘Kafai ko agasala+ a te faitaulaga telā ne fakaekegina,+ kae fai ei ke agasala a tino katoa, ko ‵tau ei o ofo atu ne ia se tamā pulumakau tagata ‵lei ki a Ieova e pelā me se taulaga mō agasala ona ko te agasala telā ne fai ne ia.+ 4 Ka aumai ne ia a te pulumakau tagata ki tafa o te mataloa o te faleie o maopoopoga+ i mua o Ieova, kae tuku atu tena lima ki luga i te ulu o te pulumakau, kae e ‵tau o tamate ne ia te pulumakau tagata i mua o Ieova.+ 5 Tenā ko puke ei ne te faitaulaga telā ne fakaekegina+ ne mu toto o te pulumakau tagata kae aumai ki loto i te faleie o maopoopoga; 6 ko ufi ei ne te faitaulaga a tena matikao ki loto i toto+ kae fakamotimoti atu ne mu toto fakafitu taimi+ i mua o Ieova mai mua o te ‵pui laugatu o te koga tapu. 7 Ka nani foki ne te faitaulaga ne mu toto ki luga i suki o te fatafaitaulaga o mea ma‵nogi,+ i mua o Ieova i loto i te faleie o maopoopoga; kae ka ‵ligi ne ia te ‵toega o toto o te pulumakau tagata ki lalo o te fatafaitaulaga o taulaga ‵sunu,+ i mua o te mataloa o te faleie o maopoopoga.

8 “‘Tenā ko tapale ei ne ia kea‵tea a gako katoa o te pulumakau tagata o te taulaga mō agasala, e aofia i ei ko gako kolā e ufi i luga i gakau mo gako i tafatafa o gakau, 9 mo nonu e lua mo gako i luga i ei i tafa o kautega. Kae ka tapale kea‵tea ne ia a gako o te ate fakatasi mo nonu.+ 10 Ka ‵pau eiloa mo mea kolā ne tapale kea‵tea mai te pulumakau tagata o te taulaga ‵kai fakatasi.+ Kae ka ‵sunu ne te faitaulaga ko te mea ke au i luga i te fatafaitaulaga o taulaga ‵sunu.

11 “‘Kae e pelā mo te pa‵kili o te pulumakau tagata mo ana ‵kano katoa fakatasi mo tena ulu, ana vae, ana gakau, mo ana fekau+​— 12 ko te pulumakau tagata kātoa​—e ‵tau o ave ne ia ki tua o te fakai, ki se koga ‵ma ke ‵ligi ki ei a lefu,* kae ka ‵sunu ne ia i luga i fafie i te afi.+ E ‵tau o ‵sunu i te koga telā e ‵ligi ki ei a lefu.

13 “‘Kafai ko ‵se a te fakapotopotoga kātoa o Isalaelu ona ko te agasala ne fai ne latou e aunoa mo te iloa,+ kae e se iloa ne te fakapotopotoga me ne fai ne latou se mea telā ne fakatonu atu a Ieova ke se fai ne latou,+ 14 kae ko iloa fakamuli aka te agasala tenā, e ‵tau o ofo atu ne te fakapotopotoga se tamā pulumakau tagata e pelā me se taulaga mō agasala kae aumai ki mua o te faleie o maopoopoga. 15 Ka tuku atu ne toeaina o te fakapotopotoga olotou lima ki luga i te ulu o te pulumakau tagata i mua o Ieova, kae ka tamate a te pulumakau tagata tenā i mua o Ieova.

16 “‘Tenā ko aumai ei ne te faitaulaga telā ne fakaekegina, ne mu toto o te pulumakau tagata ki loto i te faleie o maopoopoga. 17 E ‵tau o ufi ne te faitaulaga tena matikao ki loto i toto konā kae fakamotimoti atu ne mu toto fakafitu taimi i mua o Ieova mai mua o te ‵pui laugatu.+ 18 Ko nani ei ne ia ne mu toto ki luga i suki o te fatafaitaulaga+ i mua o Ieova, i loto i te faleie o maopoopoga; kae ka ‵ligi ne ia te ‵toega o toto ki lalo o te fatafaitaulaga o taulaga ‵sunu, i mua o te mataloa o te faleie o maopoopoga.+ 19 Ka tapale kea‵tea ne ia ana gako katoa kae ‵sunu ko te mea ke au i luga i te fatafaitaulaga.+ 20 E ‵tau o fai ne ia ki te pulumakau tagata tenā a te mea ne fai ne ia ki te suā pulumakau tagata o te taulaga mō agasala. Tenā te mea e ‵tau o fai ne ia, kae ka fai ne te faitaulaga se faka‵māga mō latou,+ ko fakamagalo ei latou. 21 Ko fai ei ne ia ke ave te pulumakau tagata ki tua o te fakai kae ‵sunu atu i ei, e pelā loa mo te ‵sunuga ne ia o te pulumakau tagata+ muamua. A te mea tenā se taulaga mō agasala a te fakapotopotoga.+

22 “‘Kafai e agasala se takitaki+ e aunoa mo te iloa mai te faiga o se mea e tasi mai mea katoa kolā ne fakatonu atu a Ieova tena Atua ke se fai, kae ko ‵se ei a ia, 23 io me ko iloa fakamuli aka ne ia te agasala telā ko oti ne fai ne ia kae ‵teke atu ki te fakatonuga tenā, e ‵tau o aumai ne ia se tamā kouti tagata ‵lei mo fai tena taulaga. 24 Ka tuku atu ne ia tena lima ki luga i te ulu o te tamā kouti kae tamate i te koga telā e tamate i ei te manu o te taulaga ‵sunu i mua o Ieova.+ A te mea tenā se taulaga mō agasala. 25 Ka puke ne te faitaulaga ne mu toto o te taulaga mō agasala ki tena matikao kae nani ki luga i suki+ o te fatafaitaulaga o taulaga ‵sunu, kae ka ‵ligi ne ia te ‵toega o toto konā ki lalo o te fatafaitaulaga o taulaga ‵sunu.+ 26 Ka ‵sunu ne ia a gako katoa ko te mea ke au i luga i te fatafaitaulaga e pelā mo gako o te taulaga ‵kai fakatasi;+ ko fai ei ne te faitaulaga se faka‵māga mō ia ona ko ana agasala, ko fakamagalo ei a ia.

27 “‘Kafai e agasala se tokotasi o tino o te fenua e aunoa mo te iloa, kae ko ‵se a ia me ne fai ne ia se mea e tasi telā ne fakatonu atu ne Ieova ke se fai,+ 28 io me ko iloa aka ne ia te agasala ne fai ne ia, e ‵tau o aumai ne ia se tamā kouti fafine ‵lei mo fai tena taulaga, ona ko te agasala ne fai ne ia. 29 Ka tuku atu tena lima ki luga i te ulu o te taulaga mō agasala kae tamate a te manu o te taulaga mō agasala tenā i te koga e tamate ei te manu o te taulaga ‵sunu.+ 30 Ka puke ne te faitaulaga ne mu toto ki tena matikao kae nani ki luga i suki o te fatafaitaulaga o taulaga ‵sunu, ko ‵ligi ei ne ia te ‵toega o toto ki lalo o te fatafaitaulaga.+ 31 Ka tapale kea‵tea ne ia ana gako katoa,+ e pelā eiloa mo gako o te taulaga ‵kai fakatasi kolā ne tapale kea‵tea,+ kae ka ‵sunu ne te faitaulaga a mea konā ko te mea ke au i luga i te fatafaitaulaga e pelā me se taulaga manogi gali ki a Ieova; ko fai ei ne te faitaulaga se faka‵māga mō ia, ko fakamagalo ei a ia.

32 “‘Kae kafai e ofo atu ne ia se tamā mamoe mo fai tena taulaga mō agasala, e ‵tau o aumai ne ia se mamoe fafine ‵lei. 33 Ka tuku atu tena lima ki luga i te ulu o te taulaga mō agasala kae tamate mo fai te taulaga mō agasala i te koga e tamate+ i ei te manu o te taulaga ‵sunu. 34 Ka puke ne te faitaulaga ne mu toto o te taulaga mō agasala ki tena matikao kae nani ki luga i suki o te fatafaitaulaga o taulaga ‵sunu,+ ko ‵ligi ei ne ia te ‵toega o toto konā ki lalo o te fatafaitaulaga. 35 Ka tapale kea‵tea ne ia ana gako katoa, e pelā eiloa mo gako o te tamā mamoe o te taulaga ‵kai fakatasi kolā ne tapale kea‵tea, ko ‵sunu ei ne te faitaulaga a mea konā ko te mea ke au i luga i te fatafaitaulaga mai luga o te taulaga a Ieova telā e ofo atu i luga i te afi;+ kae ka fai ne te faitaulaga se faka‵māga mō ia ona ko te agasala telā ne fai ne ia, ko fakamagalo ei a ia.+